ವೃದ್ಧರಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಿಸುವ ಆಹಾರಗಳಿವು

ಕೆಂಪಕ್ಕಿ ಅನ್ನ:

ಕೆಂಪಕ್ಕಿ ಅನ್ನದಲ್ಲಿ ನಾರಿನಂಶ ಅತ್ಯಧಿಕವಿರುತ್ತದೆ ಹಾಗೂ ವಿಟಮಿನ್ಸ್ ಹಾಗೂ ಖನಿಜಾಂಶಗಳಿರುತ್ತವೆ, ಇವುಗಳು ರೋಗ ನಿರೋಧಕ ಶಕ್ತಿ ಹೆಚ್ಚಿಸುವಲ್ಲಿ ಸಹಕಾರಿಯಾಗಿವೆ. ಕೆಂಪಕ್ಕಿಯಲ್ಲಿ ಆ್ಯಂಟಿಆಕ್ಸಿಡೆಂಟ್ ಅಂಶ ಅಧಿಕವಿರುತ್ತದೆ, ಇದು ದೇಹದಲ್ಲಿರುವ ಕಶ್ಮಲಗಳನ್ನು ಹೊರ ಹಾಕುವಲ್ಲಿಯೂ ಸಹಕಾರಿ.

ಸಿಹಿ ಗೆಣಸು

ಸಿಹಿ ಗೆಣಸಿನಲ್ಲಿ ಬೀಟಾ ಕೆರೋಟಿನ್ ಮತ್ತು ವಿಟಮಿನ್ ಎ ಅಧಿಕವಿರುವುದರಿಂದ ವಯಸ್ಸಾದವರು ಇದನ್ನು ತಿನ್ನುವುದು ಒಳ್ಳೆಯದು. ಅಲ್ಲದೆ ಇದರಲ್ಲಿರುವ ಕಾರ್ಬೋಹೈಡ್ರೇಟ್ಸ್ ಕೂಡ ದೇಹಕ್ಕೆ ಶಕ್ತಿಯನ್ನು ನೀಡುತ್ತದೆ. ಇದನ್ನು ವಾರದಲ್ಲಿ ಒಮ್ಮೆಯಾದರೂ ಸೇವಿಸುವುದು ಒಳ್ಳೆಯದು.

ಪಾಲಾಕ್

ಪಾಲಾಕ್‌ನಲ್ಲಿ ವಿಟಮಿನ್ ಸಿ, ಆ್ಯಂಟಿಆಕ್ಸಿಡೆಂಟ್, ಬೀಟಾ ಕೆರೋಟಿನ್, ವಿಟಮಿನ್ ಕೆ ಇರುವುದರಿಂದ ಇದನ್ನು ತಿನ್ನುವುದರಿಂದ ರೋಗ ನಿರೋಧಕ ಶಕ್ತಿ ಹೆಚ್ಚುವುದು. ಇದನ್ನು ಪಲ್ಯ, ಸಾರು, ಜ್ಯೂಸ್‌ ಹೀಗೆ ಅನೇಕ ರುಚಿಯಲ್ಲಿ ಸವಿಯಬಹುದಾಗಿದೆ.

ಮೊಟ್ಟೆ

ಮೊಟ್ಟೆಯಲ್ಲಿ ಪ್ರೊಟೀನ್ ಹಾಗೂ ವಿಟಮಿನ್ಸ್ ಇರುವುದರಿಂದ ರೋಗ ನಿರೋಧಕ ಶಕ್ತಿ ಹೆಚ್ಚಿಸುತ್ತದೆ. ಇದನ್ನು ವಯಸ್ಸಾದ ಮೇಲೆ ಪ್ರತಿದಿನ ಒಂದು ಸೇವಿಸಿದರೆ ಒಳ್ಳೆಯದು. ಇದು ದೇಹಕ್ಕೆ ಅಗ್ಯತವಾದ ಪ್ರೊಟೀನ್ ಹಾಗೂ ಪೋಷಕಾಂಶ ಒದಗಿಸುತ್ತದೆ.

ಮೊಸರು

ಮೊಸರು ತಿನ್ನುವುದರಿಂದ ಹೊಟ್ಟೆ ಆರೋಗ್ಯ ವೃದ್ಧಿಯಾಗುವುದು. ರೋಗ ನಿರೋಧಕ ಶಕ್ತಿ ಹೆಚ್ಚಿಸುವಲ್ಲಿ ಚಯಾಪಚಯ ಕ್ರಿಯೆ ಚೆನ್ನಾಗಿ ನಡೆಯಬೇಕು. ಇದು ಹೊಟ್ಟೆಯಲ್ಲಿರುವ ಕೆಟ್ಟ ಕೊಲೆಸ್ಟ್ರಾಲ್ ಕಡಿಮೆ ಮಾಡುತ್ತದೆ.

ಗಿಡ ಮೂಲಿಕೆಗಳು

ಆಹಾರದಲ್ಲಿ ಗಿಡ ಮೂಲಿಕೆಗಳು ಕೂಡ ಹೆಚ್ಚಾಗಿ ಇರಲಿ. ಶುಂಠಿ, ಅರಿಶಿಣ, ಒರೆಗ್ನೋ, ಇನ್ನು ಸಂಬಾರ ಪದಾರ್ಥಗಳಾದ ಚಕ್ಕೆ, ಲವಂಗ ಇವೆಲ್ಲಾ ಅಡುಗೆಯಲ್ಲಿ ಇರಲಿ. ಅಲ್ಲದೆ ಕೆಲವೊಂದು ಆಯುರ್ವೇದ ಔಷಧಗಳನ್ನು ಕೂಡ ತೆಗೆದುಕೊಳ್ಳಬಹುದು. ಹೀಗೆ ಮಾಡುವುದರಿಂದ ವಯಸ್ಸಾದಾಗ ಕಾಡುವ ಅನೇಕ ಸಮಸ್ಯೆಗಳನ್ನು ದೂರವಿಡಬಹುದು.

ತೆಳು ಮಾಂಸ

ವಯಸ್ಸಾಗುತ್ತಿದ್ದಂತೆ ಜೀರ್ಣಕ್ರಿಯೆ ಸಾಮಾರ್ಥ್ಯ ಸ್ವಲ್ಪ ಕಡಿಮೆಯಾಗುವುದರಿಂದ ಕೊಬ್ಬಿನಂಶ ಕಡಿಮೆ ಇರುವ ಮಾಂಸಾಹಾರ ಸೇವನೆ ಮಾಡಿ. ಮೀನು ತಿನ್ನಿ. ಇದರಿಂದ ವಿಟಮಿನ್ ಇ ಹಾಗೂ ಒಮೆಗಾ 3 ಕೊಬ್ಬಿನಂಶ ದೊರೆಯುತ್ತದೆ. ಈ ಆಹಾರಗಳು ದೇಹವನ್ನು ಅನೇಕ ಕಾಯಿಲೆಯಿಂದ ರಕ್ಷಿಸುತ್ತದೆ. ದೇಹದಲ್ಲಿ ಪ್ರೊಟೀನ್ ಹಾಗೂ ವಿಟಮಿನ್ ಕಡಿಮೆಯಾಗದಂತೆ ನೋಡಿಕೊಳ್ಳುತ್ತದೆ.

ನೀರು

ಸಾಕಷ್ಟು ನೀರು ಕುಡಿಯಿರಿ, ಅದರಲ್ಲೂ ಬೆಚ್ಚಗಿನ ನೀರು ಕುಡಿಯಿರಿ. ದಿನಕ್ಕೆ ಒಂದು ಲೋಟ ತಾಜಾ ಹಣ್ಣಿನ ಜ್ಯೂಸ್ ಕುಡಿಯಿರಿ. ಹೀಗೆ ದೇಹದಲ್ಲಿ ನೀರಿನಂಶ ಕಡಿಮೆಯಾಗದಂತೆ ನೋಡಿಕೊಳ್ಳಿ. ಇನ್ನು ಸಣ್ಣ ಪುಟ್ಟ ಶೀತ, ಕೆಮ್ಮು ಹೋಗಲಾಡಿಸಲು ಕಷಾಯ ಮಾಡಿ ಕುಡಿಯಿರಿ. ಸೂಪ್ ಕೂಡ ಒಳ್ಳೆಯದು. ಹೀಗೆ ಮಾಡುವುದರಿಂದ ದೇಹವು ಚಟುವಟಿಕೆಯಿಂದ ಇರುವುದು.

ಹೀಗೆ ಆರೋಗ್ಯಕರ ಆಹಾರಕ್ರಮ ಪಾಲಿಸುವುದರ ಜೊತೆಗೆ ದಿನದಲ್ಲಿ ಅರ್ಧಗಂಟೆ ವಾಕಿಂಗ್ ಅಥವಾ ಯೋಗಕ್ಕೆ ಮೀಸಲಿಡಿ, ಧ್ಯಾನ ಮಾಡಿ, ಇವೆಲ್ಲಾ ಆರೋಗ್ಯ ವೃದ್ಧಿಗೆ ಸಹಕಾರಿ.