ಕಾಂಡೋಮ್‌ಗೆ ತೆರಿಗೆ.. ಗರ್ಭನಿರೋಧಕಗಳಿಗೆ ನಿಷೇಧ! ಈ ದೇಶದ ವಿಚಿತ್ರ ಕಾನೂನು.. ಎಲ್ಲಿ, ಯಾಕೆ?

ಈ ದೇಶದಲ್ಲಿ ಕಾಂಡೋಮ್‌ಗೆ ಶೇ.13 ರಷ್ಟು ತೆರಿಗೆ! ಗರ್ಭನಿರೋಧಕಗಳಿಗೆ ನಿಷೇಧ. ಕಾರಣ ತಿಳಿದರೆ ಶಾಕ್ ಆಗ್ತೀರಾ. ಹೌದು, ಜನಸಂಖ್ಯೆ ಹೆಚ್ಚಳದ ವಿಚಾರದಲ್ಲಿ ಚೀನಾ (China) ಮತ್ತೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ಸುದ್ದಿಯ ಕೇಂದ್ರಬಿಂದುವಾಗಿದೆ. ಒಂದು ಕಾಲದಲ್ಲಿ ವಿಶ್ವದಲ್ಲೇ ಅತಿ ಹೆಚ್ಚು ಜನಸಂಖ್ಯೆ ಹೊಂದಿದ್ದ ಚೀನಾವನ್ನು (China Population) ಇದೀಗ ಭಾರತ ಹಿಂದಿಕ್ಕಿದೆ. ಈ ಜನಸಂಖ್ಯಾ ಕುಸಿತದ ಗಂಭೀರತೆಯನ್ನು ಮನಗಂಡ ಚೀನಾ ಸರ್ಕಾರ, ತನ್ನ ಕುಸಿಯುತ್ತಿರುವ ಜನಸಂಖ್ಯೆಯನ್ನು ಹೆಚ್ಚಿಸಲು ಹೊಸ ಮತ್ತು ಕಠಿಣ ಕಾರ್ಯತಂತ್ರಗಳನ್ನು ಜಾರಿಗೊಳಿಸಿದೆ.

ಜನನ ನಿಯಂತ್ರಣ (Birth Control) ಔಷಧಿಗಳ ನಿಷೇಧ ಮತ್ತು ಗರ್ಭನಿರೋಧಕ ಉತ್ಪನ್ನಗಳ ಮೇಲೆ ತೆರಿಗೆ ವಿಧಿಸುವುದು ಈ ಹೊಸ ನೀತಿಯ ಪ್ರಮುಖ ಭಾಗವಾಗಿದೆ. ಕಳೆದ ಮೂರು ದಶಕಗಳ ಕಾಲ ಜನಸಂಖ್ಯಾ ನಿಯಂತ್ರಣಕ್ಕೆ ಒತ್ತು ನೀಡಿದ್ದ ಚೀನಾ, ಈಗ ದಿಢೀರನೇ ಜನಸಂಖ್ಯೆ ಹೆಚ್ಚಳದ ನೀತಿಗೆ ಬದಲಾಗಿದೆ.

Photo Credit: ಸಾಂದರ್ಭಿಕ ಚಿತ್ರ

ಮೂರು ವರ್ಷಗಳಿಂದ ನಿರಂತರ ಇಳಿಕೆ

ದೇಶದ ಜನನ ಪ್ರಮಾಣ ಕಳೆದ ಮೂರು ವರ್ಷಗಳಿಂದ ನಿರಂತರವಾಗಿ ಇಳಿಕೆಯಾಗುತ್ತಿದೆ. 2024ರಲ್ಲಿ ಕೇವಲ 9.54 ಲಕ್ಷ ಶಿಶುಗಳ ಜನನ ದಾಖಲಾಗಿದ್ದು, ಇದು ಹತ್ತು ವರ್ಷಗಳ ಹಿಂದಿನ 18.8 ಲಕ್ಷ ಜನನಗಳ ಅರ್ಧದಷ್ಟಿದೆ. ಈ ತೀವ್ರ ಜನಸಂಖ್ಯಾ ಕುಸಿತವು ದೇಶದ ಭವಿಷ್ಯದ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದೆಂದು ಸರ್ಕಾರ ಆತಂಕ ವ್ಯಕ್ತಪಡಿಸಿದೆ.

ಕಾಂಡೋಮ್‌ಗೆ ಶೇ.13 ರಷ್ಟು ತೆರಿಗೆ

ಜನಸಂಖ್ಯಾ ಬೆಳವಣಿಗೆಯನ್ನು ಉತ್ತೇಜಿಸುವ ಹೊಸ ನಿಟ್ಟಿನಲ್ಲಿ, ಚೀನಾ ಸರ್ಕಾರವು ಕಾಂಡೋಮ್‌ಗಳು ಹಾಗೂ ಇತರೆ ಎಲ್ಲಾ ಗರ್ಭನಿರೋಧಕ ಉತ್ಪನ್ನಗಳ ಮೇಲೆ ಶೇಕಡ 13ರಷ್ಟು ವ್ಯಾಟ್ (ಮೌಲ್ಯವರ್ಧಿತ ತೆರಿಗೆ) ವಿಧಿಸಲು ತೀರ್ಮಾನಿಸಿದೆ. ಕಳೆದ ಮೂರು ದಶಕಗಳಲ್ಲಿ ಈ ಉತ್ಪನ್ನಗಳ ಮೇಲೆ ತೆರಿಗೆ ಹೇರುತ್ತಿರುವುದು ಇದೇ ಮೊದಲು ಎಂಬುದು ಗಮನಾರ್ಹ. ನವೀಕರಿಸಿದ ವ್ಯಾಟ್ ಕಾನೂನುಗಳು (china population policy) ಜನವರಿ ತಿಂಗಳಿನಿಂದಲೇ ಜಾರಿಗೆ ಬರಲಿವೆ.

ಈ ವಸ್ತುಗಳಿಗೆ ತೆರಿಗೆ ವಿನಾಯಿತಿ

ಹಿಂದೆ, 1993ರಲ್ಲಿ, ಚೀನಾ ಸರ್ಕಾರವು ಜನಸಂಖ್ಯೆ ನಿಯಂತ್ರಣಕ್ಕೆ ಪ್ರೋತ್ಸಾಹ ನೀಡುವ ಸಲುವಾಗಿ ಈ ವಸ್ತುಗಳಿಗೆ ತೆರಿಗೆ ವಿನಾಯಿತಿ ನೀಡಿತ್ತು. ಅದಕ್ಕೂ ಮೊದಲು ಇಂತಹ ಯಾವುದೇ ತೆರಿಗೆ ನಿಯಮ ಅಸ್ತಿತ್ವದಲ್ಲಿರಲಿಲ್ಲ. ಈಗ ಪರಿಸ್ಥಿತಿ ಸಂಪೂರ್ಣ ತಲೆಕೆಳಗಾಗಿದ್ದು, ಜನನ ಹೆಚ್ಚಳವನ್ನು ಉತ್ತೇಜಿಸಲು ತೆರಿಗೆಯನ್ನು ಒಂದು ಸಾಧನವನ್ನಾಗಿ ಬಳಸಲಾಗುತ್ತಿದೆ.

ಇದರ ಜೊತೆಗೆ, ಚೀನಾ ಸರ್ಕಾರವು ಜನನ ನಿಯಂತ್ರಣಕ್ಕೆ ಬಳಸುವ ಕೆಲವು ಔಷಧಿಗಳ ಉತ್ಪಾದನೆ ಮತ್ತು ಮಾರಾಟವನ್ನು ನಿಷೇಧಿಸಿದೆ. ಈ ಕ್ರಮವು ದೇಶದಲ್ಲಿ ಮಕ್ಕಳ ಜನನವನ್ನು ಹೆಚ್ಚಿಸುವ ಸರ್ಕಾರದ ನಿರ್ಧಾರದ ಗಂಭೀರತೆಯನ್ನು ಸ್ಪಷ್ಟವಾಗಿ ತೋರಿಸುತ್ತದೆ. ಈ ಮೂಲಕ, ಸರ್ಕಾರವು ತನ್ನ ಜನಸಂಖ್ಯಾ ಗುರಿಗಳನ್ನು ತಲುಪಲು ಯಾವುದೇ ಅಡೆತಡೆಗಳನ್ನು ನಿವಾರಿಸಲು ಬದ್ಧವಾಗಿದೆ.

ದುಬಾರಿ ಮಕ್ಕಳ ಪೋಷಣೆಯೇ ಸಮಸ್ಯೆ

ಚೀನಾದ ಯುವ ದಂಪತಿಗಳು ಮಕ್ಕಳನ್ನು ಹೊಂದುವುದರಿಂದ ಹಿಂದೆ ಸರಿಯಲು ಪ್ರಮುಖ ಕಾರಣವೆಂದರೆ ಮಕ್ಕಳ ಪೋಷಣೆಯ ದುಬಾರಿ ವೆಚ್ಚ. 2024ರಲ್ಲಿ ಬೀಜಿಂಗ್ ಮೂಲದ ಯುವ ಜನಸಂಖ್ಯಾ ಸಂಶೋಧನಾ ಸಂಸ್ಥೆಯೊಂದು ನಡೆಸಿದ ಅಧ್ಯಯನದ ಪ್ರಕಾರ, ಮಗುವನ್ನು 18 ವರ್ಷದವರೆಗೆ ಬೆಳೆಸಲು ಅಂದಾಜು 5.38 ಲಕ್ಷ ಯುವಾನ್ (ಸುಮಾರು 76,000 ಅಮೆರಿಕನ್ ಡಾಲರ್‌ಗಳು) ಬೇಕಾಗುತ್ತದೆ.

ಜನಸಂಖ್ಯೆ ಹೆಚ್ಚಿಸಲು ಒತ್ತಾಯ

ಈ ಅಂಕಿಅಂಶಗಳು ಚೀನಾವನ್ನು ಮಕ್ಕಳ ಪಾಲನೆಗೆ ವಿಶ್ವದ ಅತ್ಯಂತ ದುಬಾರಿ ದೇಶಗಳಲ್ಲಿ ಒಂದನ್ನಾಗಿ ಮಾಡಿವೆ. ಈ ಆರ್ಥಿಕ ಹೊರೆಯಿಂದಾಗಿ ಅಲ್ಲಿನ ಯುವ ಜನತೆ ಮಕ್ಕಳನ್ನು ಹೊಂದಲು ಹಿಂದೇಟು ಹಾಕುತ್ತಿದ್ದಾರೆ. ಇದನ್ನು ನಿವಾರಿಸಲು ಸರ್ಕಾರವು ಒಂದು ಕಡೆ ಆರ್ಥಿಕ ಪ್ರೋತ್ಸಾಹಗಳನ್ನು ನೀಡಿದರೆ, ಮತ್ತೊಂದೆಡೆ ಜನನ ನಿಯಂತ್ರಕಗಳ ಮೇಲೆ ತೆರಿಗೆ ವಿಧಿಸುವ ಮೂಲಕ ಪರೋಕ್ಷವಾಗಿ ಜನಸಂಖ್ಯೆಯನ್ನು ಹೆಚ್ಚಿಸಲು ಒತ್ತಾಯಿಸುತ್ತಿದೆ.