ಬೊಜ್ಜು ಕರಗಿಸುವ ರಹಸ್ಯ -ಅಡುಗೆ ಮನೆಯಲ್ಲಿಯೇ ಇದೆ!

Wellness

oi-Manohar

By Manohar Shetty

Updated: Thursday, November 5, 2015, 10:42 [IST]

ಇಡಿಯ ವಿಶ್ವದಲ್ಲಿ ಶೇಖಡಾ ಐವತ್ತಕ್ಕಿಂತಲೂ ಹೆಚ್ಚು ಜನರು ಸ್ಥೂಲಕಾಯರಾಗಿದ್ದು ತಮ್ಮ ಹೊಟ್ಟೆಯ ಸುತ್ತಳತೆಯನ್ನು ಕಡಿಮೆಗೊಳಿಸಲು ಇಚ್ಛಿಸುತ್ತಿದ್ದಾರೆ. ಹೊಟ್ಟೆಯ ಸುತ್ತಳತೆ ಹೆಚ್ಚಿರುವುದು ಉಳ್ಳವರ ಲಕ್ಷಣ ಎಂದು ಹಿಂದೆ ಭಾವಿಸಲಾಗುತ್ತಿತ್ತು. ಆದರೆ ಇದು ವಾಸ್ತವವಾಗಿ ಅನಗತ್ಯ ಕೊಬ್ಬಿನ ಸಂಗ್ರಹವಾಗಿದ್ದು ಹಲವು ಕಾಯಿಲೆಗಳಿಗೆ ನೀಡುವ ಆಹ್ವಾನವಾಗಿದೆ. ಇದು ದೇಹದ ಆಕಾರವನ್ನು ಕೆಡಿಸುವುದು ಮಾತ್ರವಲ್ಲ, ಮಧುಮೇಹ, ಹೃದಯ ಸಂಬಂಧಿ ಕಾಯಿಲೆ, ಪಾರ್ಶ್ವವಾಯು ಮತ್ತು ಮರೆಗುಳಿತನಕ್ಕೂ ಕಾರಣವಾಗಬಹುದು, ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ ಹೊಟ್ಟೆಯ ಬೊಜ್ಜಿನ ಸಮಸ್ಯೆ: ಆರೋಗ್ಯಕ್ಕೆ ಕಾದಿದೆ ಗಂಡಾಂತರ!

ಹಾಗಾಗಿ ಇಂದು ಜನರು ದೇಹದ ಕೊಬ್ಬು ಕರಗಿಸುವುದಕ್ಕಾಗಿ ಎಷ್ಟೇ ಹಣ ಖರ್ಚು ಮಾಡಲು ಕೂಡ ತಯಾರಾಗುತ್ತಿದ್ದಾರೆ. ಅಲ್ಲದೆ ಈ ವಿದ್ಯಮಾನವನ್ನು ಗಮನಿಸಿದ ಕೆಲವೊಂದು ಸಂಸ್ಥೆಗಳು ಕೊಬ್ಬು ಇಳಿಸಲು ಭಾರೀ ಹಣ ತೊಡಗಿಸಿವೆ. ಅಷ್ಟೇ ಅಲ್ಲದೆ ಯೋಗಾಭ್ಯಾಸದ ಮೂಲಕವೂ ಕೊಬ್ಬು ಇಳಿಕೆಯಲ್ಲಿ ಹೊಸ ವ್ಯವಸ್ಥಿತ ಕಾರ್ಯಕ್ರಮಗಳನ್ನು ಪ್ರಸ್ತುತಪಡಿಸುತ್ತಿದೆ. ಆದರೆ ದೇಹದ ಕೊಬ್ಬನ್ನು ಕರಗಿಸುವುದು ಅಷ್ಟು ಸುಲಭವಲ್ಲ.

ಏಕೆಂದರೆ ನಮ್ಮ ದೇಹದಲ್ಲಿ ಅಡಕವಾಗಿರುವ ಕಾರ್ಯಸೂಚಿ (programme) ಪ್ರಕಾರ ಸೊಂಟದ ಸುತ್ತ ಕೊಬ್ಬು ಪ್ರಥಮವಾಗಿ ಸಂಗ್ರಹವಾಗುತ್ತಾ ಕಟ್ಟ ಕಡೆಯದಾಗಿ ಮುಖದ ಚರ್ಮದಡಿಯಲ್ಲಿ ಸಂಗ್ರಹವಾಗುತ್ತದೆ. ಅದೇ ಕರಗಿಸುವಾಗ ಮುಖದ ಚರ್ಮದಡಿಯ ಕೊಬ್ಬಿನಿಂದ ಪ್ರಾರಂಭವಾಗಿ ಕಟ್ಟಕಡೆಗೆ ಸೊಂಟದ ಕೊಬ್ಬು ಕರಗಲು ಪ್ರಾರಂಭವಾಗುತ್ತದೆ.

ಆದರೆ ನಿಮಗೊಂದು ಸಿಹಿ ಸುದ್ದಿ, ಶರೀರದ ಕೊಬ್ಬನ್ನು ದಹಿಸಿ ಬಿಡುವ ಕೆಲವೊ೦ದು ಆಹಾರವಸ್ತುಗಳು ನಿಮ್ಮ ಅಡುಗೆಮನೆಯಲ್ಲಿಯೇ ಇದ್ದು, ಈ ಆಹಾರಗಳು ಹೆಚ್ಚುವರಿ ಕೊಬ್ಬನ್ನು ಕರಗಿಸಿಕೊ೦ಡು, ಸದೃಢವಾದ ಬಳ್ಳಿಯ೦ತಹ ಮೈಕಟ್ಟನ್ನು ಸಾಧಿಸಲು ನೆರವಾಗುತ್ತವೆ. ಈ ನಿಟ್ಟಿನಲ್ಲಿ ಕೆಲವೊಂದನ್ನು ಕೆಳಗಿನ ಸ್ಲೈಡ್ ಶೋ ಮೂಲಕ ನೀಡಲಾಗಿದೆ, ಮುಂದೆ ಓದಿ....

ಸಾಸಿವೆ ಕಾಳು

ಸಾಸಿವೆಯಲ್ಲಿ ಹಲವು ಬಿ-ಕಾಂಪ್ಲೆಕ್ಸ್ ವಿಟಮಿನ್‌ಗಳಿವೆ. ಇದರಲ್ಲಿ ಫೋಲೇಟ್, ನಿಯಾಸಿನ್, ಥಿಯಾಮಿನ್, ರೈಬೋಫ್ಲೋವಿನ್ ಮೊದಲಾದವು ಪ್ರಮುಖವಾಗಿವೆ. ಈ ವಿಟಮಿನ್ನುಗಳು ಶರೀರದ ಚಯಾಪಚಯ ಕ್ರಿಯೆಯನ್ನು ಚುರುಕುಗೊಳಿಸುತ್ತದೆ. ಚುರುಕುಗೊಂಡ ಈ ಕ್ರಿಯೆ ಸರಾಗವಾಗಿ ನೆರವೇರಲು ಶರೀರದಲ್ಲಿ ಸಂಗ್ರಹವಾಗಿದ್ದ ಕೊಬ್ಬು ಬಳಕೆಯಾಗುತ್ತದೆ. ಪರಿಣಾಮವಾಗಿ ಕೊಬ್ಬು ಕರಗಿ ತೂಕ ಇಳಿಯಲು ಸಾಧ್ಯವಾಗುತ್ತದೆ. ತಕ್ಕಮಟ್ಟಿಗೆ ಸಾಸಿವೆಕಾಳುಗಳನ್ನು ನಿಮ್ಮ ಆಹಾರಪದಾರ್ಥಗಳಲ್ಲಿ ಸೇರಿಸಿಕೊ೦ಡಿರುವುದನ್ನು ಖಚಿತಪಡಿಸಿಕೊಳ್ಳಿರಿ.

ಶುಂಠಿ ಚಹಾ

ಒಂದು ಲೋಟಕ್ಕಿಂತ ಕೊಂಚ ಹೆಚ್ಚು ನೀರನ್ನು ಕುದಿಸಿ. ಈ ನೀರಿನಲ್ಲಿ ಒಂದು ಇಂಚು ಹಸಿಶುಂಠಿಯನ್ನು ಜಜ್ಜಿ ಸುಮಾರು ಹತ್ತು ನಿಮಿಷಗಳವೆರೆಗೆ ಚಿಕ್ಕ ಉರಿಯಲ್ಲಿ ಕುದಿಸಿ. ಈಗ ಪಾತ್ರೆಯನ್ನು ಒಲೆಯಿಂದ ಕೆಳಗಿಳಿಸಿ ಒಂದು ಚಮಚ ಈಗತಾನೇ ಹಿಂಡಿದ ಲಿಂಬೆರಸ ಮತ್ತು ಒಂದು ಚಮಚ ಜೇನು ಸೇರಿಸಿ. ತದನಂತರ ಸೋಸಿ, ಬಿಸಿಬಿಸಿ ಇರುವಂತೆಯೇ ಸೇವಿಸಿ. ಒಂದು ದಿನಕ್ಕೆ ಕನಿಷ್ಠ ಎರಡು ಕಪ್ ಈ ಟೀ ಸೇವಿಸಿ ಕೊಬ್ಬಿನಿಂದ ಮುಕ್ತಿಪಡೆಯಿರಿ. ಪ್ರತಿದಿನ ಎರಡು ಕಪ್ ಕುಡಿಯುವ ಮೂಲಕ ಜೀವರಾಸಾಯನಿಕ ಕ್ರಿಯೆಯಲ್ಲಿ ನಿಯಂತ್ರಣ, ಜೀರ್ಣಕ್ರಿಯೆಯಲ್ಲಿ ಪ್ರಚೋದನೆ, ಕಾರ್ಟಿಸೋಲ್ ಎಂಬ ರಸದೂತದ ಉತ್ಪತ್ತಿ ಪ್ರಮಾಣದಲ್ಲಿ ಇಳಿತ ಮೊದಲಾದ ಫಲಗಳನ್ನು ಕಾಣಬಹುದು.

ಮೊಸರು

ಮೊಸರಿನಲ್ಲಿ ಆರೋಗ್ಯಕರ ಬ್ಯಾಕ್ಟೀರಿಯಾವು (ಪ್ರೊಬಯಾಟಿಕ್ಸ್) ಸಮೃದ್ಧವಾಗಿದ್ದು, ಇದು ಪಚನಕ್ರಿಯೆಯಲ್ಲಿ ನೆರವಾಗುತ್ತದೆ ಹಾಗೂ ಜೊತೆಗೆ ವಿಟಮಿನ್‌ಗಳು ಹಾಗೂ ಖನಿಜಾ೦ಶಗಳು ಶರೀರದಿ೦ದ ಹೀರಿಕೊಳ್ಳಲ್ಪಡಲು ನೆರವಾಗುತ್ತದೆ. ಅಲ್ಲದೆ ಮೊಸರಿನ ಸೇವನೆಯಿ೦ದ ಹೊಟ್ಟೆಯೊಳಗಿನ ಅನಿಲದ ಪ್ರಮಾಣ ಹಾಗೂ ಹೊಟ್ಟೆಯುಬ್ಬರವು ಶೇ. ಎ೦ಬತ್ತರಷ್ಟು ತಗ್ಗುತ್ತವೆ ಎ೦ದು ಸಾಬೀತಾಗಿದೆ.

ಬೆಳ್ಳುಳ್ಳಿ-ಲಿಂಬೆರಸ

ಒಂದು ಕಪ್ ತಣ್ಣನೆಯ ಅಥವಾ ಉಗುರುಬೆಚ್ಚನೆಯ ನೀರಿಗೆ ಒಂದು ಲಿಂಬೆಹಣ್ಣಿನ ರಸವನ್ನು ಹಿಂಡಿರಿ
ಮೂರು ಎಸಳು ಬೆಳ್ಳುಳ್ಳಿಯನ್ನು ಸಿಪ್ಪೆ ಸುಲಿದು ಹಸಿಯಾಗಿಯೇ ಅಗಿಯಿರಿ ಮತ್ತು ಲಿಂಬೆರಸ ಹಿಂಡಿದ ನೀರಿನ ಜೊತೆ ಅಗಿದ ಬೆಳ್ಳುಳ್ಳಿಯನ್ನು ನುಂಗಿ.
ಈ ನೀರನ್ನು ಪ್ರತಿದಿನ ಬೆಳಿಗ್ಗೆ ಖಾಲಿಹೊಟ್ಟೆಯಲ್ಲಿ ಕುಡಿದ ಬಳಿಕ ಮುಕ್ಕಾಲು ಗಂಟೆ ಏನನ್ನೂ ಸೇವಿಸಬೇಡಿ. ಎರಡು ವಾರದಲ್ಲಿಯೇ ಸೊಂಟದ ಸುತ್ತಳತೆ ಕಡಿಮೆಯಾಗುವ ಲಕ್ಷಣಗಳು ಗೋಚರಿಸತೊಡಗುತ್ತವೆ

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.