ಝೆನ್ ಕಥೆ: ನಾನೊಂದು ಬೆಕ್ಕು ಎಂದಷ್ಟೆ ಗೊತ್ತು!

Short Story

oi-Reena

By Hema S

Updated: Monday, August 6, 2012, 9:53 [IST]

ಸಾಮೂರೈ ಹೆಸರಿನ ಯೋಧನಿದ್ದ. ಖಡ್ಗ ವಿದ್ಯೆಯಲ್ಲಿ ತುಂಬಾ ಹೆಸರುವಾಸಿಯಾಗಿದ್ದನು. ಯುದ್ಧ ಭೂಮಿಯಲ್ಲಿ ಅವನ ವಿರುದ್ಧ ಗೆಲ್ಲಲು ಯಾರಿಗೂ ಸಾಧ್ಯವಾಗುತ್ತಿರಲಿಲ್ಲ. ಒಂದು ದಿನ ಯುದ್ಧ ಮುಗಿಸಿ ವಿಶ್ರಾಂತಿ ತೆಗೆದುಕೊಳ್ಳಲು ಮನೆಗೆ ಬಂದನು. ತುಂಬಾ ಸುಸ್ತು, ಸ್ವಲ್ಪ ಹೊತ್ತು ಮಲಗಿದರೆ ಸರಿಹೋದಿತು ಎಂದು ಮಲಗಿದನು.

ಆಗ ಅವನ ಮನೆಯಲ್ಲಿದ್ದ ಇಲಿಯೊಂದು ಅತ್ತಿತ್ತ ಓಡಾಡುತ್ತಿದ್ದರಿಂದ ಅವನ ನಿದ್ದೆಗೆ ಭಂಗವಾಯಿತು. ಈ ಇಲಿನ್ನು ಕೊಂದು ಹಾಕಬೇಕು ಎಂದು ಕೋಪದಿಂದ ಖಡ್ಗ ತೆಗೆದು ಇಲಿಯನ್ನು ಕೊಲ್ಲಲು ಹೋದನು. ಇವನು ಖಡ್ಗ ಬೀಸಿದಂತೆ ಆ ಇಲಿ ತಪ್ಪಿಸಿಕೊಳ್ಳುತ್ತಿತ್ತು. ಕೊನೆಗೂ ಅವನಿಂದ ಆ ಇಲಿಯನ್ನು ಕೊಲ್ಲಲು ಅವನಿಂದ ಸಾಧ್ಯವಾಗಲಿಲ್ಲ!

ಈ ಇಲಿ ಅಸಾಮಾನ್ಯವಾದ ಇಲಿಯಾಗಿರಬಹುದು ಎಂದು ಭಾವಿಸಿ ಹೆಂಡತಿಯನ್ನು ಕೂಗಿದನು. ಹೆಂಡತಿಯ ಹತ್ತಿರ "ಇದು ಅಸಾಮಾನ್ಯವಾದ ಇಲಿ" ಎಂದಾಗ ಹೆಂಡತಿಯು "ಹಾಗೇನು ಇಲ್ಲ, ಇದು ಸಾಮಾನ್ಯವಾದ ಇಲಿ, ಇದನ್ನು ಕೊಲ್ಲಲು ಒಂದು ಬೆಕ್ಕು ತನ್ನಿ" ಎಂದಳು.

ಈ ಸೈನಿಕ ಹೋಗಿ ಇಲಿ ಹಿಡಿಯುವುದರಲ್ಲಿ ಪರಿಣಿತಿಯನ್ನು ಪಡೆದ ಬೆಕ್ಕನ್ನು ತಂದನು. ಆ ಬೆಕ್ಕಿನಿಂದಲೂ ಆ ಇಲಿಯನ್ನು ಹಿಡಿಯಲು ಸಾಧ್ಯವಾಗಲಿಲ್ಲ. ನಂತರ ರಾಜನ ಹತ್ತಿರ ಹೋಗಿ ರಾಜನ ಬಳಿ ಇರುವ ಮಾರ್ಷಲ್ ಆರ್ಟ್ ಕಲಿತ ಬೆಕ್ಕನ್ನು ತಂದನು ಅದರಿಂದಲೂ ಆ ಇಲಿಯನ್ನು ಹಿಡಿಯಲು ಸಾಧ್ಯವಾಗಲಿಲ್ಲ. ನಂತರ ರಾಜನ ಬೆಕ್ಕು ಒಂದು ಸಾಮಾನ್ಯ ಬೆಕ್ಕನ್ನು ತರಲು ಹೇಳಿತು.

ಅದರಂತೆ ಸೈನಿಕ ಸಾಮಾನ್ಯವಾದ ಬೆಕ್ಕನ್ನು ತಂದನು. ಆ ಬೆಕ್ಕು ನೋಡಿದರೆ ತುಂಬಾ ಸಣಕಲು ಇತ್ತು, ಅಲ್ಲದೆ ಯಾವತ್ತೂ ನಿದ್ದೆ ಮಾಡವುದು ಒಂದೇ ಅದರ ಕೆಲಸವಾಗಿತ್ತು. ಆ ಬೆಕ್ಕನ್ನು ತಂದು ಮನೆಯೊಳಗೆ ಬಿಟ್ಟನು. ಬೆಕ್ಕು ನಿದ್ದೆ ಮಾಡಲಾರಂಭಿಸಿತು. ಈ ಬೆಕ್ಕಿನಿಂದ ಆ ಇಲಿಯನ್ನು ಹಿಡಿಯಲು ಸಾಧ್ಯವೇ ಎಂದು ಸೈನಿಕ ಅಸಡ್ಡೆಯಿಂದ ಬೆಕ್ಕಿನೆಡೆಗೆ ನೋಡಿದನು. ಬೆಕ್ಕಿಗೆ ಇಲಿಯ ವಾಸನೆ ಮೂಗಿಗೆ ಬಡೆಯಿತು,

ನಿದ್ದೆಯಿಂದ ಎಚ್ಚೆತ್ತ ಆ ಬೆಕ್ಕು ಕೆಲವೇ ನಿಮಿಷಗಳಲ್ಲಿ ಇಲಿಯನ್ನು ಕೊಂದು ತಂದು ಸೈನಿಕನ ಎದುರಿಗೆ ಹಾಕಿತು. ನಂತರ ಎಲ್ಲಾ ಬೆಕ್ಕಗಳು ಆ ಸಾಮಾನ್ಯ ಬೆಕ್ಕನ್ನು ಸುತ್ತುವರಿದು 'ಇಲಿಯನ್ನು ಕೊಲ್ಲಲು ನೀ ಬಳಸಿದ ವಿದ್ಯೆ ಏನು?' ಎಂದು ಕೇಳಿದವು ಅದಕ್ಕೆ ಈ ಬೆಕ್ಕು 'ನನಗೆ ಯಾವ ವಿಶೇಷ ವಿದ್ಯೆಯೂ ಗೊತ್ತಿಲ್ಲ, ನಾನೊಂದು ಬೆಕ್ಕು ಅಷ್ಟು ಮಾತ್ರ ಗೊತ್ತು' ಎಂದಿತು.