ಹೊರಗೆ ಮಾಲಿನ್ಯ, ಮನೆಯೊಳಗೆ ಉಸಿರುಗಟ್ಟುವ ವಾತಾವರಣವೇ? ಗಾಳಿ ಶುದ್ಧೀಕರಿಸಲು ಇಲ್ಲಿದೆ ಸರಳ ಟಿಪ್ಸ್!

ಅಕ್ಟೋಬರ್ 18ರ ಬೆಳಿಗ್ಗೆ 9:30ರ ವೇಳೆಗೆ ದೆಹಲಿಯಲ್ಲಿ ವಾಯು ಮಾಲಿನ್ಯ ಸೂಚ್ಯಂಕ (AQI) 146 ತಲುಪಿ ಪರಿಸ್ಥಿತಿ 'ಖರಾಬ್' (Poor) ಆಗಿತ್ತು. ಗ್ರೇಟರ್ ನೋಯ್ಡಾದಲ್ಲಿ 188, ಗುರ್ಗಾಂವ್‌ನಲ್ಲಿ 126 ಹಾಗೂ ನೋಯ್ಡಾದಲ್ಲಿ 135 ದಾಖಲಾಗಿ, ಬೆಳಗಿನ ವಾತಾವರಣ ಧೂಳುಮಯವಾಗಿತ್ತು. ಮುಂಬೈ ತುಸು ಹೆಚ್ಚೇ ಹದಗೆಟ್ಟು 263 AQI ಜೊತೆ 'ಅತ್ಯಂತ ಗಂಭೀರ' (Severe) ಮಟ್ಟ ಮುಟ್ಟಿತ್ತು. ಆದರೆ, ದಕ್ಷಿಣ ಭಾರತದ ಬೆಂಗಳೂರಿನಲ್ಲಿ 64 (ಮಧ್ಯಮ - Moderate) ಮತ್ತು ಚೆನ್ನೈನಲ್ಲಿ 47 (ಉತ್ತಮ - Good) ದಾಖಲಾಗುವ ಮೂಲಕ ವಾಯು ಗುಣಮಟ್ಟ ಉತ್ತಮವಾಗಿತ್ತು. ಹಾಗಿದ್ದರೆ, ನಿಮ್ಮ ಮನೆಯೊಳಗಿನ ಗಾಳಿಯನ್ನು ತಕ್ಷಣ ಶುದ್ಧೀಕರಿಸುವುದು ಹೇಗೆ? ಇಲ್ಲಿದೆ ಸಿಂಪಲ್ ಟಿಪ್ಸ್.

ಹೊರಗೆ ವಾಯು ಮಾಲಿನ್ಯ ಹೆಚ್ಚಾದಾಗ ಮನೆಯೊಳಗಿನ ಗಾಳಿಯೂ ಕಲುಷಿತಗೊಳ್ಳುತ್ತದೆ. ಅಧ್ಯಯನಗಳ ಪ್ರಕಾರ, ಮನೆಯೊಳಗಿನ ಮಾಲಿನ್ಯವು ಹೊರಗಿನ ಗಾಳಿಗಿಂತ ಎರಡರಿಂದ ಐದು ಪಟ್ಟು ಹೆಚ್ಚಿರಬಹುದು! ಬೆಳಗಿನ ತಂಪಾದ ವಾತಾವರಣ, ವಾಹನಗಳ ಹೊಗೆ ಮತ್ತು ಹಬ್ಬಗಳ ಧೂಪ-ಹೊಗೆಯಿಂದಾಗಿ ಮಾಲಿನ್ಯಕಾರಕ ಕಣಗಳು ಮನೆಗಳ ಸುತ್ತಲೂ ನಿಲ್ಲುತ್ತವೆ. ಆದ್ದರಿಂದ, ಮಧ್ಯಾಹ್ನ 12 ರಿಂದ ಸಂಜೆ 4 ರ ನಡುವೆ ಗಾಳಿ ಶುದ್ಧವಾಗಿರುವಾಗ ಮಾತ್ರ ಕಿಟಕಿಗಳನ್ನು ತೆರೆಯಿರಿ. ಬೆಳಿಗ್ಗೆ ಬೇಗ ಹಾಗೂ ತಡಸಂಜೆ ಕಿಟಕಿಗಳನ್ನು ತೆರೆಯುವುದನ್ನು ತಪ್ಪಿಸಿ.

ಲೈವ್ AQI ಅಪ್‌ಡೇಟ್: ಬೆಂಗಳೂರು, ಮುಂಬೈ, ಚೆನ್ನೈ

20 ನಿಮಿಷಗಳಲ್ಲಿ ಮನೆ ಗಾಳಿ ಶುದ್ಧೀಕರಣ: DIY ಫಿಲ್ಟರ್ ಮತ್ತು AC ಸೆಟ್ಟಿಂಗ್ಸ್

ಕಿಟಕಿ ಮತ್ತು ಬಾಗಿಲುಗಳ ಸಂದಿಗಳನ್ನು ಟೇಪ್ ಅಥವಾ ಒದ್ದೆ ಟವಲ್ ಬಳಸಿ ಮುಚ್ಚಿ, ಹೊರಗಿನ ಗಾಳಿ ಒಳಬಾರದಂತೆ ತಡೆಯಿರಿ. ಏರ್ ಕಂಡಿಷನರ್ (AC) ಅನ್ನು 'ರೀಸರ್ಕ್ಯುಲೇಶನ್' (Recirculation) ಮೋಡ್‌ಗೆ ಹಾಕಿ; ಜೊತೆಗೆ ಹಳೆಯ ಫಿಲ್ಟರ್‌ಗಳನ್ನು ತೊಳೆಯಿರಿ ಅಥವಾ ಬದಲಾಯಿಸಿ. ಸಾಧ್ಯವಾದರೆ Minimum Efficiency Reporting Value 13 (MERV 13) ರೇಟಿಂಗ್ ಹೊಂದಿರುವ ಫಿಲ್ಟರ್‌ ಬಳಸುವುದು ಒಳಿತು. ಕೇವಲ ₹1,000 ದಿಂದ ₹3,000 ವೆಚ್ಚದಲ್ಲಿ ಬಾಕ್ಸ್-ಫ್ಯಾನ್ ಮತ್ತು MERV-13 ಫಿಲ್ಟರ್ ಬಳಸಿ ನೀವೇ ಹೋಮ್‌ಮೇಡ್ ಏರ್ ಪ್ಯೂರಿಫೈಯರ್ ಮಾಡಿಕೊಳ್ಳಬಹುದು. ಇದನ್ನು ಸಣ್ಣ ಕೋಣೆಯಲ್ಲಿ ಹೈ-ಸ್ಪೀಡ್‌ನಲ್ಲಿ ರನ್ ಮಾಡಿ, ನಂತರ AQI ಕಡಿಮೆಯಾದಾಗ ಕಿಟಕಿ ತೆರೆದು ಗಾಳಿ ಆಡಿಸಿ.

ಅಗರಬತ್ತಿ ಧೂಪದ ನಿಯಮ, ಅಡುಗೆ ಮನೆಯ ಹೊಗೆ ಮತ್ತು ಕ್ಲೀನಿಂಗ್ ಸಲಹೆಗಳು

ಮನೆಯಲ್ಲಿ ಒಂದಕ್ಕಿಂತ ಹೆಚ್ಚು ಅಗರಬತ್ತಿ ಅಥವಾ ಧೂಪ ಹಚ್ಚಬೇಡಿ, ಮುಚ್ಚಿದ ಕೋಣೆಯಲ್ಲಂತೂ ಅಸಲೇ ಹಚ್ಚದಿರಿ; ಏಕೆಂದರೆ ಇದರಿಂದ PM2.5 ಮಟ್ಟ ತೀವ್ರವಾಗಿ ಏರುತ್ತದೆ. ಎಣ್ಣೆಯಲ್ಲಿ ಕರಿಯುವ ಅಡುಗೆ ಮಾಡುವಾಗ ಮತ್ತು ಅಡುಗೆ ಮುಗಿದ 15 ನಿಮಿಷಗಳ ಕಾಲ ಕಿಚನ್ ಚಿಮಣಿಯನ್ನು ಆನ್‌ನಲ್ಲಿಡಿ. ಧೂಳು ಏಳದಂತೆ ಮನೆಯನ್ನು ಒದ್ದೆ ಬಟ್ಟೆಯಿಂದ ಒರೆಸಿ. ಕೃತಕ ಸುಗಂಧವಿಲ್ಲದ (Fragrance-free) ಕ್ಲೀನರ್‌ಗಳನ್ನು ಬಳಸಿ ಮತ್ತು ಏರ್ ಫ್ರೆಶ್‌ನರ್‌ಗಳನ್ನು ಆದಷ್ಟು ತಪ್ಪಿಸಿ. ಬಾಲ್ಕನಿ ಗಿಡಗಳು ಧೂಳನ್ನು ತಡೆಯಲು ಮಾತ್ರ ಸಹಕಾರಿ. ಅವು ಕೋಣೆಯ ಗಾಳಿಯನ್ನು ಗಮನಾರ್ಹವಾಗಿ ಶುದ್ಧೀಕರಿಸುವುದಿಲ್ಲ, ಆದ್ದರಿಂದ ಅವುಗಳ ಎಲೆಗಳನ್ನು ವಾರಕ್ಕೊಮ್ಮೆ ನೀರಿನಿಂದ ತೊಳೆಯಿರಿ.

ಸಾಕುಪ್ರಾಣಿಗಳ ರಕ್ಷಣೆ ಮತ್ತು ಆರೋಗ್ಯದ ಅಪಾಯಕಾರಿ ಲಕ್ಷಣಗಳು

AQI ಮಟ್ಟ ಕಡಿಮೆಯಿದ್ದಾಗ ಮಾತ್ರ ಸಾಕುಪ್ರಾಣಿ ಹಾಗೂ ಮಕ್ಕಳನ್ನು ಹೊರಗೆ ವಾಕಿಂಗ್ ಕರೆದೊಯ್ಯಿರಿ. ಸಣ್ಣ ರಸ್ತೆಗಳಲ್ಲಿ ಕಡಿಮೆ ಅವಧಿಯ ನಡಿಗೆ ಇರಲಿ. ವಾಕಿಂಗ್ ಮುಗಿಸಿ ಬಂದ ಮೇಲೆ ಪ್ರಾಣಿಗಳ ಕಾಲು ಮತ್ತು ತುಪ್ಪಳವನ್ನು ಒರೆಸಿ ಕ್ಲೀನ್ ಮಾಡಿ. ಮಾಲಿನ್ಯ ಹೆಚ್ಚಿದ್ದಾಗ ಮನೆಯೊಳಗೇ ಆಟವಾಡಲು ಅವಕಾಶ ನೀಡಿ. ಮನೆಯಲ್ಲಿ ಹೊಗೆ ಹೆಚ್ಚಿದ್ದರೆ ಹಿರಿಯರು, ಎರಡು ವರ್ಷ ಮೇಲ್ಪಟ್ಟ ಮಕ್ಕಳು ಮತ್ತು ಉಬ್ಬಸ (ಅಸ್ತಮಾ) ರೋಗಿಗಳು ಸರಿಯಾಗಿ ಫಿಟ್ ಆಗುವ N95 ಮಾಸ್ಕ್ ಧರಿಸುವುದು ಒಳಿತು. ವಿಶ್ರಾಂತಿ ಪಡೆಯುವಾಗಲೂ ಉಸಿರಾಟದ ತೊಂದರೆ ಕಾಣಿಸಿಕೊಂಡರೆ, ತುಟಿಗಳು ನೀಲಿ ಬಣ್ಣಕ್ಕೆ ತಿರುಗಿದರೆ ಅಥವಾ ಔಷಧಿಯಿಂದಲೂ ಕೆಮ್ಮು/ಉಸಿರುಕಟ್ಟುವಿಕೆ ಶಮನವಾಗದಿದ್ದರೆ ತಕ್ಷಣ ವೈದ್ಯಕೀಯ ನೆರವು ಪಡೆಯಿರಿ.