ಮಹಾಶಿವರಾತ್ರಿಗೆ ಉಪವಾಸ ಮಾಡುವುದೇಕೆ? ಇದರ ಮಹತ್ವವೇನು?

ಮನಸ್ಸನ್ನು ಶಿವನ ಮೇಲೆ ಕೇಂದ್ರೀಕರಿಸಿ ಧ್ಯಾನ ಮಾಡಲು ಸಹಕಾರಿ

ಉಪವಾಸ ಮಾಡಿದಾಗ ದೇಹ ಶುದ್ಧವಾಗುವುದು, ಮನಸ್ಸು ಶುದ್ಧವಾಗುವುದು. ನಮ್ಮ ಮನಸ್ಸು ತುಂಬಾ ವಿಶ್ರಾಂತಿಯ ಅನುಭವ ಪಡೆಯುವುದು. ಅಲ್ಲದೆ ಮನಸ್ಸು ತುಂಬಾ ಎಚ್ಚರದಿಂದ ಇರುತ್ತದೆ, ಆಗ ಮನಸ್ಸನ್ನು ಧ್ಯಾನ ಕಡೆ ಗಮನ ಕೊಡಲು ಸಹಕಾರಿಯಾಗುವುದು. ಮನಸ್ಸು ಹಾಗೂ ದೇಹವನ್ನು ಶುದ್ಧ ಮಾಡಿ, ಆ ದಿನಪೂರ್ತಿ ಶಿವ ಜಪ ಮಾಡುತ್ತಾ ಕಳೆಯಲು ಉಪವಾಸ ಆಚರಣೆ ಮಾಡಲಾಗುವುದು.

ತುಂಬಾ ಹೊತ್ತು ಧ್ಯಾನದಲ್ಲಿ ಕೂರಲು ಸಾಧ್ಯವಾಗುವುದು

ಉಪವಾಸ ಮಾಡಿದಾಗ ದೇಹ ಡಿಟಾಕ್ಸ್ ಆಗುವುದರಿಂದ ಒಮ್ಮೆ ಪೂಜೆಗೆ ಕೂತರೆ ತುಂಬಾ ಹೊತ್ತು ಪೂಜೆಯಲ್ಲಿ ಕಳೆಯಬಹುದು. ಅಂದರೆ ಮೂತ್ರವಿಸರ್ಜನೆಗೆ, ಮಲವಿಸರ್ಜನೆಗೆ ಹೋಗುವುದು ಕಡಿಮೆಯಾಗುತ್ತೆ, ಇದರಿಂದ ದೇವರ ಧ್ಯಾನದಲ್ಲಿ ಹೆಚ್ಚು ಹೊತ್ತು ತೊಡಗಿಸಿಕೊಳ್ಳಬಹುದು.

ದೇವರ ಪೂಜೆಯಲ್ಲಿ ತಲ್ಲೀನರಾಗಬಹುದು

ದೇವರಿಗಾಗಿ ನಾವು ಉಪವಾಸವಿದ್ದಾಗ ಆ ದಿನವಿಡೀ ದೇವರ ಜಪದಲ್ಲಿಯೇ ಕಳೆಯುತ್ತೇವೆ, ಉಪವಾಸವಿದ್ದು ಮಾಡುವ ಪೂಜೆಗೆ ಬೇಗ ಫಲ ಸಿಗುವುದು, ಆದ್ದರಿಂದ ನಾವು ಅಂದುಕೊಂಡಿದ್ದ ಸಂಕಲ್ಪ ನೆರವೇರುವುದು.

ಪಾಪ -ಕರ್ಮಗಳಿಂದ ಮುಕ್ತಿ ಸಿಗುವುದು

ಉಪವಾಸವಿದ್ದು ಶಿವನ ಆರಾಧನೆ ಮಾಡುವುದರಿಂದ ಬೇಗನೆ ಪಾಪಕರ್ಮಗಳಿಂದ ಮುಕ್ತರಾಗುವವರು ಎಂದು ಹೇಳಲಾಗುವುದು. ಅಲ್ಲದೆ ಮತ್ಸರ, ಕಾಮ, ಕ್ರೋಧ ಇವುಗಳೆನ್ನೆಲ್ಲಾ ನಿಯಂತ್ರಿಸುವ ಶಕ್ತಿ ಮನಸ್ಸಿಗೆ ದೊರೆಯುವುದು.

ಅಲ್ಲದೆ ಶಿವರಾತ್ರಿಗೆ ಏಕೆ ಉಪವಾಸ ಮಾಡುತ್ತಾರೆ ಎಂಬುವುದಕ್ಕೆ ಪೌರಾಣಿಕ ಕತೆಯೂ ಇದೆ:

ಅಮೃತಗಾಗಿ ದಾನವರು ಹಾಗೂ ದೇವತೆಗಳು ಸಮುದ್ರ ಮಂಥನ ಮಾಡುವಾಗ ಮೊದಲಿಗೆ ಹಾಲಾಹಲ ಉಕ್ಕುತ್ತೆ, ಆಗ ದೇವತೆಗಳು ಹಾಗೂ ಅಸುರರು ಶಿವನಲ್ಲಿ ಪ್ರಾರ್ಥಿಸಿದಾಗ ಶಿವನು ಆ ವಿಷವನ್ನು ಕುಡಿಯುತ್ತಾನೆ, ಆಗ ಪಾರ್ವತಿಯು ಶಿವ ಕುಡಿದ ವಿಷ ಅವನ ದೇಹಕ್ಕೆ ಹರಡಬಾರದು ಎಂದು ಶಿವನ ಕುತ್ತಿಗೆಯನ್ನು ಗಟ್ಟಿಯಾಗಿ ಹಿಡಿದು ಏನೂ ತಿನ್ನದೆ ಒಂದು ರಾತ್ರಿ- ಒಂದು ಹಗಲು ನಿಲ್ಲುತ್ತಾರೆ, ಆಗ ಶಿವ ನೀಲಕಂಠನಾಗುತ್ತಾನೆ ಎಂದು ಪೌರಾಣಿಕ ಕತೆ ಹೇಳುತ್ತದೆ. ಅಲ್ಲಿಂದ ಶಿವರಾತ್ರಿಗೆ ಉಪವಾಸ ಆಚರಣೆ ಮಾಡಲಾಗುವುದು ಎಂದು ಹೇಳಲಾಗುವುದು.