Kargil Vijay Diwas 2025: ಕಾರ್ಗಿಲ್ ಯುದ್ಧ.. ಇತಿಹಾಸ ಬದಲಿಸಿದ 12 ದಿನಗಳು! ಯಾವಾಗ, ಏನಾಯಿತು?

ಇತಿಹಾಸ ಮರೆಯಬೇಡಿ! ಕಾರ್ಗಿಲ್ ಯುದ್ಧ ನಡೆದು ಇಂದಿಗೆ 26 ವರ್ಷಗಳು ತುಂಬಿವೆ. ಭಾರತೀಯ ಸೈನಿಕರು ಪಾಕ್ ಸೈನಿಕರನ್ನು ಸೋಲಿಸಿ, ವಿಜಯ ಪತಾಕೆ ಹಾರಿಸಿದ ದಿನವಿದು. ಈ ವಿಜಯದ ನೆನಪಿಗಾಗಿ ಪ್ರತಿ ವರ್ಷ ಜುಲೈ 26 ರಂದು ಕಾರ್ಗಿಲ್ ವಿಜಯ್ ದಿವಸ್ (Kargil Vijay Diwas 2025) ಅನ್ನು ಆಚರಿಸಲಾಗುತ್ತದೆ. ಕಾರ್ಗಿಲ್ ಯುದ್ಧದಲ್ಲಿ ಯಾವಾಗ ಏನಾಯ್ತು? ಭಾರತೀಯ ಯೋಧರು ಪಾಕಿಸ್ತಾನದ ಹುಟ್ಟಡಗಿಸಿದ ರೋಚಕ ಕಥೆ ಮತ್ತು ವಿದ್ಯಾರ್ಥಿಗಳು ನೆನಪಿಡಬೇಕಾದ 12 ಪ್ರಮುಖ ದಿನಾಂಕಗಳು ಇಲ್ಲಿವೆ.

ಪ್ರತಿ ವರ್ಷ ಜುಲೈ 26 ರಂದು ಭಾರತವು ಕಾರ್ಗಿಲ್ ವಿಜಯ್ ದಿವಸ್ ಅನ್ನು ಆಚರಿಸುತ್ತದೆ. ಇದು 1999 ರಲ್ಲಿ ಪಾಕಿಸ್ತಾನದ (Pakistan) ವಿರುದ್ಧ ನಡೆದ ಕಾರ್ಗಿಲ್ ಯುದ್ಧದಲ್ಲಿ ಭಾರತೀಯ ಸೇನೆಯು ಗಳಿಸಿದ ಅಪ್ರತಿಮ ವಿಜಯದ ಸ್ಮರಣಾರ್ಥವಾಗಿ ಆಚರಿಸುವ ದಿನ. ಈ ದಿನವು ನಮ್ಮ ದೇಶದ ವೀರ ಯೋಧರ ತ್ಯಾಗ, ಶೌರ್ಯ ಮತ್ತು ದೇಶಭಕ್ತಿಯನ್ನು ನೆನಪಿಸುತ್ತದೆ. ಪಾಕಿಸ್ತಾನಿ ಒಳನುಸುಳುಕೋರರು ಮತ್ತು ಸೈನಿಕರು ಕಾರ್ಗಿಲ್‌ನ ಎತ್ತರದ ಪರ್ವತ ಶಿಖರಗಳನ್ನು ಅಕ್ರಮವಾಗಿ ಆಕ್ರಮಿಸಿಕೊಂಡಾಗ ಪ್ರಾರಂಭವಾದ ಈ ಯುದ್ಧವು ಭಾರತೀಯ ಸೇನೆಯ ದೃಢ ಸಂಕಲ್ಪ ಮತ್ತು ಅಸಾಧಾರಣ ಧೈರ್ಯಕ್ಕೆ ಸಾಕ್ಷಿಯಾಯಿತು.

ಕಾರ್ಗಿಲ್ ಯುದ್ಧ ಯಾವಾಗ ಪ್ರಾರಂಭ?

ಕಾರ್ಗಿಲ್ ಯುದ್ಧವು 1999ರ ಬೇಸಿಗೆಯಲ್ಲಿ ಪ್ರಾರಂಭವಾಯಿತು. ಪಾಕ್ ಸೇನೆಯು ಭಾರತೀಯ ಗಡಿಯೊಳಗೆ ನುಸುಳಿ, ಕಾರ್ಯತಂತ್ರವಾಗಿ ಪ್ರಮುಖವಾದ ಪರ್ವತ ಶಿಖರಗಳನ್ನು ಆಕ್ರಮಿಸಿಕೊಂಡಿತು. ಇದು ಭಾರತಕ್ಕೆ ಅನಿರೀಕ್ಷಿತ ಆಘಾತವಾಗಿತ್ತು. ಏಕೆಂದರೆ, ಚಳಿಗಾಲದಲ್ಲಿ ಎರಡೂ ಕಡೆಯ ಸೈನಿಕರು ತಮ್ಮ ಮುಂಚೂಣಿ ಪೋಸ್ಟ್‌ಗಳನ್ನು ಖಾಲಿ ಮಾಡುವ ಅನೌಪಚಾರಿಕ ಒಪ್ಪಂದವಿತ್ತು. ಇದನ್ನು ದುರುಪಯೋಗಪಡಿಸಿಕೊಂಡ ಪಾಕಿಸ್ತಾನಿ ಸೇನೆಯು, ಬಂಡುಕೋರರ ವೇಷದಲ್ಲಿ ತಮ್ಮ ಸೈನಿಕರನ್ನು ಕಳುಹಿಸಿತು. ಭಾರತದ ಖಾಲಿ ಪೋಸ್ಟ್‌ಗಳನ್ನು ಆಕ್ರಮಿಸಿಕೊಂಡಿತು. ಕಾರ್ಗಿಲ್ ಯುದ್ಧದ ಸಂಪೂರ್ಣ ಕಥೆ ಇಲ್ಲಿದೆ.

ವಿದ್ಯಾರ್ಥಿಗಳು ನೆನಪಿಡಬೇಕಾದ 12 ಪ್ರಮುಖ ದಿನಾಂಕಗಳಿವು

• ಮೇ 3: ಕಾರ್ಗಿಲ್ ಪ್ರದೇಶದಲ್ಲಿ ಕೆಲವು ಅನುಮಾನಾಸ್ಪದ ಚಟುವಟಿಕೆಗಳ ಬಗ್ಗೆ ಸ್ಥಳೀಯ ಕುರಿಗಾಹಿಗಳ ಮೂಲಕ ಭಾರತೀಯ ಸೈನಿಕರಿಗೆ ಮಾಹಿತಿ ದೊರೆಯಿತು.

• ಮೇ 5: ಗಸ್ತು ತಿರುಗುತ್ತಿದ್ದ ಐವರು ಭಾರತೀಯ ಸೈನಿಕರನ್ನು ಪಾಕಿಸ್ತಾನಿ ಪಡೆಗಳು ಸೆರೆಹಿಡಿದು ಹತ್ಯೆಗೈದವು. ಇದು ಯುದ್ಧದ ಮೊದಲ ಪ್ರಮುಖ ಘಟನೆಯಾಗಿತ್ತು. ಇದು ಪರಿಸ್ಥಿತಿಯ ಗಂಭೀರತೆಯನ್ನು ಭಾರತಕ್ಕೆ ಮನವರಿಕೆ ಮಾಡಿಕೊಟ್ಟಿತು.

• ಮೇ 8: ಕಾರ್ಗಿಲ್ ಬೆಟ್ಟದ ಮೇಲೆ ಪಾಕಿಸ್ತಾನಿ ಸೈನಿಕರು ಮತ್ತು ಭಯೋತ್ಪಾದಕರು ಕಾಣಿಸಿಕೊಂಡರು. ಇದು ಭಾರತ ಮತ್ತು ಪಾಕಿಸ್ತಾನದ ನಡುವೆ ಯುದ್ಧಕ್ಕೆ ಕಾರಣವಾಯಿತು. ಭಾರತೀಯ ಸೇನೆಯು 'ಆಪರೇಷನ್ ವಿಜಯ್' ಅನ್ನು ಪ್ರಾರಂಭಿಸಿತು. ಒಳನುಸುಳುಕೋರರನ್ನು ಹೊರಹಾಕುವ ಗುರಿಯನ್ನು ಹೊಂದಿತ್ತು. ಭಾರತೀಯ ವಾಯುಪಡೆಯು 'ಆಪರೇಷನ್ ಸಫೇದ್ ಸಾಗರ್' ಮೂಲಕ ಸೇನೆಗೆ ಬೆಂಬಲ ನೀಡಿತು.

• ಜೂನ್ 13: ಭಾರತೀಯ ಸೇನೆಯು ಡ್ರಾಸ್ ವಲಯದಲ್ಲಿರುವ ತೋಲೋಲಿಂಗ್ ಅನ್ನು ಯಶಸ್ವಿಯಾಗಿ ವಶಪಡಿಸಿಕೊಂಡಿತು. ಇದು ಭಾರತಕ್ಕೆ ಯುದ್ಧದಲ್ಲಿ ದೊರೆತ ಮೊದಲ ಪ್ರಮುಖ ವಿಜಯ. ಇದು ಭಾರತೀಯ ಸೈನಿಕರ ನೈತಿಕ ಸ್ಥೈರ್ಯವನ್ನು ಹೆಚ್ಚಿಸಿತು.

• ಜೂನ್ 29: ಭಾರತೀಯ ಸೇನೆಯು 5060 ಮತ್ತು 5100 ಎಂಬ ಎರಡು ಪ್ರಮುಖ ಪಾಯಿಂಟ್‌ಗಳನ್ನು ನಿಯಂತ್ರಣಕ್ಕೆ ತೆಗೆದುಕೊಂಡಿತು.

• ಜುಲೈ 2: ಕಾರ್ಗಿಲ್‌ನಲ್ಲಿ ಮತ್ತೊಂದು ಪ್ರಬಲ ದಾಳಿ ನಡೆಯಿತು.

• ಜುಲೈ 4: ಭಾರತೀಯ ಸೈನಿಕರು ಪ್ರತಿದಾಳಿ ನಡೆಸಿ, ಅತ್ಯಂತ ಕಾರ್ಯತಂತ್ರದ ಮಹತ್ವವನ್ನು ಹೊಂದಿದ್ದ ಟೈಗರ್ ಹಿಲ್ ಅನ್ನು ವಶಪಡಿಸಿಕೊಂಡರು. ಇದು ಯುದ್ಧದ ನಿರ್ಣಾಯಕ ಹಂತಗಳಲ್ಲಿ ಒಂದಾಗಿತ್ತು.

• ಜುಲೈ 5: ಭಾರತವು ಡ್ರಾಸ್ ವಲಯದಲ್ಲಿ ಸಂಪೂರ್ಣ ವಿಜಯ ಸಾಧಿಸಿತು.

• ಜುಲೈ 7: ಭಾರತೀಯ ಸೇನೆಯು ಜುಬಾರ್ ಪೀಕ್ ಅನ್ನು ವಶಪಡಿಸಿಕೊಂಡಿತು.

• ಜುಲೈ 11: ಭಾರತವು ಬಾಲ್ಟಿಕ್ ಪ್ರದೇಶದಲ್ಲಿನ ಪ್ರಮುಖ ಶಿಖರಗಳನ್ನು ಗೆದ್ದುಕೊಂಡಿತು.

• ಜುಲೈ 14: ಅಂದಿನ ಪ್ರಧಾನಮಂತ್ರಿ ಅಟಲ್ ಬಿಹಾರಿ ವಾಜಪೇಯಿ ಅವರು ಒಳನುಸುಳುಕೋರರ ವಿರುದ್ಧದ 'ಆಪರೇಷನ್ ವಿಜಯ್' ಯಶಸ್ವಿಯಾಗಿದೆ ಎಂದು ಘೋಷಿಸಿದರು.

• ಜುಲೈ 26: ಕಾರ್ಗಿಲ್ ಯುದ್ಧ ಅಧಿಕೃತವಾಗಿ ಅಂತ್ಯಗೊಂಡಿತು. ಭಾರತವು ತನ್ನ ಎಲ್ಲಾ ಆಕ್ರಮಿತ ಪ್ರದೇಶಗಳನ್ನು ಮರಳಿ ಪಡೆದುಕೊಂಡಿತು.

ಭಾರತ 527 ವೀರ ಯೋಧರನ್ನು ಕಳೆದುಕೊಂಡಿತು

ಈ ಯುದ್ಧದಲ್ಲಿ 527 ಭಾರತೀಯ ವೀರ ಯೋಧರು ದೇಶಕ್ಕಾಗಿ ಪ್ರಾಣ ತೆತ್ತರು. 1,363 ಸೈನಿಕರು ಗಾಯಗೊಂಡರು. ಕ್ಯಾಪ್ಟನ್ ವಿಕ್ರಮ್ ಬಾತ್ರಾ, ಕ್ಯಾಪ್ಟನ್ ಮನೋಜ್ ಕುಮಾರ್ ಪಾಂಡೆ, ಗ್ರೇನೆಡಿಯರ್ ಯೋಗೇಂದ್ರ ಸಿಂಗ್ ಯಾದವ್, ರೈಫಲ್‌ಮ್ಯಾನ್ ಸಂಜಯ್ ಕುಮಾರ್ ಅವರಂತಹ ಅನೇಕ ವೀರರು ತಮ್ಮ ಪ್ರಾಣವನ್ನು ಲೆಕ್ಕಿಸದೆ ದೇಶಕ್ಕಾಗಿ ಹೋರಾಡಿದರು. ಅವರಿಗೆ 'ಪರಮ ವೀರ ಚಕ್ರ'ದಂತಹ ಉನ್ನತ ಸೇನಾ ಗೌರವಗಳನ್ನು ನೀಡಿ ಗೌರವಿಸಲಾಯಿತು.

ಒಟ್ಟಾರೆಯಾಗಿ, ಕಾರ್ಗಿಲ್ ವಿಜಯ್ ದಿವಸ್ ಕೇವಲ ಯುದ್ಧದ ವಿಜಯವನ್ನು ಆಚರಿಸುವ ದಿನವಲ್ಲ. ಇದು ನಮ್ಮ ಸೈನಿಕರ ಅಪ್ರತಿಮ ತ್ಯಾಗ ಮತ್ತು ದೇಶಭಕ್ತಿಯನ್ನು ಸ್ಮರಿಸುವ ದಿನ. ಈ ದಿನದಂದು, ನಾವು ನಮ್ಮ ವೀರ ಯೋಧರಿಗೆ ಗೌರವ ಸಲ್ಲಿಸುತ್ತೇವೆ. ಅವರ ಬಲಿದಾನವನ್ನು ಸ್ಮರಿಸುತ್ತೇವೆ. ಇದು ನಮ್ಮ ದೇಶದ ಸಾರ್ವಭೌಮತ್ವ ಮತ್ತು ಸಮಗ್ರತೆಯನ್ನು ಕಾಪಾಡಲು ಸೈನಿಕರು ಪಡುವ ಕಷ್ಟ ಮತ್ತು ಮಾಡುವ ತ್ಯಾಗವನ್ನು ನೆನಪಿಸುತ್ತದೆ.