ಮಳೆಗಾಲದ ನಂ.1 ಫುಡ್ ಯಾವುದು ಗೊತ್ತಾ? ಎಲ್ಲೆಡೆ ಇದರದ್ದೇ ಕ್ರೇಜ್.. ಟಾಪ್ 10 ಭಕ್ಷ್ಯಗಳಿವು

ಒಂದುಕಡೆ ಮಳೆ ಹನಿಗಳ ಸದ್ದು, ಒದ್ದೆಯಾದ ಮಣ್ಣಿನ ಪರಿಮಳ. ಮತ್ತೊಂದು ಕಡೆ ಬಿಸಿಬಿಸಿಯಾದ, ಕುರುಕುಲಾದ ಮತ್ತು ಹಳೆಯ ನೆನಪುಗಳನ್ನು ಮರುಕಳಿಸುವಂತಹ ತಿಂಡಿಗಳ ಬಯಕೆ. ಭಾರತದಲ್ಲಿ ಮಳೆಗಾಲ ಕೇವಲ ಒಂದು ಋತುವಲ್ಲ. ಇದು ಆಹಾರದ ಮೂಲಕ ಅನುಭವಿಸಬಹುದಾದ ಒಂದು ನವಿರಾದ ಭಾವನೆ. ದೇಶದ ಹಲವು ರಾಜ್ಯಗಳಲ್ಲಿ ಮಳೆಗೆ ತಕ್ಕಂತಹ ಖಾರವಾದ, ಕರಿದ ಅಥವಾ ಬಿಸಿಬಿಸಿ ತಿಂಡಿಗಳನ್ನು ಜನರು ಬಯಸುತ್ತಾರೆ. ಹಾಗಿದ್ರೆ, ಮಳೆಗಾಲದ ನೆಚ್ಚಿನ ಆಹಾರ (Monsoon Food) ಯಾವುದು ಗೊತ್ತಾ? ಈ ಬಗ್ಗೆ ಇಲ್ಲಿದೆ ಮಾಹಿತಿ.

ಭಾರತೀಯ ಪಾಕಶಾಲೆಯ ವೇದಿಕೆ (Indian Culinary Forum) 2024 ರಲ್ಲಿ ಸಮೀಕ್ಷೆ ನಡೆಸಿದೆ. ಈ ಸಮೀಕ್ಷೆ ನೀಡಿದ ಅಚ್ಚರಿಯ ಫಲಿತಾಂಶ ನೀಡಿದೆ. ಇದರಲ್ಲಿ 15 ರಾಜ್ಯಗಳ 15,000ಕ್ಕೂ ಹೆಚ್ಚು ಜನರು ಮಳೆಗಾಲದಲ್ಲಿ ತಿನ್ನಲು ಬಯಸುವ ಆಹಾರಗಳ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ. ಈ ಸಮೀಕ್ಷೆಯ ಫಲಿತಾಂಶವು ಸಂಪ್ರದಾಯ, ನೆಮ್ಮದಿ ಮತ್ತು ಬೀದಿ ಬದಿಯ ಆಹಾರದ ರುಚಿಕರ ಮಿಶ್ರಣವಾಗಿದೆ. ಬನ್ನಿ, ಮಳೆಗಾಲದಲ್ಲಿ ಜನರು ಹೆಚ್ಚಾಗಿ ಇಷ್ಟಪಡುವ ಆಹಾರಗಳು (India's No. 1 Monsoon Food) ಯಾವುವು? ಎಂಬ ಬಗ್ಗೆ ಈಗ ತಿಳಿಯೋಣ.

ಜನರು ಇಷ್ಟಪಡುವ ಟಾಪ್ 10 ಮಳೆಗಾಲದ ಆಹಾರಗಳಿವು

1. ಪಕೋಡ ಅಥವಾ ಬಜ್ಜಿ - ಶೇ.78%

ಪಕೋಡ ಅಥವಾ ಬಜ್ಜಿ ಸಾರ್ವಕಾಲಿಕ ಅಚ್ಚುಮೆಚ್ಚಿನ ತಿನಿಸಾಗಿದೆ. ಪಕೋಡಗಳು ಮಳೆಗಾಲದಲ್ಲಿ ಭಾರತದ ನೆಚ್ಚಿನ ತಿಂಡಿಯಾಗಿದೆ. ಇದು ಈರುಳ್ಳಿ, ಆಲೂಗಡ್ಡೆ, ಪನ್ನೀರ್ ಅಥವಾ ಪಾಲಕ್ ಆಗಿರಲಿ. ಸಾಮಾನ್ಯವಾಗಿ ಶುಂಠಿ ಚಹಾದೊಂದಿಗೆ ಸವಿಯುವ ಪಕೋಡಗಳು ಉತ್ತರ, ಪಶ್ಚಿಮ ಮತ್ತು ದಕ್ಷಿಣ ಭಾರತದ ಭಾಗಗಳಲ್ಲಿ ಮೊದಲ ಸ್ಥಾನವನ್ನು ಪಡೆದುಕೊಂಡಿವೆ.

ಸಮೀಕ್ಷೆಯ ಪ್ರಕಾರ, ಪ್ರತಿ ಐವರು ಭಾರತೀಯರಲ್ಲಿ ನಾಲ್ವರು ಪಕೋಡವನ್ನು ತಮ್ಮ ನೆಚ್ಚಿನ ಮಳೆಗಾಲದ ತಿಂಡಿ ಎಂದು ಆಯ್ಕೆ ಮಾಡಿದ್ದಾರೆ. ಮುಂಬೈ, ದೆಹಲಿ, ಜೈಪುರ ಮತ್ತು ಲಕ್ನೋ ನಗರಗಳಲ್ಲಿ ಮಳೆಗಾಲದಲ್ಲಿ ಪಕೋಡಗಳ ಮಾರಾಟವು ಶೇ.40 ರಷ್ಟು ಹೆಚ್ಚಾಗುತ್ತದೆ ಎಂದು ಝೊಮ್ಯಾಟೊ ಫುಡ್ ಇಂಡೆಕ್ಸ್ 2023 ಬಹಿರಂಗಪಡಿಸಿದೆ.

2. ಮಸಾಲಾ ಚಹಾ - ಶೇ.71%

ಮಸಾಲಾ ಚಹಾ ಮಳೆಯ ಅತ್ಯುತ್ತಮ ಸಂಗಾತಿ. ಇದು ಕೇವಲ ಪಾನೀಯವಲ್ಲ, ಇದೊಂದು ಭಾವನೆ. ಶುಂಠಿ, ಏಲಕ್ಕಿ, ತುಳಸಿ ಮತ್ತು ಕರಿಮೆಣಸು ಮಸಾಲಾ ಚಹಾದ ಸಾಮಾನ್ಯ ಪದಾರ್ಥಗಳಾಗಿವೆ. ಮಳೆಗಾಲದಲ್ಲಿ, ರಸ್ತೆಯ ಬದಿಯ ಟೀ ಅಂಗಡಿಯಲ್ಲಿ ಒಂದು ಲೋಟ ಚಹಾವನ್ನು ಕುಡಿಯುವುದು ಬೇರೆ ರೀತಿಯ ಆನಂದ ನೀಡುತ್ತದೆ. ಭಾರತದಲ್ಲಿ ವಾರ್ಷಿಕವಾಗಿ 837,000 ಟನ್‌ಗಳಿಗಿಂತ ಹೆಚ್ಚು ಚಹಾ ಸೇವಿಸಲಾಗುತ್ತಿದೆ. ಮಳೆಗಾಲದ ತಿಂಗಳುಗಳಲ್ಲಿ ಚಹಾದ ಮಾರಾಟವು ಶೇ.30 ರಷ್ಟು ಹೆಚ್ಚಾಗುತ್ತದೆ ಎಂದು ಟೀ ಬೋರ್ಡ್ ಆಫ್ ಇಂಡಿಯಾ ಹೇಳಿದೆ.

3. ವಡಾ ಪಾವ್

ಮುಂಬೈನಲ್ಲಿ ಮಳೆಗಾಲವು ಈ ಖಾರವಾದ ವಡಾ ಪಾವ್ ಇಲ್ಲದೆ ಪೂರ್ಣಗೊಳ್ಳುವುದಿಲ್ಲ. ಇದು ಪ್ರತಿಯೊಂದು ಬೀದಿ ಮೂಲೆಯಲ್ಲಿಯೂ ಮಾರಾಟವಾಗುತ್ತದೆ. ವಡಾ ಪಾವ್ ಕೈಗೆಟಕುವ ದರದಲ್ಲಿ ಲಭ್ಯವಿದ್ದು, ಹೊಟ್ಟೆ ತುಂಬಿಸುತ್ತದೆ. ಮುಂಬೈನ ಶೇ.92 ರಷ್ಟು ಜನರು ವಡಾ ಪಾವನ್ನು ತಮ್ಮ ನೆಚ್ಚಿನ 'ಮಳೆಗಾಲದ ತಿಂಡಿ' ಎಂದು ಆಯ್ಕೆ ಮಾಡಿದ್ದಾರೆ.

4. ಖಿಚಡಿ

ಇದು ಮಳೆಗಾಲದ ನೆಮ್ಮದಿಯ ಆಹಾರ. ಮಳೆಗಾಲದಲ್ಲಿ ಮೂಂಗ್ ದಾಲ್ ಖಿಚಡಿ ಮೆದುವಾದ, ಸರಳ ಮತ್ತು ಮನಸ್ಸಿಗೆ ಹಿತ ನೀಡುತ್ತದೆ. ಇದು ಬಂಗಾಳಿ, ಗುಜರಾತಿ ಮತ್ತು ಮಹಾರಾಷ್ಟ್ರದ ಮನೆಗಳಲ್ಲಿ ತಯಾರಿಸುವ ಸಾಮಾನ್ಯ ಆಹಾರ. ಇದಕ್ಕೆ ಸ್ವಲ್ಪ ತುಪ್ಪ ಮತ್ತು ಪಕ್ಕದಲ್ಲಿ ಸ್ವಲ್ಪ ಪಪ್ಪಡಿಯನ್ನು ಹಾಕಿಕೊಂಡು ತಿಂದರೆ ಮಳೆಗಾಲಕ್ಕೆ ಹೇಳಿಮಾಡಿಸಿದ ತಿಂಡಿ. ಮಳೆಗಾಲದಲ್ಲಿ ದೇಹದ ಜೀರ್ಣಕಾರಿ ಶಕ್ತಿಯು ತೇವಾಂಶದಿಂದ ದುರ್ಬಲಗೊಳ್ಳುತ್ತದೆ. ಆದ್ದರಿಂದ, ಖಿಚಡಿ ಜೀರ್ಣಕ್ರಿಯೆಯನ್ನು ಸರಾಗಗೊಳಿಸಲು ಸಹಾಯ ಮಾಡುತ್ತದೆ.

5. ಕಾರ್ನ್ - ಶೇ.65%

ಈ ಬೀದಿ ಬದಿಯ ತಿನಿಸು ಯಾರಿಗೆ ತಾನೆ ಇಷ್ಟವಿಲ್ಲ ಹೇಳಿ. ಕಾರ್ನ್ (ಭುಟ್ಟಾ) ಮಳೆಗಾಲದಲ್ಲಿ ತಿನ್ನಲು ಸಿಗುವಂತಹ ಒಂದು ಜನಪ್ರಿಯ ಆಹಾರ. ಇದರ ವಾಸನೆ, ನಿಂಬೆಹಣ್ಣು ಮತ್ತು ಮಸಾಲೆಯ ಪರಿಮಳವು ಮಳೆಗಾಲಕ್ಕೆ ಹೇಳಿಮಾಡಿಸಿದ ತಿನಿಸು. ಇದು ರಸ್ತೆ ಬದಿಯ ಅಂಗಡಿಗಳು, ಬೆಟ್ಟಗಳು ಅಥವಾ ಕಡಲತೀರಗಳಲ್ಲಿ ಲಭ್ಯವಿದೆ. ತಿನ್ನಲು ರುಚಿಕರ ಮತ್ತು ಹೊಟ್ಟೆಗೂ ಒಳ್ಳೆಯದು. ಹಿಮಾಚಲ ಮತ್ತು ಉತ್ತರಾಖಂಡದಲ್ಲಿ, ಇದನ್ನು ಹಿಮಾಲಯನ್ ಉಪ್ಪಿನೊಂದಿಗೆ ನೀಡಲಾಗುತ್ತದೆ. ಗುಜರಾತ್‌ನಲ್ಲಿ, ಚಾಟ್ ಮಸಾಲಾ ಮತ್ತು ಮೆಣಸಿನಕಾಯಿಯನ್ನು ಬೆರೆಸಿ ಸವಿಯುತ್ತಾರೆ.

6. ಸಮೋಸಾ ಮತ್ತು ಜಲೇಬಿ

ಸಮೋಸಾ ಮತ್ತು ಜಲೇಬಿ ಉತ್ತರ ಭಾರತದ ಜನಪ್ರಿಯ ಕಾಂಬೊ. ಮಳೆಗಾಲದ ಮಧ್ಯಾಹ್ನಗಳಲ್ಲಿ ಈ ಬಿಸಿ ಮತ್ತು ಸಿಹಿ ತಿನಿಸುಗಳನ್ನು ತಿನ್ನಲು ಅನೇಕ ಜನರು ಇಷ್ಟಪಡುತ್ತಾರೆ. ಸಮೋಸಾದ ಗರಿಗರಿಯಾದ ಹೊರಭಾಗ ಮತ್ತು ಒಳಗಡೆ ಆಲೂ ಮಸಾಲೆಯ ರುಚಿ, ನಂತರ ಜಲೇಬಿಯ ಸಿಹಿ ಸವಿಯನ್ನು ಸವಿಯುವುದು ಒಂದು ರೀತಿಯ ಆನಂದ ನೀಡುತ್ತದೆ. ಉತ್ತರ ಪ್ರದೇಶ ಮತ್ತು ದೆಹಲಿಯಲ್ಲಿ, ಪಕೋಡಗಳ ಬಳಿಕ ಈ ಕಾಂಬೊ ಎರಡನೇ ಸ್ಥಾನದಲ್ಲಿದೆ.

7. ಪಖಾಲ ಭಾತಾ

ಇದು ಒಡಿಶಾದ ಮಳೆಗಾಲದ ಪ್ರಮುಖ ಆಹಾರ. ಇದು ಅಷ್ಟಾಗಿ ಪರಿಚಯವಿಲ್ಲದ ಒಂದು ಆಹಾರ. ಇದಕ್ಕೆ ಹುದುಗಿಸಿದ ಅನ್ನದ ಜೊತೆಗೆ ನೀರು, ಮೊಸರು, ಹಸಿ ಮೆಣಸಿನಕಾಯಿ ಮತ್ತು ನಿಂಬೆಹಣ್ಣನ್ನು ಬಳಸಲಾಗುತ್ತದೆ. ಇದು ಹೊಟ್ಟೆಯನ್ನು ತಂಪಾಗಿರಿಸಲು ಮತ್ತು ಆಯಾಸವನ್ನು ತಡೆಯಲು ಸಹಾಯ ಮಾಡುತ್ತದೆ. ಇದು ನೈಸರ್ಗಿಕ ಪ್ರೋಬಯಾಟಿಕ್ ಆಗಿ ಕೆಲಸ ನಿರ್ವಹಿಸುತ್ತದೆ. ಕರುಳಿನ ಆರೋಗ್ಯ ಮತ್ತು ಜಲಸಂಚಯನವನ್ನು ಸುಧಾರಿಸುತ್ತದೆ.

8. ಮೊಮೊಸ್

ಮೊಮೊಸ್ ಈಶಾನ್ಯದಿಂದ ಮೆಟ್ರೋ ನಗರಗಳ ನೆಚ್ಚಿನ ತಿನಿಸಾಗಿದೆ. ತರಕಾರಿಗಳು ಅಥವಾ ಮಾಂಸದಿಂದ ತುಂಬಿದ ಬಿಸಿ ಬಿಸಿಯಾದ ಮೊಮೊಸ್ ಅನ್ನು ಕೆಂಪು ಮೆಣಸಿನಕಾಯಿ ಚಟ್ನಿಯೊಂದಿಗೆ ಸವಿಯಬಹುದು. ಇದು ಮಳೆಗಾಲದಲ್ಲಿ ತಿನ್ನಲು ಹೇಳಿಮಾಡಿಸಿದ ತಿನಿಸು. ದೆಹಲಿ, ಸಿಕ್ಕಿಂ, ಅರುಣಾಚಲ ಮತ್ತು ಡಾರ್ಜಿಲಿಂಗ್‌ನಲ್ಲಿ ಇದನ್ನು ಹೆಚ್ಚಾಗಿ ಇಷ್ಟಪಡುತ್ತಾರೆ. ಝೊಮ್ಯಾಟೊ (Zomato) ವರದಿಯ ಪ್ರಕಾರ, ಮೆಟ್ರೋ ನಗರಗಳಲ್ಲಿ 2023ರ ಜುಲೈ ಮತ್ತು ಸೆಪ್ಟೆಂಬರ್ ತಿಂಗಳಲ್ಲಿ ಮೊಮೊಸ್ ಆರ್ಡರ್‌ಗಳು ಶೇ.35 ರಷ್ಟು ಹೆಚ್ಚಾಗಿದೆ.

9. ಸಬುದಾನ ಖಿಚಡಿ

ಸಬುದಾನ ಖಿಚಡಿಯು ಲಘು ಮತ್ತು ಹೊಟ್ಟೆ ತುಂಬಿಸುವಂತಹ ತಿನಿಸಾಗಿದೆ. ಇದು ಮಹಾರಾಷ್ಟ್ರ ಮತ್ತು ಮಧ್ಯಪ್ರದೇಶದಲ್ಲಿ ಜನಪ್ರಿಯ ಆಹಾರವಾಗಿದೆ. ಇದು ಉಪವಾಸದ ಸಮಯದಲ್ಲಿ ತಿನ್ನಲು ಆರೋಗ್ಯಕರ ಮತ್ತು ಹಿತವಾದ ತಿಂಡಿ. ಕಡಲೆಕಾಯಿ, ಕರಿಬೇವಿನ ಎಲೆಗಳು ಮತ್ತು ನಿಂಬೆಹಣ್ಣು ಇದನ್ನು ಮಳೆಗಾಲದಲ್ಲಿ ತಿನ್ನಲು ಹೇಳಿಮಾಡಿಸಿದ ರುಚಿ ನೀಡುತ್ತದೆ.

10. ಹಲೀಮ್

ಇದು ಮಳೆಗಾಲ ಮತ್ತು ರಂಜಾನ್ ಹಬ್ಬದ ಸಮಯದಲ್ಲಿ ವಿಶೇಷವಾಗಿ ತಯಾರಿಸುವ ತಿನಿಸು. ಆದರೂ, ಹೈದರಾಬಾದ್‌ನಲ್ಲಿ ಮಳೆಗಾಲದಲ್ಲಿ ಇದನ್ನು ಹೆಚ್ಚಾಗಿ ಮಾರಾಟ ಮಾಡಲಾಗುತ್ತದೆ. ಹಲೀಮ್ ಕುರಿಮಾಂಸ, ಬೇಳೆಕಾಳು ಮತ್ತು ಮಸಾಲೆ ಪದಾರ್ಥಗಳನ್ನು ಬಳಸಿ ತಯಾರಿಸಲಾಗುತ್ತದೆ. ಇದು ಬೆಚ್ಚಗಿನ ವಾತಾವರಣಕ್ಕೆ ಸೂಕ್ತ.

ಹೆಚ್ಚು ಜನಪ್ರಿಯ ಪ್ರಾದೇಶಿಕ ತಿನಿಸುಗಳು

• ತಮಿಳುನಾಡು: ಬಿಸಿ ರಸಂ, ಬಜ್ಜಿ (ಬಾಳೆಹಣ್ಣಿನ ಚಿಪ್ಸ್) ಮತ್ತು ಫಿಲ್ಟರ್ ಕಾಫಿ.
• ಅಸ್ಸಾಂ: ಬೆಲ್ಲ ಮತ್ತು ಕಪ್ಪು ಚಹಾದೊಂದಿಗೆ ಪಿತಾ
• ಗೋವಾ: ಪೋಯಿ ಬ್ರೆಡ್‌ನೊಂದಿಗೆ ರೋಸ್ ಆಮ್ಲೆಟ್
• ಬಂಗಾಳ: ಬೇಗುನಿ (ಕರಿದ ಬದನೆಕಾಯಿ), ಖಿಚುರಿ ಮತ್ತು ಇಲಿಶ್ ಮಾಚ್

ಕೇವಲ ಛತ್ರಿ ಹಿಡಿಯಬೇಡಿ, ತಿನ್ನುವ ಹಂಬಲ ಇಟ್ಟುಕೊಳ್ಳಿ

ಭಾರತದ ಮಳೆಗಾಲದ ಮೂಡ್ ಎಂದರೆ ಕರಿದ, ಬೇಯಿಸಿದ ಆಹಾರಗಳು. ಮಳೆ ಇರಲಿ ಅಥವಾ ಬಿರುಗಾಳಿ ಇರಲಿ, ಭಾರತೀಯರು ಆಹಾರದಲ್ಲಿ ನೆಮ್ಮದಿ ಕಾಣುತ್ತಾರೆ. ಪಕೋಡದ ಗರಿಗರಿಯಾದ ರುಚಿ, ಖಿಚಡಿಯ ಮೃದುತ್ವ ಅಥವಾ ಚಹಾದ ಬೆಚ್ಚಗಿನ ಅನುಭವ ಇರಬಹುದು. ಈ ತಿಂಡಿಗಳು ಕೇವಲ ಊಟಗಳಲ್ಲ, ಇವು ಮಳೆಯೊಂದಿಗೆ ಬರುವ ನೆನಪುಗಳು. ಹೀಗಾಗಿ, ನೀವು ಸಹ ಮೋಡಗಳು ಕವಿದಾಗ, ಕೇವಲ ಛತ್ರಿ ಹಿಡಿಯಬೇಡಿ. ರುಚಿಕರವಾಗಿ ಏನನ್ನಾದರೂ ತಿನ್ನುವ ಹಂಬಲ ಬೆಳೆಸಿಕೊಳ್ಳಿ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.