Diwali Diyas: ಹಳೆಯ ದೀಪಗಳನ್ನು ಮತ್ತೆ ಹಚ್ಚುವುದು ಶುಭವೋ? ಅಶುಭವೋ? ಶಾಸ್ತ್ರ ಏನು ಹೇಳುತ್ತೆ

ದೀಪಾವಳಿ ಹಬ್ಬದಲ್ಲಿ (Deepavali) ಹಳೆಯ ದೀಪಗಳನ್ನು ಮತ್ತೆ ಹಚ್ಚುವುದು ಅಥವಾ ಮರುಬಳಕೆ ಮಾಡುವುದು ಶುಭವೋ ಅಶುಭವೋ ಎಂಬ ಪ್ರಶ್ನೆ ಅನೇಕರಲ್ಲಿ ಮೂಡುತ್ತದೆ. ಧಾರ್ಮಿಕ ಗ್ರಂಥಗಳ ಪ್ರಕಾರ, ದೀಪಗಳನ್ನು ಬೆಳಗಿಸುವುದು ಕೇವಲ ಸಂಪ್ರದಾಯವಲ್ಲ. ಇದು ಸಕಾರಾತ್ಮಕ ಶಕ್ತಿ ಮತ್ತು ಸಮೃದ್ಧಿಯ ಸಂಕೇತ. ಹಳೆಯ ದೀಪಗಳ (Old Diyas) ಬಳಕೆಗೆ ಸಂಬಂಧಿಸಿದಂತೆ ಕೆಲವು ನಿಯಮಗಳಿವೆ. ಅವುಗಳನ್ನು ತಿಳಿದುಕೊಳ್ಳುವುದು ಮುಖ್ಯ. ಈ ಕುರಿತು ಶಾಸ್ತ್ರಗಳು ಏನು ಹೇಳುತ್ತವೆ ಎಂಬುದನ್ನು ಈ ಲೇಖನದಲ್ಲಿ ತಿಳಿಸಲಾಗಿದೆ.

ದೀಪಾವಳಿ ಹಬ್ಬವು (Diwali 2025) ಕೇವಲ ದೀಪಗಳನ್ನು ಬೆಳಗಿಸುವ ಅಥವಾ ಸಿಹಿ ಹಂಚುವ ಹಬ್ಬವಲ್ಲ. ಇದು ಅಂಧಕಾರದ ಮೇಲೆ ಬೆಳಕು, ಅಸತ್ಯದ ಮೇಲೆ ಸತ್ಯ ಮತ್ತು ನಕಾರಾತ್ಮಕತೆಯ ಮೇಲೆ ಸಕಾರಾತ್ಮಕತೆಯ ವಿಜಯದ ಸಂಕೇತ. ಈ ದಿನ ಎಲ್ಲರೂ ತಮ್ಮ ಮನೆಗಳನ್ನು ದೀಪಗಳಿಂದ ಅಲಂಕರಿಸಿ, ಲಕ್ಷ್ಮಿ ಮತ್ತು ಗಣೇಶನನ್ನು ಪೂಜಿಸುವರು. ಸಂತೋಷ, ಸಮೃದ್ಧಿ ಮತ್ತು ಶಾಂತಿಗಾಗಿ ಪ್ರಾರ್ಥಿಸುತ್ತಾರೆ. ಆದರೆ, ಕಳೆದ ವರ್ಷದ ಮಣ್ಣಿನ ದೀಪಗಳನ್ನು (Old Lamps) ಅಥವಾ ಬೇರೆ ಪೂಜೆಗಳಲ್ಲಿ ಬಳಸಿದ ದೀಪಗಳನ್ನು ದೀಪಾವಳಿಯಂದು ಮತ್ತೆ ಬೆಳಗಿಸಬಹುದೇ? ಎಂಬ ಪ್ರಶ್ನೆ ಹಲವರನ್ನು ಕಾಡುತ್ತದೆ.

ಸ್ವಚ್ಛಗೊಳಿಸಿ ಮತ್ತೆ ಬೆಳಗಿಸಬಹುದೇ?

ಪೂಜೆಯಲ್ಲಿ ಶುದ್ಧತೆ ಮತ್ತು ಆಚರಣೆಗಳು ನಿರ್ಣಾಯಕ ಪಾತ್ರ ವಹಿಸುವುದರಿಂದ ಈ ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳುವುದು ಮುಖ್ಯ. ಪೂಜೆಯಲ್ಲಿ ಬಳಸಿದ ಮಣ್ಣಿನ ದೀಪಗಳನ್ನು ಮತ್ತೆ ಬೆಳಗಿಸುವುದು ಅಶುಭವೆಂದು ಪರಿಗಣಿಸಲಾಗುತ್ತದೆ. ಪೂಜೆಯ ಸಮಯದಲ್ಲಿ ದೀಪಗಳು ನಕಾರಾತ್ಮಕ ಶಕ್ತಿಯನ್ನು ಹೀರಿಕೊಳ್ಳುತ್ತವೆ. ಇದರಿಂದ ಅವುಗಳ ಮರುಬಳಕೆಯನ್ನು ಸಾಮಾನ್ಯವಾಗಿ ನಿಷೇಧಿಸಲಾಗಿದೆ. ಆದರೆ, ಅಲಂಕಾರ ಅಥವಾ ಬೆಳಕಿಗಾಗಿ ಬಳಸುವ ದೀಪಗಳನ್ನು, ಪೂಜೆಯಲ್ಲಿ ಬಳಸದಿದ್ದರೆ, ಅವುಗಳನ್ನು ಸ್ವಚ್ಛಗೊಳಿಸಿ ಮತ್ತೆ ಬೆಳಗಿಸಬಹುದು.

ಯಮರಾಜನಿಗೆ ದೀಪ ಹಚ್ಚುವುದು ಶುಭ

ವಿಶೇಷ ಸಂದರ್ಭಗಳಲ್ಲಿ, ಹಳೆಯ ದೀಪಗಳನ್ನು ಯಮ ದೀಪಗಳಾಗಿ ಮರುಬಳಕೆ ಮಾಡಬಹುದು. ಧನತೇರಸ್ ಅಥವಾ ನರಕ ಚತುರ್ದಶಿಯ ರಾತ್ರಿ, ಯಮರಾಜನಿಗೆ ಸಾಸಿವೆ ಎಣ್ಣೆಯಿಂದ ದೀಪ ಹಚ್ಚುವುದು ಶುಭವೆಂದು ಹೇಳಲಾಗುತ್ತದೆ. ಇದು ಕುಟುಂಬವನ್ನು ಅಕಾಲಿಕ ಮರಣದಿಂದ ರಕ್ಷಿಸುತ್ತದೆ. ಧಾರ್ಮಿಕ ಶುದ್ಧತೆಯನ್ನು ಕಾಪಾಡಿಕೊಳ್ಳಲು, ಪೂಜೆಯಲ್ಲಿ ಹೊಸ ದೀಪಗಳನ್ನೇ ಬಳಸಬೇಕು. ಪರಿಸರ ಸ್ನೇಹಿ ದೃಷ್ಟಿಕೋನದಿಂದ, ಪೂಜೆಗೆ ಬಳಸದ ದೀಪಗಳನ್ನು ಮರುಬಳಕೆ ಮಾಡುವುದು ಉತ್ತಮ.

ಲೋಹದ ದೀಪಗಳನ್ನು ಮತ್ತೆ ಬಳಸಬಹುದಾ?

ಲೋಹದ ದೀಪಗಳಿಗೆ (Diya Lighting Rules) ಕೆಲವು ನಿಯಮಗಳಿವೆ. ಹಿತ್ತಾಳೆ, ಬೆಳ್ಳಿ ಅಥವಾ ಇತರ ಲೋಹದಿಂದ ಮಾಡಿದ ದೀಪಗಳನ್ನು ಪೂಜೆಯಲ್ಲಿ ಮತ್ತೆ ಮತ್ತೆ ಬಳಸಬಹುದು. ಆದರೆ, ಪ್ರತಿ ಬಳಕೆಯ ಮೊದಲು ಅವುಗಳನ್ನು ಚೆನ್ನಾಗಿ ತೊಳೆಯಬೇಕು. ಈ ದೀಪಗಳನ್ನು ಮರುಬಳಕೆ ಮಾಡುವುದು ಶುಭ. ಇದು ಪರಿಸರ ಜವಾಬ್ದಾರಿಯನ್ನೂ ತೋರಿಸುತ್ತದೆ. ದೀಪಾವಳಿ ಅಥವಾ ಯಾವುದೇ ಇತರೆ ಪೂಜೆಯ ಸಮಯದಲ್ಲಿ ಮುರಿದ ಅಥವಾ ಹಾನಿಗೊಂಡ ಯಾವುದೇ ರೀತಿಯ ದೀಪವನ್ನು ಬೆಳಗಿಸಬಾರದು.

ಹಳೆಯ ಮಣ್ಣಿನ ದೀಪಗಳನ್ನು ಏನು ಮಾಡಬೇಕು?

ಪೂಜೆಯ ನಂತರ, ಮಣ್ಣಿನ ದೀಪಗಳನ್ನು ಪವಿತ್ರ ನದಿಯಲ್ಲಿ ವಿಸರ್ಜಿಸಬೇಕು. ಅರಳಿ ಅಥವಾ ತುಳಸಿ ಮರದ ಬುಡದಲ್ಲಿ ಇಡಬೇಕು. ಅವುಗಳನ್ನು ವಿಸರ್ಜಿಸಲು ಸಾಧ್ಯವಾಗದಿದ್ದರೆ, ಈ ದೀಪಗಳನ್ನು ಮನೆಯ ಅಲಂಕಾರಕ್ಕಾಗಿ ಅಥವಾ ಕಲಾತ್ಮಕ ಉದ್ದೇಶಗಳಿಗಾಗಿ ಬಳಸಬಹುದು. ಆದರೆ, ಪೂಜೆಗಾಗಿ ಅವುಗಳನ್ನು ಮತ್ತೆ ಬೆಳಗಿಸಬಾರದು.

ದೀಪಗಳನ್ನು ಬೆಳಗಿಸುವ ನಿಯಮಗಳು

• ದೀಪಾವಳಿಯಂದು ದೀಪಗಳನ್ನು ಯಾವಾಗಲೂ ಪೂರ್ವ ಅಥವಾ ಉತ್ತರಕ್ಕೆ ಮುಖ ಮಾಡಿ ಹಚ್ಚಬೇಕು.

• ಮನೆಯ ಮುಖ್ಯ ದ್ವಾರದಲ್ಲಿ ದೀಪ ಹಚ್ಚುವಾಗ, ಅದರ ಜ್ವಾಲೆಯು ಮನೆಯ ಒಳಮುಖವಾಗಿರಬೇಕು.

• ದೀಪಗಳ ಸಂಖ್ಯೆಯನ್ನು 5, 7, 9, 11, 21, 51 ಅಥವಾ 108 ರಂತೆ ಬೆಸ ಸಂಖ್ಯೆಯಲ್ಲಿ ಇಡಬೇಕು. ಬೆಸ ಸಂಖ್ಯೆಗಳನ್ನು ಶುಭವೆಂದು ಪರಿಗಣಿಸಲಾಗುತ್ತದೆ.

• ದೇವಸ್ಥಾನದಲ್ಲಿ ಮೊದಲ ದೀಪವನ್ನು ಬೆಳಗಿಸುವ ಮೂಲಕ ಪೂಜೆಯನ್ನು ಪ್ರಾರಂಭಿಸಬೇಕು.

• ಎಣ್ಣೆ ದೀಪಕ್ಕಿಂತ ತುಪ್ಪದ ದೀಪವನ್ನು ಹೆಚ್ಚು ಮಂಗಳಕರವೆಂದು ಪರಿಗಣಿಸಲಾಗುತ್ತದೆ.

• ಪೂಜೆಯ ಸಮಯದಲ್ಲಿ ದೀಪವನ್ನು ಯಾವುದೇ ರೀತಿಯಲ್ಲಿ ಆರಿ ಹೋಗಲು ಬಿಡಬಾರದು.

• ದೀಪವನ್ನು ಕೈಯಿಂದ ಆರಿಸುವುದು ಅಥವಾ ಊದುವುದು ಲಕ್ಷ್ಮಿ ದೇವಿಗೆ ಅಗೌರವ ತೋರಿದಂತೆ.