ಹಲ್ಲುಗಳ ಆರೋಗ್ಯಕ್ಕೆ ಸರಳ ಸೂತ್ರ-ತಪ್ಪದೇ ಅನುಸರಿಸಿ

ಸಲಹೆ #1

ಆಮ್ಲೀಯತೆ ಹೆಚ್ಚಿರುವ ಆಹಾರಗಳು ಹಲ್ಲಿನ ಮೇಲ್ಪದರವನ್ನು ಸುಲಭವಾಗಿ ಕರಗಿಸಬಲ್ಲವು. ಆದ್ದರಿಂದ ಆಮ್ಲೀಯತೆ ಹೆಚ್ಚಿರುವ ಉಪ್ಪಿನಕಾಯಿ, ಲಿಂಬೆರಸ ಮೊದಲಾದ ಆಮ್ಲೀಯ ಹಣ್ಣುಗಳ ರಸ, ಕೆಂಪು ವೈನ್ ಇತ್ಯಾದಿಗಳನ್ನು ತ್ಯಜಿಸುವುದೇ ಉತ್ತಮ.

ಸಲಹೆ #2

ಹಲ್ಲಿನ ಸವೆತಕ್ಕೆ ಹಲ್ಲುಗಳನ್ನು ಉಜ್ಜಿಕೊಳ್ಳುತ್ತಾ ಇರುವ ಅಭ್ಯಾಸವೂ ಇನ್ನೊಂದು ಕಾರಣ. ಇದನ್ನು ತಡೆಯಲು ಸುಲಭದಲ್ಲಿ ಸಾಧ್ಯವಿಲ್ಲ. ಇದಕ್ಕೆ ಅಪ್ರತಿಮ ಮನೋದಾರ್ಢ್ಯ ಮತ್ತು ದೃಢಸಂಕಲ್ಪ ಅಗತ್ಯ. ಒಂದು ವೇಳೆ ಇದು ಸಾಧ್ಯವಾಗದಿದ್ದರೆ ದಂತವೈದ್ಯರನ್ನು ಕಂಡು ಅವರು ಹೆಚ್ಚು ಸವೆದ ಹಲ್ಲುಗಳನ್ನು ಪರೀಕ್ಷಿಸಿ ಈ ಭಾಗದ ಸವೆತ ತಡೆಯಲು ನೀಡುವ ರಕ್ಷಣಾ ಕವಚಗಳನ್ನು ಧರಿಸಿ, ಉಜ್ಜಿಕೊಳ್ಳುವುದನ್ನು ಮುಂದುವರೆಸಬಹುದು.

ಸಲಹೆ #3

ಸೂಕ್ಷ್ಮಸಂವೇದಿ ಹಲ್ಲುಗಳಿಗಾಯೇ ಇರುವ ಪೇಸ್ಟ್ ಗಳನ್ನು ಬಳಸಲು ಪ್ರಾರಂಭಿಸಿ. ಇವು ಕೊಂಚ ದುಬಾರಿಯಾದರೂ ಹಲ್ಲುಗಳ ಆರೋಗ್ಯದ ವಿಷಯ ಬಂದಾಗ ಅನಿವಾರ್ಯವಾಗಿ ಸಹಿಸಿಕೊಳ್ಳಲೇಬೇಕಾಗುತ್ತದೆ. ಇದರ ಬಳಕೆಯಿಂದ ಒಂದೆರಡು ದಿನಗಳಲ್ಲೇನೂ ಥಟ್ಟನೆ ಪರಿಣಾಮ ದೊರಕುವುದಿಲ್ಲ. ಆದರೆ ನಿಧಾನವಾಗಿ ಹಲ್ಲುಗಳು ಅತಿ ಸೂಕ್ಷ ಸಂವೇದಿಯಾಗಿರದೇ ಕೊಂಚ ಕಡಿಮೆಯಾಗುತ್ತದೆ. ನಮ್ಮ ಹಲ್ಲುಗಳಲ್ಲಿರುವ ನರತಂತುಗಳ ಅತಿಸೂಕ್ಷ್ಮ ನರಾಗ್ರ ಅಥವಾ ತುದಿಗಳನ್ನು ಈ ಪೇಸ್ಟ್ ನಲ್ಲಿರುವ ಅಂಶ ಮರಗಟ್ಟಿಸುವ ಮೂಲಕ ನೋವಿನ ಸಂವೇದನೆಯನ್ನು ಮೆದುಳಿಗೆ ತಲುಪಿಸದೇ ಇರುವುದು ಇದರ ಗುಟ್ಟು

ಸಲಹೆ #4

ಹಲ್ಲುಗಳು ಉತ್ತಮಗೊಳ್ಳಬೇಕೇ, ಕೆಫೀನ್ ಇರುವ ಪೇಯಗಳು, ಆಲ್ಕೋಹಾಲ್, ಧೂಮಪಾನ, ಗುಟ್ಕಾ ಅಥವಾ ಬಾಯಿಯ ಆರೋಗ್ಯವನ್ನು ಬಾಧಿಸುವ ಯಾವುದೇ ಕೆಟ್ಟ ಅಭ್ಯಾಸವನ್ನು ಎಷ್ಟೇ ಕಷ್ಟವಾದರೂ ಸರಿ, ಬಿಟ್ಟುಬಿಡಿ. ಇದಕ್ಕಾಗಿ ಮನಸ್ಸನ್ನು ಮೊದಲು ಗಟ್ಟಿಮಾಡಿಕೊಂಡು ಬಳಿಕ ವೈದ್ಯರ ನೆರವು ಪಡೆದು ಆರೋಗ್ಯಕರ ವಿಧಾನ ಅನುಸರಿಸಿ ಕೆಟ್ಟ ಅಭ್ಯಾಸದಿಂದ ಹೊರಬನ್ನಿ.

ಸಲಹೆ #5

ದಿನಕ್ಕೆ ಕನಿಷ್ಠ ಎರಡು ಬಾರಿಯಾದರೂ ಹಲ್ಲುಗಳನ್ನು ಉಜ್ಜಿಕ್ಕೊಳ್ಳಿ. ಪ್ರತಿ ಬಾರಿ ಉಜ್ಜಲೂ ಮೃದುವಾದ ಬ್ರಶ್ ಬಳಸಿ. ಹಲ್ಲುಗಳಿಗೆ ನೀಡುವ ಒತ್ತಡ ಅತಿ ಕಡಿಮೆ ಇರಲಿ. ಒತ್ತಡ ಹೆಚ್ಚಾದಷ್ಟೂ ಹಲ್ಲುಗಳೂ, ಹಲ್ಲುಗಳಿಗಿಂತ ಹೆಚ್ಚಾಗಿ ಒಸಡುಗಳು ಸವೆಯುತ್ತವೆ. ನೆನಪಿರಲಿ, ಸವೆದ ಹಲ್ಲು ಅಥವಾ ಒಸಡು ಮತ್ತೆ ಬೆಳೆಯುವುದಿಲ್ಲ.

ಸಲಹೆ #6

ನಿಮ್ಮ ಒಸಡುಗಳನ್ನು ಪರೀಕ್ಷಿಸಿ ನೋಡಿ. ಇವು ತುಂಬಾ ಆಳಕ್ಕೆ ಸವೆದಿರುವಂತೆ ಕಂಡರೆ ತಕ್ಷಣ ದಂತವೈದ್ಯರನ್ನು ಭೇಟಿಯಾಗಿ ಸೂಕ್ತ ಚಿಕಿತ್ಸೆಯನ್ನು ಪಡೆಯಿರಿ.

ಸಲಹೆ #7

ವರ್ಷಕ್ಕೆ ಎರಡು ಬಾರಿ ನಿಯಮಿತವಾಗಿ ನಿಮ್ಮ ದಂತವೈದ್ಯರನ್ನು ಕಂಡು ಹಲ್ಲುಗಳನ್ನು ಪರೀಕ್ಷಿಸಿಕೊಳ್ಳಿ. ಇಂದು ಸೂಕ್ಷ್ಮ ಸಂವೇದಿ ಹಲ್ಲುಗಳಿಗೆ ನೂತನ ವಿಧಾನದ ಚಿಕಿತ್ಸೆ ಲಭ್ಯವಿದ್ದು ನಿಮ್ಮ ಅಗತ್ಯಕ್ಕೆ ಮತ್ತು ಸಾಮರ್ಥ್ಯಕ್ಕೆ ತಕ್ಕ ಚಿಕಿತ್ಸೆ ಪಡೆದುಕೊಳ್ಳಿ.