ಕಸ ಎಂದು ಬಿಸಾಡುವ ಮುನ್ನ ಯೋಚಿಸಿ!

ಕಸದಿಂದ ರಸ ತೆಗೆಯುವುದು ಒಂದು ಕಲೆ. ಆದರೆ ನಮಗೆ ಅನೇಕ ಬಾರಿ ಕೆಲವೊಂದು ವಸ್ತುಗಳು ಕಸವಾಗಿಯೇ ಕಾಣುತ್ತದೆಯೆ ಹೊರತು ಅದನ್ನು ಮತ್ತೊಂದು ರೀತಿಯಲ್ಲಿ ಉಪಯೋಗಿಸಬಹುದು ಅಂತ ತೋಚುವುದೇ ಇಲ್ಲ. ಬಾಟಲಿಗಳನ್ನು ತಂದರೆ ಅದರಲ್ಲಿರುವ ಪಾನೀಯಗಳನ್ನು ಕುಡಿದ ನಂತರ ಅದನ್ನು ಹಾಗೇ ಬಿಸಾಡುತ್ತೇವೆ, ಬಾಟಲಿ ಮಾತ್ರವಲ್ಲ ಬಾಕ್ಸ್ , ಹಳೆಯ ಕಪ್ ಹೀಗೆ ಅನೇಕ ಸಾಧನಗಳನ್ನು ಕಸದ ಬುಟ್ಟಿಗೆ ಹಾಕಿ ಬಿಡುತ್ತೇವೆ. ಇದನ್ನು ಸ್ವಲ್ಪ ವಿನ್ಯಾಸಗೊಳಿಸಿದರೆ ಅವುಗಳು ನಿಮ್ಮ ಮನೆಯ ಅಂದವನ್ನು ಹೆಚ್ಚಿಸುವ ವಸ್ತುಗಳಾಗಿ ಮಾರ್ಪಡುವುದು. ಇಲ್ಲಿ ನಾವು ಕೆಲವು ನಿರುಪಯುಕ್ತ ವಸ್ತುಗಳನ್ನು, ಉಪಯುಕ್ತ ವಸ್ತುಗಳಾಗಿ ಹೇಗೆ ಬಳಸಬಹುದು ಎಂಬ ಸಲಹೆಗಳನ್ನು ನೀಡಲಾಗಿದೆ. ಈ ಸಲಹೆಯಂತೆ ಮಾಡಿದರೆ ಕಸದಿಂದ ರಸ ತೆಗೆಯುವ ಕಲೆ ನಿಮಗೂ ತಿಳಿಯುವುದು.

ಪ್ಲಾಸ್ಟಿಕ್ ಬ್ಯಾಗ್: ಪ್ಲಾಸ್ಟಿಕ್ ಬ್ಯಾಗ್‌ಗಳನ್ನು ಬಿಸಾಡುವಾಗ ಯೋಚಿಸುವುದಿಲ್ಲ, ಆದರೆ ಬಣ್ಣ ಬಣ್ಣದ ಬ್ಯಾಗ್‌ಗಳನ್ನು ಹರಿದು ಅದನ್ನು ಅದನ್ನು ಜಡೆ ರೀತಿ ಎಣಿದು ಅದರಿಂದ ವೃತ್ತಾಕಾರ ಅಥವಾ ಆಯತಾಕಾರವಾಗಿ ಸುರುಳಿ ಸುತ್ತಬೇಕು.ನಂತರ ಅದು ಬಿಚ್ಚಿ ಹೋಗದ ಹಾಗೆ ಗಂಟು ಹಾಕಬೇಕು. ನಂತರ ಅದನ್ನು ಕೈಯಿಂದ ಸ್ವಲ್ಪ ದಪ್ಪದ ನೂಲಿನಿಂದ ಹೊಲಿದರೆ ಆಕರ್ಷಕವಾದ ಮ್ಯಾಟ್ ರೆಡಿ.

ಬಾಟಲಿಗಳು: ಬಾಟಲಿಗಳ ಮೆಲೆ ಫ್ಯಾಭ್ರಿಕ್ ಬಣ್ಣದಿಂದ ವಿನ್ಯಾಸ ಬರೆಯಬಹುದು ಅಥವಾ ಗಾಜಿನ ಬಾಟಲಿಯಾದರೆ ಚಿತ್ರಗಳನ್ನು ಬರೆದು ವಾಸ್ ರೀತಿ ಮಾಡಬಹುದು.

ಥರ್ಮೋಕೋಲ್ ಪ್ಲೇಟ್: 2 ಥರ್ಮೋಕೋಲ್ ಫ್ಲೇಟ್, ಫ್ಯಾಭ್ರಿಕ್ ಬಣ್ಣಗಳು ಮತ್ತು ರಿಬ್ಬನ್ ತೆಗೆದುಕೊಳ್ಳಬೇಕು. ಒಂದು ಪ್ಲೇಟ್ ಅನ್ನು ಸಮ ಅರ್ಧ ಭಾಗಗಳಾಗಿ ಕತ್ತರಿಸಿ ಅದನ್ನು ಪೂರ್ಣವಾಗಿರುವ ಪ್ಲೇಟ್‌ನ ಎರಡೂ ಬದಿಗೆ ಅಂಟಿಸಬೇಕು. ನಂತರ ಪೂರ್ಣ ಪ್ಲೇಟ್‌ನ ಮೇಲೆ ಒಂದು ತೂತ ಮಾಡಿ ಅದಕ್ಕೆ ರಿಬ್ಬನ್ ಹಾಕಿ ಆಕರ್ಷಕವಾಗಿ ಕಟ್ಟಬೇಕು. ನಂತರ ಪ್ಲೇಟ್ ಅನ್ನು ವಿನ್ಯಾಸಗೊಳಿಸಿದರೆ ಗೋಡೆಗೆ ತೂಗು ಹಾಕಲು ಒಂದು ಅಲಂಕಾರಿಕ ವಸ್ತು ರೆಡಿ.

ಟೀ ಅಥವಾ ಕಾಫಿ ಕಪ್: ಹಳೆಯ ಕಪ್ ಬಳಸಿ ಬೋರಾಗಿದ್ದರೆ ಅದನ್ನು ಬಿಸಾಡದೆ ಕಪ್ ಹೊರಭಾಗದಲ್ಲಿ ಪೇಯಿಂಟ್ ಮಾಡಿದರೆ ಆಕರ್ಷಕವಾ ಪೆನ್‌ ಸ್ಟ್ಯಾಂಡ್ ಆಗುತ್ತದೆ. ಹೀಗೆ ಕಸದ ಬುಟ್ಟಿಗೆ ಸೇರಬೇಕಾದ ವಸ್ತುಗಳಿಂದ ಕ್ರಿಯಾತ್ಮಕವಾಗಿ ತಯಾರಿಸಲು ನಿಮಗೆ ಗೊತ್ತಿದ್ದರೆ ನಮಗೆ ಬರೆದು ಕಳುಹಿಸಿದರೆ ಪ್ರಕಟಿಸಲಾಗುವುದು.