ಮಧ್ಯಾಹ್ನದ ಊಟವಾದ ಕೂಡಲೇ, ನಿದ್ದೆ ಬರಲು ಕಾರಣವೇನು?

ಮಧ್ಯಾಹ್ನದ ಹೊತ್ತೇಕೆ ತೂಕಡಿಕೆ ಹೆಚ್ಚು?

ಈ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳಲು ಪ್ರಯತ್ನಿಸಿದ ಸಂಶೋಧಕರು ಕೆಲವು ಪುರುಷರನ್ನು ಪ್ರಯೋಗಕ್ಕಾಗಿ ಆಯ್ದುಕೊಂಡು ದಿನದ ವಿವಿಧ ಹೊತ್ತಿನಲ್ಲಿ ಇವರ ಮೆದುಳಿನ ಚಟುವಟಿಕೆಯನ್ನು ಸ್ಕ್ಯಾನ್ ಮೂಲಕ ಗಮನಿಸಿದರು. ಮಧ್ಯಾಹ್ನದ ಎರಡು ಗಂಟೆಯ ಬಳಿಕ ನಿಜಕ್ಕೂ ಇವರೆಲ್ಲರ ಮೆದುಳಿನ ಚಟುವಟಿಕೆ ಕಡಿಮೆಯಾಗುವುದನ್ನು ಯಂತ್ರಗಳು ದಾಖಲಿಸಿದವು.

ಇದಕ್ಕೆ ಕಾರಣವೇನಿರಬಹುದು?

ಮನೋಭಾವ ದಿನದ ವಿವಿಧ ಅವಧಿಯಲ್ಲಿ ಮೇಲೆ ಕೆಳಗಾಗಲು ಮೆದುಳಿನ ವಿವಿಧ ಭಾಗಗಳ ಚಟುವಟಿಕೆಗಳಲ್ಲಿ ಏರಿಕೆ ಇಳಿಕೆಯಾಗುವುದನ್ನು ಕಂಡುಕೊಳ್ಳಲಾಗಿದ್ದು ಇವುಗಳನ್ನು ಆಧರಿಸಿದ ಚಟುವಟಿಕೆಗಳೂ ಅದಕ್ಕನುಗುಣವಾಗಿ ಏರುಪೇರಾಗುತ್ತವೆ.

ಹಾಗಾದರೆ ಮಧ್ಯಾಹ್ನದ ಹೊತ್ತಿನಲ್ಲಿ ಏನಾಗುತ್ತದೆ?

ಮೆದುಳಿನ ಕೆಲವು ಭಾಗಗಳಲ್ಲಿ ಚಟುವಟಿಕೆ ಬೆಳಗ್ಗಿನ ಹೊತ್ತು ಅತಿ ಹೆಚ್ಚಾಗಿರುತ್ತದೆ. ಅಂತೆಯೇ ಸಂಜೆಯ ಹೊತ್ತಿನಲ್ಲಿಯೂ ಸಹಾ. ಆದರೆ ಮಧ್ಯಾಹ್ನ ಎರಡರಿಂದ ನಾಲ್ಕು ಗಂಟೆಗಳವರೆಗೆ ಈ ಭಾಗಗಳ ಚಟುವಟಿಕೆ ಕಡಿಮೆಯಾಗುತ್ತದೆ.

ಈ ಮಾಹಿತಿಯನ್ನು ಪಡೆದ ಸಂಶೋಧಕರು ಏನು ಮಾಡಿದರು?

ಈ ಪರೀಕ್ಷೆಯನ್ನು ಸಂಶೋಧಕರು ಹಲವಾರು ಪುರುಷರ ಮೇಲೆ ಪ್ರಯೋಗಿಸಿದರು. ಇವರೆಲ್ಲರಿಗೂ ಜೂಜಾಟಕ್ಕೆ ಸಂಬಂಧಿಸಿದ ಕೆಲವು ಕೆಲಸಗಳನ್ನು ನಿರ್ವಹಿಸಲು ಕೇಳಿಕೊಳ್ಳಲಾಗಿತ್ತು. ಈ ಕೆಲಸವನ್ನು ಮೊದಲಿಗೆ ಬೆಳಿಗ್ಗೆ ಹತ್ತು ಘಂಟೆಗೆ, ಬಳಿಕ ಮಧ್ಯಾಹ್ನ ಎರಡು ಘಂಟೆಗೆ ನಂತರ ಸಂಜೆ ಏಳು ಗಂಟೆಗೆ ಪುನರಾವರ್ತಿಸಲು ತಿಳಿಸಲಾಗಿತ್ತು.

ಈ ಪ್ರಯೋಗದಿಂದ ಏನು ಕಂಡುಕೊಂಡರು?

ಈ ಪ್ರಯೋಗದ ಮಾಹಿತಿಗಳನ್ನು ಪಡೆದಾಗ ಬೆಳಗ್ಗಿನ ಮತ್ತು ಸಂಜೆಯ ಹೊತ್ತಿನ ಮೆದುಳಿನ ಕ್ಷಮತೆ ಹೆಚ್ಚಾಗಿದ್ದು ಮಧ್ಯಾಹ್ನದ ಹೊತ್ತು ಕಡಿಮೆಯಾಗಿತ್ತು.

ಇದಕ್ಕೇ ಏನು ಮಧಾಹ್ನ ಎರಡು ಗಂಟೆಗೆ ಪುರುಷರು ತೂಕಡಿಸುವುದು?

ಹೌದು, ಇದೇ ಕಾರಣಕ್ಕೆ ಪುರುಷರು ಮಧ್ಯಾಹ್ನ ಎರಡು ಗಂಟೆಗೆ ತೂಕಡಿಸಲು ಅಥವಾ ಸೋಮಾರಿತನ ಅನುಭವಿಸಲು ಕಾರಣವಿರಬಹುದು. ಮೆದುಳಿನ ಈ ಭಾಗದ ಚಟುವಟಿಕೆ ಕಡಿಮೆಯಾಗಿರುವ ಕಾರಣ ಎಚ್ಚರಿಕೆ ಅಥವಾ ಜಾಗರೂಕತೆ ವಹಿಸುವ ಪ್ರಮಾಣವೂ ಕಡಿಮೆಯಾಗಿರುತ್ತದೆ. ಅಲ್ಲದೇ ಗ್ರಹಣಶಕ್ತಿಯೂ ಕಡಿಮೆಯಾಗುವ ಕಾರಣ ತೂಕಡಿಕೆ ತಾನೇತಾನಾಗಿ ಆವರಿಸುತ್ತದೆ.

ಈ ಪ್ರಯೋಗದಿಂದ ಯಾವ ಸಹಾಯ ದೊರಕಿದಂತಾಯಿತು?

ಸಂಶೋಧಕರ ಮುಖ್ಯ ಉದ್ದೇಶ ನಿದ್ದೆಯ ಕೊರತೆ ಅಥವಾ ಅಸಮರ್ಪಕ ನಿದ್ದೆಯಿಂದ ಅಥವಾ ಖಿನ್ನತೆಯಿಂದ ಬಳಲುತ್ತಿರುವ ವ್ಯಕ್ತಿಗಳಿಗೆ ಸೂಕ್ತ ಚಿಕಿತ್ಸೆಯನ್ನು ನೀಡುವುದೇ ಆಗಿತ್ತು. ಅಲ್ಲದೇ ಉಳಿದವರು ತಮ್ಮ ಕೆಲಸಗಳಲ್ಲಿ ಗರಿಷ್ಠ ಉತ್ಪಾದನೆಯನ್ನು ಪಡೆಯಲು ತಮ್ಮ ಮುಖ್ಯ ಕೆಲಸಗಳನ್ನು ಮಧ್ಯಾಹ್ನ ಒಂದು ಗಂಟೆಗೂ ಮುನ್ನ ಅಥವಾ ಮೂರು ಗಂಟೆಯ ಬಳಿಕ ನಿರ್ವಹಿಸುವಂತೆ ಬದಲಿಸಬೇಕು ಎಂಬ ತೀರ್ಮಾನಕ್ಕೆ ಬರಲಾಯಿತು.