ಊಟದ ಜೊತೆಗೆ ಸೇವಿಸಬಹುದಾದ ಐದು ಹಣ್ಣುಗಳು

Wellness

oi-Manohar

By Deepak.m

Updated: Wednesday, February 3, 2016, 13:14 [IST]

ಹಣ್ಣುಗಳು ಪ್ರಾಣಿ-ಪಕ್ಷಿಗಳಿಗೆ ದೇವರು ನೀಡಿರುವ ವರ ಎಂದು ಹೇಳಬಹುದು. ಮಾನವನು ಸಹ ಒಂದು ಪ್ರಾಣಿಯಾಗಿರುವುದರಿಂದಾಗಿ ಆತನಿಗು ಹಣ್ಣುಗಳು ಒಳ್ಳೆಯದೆ. ಹಣ್ಣುಗಳಲ್ಲಿ ಹಲವಾರು ಪೋಷಕಾಂಶಗಳು ನಮಗಾಗಿ ಲಭಿಸುತ್ತವೆ. ಹಣ್ಣು ತಿಂದರೆ ಸಾಕು, ಇತರೆ ಆಹಾರವನ್ನು ಸೇವಿಸಬೇಕಾದ ಅಗತ್ಯವಿರುವುದಿಲ್ಲ. ಅದಕ್ಕಾಗಿಯೇ ಫಲಾಹಾರ ಎಂಬ ಪದವು ಸಹ ಸೃಷ್ಟಿಯಾಗಿದೆ.

ಹಣ್ಣುಗಳನ್ನು ಸೇವಿಸುವುದು ಒಳ್ಳೆಯದೆ ಆದರೂ ಅದರ ಕುರಿತು ಜನ ನಮ್ಮನ್ನು ನಾನಾ ರೀತಿ ನಿರ್ಬಂಧಿಸುತ್ತಾರೆ. ಆ ಹಣ್ಣು ತಿನ್ನಬಾರದು, ಈ ಹಣ್ಣು ತಿನ್ನಬಾರದು, ಇದನ್ನು ಈಗ ತಿನ್ನಬಾರದು, ಇದನ್ನು ಆಮೇಲೆ ತಿನ್ನಬಾರದು, ಎಂಬ ಮೂಢನಂಬಿಕೆಗಳು ಹಣ್ಣಿನ ಸುತ್ತ ತಳಕು ಹಾಕಿಕೊಂಡಿರುತ್ತವೆ. ಅದರಲ್ಲೂ ಊಟದ ಸಮಯದಲ್ಲಿ ಹಣ್ಣನ್ನು ಸೇವಿಸಬಾರದು ಎಂದು ನಮಗೆ ತುಂಬಾ ಜನರು ಹೇಳಿರುತ್ತಾರೆ. ಆದರೆ ಪೋಷಕಾಂಶ ತಜ್ಞೆಯಾದ ಪ್ರಿಯಾ ಕತ್‌ಪಾಲ್‌ರವರು ಕೆಲವೊಂದು ಹಣ್ಣುಗಳನ್ನು ನಿಯಮಿತವಾಗಿ ಊಟದ ಜೊತೆಗೆ ಸೇವಿಸಬಹುದು ಎಂದು ಸಲಹೆಯನ್ನು ನೀಡಿದ್ದಾರೆ.

ಆದರೆ ರಾತ್ರಿ ಊಟದ ಸಮಯದಲ್ಲಿ ಹಣ್ಣುಗಳನ್ನು ಸೇವಿಸಬೇಡಿ ಎಂಬ ಸಲಹೆಯನ್ನು ಇವರು ನೀಡುತ್ತಾರೆ. ಏಕೆಂದರೆ ಇದರಲ್ಲಿ ಫ್ರಕ್ಟೋಸ್ ಅಂಶಗಳು ಅಧಿಕವಾಗಿರುತ್ತವೆ, ಇವು ಸುಲಭವಾಗಿ ಕೊಬ್ಬಾಗಿ ಪರಿವರ್ತನೆಗೊಳ್ಳುತ್ತವೆ. ಹಾಗಾಗಿ ಇದರ ಸೇವನೆ ಬೇಡ ಎಂಬುದು ಇವರ ಸಲಹೆ. ಬನ್ನಿ ಆಹಾರದ ಜೊತೆಗೆ ಯಾವ ಹಣ್ಣುಗಳನ್ನು ಸೇವಿಸಬಹುದು ನಾವು ಎಂದು ತಿಳಿದುಕೊಳ್ಳೋಣ.

ಸೇಬು
ಸೇಬು, ಇದರಲ್ಲಿ ನಾರಿನಂಶ ಮಾತ್ರ ಹೆಚ್ಚಾಗಿರುವುದಿಲ್ಲ. ಜೊತೆಗೆ ಇದು ನಮ್ಮ ಹೊಟ್ಟೆಯಲ್ಲಿ ಸುಲಭವಾಗಿ ಜೀರ್ಣವಾಗುತ್ತದೆ. ಎಲೆಕೋಸು ಮತ್ತು ಮೊಳಕೆ ಕಾಳುಗಳ ಸಲಾಡ್‌ನಲ್ಲಿ ಒಂದಷ್ಟು ತುಣುಕು ಸೇಬುಗಳನ್ನು ಸೇರಿಸಿಕೊಳ್ಳಿ.

ಕಿತ್ತಳೆ ಹಣ್ಣು

ಕಿತ್ತಳೆಯಲ್ಲಿ ಕರಗಲಾರದ ಟ್ಯಾನಿನ್‌ಗಳು, ಪೆಕ್ಟಿನ್‌ಗಳು ಮತ್ತು ಹೆಮಿಸೆಲ್ಯೂಲೋಸ್‌ಗಳಂತಹ ಪಾಲಿಸ್ಯಾಕಾರೈಡ್‌ಗಳು ಅಧಿಕ ಪ್ರಮಾಣದಲ್ಲಿರುತ್ತವೆ ( ಇವು ಒಂದು ಬಗೆಯ ಡಯಟರಿ ಫೈಬರ್‌ಗಳಾಗಿರುತ್ತವೆ). ಇವು ನಿಮ್ಮ ಜೀರ್ಣಾಂಗವನ್ನು ಸಮರ್ಪಕವಾಗಿ ಇರಿಸುತ್ತವೆ. ಆದ್ದರಿಂದ ನಿಮ್ಮ ಊಟದ ಸಮಯದಲ್ಲಿ ಒಂದು ಲೋಟ ಕಿತ್ತಳೆ ರಸವನ್ನು ಸೇವಿಸಲು ಹಿಂದೇಟು ಹಾಕಬೇಡಿ.

ಸೀಬೆ ಹಣ್ಣು

ಸೀಬೆ ಹಣ್ಣುಗಳಲ್ಲಿ ವಿಟಮಿನ್ ಸಿ ಅಧಿಕ ಪ್ರಮಾಣದಲ್ಲಿರುತ್ತದೆ. ಇದರಲ್ಲಿ ಗ್ಲಿಸೆಮಿಕ್ ಇಂಡೆಕ್ಸ್ ಕಡಿಮೆ ಪ್ರಮಾಣದಲ್ಲಿರುತ್ತದೆ ಹಾಗಾಗಿ ಇದು ಮಧುಮೇಹಕ್ಕೆ ಒಳ್ಳೆಯದು. ಆದ್ದರಿಂದ ನಿಮ್ಮ ಸಲಾಡ್‌ಗೆ ಸೀಬೆ ಹಣ್ಣನ್ನು ಸೇರಿಸಿಕೊಳ್ಳುವುದು ಒಳ್ಳೆಯದು.

ರಾಸ್ಪ್‌ಬೆರ್ರಿ
ರಾಸ್ಪ್‌ಬೆರ್ರಿಗಳಲ್ಲಿ ನಾರಿನಂಶ ಮಾತ್ರ ಹೆಚ್ಚಾಗಿರುವುದಿಲ್ಲ, ಇವುಗಳಲ್ಲಿ ಆಂಟಿಆಕ್ಸಿಡೆಂಟ್‌ಗಳು ಸಹ ಅಧಿಕ ಪ್ರಮಾಣದಲ್ಲಿರುತ್ತವೆ. ಆದ್ದರಿಂದ ನೀವು ತಯಾರಿಸಿಕೊಳ್ಳುವ ಮಿಲ್ಕ್‌ ಶೇಕ್‌ಗಳಿಗೆ ಇದನ್ನು ಬೆರೆಸಿಕೊಳ್ಳಬಹುದು.

ಮೂಸಂಬಿ ಅಥವಾ ಲಿಂಬೆರಸ
ಮೂಸಂಬಿ ಅಥವಾ ಲಿಂಬೆರಸವು ನಿಮ್ಮ ಬಾಯಿಯಲ್ಲಿರುವ ಲಾಲಾ ರಸದ ಗ್ರಂಥಿಗಳನ್ನು ಉದ್ದೀಪಿಸುತ್ತದೆ. ಅದರಿಂದ ಉತ್ಪತ್ತಿಯಾಗುವ ಜೊಲ್ಲು ನಿಮ್ಮ ಜೀರ್ಣಕ್ರಿಯೆಯನ್ನು ಸುಗಮಗೊಳಿಸುತ್ತದೆ. ಆದ್ದರಿಂದ ನೀವು ಊಟದ ಜೊತೆಗೆ ಒಂದು ಲೋಟ ಲಿಂಬೆರಸವನ್ನು ಆರಾಮವಾಗಿ ಸೇವಿಸಬಹುದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.