ಬೆನ್ನೇರಿ ಕಾಡುವ ತಲೆನೋವಿಗೆ ಸಾಂತ್ವನ ನೀಡುವ ಎಣ್ಣೆಗಳು

ಲ್ಯಾವೆಂಡರ್

ಮಲ್ಲಿಗೆಯಂತಹ ಸುವಾಸನೆ ಹೊಂದಿರುವ ಲ್ಯಾವೆಂಡರ್ ಹೂವಿನ ತೈಲದಲ್ಲಿ linalyl acetate ester ಎಂಬ ಪೋಷಕಾಂಶಗಳಿದ್ದು ಇವು ಅತ್ಯುತ್ತಮವಾದ ಉರಿಯೂತ ನಿವಾರಕಗಳಾಗಿವೆ. ಇವು ನರಗಳ ಮೂಲಕ ಹಾದುಹೋಗುವಾಗ ನೋವಿನ ಪ್ರಭಾವವನ್ನು ಕಡಿಮೆಗೊಳಿಸುವ ಕಡಿಮೆಗೊಳಿಸುವ (sedative) ಗುಣವನ್ನು ಹೊಂದಿದ್ದು ತಲೆನೋವನ್ನೂ ಕಡಿಮೆಮಾಡಲು ನೆರವಾಗುತ್ತವೆ.

ನೀಲಗಿರಿ ಎಣ್ಣೆ

ವಿಶೇಷವಾಗಿ ಸೈನಸ್ ಸೋಂಕಿನಿಂದ ತಲೆನೋವು ಉಂಟಾಗಿದ್ದರೆ ನೀಲಗಿರಿ ಎಣ್ಣೆ ಅತ್ಯುತ್ತಮವಾದ ಆಯ್ಕೆಯಾಗಿದೆ. ಈ ಎಣ್ಣೆಯ ಕೆಲವು ತೊಟ್ಟುಗಳಿಂದ ಹಣೆ, ಹಣೆಯ ಪಕ್ಕದ ಭಾಗ (ಕಿವಿಯ ಮುಂದೆ, ಕನ್ನಡಕ ತೊಟ್ಟಾಗ ಪಟ್ಟಿ ತಾಕುವ ಭಾಗ) ಮತ್ತು ಕಿವಿಯ ಹಿಂಭಾಗದ ಮೂಳೆ ಇರುವಲ್ಲಿ ಹಚ್ಚಿದರೆ ಅತ್ಯುತ್ತಮ ಪರಿಹಾರವನ್ನು ಪಡೆಯಬಹುದು. ಆದರೆ ಈ ಎಣ್ಣೆ ಕಣ್ಣಿಗೆ ಹೋದರೆ ಭಾರೀ ಉರಿ ತರಿಸುವ ಕಾರಣ ಕಣ್ಣಿಗೆ ಹೋಗದಂತೆ ಅತಿ ಹೆಚ್ಚಿನ ಎಚ್ಚರಿಕೆ ವಹಿಸಬೇಕು.

ಹೆಲಿಕ್ರೈಸಮ್ (Helichrysum)

ಈ ಎಣ್ಣೆಯನ್ನು ಆಘ್ರಾಣಿಸಲು ಡಿಫ್ಯೂಸರ್ ಯಂತ್ರದ ಅವಶ್ಯಕತೆ ಇದೆ. ಈ ಎಣ್ಣೆಯ ಸುವಾಸನೆಯನ್ನು ಸೇವಿಸಿದಾಗ ಇದರ ಚಿಕಿತ್ಸಕ ಗುಣಗಳ ಕಾರಣ ನರಗಳು ಸಡಿಲಗೊಂಡು ಮೆದುಳಿಗೆ ಹೆಚ್ಚಿನ ರಕ್ತಸಂಚಾರ ಒದಗಿಸಲು ನೆರವಾಗುವ ಮೂಲಕ ತಲೆನೋವು ಕಡಿಮೆಗೊಳ್ಳಲು ಸಾಧ್ಯವಾಗುತ್ತದೆ. ಇದು ಅಲರ್ಜಿಕಾರಕವೂ ಅಲ್ಲ, ವಿಷಕಾರಿಯೂ ಅಲ್ಲದ ಕಾರಣ ಎಲ್ಲರಿಗೂ ಉತ್ತಮವಾದರೂ ಮನೆಯಲ್ಲಿ ಗರ್ಭಿಣಿಯರು ಇದ್ದರೆ ಮಾತ್ರ ಇದರ ಬಳಕೆ ಸಲ್ಲದು.

ರೋಮನ್ ಕ್ಯಾಮೋಮೈಲ್ (Roman Chamomile)

ಈ ಎಣ್ಣೆಯ ಕೆಲವು ಬಿಂದುಗಳನ್ನು ನೀವು ಸ್ನಾನ ಮಾಡುವ ನೀರಿನಲ್ಲಿ ಹಾಕಿ ಈ ನೀರಿನಿಂದ ಸ್ನಾನ ಮಾಡಿಕೊಂಡರೆ ಸೂರ್ಯನ ಬೆಳಕಿನ ಮೂಲಕ ಬರುವ ತಲೆನೋವು ಕಡಿಮೆಯಾಗುತ್ತದೆ. ಪರ್ಯಾಯವಾಗಿ ಕೊಂಚ ಎಣ್ಣೆಯನ್ನು ಉಗುರುಬೆಚ್ಚಗೆ ಬಿಸಿಮಾಡಿ ಹಣೆಯ ಪಕ್ಕದ ಭಾಗಕ್ಕೆ ಮಸಾಜ್ ಸಹಾ ಮಾಡಬಹುದು.

ಪುದೀನಾ ಎಣ್ಣೆ

ಒಂದು ವೇಳೆ ಮಾನಸಿಕ ಒತ್ತಡದಿಂದ ತಲೆನೋವು ಉಂಟಾಗಿದ್ದರೆ ಇದಕ್ಕೆ ಪುದೀನಾ ಎಣ್ಣೆ ಅತ್ಯುತ್ತಮ ಪರಿಹಾರ ನೀಡುತ್ತದೆ. ಅಷ್ಟೇ ಅಲ್ಲ ಇದರ ಕಾರಣ ಉಂಟಾಗಿದ್ದ ಸೆಳೆತ ಹಾಗೂ ಮೈಕೈನೋವಿಗೂ ಉತ್ತಮ ಪರಿಹಾರ ದೊರಕುತ್ತದೆ. ಈ ಎಣ್ಣೆಯನ್ನು ತಲೆಗೂ ಹಚ್ಚಬಹುದು, ಇನ್ ಹೇಲರ್ ಮೂಲಕ ಸೆಳೆದುಕೊಳ್ಳಬಹುದು ಅಥವಾ ಮಂದ ಉರಿಯ ಮೇಲೆ ಬಿಸಿಯಾಗಿಸಿ ಇದರ ಸುವಾಸನೆಯನ್ನೂ ಆಘ್ರಾಣಿಸಬಹುದು.

ಸ್ಪಿಯರ್ ಮಿಂಟ್ (Spearmint)

ಒಂದು ವೇಳೆ ಪುದೀನಾ ಎಣ್ಣೆ ಬಹಳ ಗಾಢವಾಯಿತು ಅನ್ನಿಸಿದರೆ ಸ್ಪಿಯರ್ ಮಿಂಟ್ ಎಣ್ಣೆಯನ್ನು ಬಳಸಬಹುದು. ಇದು ತಿಳಿಹಸಿರು ಬಣ್ಣದ ಎಣ್ಣೆಯಾಗಿದ್ದು ಗಾಳಿಯಲ್ಲಿ ಸಿಹಿಯಾದ ವಾಸನೆಯನ್ನು ಪಸರಿಸುತ್ತದೆ. ಇದನ್ನು ಕೊಂಚವೇ ಬಿಸಿಮಾಡಿ ಹಣೆ ಮತ್ತು ಹಣೆಯ ಪಕ್ಕದ ಭಾಗಗಳಿಗೆ ಹಚ್ಚುವ ಮೂಲಕ ತಲೆನೋವು ಕಡಿಮೆಯಾಗುತ್ತದೆ.