ಬೆನ್ನುನೋವು ಗುಣಪಡಿಸುವ 'ನೈಸರ್ಗಿಕ ತೈಲ'-ಶೀಘ್ರ ಪರಿಹಾರ

ಲ್ಯಾವೆಂಡರ್ ಎಣ್ಣೆ

ಈ ಎಣ್ಣೆಯಲ್ಲಿರುವ ಉರಿಯೂತ ನಿವಾರಕ ಹಾಗೂ ನೋವು ನಿವಾರಕ ಗುಣ ಬೆನ್ನುನೋವನ್ನು ಗುಣಪಡಿಸಲು ಉತ್ತಮ ಆಯ್ಕೆಯಾಗಿಸಿವೆ. ಈ ಎಣ್ಣೆಯನ್ನು ನೋವು ನಿವಾರಕವಾಗಿ ಬಳಸುವ ನಿಟ್ಟಿನಲ್ಲಿ ಕೆಲವಾರು ಪರೀಕ್ಷೆಗಳನ್ನು ನಡೆಸಲಾಗಿದ್ದು ವಿಶೇಷವಾಗಿ ಕೆಲವು ನಿರ್ದಿಷ್ಟ ಬಿಂದುಗಳಿಗೆ ಒತ್ತಡ ನೀಡುವ ಆಕ್ಯುಪ್ರೆಷರ್ ಚಿಕಿತ್ಸಾ ವಿಧಾನದೊಂದಿಗೆ ಬಳಸಿದಾಗ ಕೆಳಬೆನ್ನಿನ ನೋವು 39ಶೇಖಡಾ ಕಡಿಮೆಯಾಗಿರುವುದು ಕಂಡುಬಂದಿದೆ.

ಲ್ಯಾವೆಂಡರ್ ಎಣ್ಣೆ

ಅಲ್ಲದೇ ಬೆನ್ನುನೋವಿನ ಕಾರಣದಿಂದ ನಡಿಗೆಯೂ ಅಸಾಧ್ಯವೆನಿಸುವಂತಿರುವ ಸ್ಥಿತಿಯಲ್ಲಿ ಈ ಎಣ್ಣೆಯನ್ನು ಬಳಸಿದಾಗ ಸರಾಗವಾಗಿ ನಡೆಯುವಷ್ಟು ಗುಣಪಡಿಸಿರುವುದೂ ಕಂಡುಬಂದಿದೆ. ಈ ಎಣ್ಣೆ ಹಿತವೆನಿಸುವ ಪರಿಮಳವನ್ನೂ ಹೊಂದಿರುವ ಮೂಲಕ ಎಣ್ಣೆ ಹಚ್ಚಿದ ಬಳಿಕ ಸುವಾಸನೆ ಮನಸ್ಸಿಗೆ ಮುದ ನೀಡುವ ಮೂಲಕವೂ ಮೆದುಳಿನಿಂದ ರಕ್ತದಲ್ಲಿ ಕೆಲವು ರಸದೂತಗಳು ಸ್ರವಿಸಿ ಬೆನ್ನುನೋವು ಇನ್ನಷ್ಟು ಬೇಗನೇ ಗುಣವಾಗಲು ನೆರವಾಗುತ್ತದೆ. ಇದೇ ಕಾರಣಕ್ಕೆ ಅರೋಮಾಥೆರಪಿ ಎಂಬ ಚಿಕಿತ್ಸಾ ವಿಧಾನದಲ್ಲಿಯೂ ಲ್ಯಾವೆಂಡರ್ ಎಣ್ಣೆಯನ್ನು ಆಯ್ಕೆ ಮಾಡಲಾಗುತ್ತದೆ. ನೋವಿರುವ ಭಾಗದ ಚರ್ಮಕ್ಕೆ ಈ ಎಣ್ಣೆಯ ಮಸಾಜ್ ಮೂಲಕ ರಕ್ತಪರಿಚಲನೆ ಹೆಚ್ಚುತ್ತದೆ. ಅಲ್ಲದೇ ನೋವು ಹೆಚ್ಚಲು ಕಾರಣವಾಗುವ ಉರಿಯೂತವನ್ನೂ ನಿವಾರಿಸುವ ಮೂಲಕ ನೋವಿನ ಮೂಲವನ್ನು ಚಿವುಟುತ್ತದೆ.

ಬಳಕೆಯ ವಿಧಾನ

ನಿಮ್ಮ ನಿತ್ಯದ ಸ್ನಾನದ ನೀರಿಗೆ ಕೆಲವು ಹನಿಗಳಷ್ಟು ಲ್ಯಾವೆಂಡರ್ ಎಣ್ಣೆಯನ್ನು ಬೆರೆಸಿ ಈ ನೀರಿನಲ್ಲಿ ಸ್ನಾನ ಮಾಡುವ ಮೂಲಕ ಸ್ನಾಯುಗಳು ಸಡಿಲಗೊಂಡು ನೋವು ನಿವಾರಣೆಯಾಗಲು ನೆರವಾಗುತ್ತದೆ. ಅಲ್ಲದೇ ನೋವಿರುವ ಭಾಗದ ಮೇಲೆ ನಯವಾಗಿ ಹೆಚ್ಚಿನ ಒತ್ತಡವಿಲ್ಲದೇ ಮಸಾಜ್ ಮಾಡಬೇಕು. ಇದರ ಮೇಲೆ ಕೊಂಚ ಮಂಜುಗಡ್ಡೆಯ ಶೀತಲ ಅಥವಾ ಬಿಸಿನೀರು ತುಂಬಿದ ರಬ್ಬರ್ ಚೀಲದ ಶಾಖ ನೀಡುವ ಮೂಲಕ ನೋವನ್ನು ಕಡಿಮೆಯಾಗಿಸಬಹುದು.

ಕ್ಯಾಮೋಮೈಲ್ ಎಣ್ಣೆ

ಈ ಎಣ್ಣೆ ಉತ್ತಮ ಉರಿಯೂತ ನಿವಾರಕವಾಗಿದ್ದು ನೋವನ್ನು ನಿವಾರಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತದೆ. ವಿಶೇಷವಾಗಿ ಬೆನ್ನು ನೋವನ್ನು ಕಡಿಮೆ ಮಾಡಲು ಈ ಎಣ್ಣೆ ಉತ್ತಮ ಆಯ್ಕೆಯಾಗಿದೆ. ವಿಶೇಷವಾಗಿ ಅನೈಚ್ಛಿಕ ಸ್ನಾಯುಗಳ ಸೆಡೆತವನ್ನು ಕಡಿಮೆಗೊಳಿಸುವ (antispasmodic) ಗುಣ ಬೆನ್ನುನೋವಿಗೆ ಕಾರಣವಾದ ಸ್ನಾಯುಸೆಡೆತವನ್ನು ಸಡಿಲಗೊಳಿಸಿ ಬೆನ್ನುನೋವು ಕಡಿಮೆಗೊಳಿಸಲು ನೆರವಾಗುತ್ತದೆ.

ಬಳಕೆಯ ವಿಧಾನ:

ಬೆನ್ನು ನೋವು ಇರುವ ಭಾಗದ ಮೇಲೆ ಕೆಲವು ತೊಟ್ಟು ಕ್ಯಾಮೋಮೈಲ್ ಎಣ್ಣೆಯನ್ನು ಹಚ್ಚಿ ನಯವಾದ ಮಸಾಜ್ ನೊಂದಿಗೆ ಹಚ್ಚಿಕೊಳ್ಳಬೇಕು. ತಾವೇ ಹಚ್ಚಿಕೊಳ್ಳುವ ಬದಲು ಇನ್ನೊಬ್ಬರ ನೆರವು ಪಡೆದುಕೊಳ್ಳುವುದು ಉತ್ತಮ.

ನೀಲಗಿರಿ ಎಣ್ಣೆ

ಈ ಎಣ್ಣೆಯ ಮುದಗೊಳಿಸುವ ಹಾಗೂ ಪೆಡಸನ್ನು ಕಡಿಮೆಗೊಳಿಸುವ ಗುಣದಿಂದ ನೈಸರ್ಗಿಕ ನೋವು ನಿವಾರಕ ಎಂಬ ಪಟ್ಟ ಪಡೆದಿದೆ. ಅಲ್ಲದೇ ಇದರ ಉರಿಯೂತ ನಿವಾರಕ ಗುಣ ಹಾಗೂ ಶಮನಪಡಿಸುವ ಗುಣ ಬೆನ್ನುನೋವನ್ನು ಬಹಳಷ್ಟು ಮಟ್ಟಿಗೆ ಶೀಘ್ರವೇ ಕಡಿಮೆಗೊಳಿಸುತ್ತದೆ.

ಬಳಕೆಯ ವಿಧಾನ: ಸುಮಾರು ಇಪ್ಪತ್ತು ತೊಟ್ಟುಗಳಷ್ಟು ಎಣ್ಣೆಯನ್ನು ನೋವಿರುವ ಭಾಗದ ಮೇಲೆ ಹಚ್ಚಿ ನಯವಾಗಿ ಮಸಾಜ್ ಮಾಡಬೇಕು. ಮೊದಲ ಬಾರಿ ಈ ಎಣ್ಣೆಯನ್ನು ಹಚ್ಚಿದಾದ ಕೊಂಚ ಉರಿಯಾದ ಅನುಭವವಾಗಬಹುದು. ಇದರ ಉರಿಯೂತ ನಿವಾರಕ ಗುಣ ಪ್ರಬಲವಾಗಿರುವ ಕಾರಣ ಕೊಂಚ ತುರಿಕೆಯೂ ಎದುರಾಗಬಹುದು. ಆದರೆ ಕೆಲವೇ ದಿನಗಳಲ್ಲಿ ದೇಹ ಈ ಗುಣಗಳಿಗೆ ಹೊಂದಿಕೊಳ್ಳುತ್ತದೆ ಹಾಗೂ ಶೀಘ್ರವೇ ನೋವು ಕಡಿಮೆಯಾಗುತ್ತದೆ. ಉತ್ತಮ ಪರಿಣಾಮಕ್ಕೆ ದಿನಕ್ಕೆ ಎರಡು ಬಾರಿ ಎಣ್ಣೆ ಹಚ್ಚಿಕೊಂಡು ಮಸಾಜ್ ಮಾಡಬೇಕು.

ತುಳಸಿ ಎಣ್ಣೆ

ನೋವು ನಿವಾರಕವಾಗಿ ಈ ಎಣ್ಣೆಯನ್ನು ಸಾವಿರಾರು ವರ್ಷಗಳಿಂದ ಭಾರತದಲ್ಲಿ ಬಳಸಲಾಗುತ್ತಾ ಬರಲಾಗಿದೆ. ವಿಶೇಷವಾಗಿ ಪೆಡಸಾಗಿದ್ದ ಸ್ನಾಯುಗಳು ಸಡಿಲಗೊಂಡು ಆರಾಮ ದೊರಕುತ್ತದೆ. ಒಂದು ವೇಳೆ ಸ್ನಾಯುಗಳ ಪೆಡಸಾಗುವುದರಿಂದ ಬೆನ್ನುನೋವು ಉಂಟಾಗಿದ್ದರೆ ತುಳಸಿ ಎಣ್ಣೆ ಉತ್ತಮ ಆಯ್ಕೆಯಾಗಿದೆ.

ಬಳಕೆಯ ವಿಧಾನ: ಒಂದು ಸ್ವಚ್ಛವಾದ ಬಟ್ಟೆಯನ್ನು ಕೊಂಚವೇ ಬಿಸಿಯಾಗಿಸಿ ಕೆಲವು ತೊಟ್ಟು ತುಳಸಿ ಎಣ್ಣೆಯನ್ನು ಚಿಮುಕಿಸಿ ಈ ಭಾಗವನ್ನು ನೋವಿರುವ ಭಾಗದ ಮೇಲೆ ಒತ್ತಿಕೊಳ್ಳಬೇಕು. ಇನ್ನೂ ಉತ್ತಮವೆಂದರೆ ಬಿಸಿನೀರಿನ ಶಾಖ ನೀಡುವ ರಬ್ಬರಿನ ಚೀಲದ ಪಾರ್ಶ್ವದ ಮೇಲೆ ತುಳಸಿ ಎಣ್ಣೆಯನ್ನು ಚಿಮುಕಿಸಿಯೂ ಬಳಸಬಹುದು. ಇದರಿಂದ ಬೆನ್ನುನೋವು ತಕ್ಷಣವೇ ಕಡಿಮೆಯಾಗುತ್ತದೆ.

ಪುದೀನಾ ಎಣ್ಣೆ

ಈ ಎಣ್ಣೆಯಲ್ಲಿಯೂ ಉರಿಯೂತ ನಿವಾರಕ ಹಾಗೂ ಶಮನಕಾರಿ ಗುಣಗಳಿವೆ. ಅಲ್ಲದೇ ಪೆಡಸಾದ ಸ್ನಾಯುಗಳನ್ನು ಸಡಿಲಗೊಳಿಸುವ ಮೂಲಕ ಹಾಗೂ ಮುದಗೊಳಿಸುವ ಪರಿಮಳದಿಂದ ಬೆನ್ನುನೋವನ್ನು ತಕ್ಷಣವೇ ಕಡಿಮೆಗೊಳಿಸುತ್ತದೆ.

ಬಳಕೆಯ ವಿಧಾನ:

ಈ ಎಣ್ಣೆ ಪ್ರಬಲವಾಗಿರುವ ಕಾರಣ ನೇರವಾಗಿ ಹಚ್ಚಬಾರದು, ಬದಲಿಗೆ ಕೊಂಚ ನೀರಿನೊಂದಿಗೆ ಬೆರೆಸಿ ಬಳಸಬೇಕು. ಇಡಿಯ ದಿನ ನೋವಿಲ್ಲದೇ ಇರಲು ನೀರು ಬೆರೆಸಿದ ಕೆಲವೇ ತೊಟ್ಟುಗಳು ಸಾಕು. ಈ ಎಣ್ಣೆಯನ್ನು ಹಚ್ಚಿದ ಚರ್ಮದ ಭಾಗದಲ್ಲಿ ರಕ್ತಪರಿಚಲನೆ ಹೆಚ್ಚುವ ಮೂಲಕ ಉರಿಯೂತದಿಂದ ಎದುರಾಗಿದ್ದ ಬೆನ್ನುನೋವು ಶೀಘ್ರವಾಗಿ ಕಡಿಮೆಯಾಗುತ್ತದೆ.