'ಜೀರಿಗೆ ಚಹಾ'- ಹೊಟ್ಟೆ ಉಬ್ಬರ ಸಮಸ್ಯೆಗೆ ಕ್ಷಣಾರ್ಧದಲ್ಲಿ ಪರಿಹಾರ

ಜೀರಿಗೆ ಚಹಾ

ಹೊಟ್ಟೆ ಉಬ್ಬರ ತಡೆಯಬೇಕಾದರೆ ಜೀರಿಗೆ ಚಹಾ ಅತ್ಯುತ್ತಮ ಮನೆಮದ್ದಾಗಿದೆ. ಜೀರಿಗೆ ಚಹಾ ಮಾಡಬೇಕಾದರೆ ಒಂದು ಕಪ್ ನೀರಿಗೆ ಎರಡು ಚಮಚ ಹುಡಿ ಮಾಡಿದ ಜೀರಿಗೆ ಹಾಕಿ, ನಂತರ ಅರ್ಥ ಚಮಚ ಟೀ ಪೌಡರ್ ಹುಡಿ, ಸಣ್ಣ ತುಂಡು ಬೆಲ್ಲ ಮತ್ತು ¼ ಕಪ್ ಹಾಲು ಹಾಕಿ. ಇದನ್ನು ಸರಿಯಾಗಿ ಕುದಿಸಿದ ಬಳಿಕ ಬಿಸಿಯಾಗಿರುವಾಗಲೇ ಕುಡಿದರೆ ಹೊಟ್ಟೆ ಉಬ್ಬರ ಮತ್ತು ಅಜೀರ್ಣವು ಕಡಿಮೆಯಾಗುವುದು.

ಏಲಕ್ಕಿ ಮತ್ತು ಶುಂಠಿ ಜತೆ ಜೀರಿಗೆ

ಒಂದು ಚಮಚ ಜೀರಿಗೆ ಮತ್ತು ಒಂದು ಸಣ್ಣ ತುಂಡು ಶುಂಠಿ ತೆಗೆದುಕೊಳ್ಳಿ. ಒಂದು ಕಪ್ ನೀರಿಗೆ ಇದನ್ನು ಹಾಕಿ ಕುದಿಸಿ. ಊಟದ ಬಳಿಕ ದಿನದಲ್ಲಿ 2-3 ಸಲ ಇದರ ಸೇವನೆ ಮಾಡಿದರೆ ಒಳ್ಳೆಯ ಪರಿಹಾರ ಸಿಗುವುದು. ಕರುಳಿನಲ್ಲಿ ನಿಂತಿರುವ ವಾಯು ಹೊರಗೆ ಹೋಗುವಂತೆ ಮಾಡುವ ಶುಂಠಿಯು ಹೊಟ್ಟೆಯುಬ್ಬರದ ಒತ್ತಡ ಕಡಿಮೆ ಮಾಡುವುದು.

ಜೀರಿಗೆ ಜಗಿಯುವುದು

ಹೊಟ್ಟೆ ಉಬ್ಬರ ತಡೆಯಲು ತಾಜಾ ಜೀರಿಗೆ ಜಗಿದರೆ ಒಳ್ಳೆಯದು. ಊಟದ ಬಳಿಕ ಜೀರಿಗೆ ಜಗಿದರೆ ವಾಯುವಿನಿಂದ ಪರಿಹಾರ ಸಿಗುವುದು. ಉತ್ತಮ ಫಲಿತಾಂಶಕ್ಕಾಗಿ ದಿನದಲ್ಲಿ 3-4 ಸಲ ಸ್ವಲ್ಪ ಜೀರಿಗೆ ಜಗಿಯಿರಿ. ಕರುಳಿನಲ್ಲಿ ತುಂಬಿಕೊಂಡಿರುವ ವಾಯುವನ್ನು ಇದು ಹೊರಗೆ ಹಾಕುವುದು.

ಪುದೀನಾ ಎಲೆಗಳ ಜತೆ ಜೀರಿಗೆ

ಒಂದು ಚಮಚ ಜೀರಿಗೆ, 1-2 ಪುದೀನಾ ಎಲೆಗಳು, ¼ ಏಲಕ್ಕಿ ಹುಡಿಯನ್ನು ಒಂದು ಕಪ್ ನೀರಿಗೆ ಹಾಕಿಕೊಂಡು ಐದು ನಿಮಿಷ ಕಾಲ ಬಿಸಿ ಮಾಡಿ ಸೋಸಿಕೊಂಡು ಕುಡಿಯಿರಿ. ಪುದೀನಾದಲ್ಲಿ ಆ್ಯಂಟಿಸ್ಪಾಸ್ಮೋಡಿಕ್ ಗುಣಗಳು ಇವೆ. ಇದು ಜೀರ್ಣಕ್ರಿಯೆಯ ವ್ಯವಸ್ಥೆ ಸರಿಪಡಿಸುವುದು. ಅಜೀರ್ಣ ಮತ್ತು ವಾಯುವಿನಿಂದ ಸಮಸ್ಯೆಯಾದಾಗ ಇದನ್ನು ಸೇವಿಸಿ. ಇದು ಹೊಟ್ಟೆಯ ಉಬ್ಬರಕ್ಕೆ ಒಳ್ಳೆಯ ಚಹಾ.

ಕರಿಮೆಣಸು ಮತ್ತು ಕಪ್ಪು ಉಪ್ಪಿನೊಂದಿಗೆ ಜೀರಿಗೆ

50 ಗ್ರಾಂ ಜೀರಿಗೆ, 25 ಗ್ರಾಂ ಕರಿಮೆಣಸು ಮತ್ತು 50 ಗ್ರಾಂ ಕಪ್ಪು ಉಪ್ಪನ್ನು ತೆಗೆದುಕೊಳ್ಳಿ. ಇದನ್ನು ಜತೆಯಾಗಿ ಸೇರಿಸಿ ರುಬ್ಬಿಕೊಂಡು ಪೌಡರ್ ಮಾಡಿ. ಈ ಮಿಶ್ರಣದ ಅರ್ಧ ಚಮಚವನ್ನು ಉಗುರುಬೆಚ್ಚಗಿನ ನೀರಿಗೆ ಹಾಕಿ 4-5 ಗಂಟೆಗೊಮ್ಮೆ ಸೇವಿಸಿ.

ಕೊತ್ತಂಬರಿ ಜತೆ ಜೀರಿಗೆ

ಹೊಟ್ಟೆ ಉಬ್ಬರಕ್ಕೆ ಇದು ಅತ್ಯುತ್ತಮ ಮನೆಮದ್ದಾಗಿದೆ. ಒಂದು ಚಮಚ ಜೀರಿಗೆ ಮತ್ತು ಒಂದು ಚಮಚ ಕೊತ್ತಂಬರಿ ತೆಗೆದುಕೊಳ್ಳಿ. ಇದನ್ನು ರುಬ್ಬಿಕೊಂಡು ಪೌಡರ್ ಮಾಡಿಕೊಳ್ಳಿ. ಊಟಕ್ಕೆ ಮೊದಲು ಈ ಹುಡಿಯನ್ನು ಸೇವಿಸಿದರೆ ಹೊಟ್ಟೆಯ ವಾಯು ಮತ್ತು ಹೊಟ್ಟೆ ಉಬ್ಬರ ಕಡಿಮೆಯಾಗುವುದು.

ಜೀರಿಗೆ ಜತೆ ಕಿತ್ತಳೆ ಸಿಪ್ಪೆ

ಒಂದು ಚಮಚ ಜೀರಿಗೆ ಮತ್ತು ಸ್ವಲ್ಪ ಕಿತ್ತಳೆ ಸಿಪ್ಪೆಯನ್ನು ತುರಿದು ನೀರಿಗೆ ಹಾಕಿ. ಸರಿಯಾಗಿ ಕುದಿಸಿ ಸೋಸಿಕೊಂಡ ಬಳಿಕ ಅದಕ್ಕೆ ½ ಚಮಚ ಜೇನುತುಪ್ಪ ಸೇರಿಸಿ. ಅಜೀರ್ಣ ಮತ್ತು ಹೊಟ್ಟೆ ಉಬ್ಬರ ತಡೆಯಲು ಊಟಕ್ಕೆ ಮೊದಲು ಇದನ್ನು ಸೇವಿಸಿ. ಪ್ರಿಡ್ಜ್‌ನಲ್ಲಿ ಇದನ್ನು ಇಟ್ಟು ಬೇಕಾದಾಗ ಸೇವಿಸಿ.