ಟಿವಿ ನೋಡ್ತಾ ಊಟ ಮಾಡೀರಾ....ಜೋಕೆ !

ಮಕ್ಕಳ ಮೇಲೆ ಪರಿಣಾಮ

ಮುಖ್ಯವಾಗಿ ಮಕ್ಕಳು ಈ ರೀತಿ ಮಾಡೋದು ಹೆಚ್ಚು. ಇದ್ರಿಂದ ಮಕ್ಕಳ ಕ್ರಿಯಾಶೀಲತೆ ಕುಂದಬಹುದು. ಓದಿನಲ್ಲಿ ಅವ್ರ ಕಾನ್ಸನ್‌ಟ್ರೇಷನ್ ಕಡಿಮೆಯಾಗ್ಬಹುದು. ಊಟ ರುಚಿಯನ್ನು ಸರಿಯಾಗಿ ಸವಿಯದೇ ಬೇಕಾಬಿಟ್ಟಿ ತಿನ್ನಲು ಆರಂಭಿಸ್ತಾರೆ. ಸುಮ್ಮನೆ ತಿನ್ನಿಸ್ತಾ ಇದ್ದಾರೆ ಅನ್ನೋ ಕಾರಣಕ್ಕೆ ತಿನ್ನುವ ಅಭ್ಯಾಸ ಬೆಳೆದು ಬಿಡಬಹುದು ಇಲ್ಲವೇ ಇದರ ಉಲ್ಟಾ ಆಗ್ಬಹುದು. ಅಂದ್ರೆ ಬೇಕಾಬಿಟ್ಟಿಯಾಗಿ ಅಗತ್ಯಕ್ಕಿಂತ ಹೆಚ್ಚು ತಿನ್ನುವ ಅಭ್ಯಾಸ ಬೆಳೆಯಬಹುದು.

ಬೊಜ್ಜಿಗೆ ಕಾರಣ

ಟಿವಿ ನೋಡ್ತಾ ಊಟ ಮಾಡಿದ್ರೆ ನೀವು ಎಷ್ಟು ತಿಂದ್ರಿ ಅನ್ನೋ ಲೆಕ್ಕವೇ ಸಿಕ್ಕುವುದಿಲ್ಲ. ಬೇಕಾಬಿಟ್ಟಿ ತಿನ್ನುತ್ತಲೇ ಇರ್ತೀರಾ.. ಹೀಗೆ ತಿನ್ನುವ ಅಭ್ಯಾಸದಿಂದ ಬೊಜ್ಜು ಕೊಡುಗೆಯಾಗಿ ಬರಬಹುದು. ಮತ್ತೂ ಕೆಲವರು ಸರಿಯಾದ ಪ್ರಮಾಣದ ಕ್ಯಾಲೋರಿ ಸ್ವೀಕರಿಸದೇ ಇರ್ಬಹುದು.

ರುಚಿಯೇ ಗೊತ್ತಿರೋದಿಲ್ಲ

ತಿನ್ನಲು ಸಿಕ್ತು ಅಂತ ತಿನ್ತಲೇ ಇರ್ತೀರಾ ಹೊರತು ರುಚಿಯ ಬಗ್ಗೆ ಯೋಚನೆ ಮಾಡೋದಿಲ್ಲ. ಪ್ಲೇಟ್‌ನಲ್ಲಿ ಇರೋದು ಟಿವಿ ನೋಡ್ತಾ ಖಾಲಿಯಾಗುತ್ತೆ ನಿಜ. ಆದ್ರೆ ತಿಂತಿದ್ದು ಮನಸ್ಸಿಗೂ ಹಿಡಿಸಬೇಕು. ಆದ್ರೆ ನಿಮ್ಮೆಲ್ಲ ಕಾನ್ಸನ್‌ಟ್ರೇಷನ್ ಟಿವಿ ಮೇಲೆಯೇ ಇರೋದ್ರಿಂದ ಊಟದ ಅಥ್ವಾ ತಿಂಡಿಯ ರುಚಿ ಬಗ್ಗೆ ನೀವು ಆ ಸಂದರ್ಭದಲ್ಲಿ ತಲೆಕೆಡಿಸಿಕೊಳ್ಳೋದೇ ಇಲ್ಲ.

ಮನೆಮಂದಿಯ ಜೊತೆ ಬಾಂಧವ್ಯ ಸಡಿಲಿಸುತ್ತೆ

ಮನೆಮಂದಿಯ ಜೊತೆ ಕೂತು ಊಟ ಮಾಡುವ ಅಭ್ಯಾಸ ಎಲ್ಲರ ನಡುವಿನ ಬಾಂಧವ್ಯ ಗಟ್ಟಿಗೊಳಿಸುತ್ತೆ. ಆದ್ರೆ ಒಬ್ಬೊಬ್ಬರೂ ಒಮ್ಮೊಮ್ಮೆ ಅಂತ ಟಿವಿ ಮುಂದೆ ಕೂತು ಊಟ ಮಾಡಿದ್ರೆ ಮನೆಯ ಸದಸ್ಯರ ನಡುವೆ ಮಾತುಕತೆ ಇಲ್ಲದಂತಾಗುತ್ತೆ. ಎಲ್ಲರೂ ಮೌನವಾಗಿ ಟಿವಿಯಲ್ಲಿ ಬರುತ್ತಿರುವ ಕಾರ್ಯಕ್ರಮದಲ್ಲೇ ಮುಳುಗಿ ಹೋಗ್ತಿರೇ ವಿನಃ ನಿಮ್ಮ ಸುಖದುಃಖಗಳ ಬಗ್ಗೆ, ನಿಮ್ಮ ಮನಸ್ಸಿನ ಭಾವನೆಗಳನ್ನು ಹಂಚಿಕೊಳ್ಳೋದಿಲ್ಲ. ಅಥ್ವಾ ಕಷ್ಟಪಟ್ಟು ಅಡುಗೆ ಮಾಡಿದ ಮಹಿಳೆಗೆ ತಾನು ಮಾಡಿದ ಅಡುಗೆ ಹೇಗೆ ಆಗಿದೆ ಅಂತ ಹೇಳಿದ್ರೆ ಖುಷಿಯಾಗುತ್ತೆ. ಅದ್ರಲ್ಲೂ ಚೆನ್ನಾಗಿದೆ ಇವತ್ತಿನ ಊಟ ಅಂತ ಮನೆಯ ಸದಸ್ಯರು ಖುಷಿಯಿಂದ ಊಟ ಮಾಡಿದಾಗ ಆಕೆಗಾಗುವ ಖುಷಿ ಇಮ್ಮಡಿ ಅಂತಲೇ ಹೇಳ್ಬಹುದು. ಆದ್ರೆ ಅದ್ಯಾವುದಕ್ಕೂ ಟಿವಿ ಅವಕಾಶವನ್ನೇ ಕೊಡೋದಿಲ್ಲ..

ಮನೆಯ ಮಹಿಳೆಗೆ ಇನ್ನಷ್ಟು ಕೆಲ್ಸದ ಹೊರೆ

ಇನ್ನು ಒಬ್ಬೊಬ್ಬರಿಗೆ ಒಂದೊಂದು ಸಲ ಊಟ ಬಡಿಸೋದು ಮನೆಯ ಮಹಿಳೆಗೂ ಕಿರಿಕಿರಿ ಅನ್ನಿಸ್ಬಹುತ್ತೆ. ಸುಮ್ಮನೆ ಕೆಲ್ಸದ ಹೊರೆ ಆಕೆಗೆ ಹೆಚ್ಚಾಗಿರುತ್ತೆ. ಒಟ್ಟಿನಲ್ಲಿ ಟಿವಿಯವ್ರೇನೋ ನೀವು ನೋಡ್ಬೇಕು ಅಂತ 24 ಗಂಟೆ ಕೆಲ್ಸ ಮಾಡಿ ಕಾರ್ಯಕ್ರಮಗಳನ್ನು ಕೊಡ್ತಾರೆ. ಆದ್ರೆ ಅವ್ರು ಹಾಕಿದ ಕಾರ್ಯಕ್ರಮವನ್ನೆಲ್ಲ ನೀವು ನೋಡ್ಬೇಕು ಅಂತೇನಿಲ್ಲ. ಬದಲಾಗಿ ನಿಮ್ಮ ಬಿಡುವಿನ ಸಮಯವನ್ನಷ್ಟೇ ಟಿವಿಗೆ ಮೀಸಲಿಡಿ.. ಇನ್ನೂ ಊಟದ ಸಮಯವನ್ನು ಬಿಡುವಿನ ಸಮಯ ಅಂತ ಯಾವತ್ತೂ ಪರಿಗಣಿಸಬೇಡಿ.. ದಯವಿಟ್ಟು ಊಟಕ್ಕೊಂದು ಬ್ರೇಕ್ ತೆಗೆದುಕೊಳ್ಳಿ.. ಸುಖವಾಗಿ ಖುಷಿಯಿಂದ ಆರೋಗ್ಯವಾಗಿರಿ.