ಇಂತಹ 7 ಲಕ್ಷಣಗಳು ಕಂಡುಬಂದರೆ- ಕಿಡ್ನಿಯಲ್ಲಿ ಸಮಸ್ಯೆ ಇದೆ ಎಂದರ್ಥ!!

1. ಸತತವಾಗಿ ಮೂತ್ರವಿಸರ್ಜನೆಗೆ ಅವಸರವಾಗುವುದು

ಒಂದು ವೇಳೆ ಸಾಮಾನ್ಯಕ್ಕೂ ಹೆಚ್ಚಿನ ಪ್ರಮಾಣದ ನೀರನ್ನು ಸೇವಿಸದೆಯೂ ಸತತವಾಗಿ ಮೂತ್ರ ವಿಸರ್ಜನೆಗೆ ಅವಸರವಾಗುತ್ತಿದ್ದರೆ, ಅಥವಾ ಮಧುಮೇಹ ಇಲ್ಲದೇ ಇದ್ದರೆ ಅಥವಾ ನೀವು ಮಹಿಳೆಯಾಗಿದ್ದು ಗರ್ಭಿಣಿಯೂ ಆಗಿರದಿದ್ದರೆ ಇದು ಮೂತ್ರಪಿಂಡದಲ್ಲಿ ಸೋಂಕು ಉಂಟಾಗಿರುವ ಬಗ್ಗೆ ದೇಹ ಮೌನವಾಗಿ ನೀಡುತ್ತಿರುವ ಸ್ಪಷ್ಟ ಸಂಕೇತವಾಗಿದೆ. ಮೂತ್ರಪಿಂಡದ ಒಳಭಾಗದಲ್ಲಿರುವ ಅಂಗಾಂಶಗಳು ಬ್ಯಾಕ್ಟೀರಿಯಾಗಳ ಮೂಲಕ ಸೋಂಕಿಗೆ ಒಳಗಾಗಿದ್ದರೆ ಇಲ್ಲಿ ಉರಿಯೂತವುಂಟಾಗಿ ಉರಿ ಎದುರಾಗುತ್ತದೆ. ಇದು ಮೂತ್ರಕೋಶವನ್ನು ಪ್ರಚೋದಿಸಿ ಇದ್ದಷ್ಟು ಅಲ್ಪ ಪ್ರಮಾಣದ ಮೂತ್ರದ ಸಂಗ್ರಹವನ್ನೂ ವಿಸರ್ಜಿಸಲು ಸಂಕೇತ ನೀಡುವಂತೆ ಮಾಡುವುದರಿಂದಲೇ ಪದೇ ಪದೇ ಮೂತ್ರಕ್ಕೆ ಅವಸರವಾಗುತ್ತದೆ.

2. ಮೂತ್ರದಿಂದ ಕಟುವಾದ ಘಾಟುವಾಸನೆ ಸೂಸುವುದು

ಒಂದು ವೇಳೆ ಮೂತ್ರ ವಿಸರ್ಜಿಸಿದ ಬಳಿಕ ಏನೋ ಕೊಳೆತಂತಹ ವಾಸನೆ ಬರುತ್ತಿದ್ದು ಇದು ನಿಮ್ಮ ಮೂತ್ರದಿಂದಲೇ ಎಂದು ಖಚಿತವಾದರೆ ಇದು ದೇಹ ನೀಡುವ ಇನ್ನೊಂದು ಸ್ಪಷ್ಟ ಸೂಚನೆಯಾಗಿದೆ. ಸಾಮಾನ್ಯವಾಗಿ ಮೂತ್ರದಿಂದ ಕೊಂಚ ವಾಸನೆ ಸದಾ ಹೊಮ್ಮುತ್ತದೆ ಹಾಗೂ ಈ ವಾಸನೆಯನ್ನು ನಮ್ಮ ಮೂಗು ಗ್ರಹಿಸೀ ಗ್ರಹಿಸೀ ಅಭ್ಯಾಸವಾಗಿಬಿಟ್ಟಿರುತ್ತದೆ. ಯಾವಾಗ ಸೋಂಕು ಎದುರಾಯಿತೋ ಆಗಿನಿಂದ ಪ್ರತಿಬಾರಿಯೂ ಮೂತ್ರವಿಸರ್ಜಿಸಿದಾಗ ಕಟುವಾದ ವಾಸನೆ ಹೊಮ್ಮುತ್ತದೆ. ಮೂತ್ರಪಿಂಡಗಳ ಒಳಗೆ ಸೋಂಕು ಎದುರಾದಾಗ ನಮ್ಮ ಜೀವನಿರೋಧಕ ವ್ಯವಸ್ಥೆ ಈ ಬ್ಯಾಕ್ಟೀರಿಯಾಗಳ ವಿರುದ್ದ ಹೋರಾಡಿ ಬಿಳಿರಕ್ತಕಣಗಳು ಸಾಯುತ್ತವೆ. ಈ ಸತ್ತ ಜೀವಕೋಶಗಳನ್ನು 'ಕೀವು' (pus cells) ಎಂದು ಕರೆಯುತ್ತೇವೆ. ಗಾಯ ಸೋಂಕಿ ಒಳಗಾದರೆ ಮೂಡುವಂತಹ ಕೀವನ್ನೇ ಹೋಲುವ ಈ ಕೀವು ದುರ್ನಾತ ಹೊಂದಿದ್ದು ಮೂತ್ರದಲ್ಲಿ ಮಿಶ್ರಣಗೊಂಡು ಹೊರಬಿದ್ದಾಗ ದುರ್ನಾತವನ್ನು ಗಾಳಿಯಲ್ಲಿ ಪಸರಿಸತೊಡಗುತ್ತದೆ.

3. ಮೂತ್ರ ವಿಸರ್ಜಿಸಲು ಒತ್ತಡ ಹೇರಿದಾಗ ಎದುರಾಗುವ ನೋವು

ಹಲವು ಸಮಯದಲ್ಲಿ, ಹೆಚ್ಚಿನವರು, ವಿಶೇಷವಾಗಿ ಮಹಿಳೆಯರು ಮೂತ್ರ ವಿಸರ್ಜಿಸಲು ಪ್ರಾರಂಭಿಸಿದಾಗ ಉರಿ ಅಥವಾ ನೋವಿನ ಅನುಭವವನ್ನು ಅನುಭವಿಸುತ್ತಾರೆ ಹಾಗೂ ಮೂತ್ರಕ್ಕೆ ಒತ್ತಡ ಹೇರಿದರೂ ಸಾಮಾನ್ಯಕ್ಕಿಂತಲೂ ತಡವಾಗಿ ಮೂತ್ರದ ಹರಿವು ಪ್ರಾರಂಭವಾಗುತ್ತದೆ. ಸಾಮಾನ್ಯವಾಗಿ ಈ ಸೂಚನೆಯನ್ನು ಮೂತ್ರನಾಳದ ಸೋಂಕು ಎಂದೇ ಭಾವಿಸಿ 'ಇನ್ನು ಕೊಂಚ ಹೆಚ್ಚು ನೀರು ಕುಡಿಯಬೇಕು' ಎಂಬ ನಿರ್ಧಾರದೊಂದಿಗೆ ಈ ಸೂಚನೆಯನ್ನು ಇವರು ಅಲಕ್ಷಿಸಿಬಿಡುತ್ತಾರೆ. ಆದರೆ ಈ ತೊಂದರೆ ಒಂದು ಅಥವಾ ಎರಡು ದಿನಗಳಲ್ಲಿ ಕಡಿಮೆಯಾಗದೇ ಇದ್ದರೆ, ಹಾಗೂ ಇದರೊಂದಿಗೆ ಈ ಲೇಖನದಲ್ಲಿ ವಿವರಿಸಿರುವ ಬೇರೆ ಲಕ್ಷಣಗಳೂ ಕಂಡುಬಂದರೆ ಇದು ಸಹಾ ಮೂತ್ರಪಿಂಡದಲ್ಲಿ ಸೋಂಕು ಉಂಟಾಗಿರುವ ಸಂಜ್ಞೆ ಎಂದು ತಿಳಿದಿಕೊಳ್ಳಬೇಕು. ಮೂತ್ರಪಿಂಡದ ಸೋಂಕು ನಿಧಾನವಾಗಿ ಮೂತ್ರನಾಳ, ಮೂತ್ರಕೋಶ ಹಾಗೂ ಮೂತ್ರವ್ಯವಸ್ಥೆಯ ತುದಿಯವರೆಗೂ ತಲುಪಬಹುದು ಹಾಗೂ ಈ ನಾಳದ ಒಳಗೋಡೆಗಳಲ್ಲಿಯೂ ಸೋಂಕು ಹರಡಿ ಉರಿಗೆ ಕಾರಣವಾಗಬಹುದು.

4. ಮೂತ್ರ ವಿಸರ್ಜನೆಯ ಪ್ರಾರಂಭ ತೀರಾ ತಡವಾಗುವುದು.

ಒಂದು ವೇಳೆ ಮೂತ್ರ ವಿಸರ್ಜಿಸಲು ಕುಳಿತ ಬಳಿಕವೂ ಕೊಂಚ ಹೊತ್ತಿನವರೆಗೂ ಮೂತ್ರದ ಹರಿವು ಪ್ರಾರಂಭವಾಗದೇ ಇದ್ದರೆ, ಇತರ ಸಮಯಕ್ಕಿಂತಲೂ ಇಂದು ಹೆಚ್ಚೇ ಸಮಯ ತೆಗೆದುಕೊಳ್ಳುತ್ತಿದ್ದು ಮೂತ್ರವೇ ಇಲ್ಲವೇನೋ ಎಂಬ ಭಾವನೆ ಮೂಡಿದರೆ ಇದು ಸಹಾ ಮೂತ್ರಪಿಂಡದ ಸೋಂಕಿನ ಸಂಜ್ಞೆಯಾಗಿರಬಹುದು. ಒಂದು ವೇಳೆ ಈ ಸಮಯದಲ್ಲಿ ಮೂತ್ರ ವಿಸರ್ಜಿಸಲು ಹೆಚ್ಚಿಸುವ ಒತ್ತಡದಿಂದ ನೋವು ಕಾಣಿಸಿಕೊಂಡರೆ ಮೂತ್ರಪಿಂಡದಲ್ಲಿನ ಸೋಂಕು ತೀರಾ ಹೆಚ್ಚಾಗಿ ಒಳಗಿನ ಕೀವು ತುಂಬಾ ಸ್ನಿಗ್ಧರೂಪ ಪಡೆದಿದ್ದು ಮೂತ್ರದ ಹರಿವಿದೆ ಅಡ್ಡಿಪಡಿಸುತ್ತದೆ ಹಾಗೂ ಮೂತ್ರ ಈ ಗಾಢವಾದ ಕೀವನ್ನು ಕರಗಿಸಿಕೊಂಡು ಹೊರಬರುವಾಗ ತೀರಾ ತಡವಾಗುತ್ತದೆ.

5. ಬೆನ್ನುನೋವು

ಮೂತ್ರಪಿಂಡಗಳು ನಮ್ಮ ಬೆನ್ನಿನ ಕೆಳಭಾಗದಲ್ಲಿ ಇರುತ್ತವೆ ಎಂದು ಈಗಾಗಲೇ ಅರಿತಿದ್ದೇವೆ. ಅಂತೆಯೇ ಮೂತ್ರಪಿಂಡಗಳಲ್ಲಿ ಸೋಂಕು ಎದುರಾದಾಗ ಈ ಭಾಗದ ಬೆನ್ನಿನಲ್ಲಿಯೂ ನೋವು ಎದುರಾಗುತ್ತದೆ. ಆದರೆ ಈ ನೋವು ಬೆನ್ನುಮೂಳೆ ಅಥವಾ ಸೊಂಟದ ಮೂಳೆಯ ಉರಿಯೂತದಿಂದ ಎದುರಾಗುವ ಸಾಮಾನ್ಯ ಬೆನ್ನುನೋವಿನಂತಿರದೇ ಬೆನ್ನಿನ ಎರಡೂ ಪಕ್ಕಗಳಲ್ಲಿ ಒಳಭಾಗದಲ್ಲಿ ಚಿಕ್ಕದಾಗಿ ಬೆಂಕಿ ಹೆಚ್ಚಿದಂತೆ ಚಿಕ್ಕದಾಗಿ ಉರಿಯತೊಡಗುತ್ತದೆ. ಈ ಉರಿ ಅಷ್ಟೇನೂ ಭೀಕರ ಎನಿಸದ ಕಾರಣ ಹೆಚ್ಚಿನವರು ಈ ಲಕ್ಷಣವನ್ನು ಉಪೇಕ್ಷಿಸುತ್ತಾರೆ. ಆದರೆ ಈ ಉರಿ ಸತತವಾಗಿ ಕಾಣಿಸಿಕೊಂಡರೆ ಮಾತ್ರ ಇದು ಮೂತ್ರಪಿಂಡಗಳಲ್ಲಿ ಏನೋ ತೊಂದರೆ ಇದೆ ಎಂಬ ಸ್ಪಷ್ಟ ಸೂಚನೆಯಾಗಿದ್ದು ತಕ್ಷಣವೇ ಪರೀಕ್ಷೆಗೊಳಪಡುವುದು ಅನಿವಾರ್ಯವಾಗಿದೆ.

6. ಮೂತ್ರದಲ್ಲಿ ರಕ್ತದ ಇರುವಿಕೆ

ಒಂದು ವೇಳೆ ಮೂತ್ರದೊಂದಿಗೆ ರಕ್ತವೂ ಬರುತ್ತಿದ್ದು ಇದು ದುರ್ವಾಸನೆಯಿಂದ ಕೂಡಿದ್ದರೆ ಹಾಗೂ ಕೊಂಚ ನೋವಿನ ಅನುಭವವೂ ಆಗುತ್ತಿದ್ದರೆ ಇದು ಮೂತ್ರಪಿಂಡದಲ್ಲಿನ ಸೋಂಕಿನ ಸ್ಪಷ್ಟ ಸಂಕೇತವಾಗಿದೆ. ಆದರೆ ಈ ಸೂಚನೆ ಉಲ್ಬಣಗೊಂಡ ಬಳಿಕವೇ ಕಾಣಿಸತೊಡಗುತ್ತದೆ. ಮೂತ್ರಪಿಂಡದ ಒಳಗಿನ ಸೋಂಕು ವಿಪರೀತವಾಗಿ ಉರಿಯೂತವೂ ಅಪಾರವಾಗಿ ಹೆಚ್ಚಿರುವ ಕಾರಣ ಇಲ್ಲಿಂದ ರಕ್ತ ಜಿನುಗತೊಡಗುತ್ತದೆ. ಇದು ಮೂತ್ರದೊಂದಿಗೆ ಮಿಶ್ರಣಗೊಂಡು ಮೂತ್ರವಿಸರ್ಜನೆಯ ಮೂಲಕ ಪ್ರಕಟಗೊಳ್ಳುತ್ತದೆ.

7.ಫ್ಲೂ

ಫ್ಲೂ ಎಂದರೆ ಒಂದು ಬಗೆಯ ಜ್ವರ. ವಾಸ್ತವವಾಗಿ ದೇಹದ ಯಾವುದಾದರೊಂದು ಭಾಗಕ್ಕೆ ವೈರಸ್ಸುಗಳು ಧಾಳಿ ಮಾಡಿದಾಗ ಈ ಧಾಳಿಯನ್ನು ಎದುರಿಸಲು ದೇಹದ ತಾಪಮಾನವನ್ನು ಹೆಚ್ಚಿಸಿ ರೋಗ ನಿರೋಧಕ ವ್ಯವಸ್ಥೆಯನ್ನು ಸನ್ನದ್ಧಗೊಳಿಸುವುದನ್ನೇ ನಾವು ಜ್ವರ ಎಂದು ಕರೆಯುತ್ತೇವೆಯೇ ವಿನಃ ಜ್ವರವೇ ನಿಜವಾದ ಕಾಯಿಲೆಯಲ್ಲ. ಹಾಗಾಗಿ ಫ್ಲೂ ಜ್ವರ ಆವರಿಸಿ ಮೇಲೆ ತಿಳಿಸಿದ ಸೂಚನೆಗಳಲ್ಲಿ ಕನಿಷ್ಟ ಒಂದಾದರೂ ಅನುಭವವಾದರೆ ತಕ್ಷಣವೇ ವೈದ್ಯರಿಂದ ಮೂತ್ರಪಿಂಡಗಳಲ್ಲಿ ಸೋಂಕು ಇರುವ ಬಗ್ಗೆ ಪರೀಕ್ಷೆಗೆ ಒಳಪಡಬೇಕು.