ಬೆಂಗಳೂರಿನಲ್ಲಿ 12 ಗಂಟೆಗಳ ಕಾಲ ನೀರಿನ ಕಡಿತ: ನಾಳೆ ನೀರು ಉಳಿಸಲು ಈ ಟಿಪ್ಸ್ ಫಾಲೋ ಮಾಡಿ!

ಬೆಂಗಳೂರು ಜನರೇ ಗಮನಿಸಿ, ಜುಲೈ 16ರಂದು ನಗರದ ಹಲವೆಡೆ ಸತತ 12 ಗಂಟೆಗಳ ಕಾಲ ನೀರಿನ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಲಿದೆ. ಬೆಂಗಳೂರು ಜಲಮಂಡಳಿ (BWSSB) ತುರ್ತು ನಿರ್ವಹಣಾ ಕಾರ್ಯ ಕೈಗೆತ್ತಿಕೊಳ್ಳುತ್ತಿರುವುದರಿಂದ ಈ ಕ್ರಮ ಅನಿವಾರ್ಯವಾಗಿದೆ. ಅಡುಗೆ, ಸ್ನಾನ ಹಾಗೂ ದಿನನಿತ್ಯದ ಬಳಕೆಗೆ ಬೇಕಾದ ನೀರನ್ನು ಮೊದಲೇ ಸಂಗ್ರಹಿಸಿಟ್ಟುಕೊಳ್ಳುವುದು ಉತ್ತಮ. ಮುನ್ನೆಚ್ಚರಿಕೆ ಕ್ರಮವಾಗಿ ನೀರು ಉಳಿತಾಯ ಮಾಡಿದರೆ ಕೊನೆಯ ಕ್ಷಣದ ಆತಂಕವನ್ನು ತಪ್ಪಿಸಬಹುದು.

ಮನೆಯಲ್ಲಿ ಎಷ್ಟು ನೀರು ಬೇಕಾಗಬಹುದು ಎಂಬುದನ್ನು ಮೊದಲೇ ಲೆಕ್ಕ ಹಾಕಿ ಸಂಗ್ರಹಿಸಿಡಿ. ತಜ್ಞರ ಪ್ರಕಾರ, ಒಬ್ಬ ವ್ಯಕ್ತಿಗೆ ದಿನಕ್ಕೆ ಕನಿಷ್ಠ 50 ಲೀಟರ್ ನೀರು ಬೇಕಾಗುತ್ತದೆ. ಕುಡಿಯುವ ನೀರನ್ನು ಶುದ್ಧವಾದ ಪಾತ್ರೆಗಳಲ್ಲಿ ಮುಚ್ಚಿಡಿ. ಪಾತ್ರೆ ತೊಳೆಯಲು ಮತ್ತು ಶೌಚಾಲಯದ ಬಳಕೆಗೆ ಪ್ರತ್ಯೇಕವಾಗಿ ಬಕೆಟ್‌ಗಳಲ್ಲಿ ನೀರು ತುಂಬಿಸಿಟ್ಟುಕೊಳ್ಳಿ. ಈ ಸಣ್ಣ ಪ್ಲಾನಿಂಗ್‌ನಿಂದ ನೀರಿನ ಅಭಾವದ ನಡುವೆಯೂ ನಿಮ್ಮ ದಿನಚರಿ ಸುಗಮವಾಗಿ ಸಾಗುತ್ತದೆ.

ಬೆಂಗಳೂರಿನಲ್ಲಿ 12 ಗಂಟೆಗಳ ಕಾಲ ನೀರಿನ ಕಡಿತ: ನಿಭಾಯಿಸುವುದು ಹೇಗೆ?

ನೀರಿನ ಮಿತಬಳಕೆಗಾಗಿ ಅಡುಗೆಗೆ ಕಡಿಮೆ ಪಾತ್ರೆಗಳನ್ನು ಬಳಸಿ. ವಾಷಿಂಗ್ ಮೆಷಿನ್ ಅಥವಾ ಡಿಶ್‌ವಾಶರ್‌ಗಳಂತಹ ಹೆಚ್ಚು ನೀರು ಬೇಡುವ ಉಪಕರಣಗಳನ್ನು ಆ ದಿನ ಬಳಸಬೇಡಿ. ನಿಮ್ಮ ಮನೆಯಲ್ಲಿ RO ಫಿಲ್ಟರ್ ಇದ್ದರೆ, ಅದರಿಂದ ಹೊರಬರುವ ನೀರನ್ನು ಚೆಲ್ಲುವ ಬದಲು ಒಂದು ಕಡೆ ಸಂಗ್ರಹಿಸಿ. ಅದನ್ನು ನೆಲ ಒರೆಸಲು ಅಥವಾ ಶೌಚಾಲಯಕ್ಕೆ ಬಳಸಬಹುದು. ಇಂತಹ ಸಣ್ಣ ಹವ್ಯಾಸಗಳು ನೀರನ್ನು ಉಳಿಸಲು ದೊಡ್ಡ ಮಟ್ಟದಲ್ಲಿ ಸಹಾಯ ಮಾಡುತ್ತವೆ.

ನೀರಿನ ಅಭಾವದ ಸಮಯದಲ್ಲಿ ಖಾಸಗಿ ಟ್ಯಾಂಕರ್‌ಗಳ ದರ ಏರಿಕೆಯಾಗುವ ಸಾಧ್ಯತೆ ಇರುತ್ತದೆ. ಹಾಗಾಗಿ, ನಂಬಿಕಸ್ತ ಸಪ್ಲೈಯರ್‌ಗಳಿಂದ ಮಾತ್ರ ನೀರು ತರಿಸಿಕೊಳ್ಳಿ ಮತ್ತು ಆರ್ಡರ್ ಮಾಡುವ ಮೊದಲೇ ಬೆಲೆಯನ್ನು ಖಚಿತಪಡಿಸಿಕೊಳ್ಳಿ. ಹೆಚ್ಚಿನ ಹಣ ವಸೂಲಿ ಮಾಡುವವರ ಬಗ್ಗೆ ಎಚ್ಚರವಿರಲಿ ಮತ್ತು ಅಕ್ರಮಗಳಿದ್ದರೆ ಅಧಿಕಾರಿಗಳಿಗೆ ದೂರು ನೀಡಿ. ಅಪಾರ್ಟ್‌ಮೆಂಟ್ ಅಥವಾ ಕಮ್ಯುನಿಟಿ ಗ್ರೂಪ್‌ಗಳಲ್ಲಿರುವ ಪರಿಶೀಲಿಸಿದ ಕಾಂಟ್ಯಾಕ್ಟ್‌ಗಳನ್ನು ಬಳಸುವುದು ಸುರಕ್ಷಿತ ಆಯ್ಕೆಯಾಗಿದೆ.

ಮನೆಯಲ್ಲಿರುವ ಮಕ್ಕಳು ಮತ್ತು ಹಿರಿಯರ ಆರೋಗ್ಯದ ದೃಷ್ಟಿಯಿಂದ ಅವರಿಗೆ ಬೇಕಾದ ನೀರನ್ನು ಮೊದಲೇ ಕಾಯ್ದಿರಿಸಿ. ಫಿಲ್ಟರ್ ಕೆಲಸ ಮಾಡದಿದ್ದರೆ ನೀರನ್ನು ಕಾಯಿಸಿ ಆರಿಸಿ ಕುಡಿಯುವುದು ಉತ್ತಮ. ಜಲಮಂಡಳಿಯ ಅಧಿಕೃತ ಪ್ರಕಟಣೆಗಳನ್ನು ಸದಾ ಗಮನಿಸುತ್ತಿರಿ. ಸರಿಯಾದ ತಯಾರಿ ನಡೆಸಿದರೆ ನಗರದ ಈ ದುರಸ್ತಿ ಕಾರ್ಯದ ಸಮಯದಲ್ಲಿ ಯಾವುದೇ ತೊಂದರೆಯಿಲ್ಲದೆ ದಿನ ಕಳೆಯಬಹುದು.