ನಿಜವಾಗಿಯೂ ಶುಂಠಿ ಚಹಾ ದೇಹಕ್ಕೆ ಮಾರಕವೇ?

ಹೆಚ್ಚಾಗಿ ಸೇವಿಸುವುದು

ಅಮೃತವನ್ನೇ ಆಗಲಿ ಅತಿಯಾಗಿ ಸೇವಿಸಿದರೆ ಅದು ವಿಷವಾಗುತ್ತದೆ. ಅದಕ್ಕೆ ಶುಂಠಿಯು ಹೊರತಲ್ಲ. ಆದ್ದರಿಂದ ಶುಂಠಿ ಚಹಾವನ್ನು ಹಿತ ಮಿತವಾಗಿ ಸೇವಿಸಿ, ಇದು ನಿಮ್ಮ ಅಗತ್ಯಕ್ಕೆ ತಕ್ಕಷ್ಟಿರಬೇಕೆ ಹೊರತು ಅದನ್ನು ಮೀರಬಾರದು. ಶುಂಠಿ ಟೀಯನ್ನು ಅಧಿಕವಾಗಿ ಸೇವಿಸುವುದರಿಂದ ಜೀರ್ಣಾಂಗ ವ್ಯೂಹದ ಮೇಲೆ ದುಷ್ಪರಿಣಾಮ ಬೀರುತ್ತದೆ. ಇದರಿಂದ ಜಠರದಲ್ಲಿ ಸಮಸ್ಯೆ, ಎದೆ ಉರಿ, ಬಾಯಿ ತುರಿಕೆ ಕಂಡುಬರುತ್ತವೆ. ಇದನ್ನು ಅಧಿಕವಾಗಿ ಸೇವಿಸುವುದರಿಂದ ನಮ್ಮ ದೇಹದಲ್ಲಿ ಆಸಿಡ್ ಹೆಚ್ಚಾಗುತ್ತವೆ. ಇದರಿಂದ ಆಸಿಡಿಟಿ ನಮ್ಮನ್ನು ಕಾಡುತ್ತದೆ. ಇದರ ಜೊತೆಗೆ ಮಧುಮೇಹದಿಂದ ಬಳಲುತ್ತಿರುವವರು ಅಧಿಕ ಪ್ರಮಾಣದ ಶುಂಠಿಯನ್ನು ಯಾವುದೇ ರೂಪದಲ್ಲಿ ಸೇವಿಸಲು ಹೋಗಬಾರದು. ಇದು ನಮ್ಮ ರಕ್ತದಲ್ಲಿರುವ ಸಕ್ಕರೆ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ ಮತ್ತು ಹೈಪೊಗ್ಲಿಸೆಮಿಯಾವನ್ನುಂಟು ಮಾಡುತ್ತದೆ.

ಬ್ಲಡ್ ಥಿನ್ನರ್‌ಗಳು ಮತ್ತು ಡಿಸಾರ್ಡರ್‌ಗಳು

ಶುಂಠಿ ಚಹಾ ಜೊತೆಗೆ ಯಾವುದೇ ರೀತಿಯ ಬ್ಲಡ್ ಥಿನ್ನರ್ ಅಂದರೆ ರಕ್ತವನ್ನು ತೆಳ್ಳಗೆ ಮಾಡುವ ಔಷಧಿಗಳನ್ನು ತೆಗೆದುಕೊಳ್ಳುವುದು ಒಳ್ಳೆಯದಲ್ಲ. ಅಸ್ಪಿರಿನ್ ಅಥವಾ ಇಬುರುಫೆನ್‍ನಂತಹ ಅನಲ್ಜೆಸಿಕ್‍ಗಳು ಈ ಬಗೆಯ ಔಷಧಿಗಳ ಪಟ್ಟಿಗೆ ಸೇರುತ್ತವೆ. ಅಧಿಕ ರಕ್ತದೊತ್ತಡದಿಂದ ಬಳಲುವ ರೋಗಿಗಳು ಶುಂಠಿಯನ್ನು ಯಾವುದೇ ರೂಪದಲ್ಲಿ ಸೇವಿಸುವುದು ಒಳ್ಳೆಯದಲ್ಲ. ಶುಂಠಿಯು ರಕ್ತವನ್ನು ಗಡ್ಡೆ ಕಟ್ಟುವಂತೆ ಮಾಡುವ ಪ್ಲೇಟ್‍ಲೆಟ್ ಅಂದರೆ ಕಿರುತಟ್ಟೆಗಳ ಕಾರ್ಯವನ್ನು ಅಡಚಣೆ ಮಾಡುತ್ತದೆ. ಹಿಮೊಫಿಲ್ಲಾ ಮುಂತಾದ ರಕ್ತ ಸಂಬಂಧಿ ಕಾಯಿಲೆಗಳಿಂದ ಬಳಲುತ್ತಿರುವವರು ಈ ಶುಂಠಿಯನ್ನು ಸೇವಿಸುವುದರಿಂದ ಅವರ ಆರೋಗ್ಯ ಬಿಗಡಾಯಿಸುತ್ತದೆ. ಆದ್ದರಿಂದ ಶುಂಠಿ ಚಹಾವನ್ನು ಸೇವಿಸುವ ಮೊದಲು ವೈದ್ಯರ ಬಳಿ ಸಲಹೆ ತೆಗೆದುಕೊಳ್ಳುವುದು ಉತ್ತಮ.

ನಿದ್ದೆಯ ಸಮಸ್ಯೆಗಳು

ಶುಂಠಿ ಚಹಾವನ್ನು ಸೇವಿಸುವುದರಿಂದ ವಿಶ್ರಾಂತಿ ಹೀನತೆ ಮತ್ತು ನಿದ್ರಾಹೀನತೆ ಸಮಸ್ಯೆ ಕಂಡು ಬರುತ್ತದೆ. ನಿದ್ದೆಗೆ ಮೊದಲು ಶುಂಠಿ ಚಹಾ ಸೇವಿಸಲೇ ಬೇಡಿ, ಏಕೆಂದರೆ ಇದು ನಿಮ್ಮ ನಿದ್ದೆಯನ್ನು "ಕೊಂದು" ಹಾಕುತ್ತದೆ. ಇದನ್ನು ಸೇವಿಸಿ ನಿದ್ರಿಸಲು ಹೋದರೆ ಬಹಳ ಹೊತ್ತು ನಿದ್ದೆ ಬರದೆ ಹೊರಳಾಡಬೇಕಾಗುತ್ತದೆ. ಅದರ ಜೊತೆಗೆ ನಿಮಗೆ ಎದೆಯುರಿ ಸಹ ಬರಬಹುದು. ಇದರಿಂದ ಜೀವಕ್ಕೆ ಆಪತ್ತು.

ಅನೆಸ್ತೇಷಿಯಾ

ಸುಮಾರು ದಿನಗಳಿಂದ ಶುಂಠಿ ಚಹಾವನ್ನು ಸೇವಿಸುತ್ತಿರುವವರು ಯಾವುದಾದರು ಒಂದು ಶಸ್ತ್ರ ಚಿಕಿತ್ಸೆಗೆ ಒಳಗಾದರೆ ಇದರ ದುಷ್ಪರಿಣಾಮವನ್ನು ಎದುರಿಸಬೇಕಾಗುತ್ತದೆ. ಏಕೆಂದರೆ ಶುಂಠಿ ಚಹಾವನ್ನು ಸೇವಿಸುವರ ದೇಹವು ಅನೆಸ್ತೇಷಿಯಾದ ಜೊತೆಗೆ ವಿಚಿತ್ರವಾಗಿ ಪ್ರತಿಕ್ರಿಯಿಸುತ್ತದೆ. ಇದರಿಂದಾಗಿ ರೋಗಿಯು ಶಸ್ತ್ರ ಚಿಕಿತ್ಸೆಯಲ್ಲಿ ವಿಪರೀತ ನೋವನ್ನು ಅನುಭವಿಸುತ್ತಾನೆ. ಜೊತೆಗೆ ಗಾಯಗಳು, ಫೋಟೊಸೆನ್ಸಿಟಿವ್ ಪ್ರತಿಕ್ರಿಯೆಗಳು, ರಕ್ತಸ್ರಾವ ಮುಂತಾದ ಸಮಸ್ಯೆಗಳು ಕಂಡು ಬರುತ್ತವೆ. ಇದಕ್ಕೆ ಕಾರಣ, ಆಂಟಿಕೊವಾಗುಲೆಂಟ್‍ಗಳ ನಡುವಿನ ಮುಖಾಮುಖಿಯೇ ಕಾರಣವಾಗುತ್ತದೆ. ಆದ್ದರಿಂದ ಬಹುತೇಕ ವೈದ್ಯರು ಶಸ್ತ್ರಚಿಕಿತ್ಸೆಗಿಂತ ಒಂದು ವಾರ ಮೊದಲು ಶುಂಠಿ ಟೀಯನ್ನು ಸೇವಿಸದಿರುವಂತೆ ಸಲಹೆ ಮಾಡುತ್ತಾರೆ.

ಪಿತ್ತಕೋಶದ ಕಲ್ಲುಗಳು

ಪಿತ್ತಕೋಶದಲ್ಲಿ ಕಲ್ಲು ಇರುವ ರೋಗಿಗಳು ವೈದ್ಯರನ್ನು ಸಂಪರ್ಕಿಸಿದ ನಂತರ ಮಾತ್ರ ಶುಂಠಿ ಟೀಯನ್ನು ಕುಡಿಯಬೇಕಾಗುತ್ತದೆ. ಅದರಲ್ಲೂ ಪೋಷಕಾಂಶ ಮತ್ತು ಆಹಾರಕ್ಕೆ ಸಂಬಂಧಿಸಿದ ವೈದ್ಯರಾದರೆ ಇನ್ನೂ ಉತ್ತಮ. ಏಕೆಂದರೆ ಇದರಿಂದ ನಿಶ್ಚಿತವಾಗಿ ಯಾವುದಾದರು ಅಡ್ಡ ಪರಿಣಾಮ ಉಂಟಾಗುವುದು ನಿಶ್ಚಿತ. ಏಕೆಂದರೆ ಪಿತ್ತಕೋಶದಲ್ಲಿ ಕಲ್ಲು ಇರುವವರಲ್ಲಿ ಪಿತ್ತ ರಸ ಉತ್ಪತ್ತಿಯಾದಾಗ ವಿಪರೀತವಾದ ನೋವು ಕಂಡು ಬರುತ್ತದೆ. ಶುಂಠಿಯು ಪಿತ್ತರಸ ಉತ್ಪಾದನೆಯನ್ನು ಹೆಚ್ಚು ಮಾಡುತ್ತದೆ, ಹೀಗಾಗಿ ಅವರ ಸ್ಥಿತಿ ಮತ್ತಷ್ಟು ಶೋಚನೀಯವಾಗುತ್ತದೆ.

ಹೊಟ್ಟೆ ನೋವು

ಹೊಟ್ಟೆ ನೋವು ಅಥವಾ ಹೊಟ್ಟೆ ತೊಳೆಸಿದಂತಾಗುವುದು ಶುಂಠಿ ಟೀಯ ಮತ್ತೊಂದು ಅಡ್ಡ ಪರಿಣಾಮವಾಗಿರುತ್ತದೆ. ನಾಸಿಯಾ ಇರುವವರು ಅದನ್ನು ಹೋಗಲಾಡಿಸಿಕೊಳ್ಳಲು ಶುಂಠಿ ಟೀಯ ಮೊರೆ ಹೋಗುತ್ತಾರೆ. ಆದರೆ ಇದನ್ನು ಖಾಲಿ ಹೊಟ್ಟೆಯಲ್ಲಿ ಸೇವಿಸುವುದರಿಂದ ಗ್ಯಾಸ್ಟ್ರೊಇಂಟೆಸ್ಟಿನಲ್ ಅಪ್‍ಸೆಟ್ ಉಂಟಾಗುತ್ತದೆ ಎಂದು ಮೇರಿಲ್ಯಾಂಡ್ ಸೆಂಟರ್ ವಿಶ್ವವಿದ್ಯಾನಿಲಯದವರು ಹೇಳಿದ್ದಾರೆ. ಶುಂಠಿ ಟೀಯ ಡೋಸ್ ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನವಾಗಿರುತ್ತದೆ. ಹಾಗಾಗಿ ಎಷ್ಟು ಸೇವಿಸಬೇಕೆಂಬ ಮಾನದಂಡದ ಕೊರತೆಯು ನಮ್ಮನ್ನು ತಪ್ಪು ದಾರಿಗೆ ಕೊಂಡೊಯ್ಯುತ್ತದೆ. ಗ್ಯಾಸ್ಟ್ರೊಇಂಟೆಸ್ಟಿನಲ್ ಅಪ್‍ಸೆಟ್ ಅಂದರೆ ಹೊಟ್ಟೆ ತೊಳೆಸುವ ಸಮಸ್ಯೆ ಹೀಗೆ ಶುರುವಾಗುತ್ತದೆ.

ಗರ್ಭಿಣಿಯರು

ಗರ್ಭಿಣಿಯರು ಶುಂಠಿಯನ್ನು ಬಳಸುವುದು ಒಂದು ವಿವಾದಾತ್ಮಕ ವಿಷಯವಾಗಿದೆ. ಶುಂಠಿ ಟೀಯನ್ನು ಗರ್ಭಿಣಿಯರಿಗೆ ನೀಡುವಂತೆ ಯಾರು ಸಲಹೆ ಮಾಡುವುದಿಲ್ಲ. ಕಾರಣ, ಇದು ಗರ್ಭದಲ್ಲಿರುವ ಮಗುವಿಗೆ ವಿಷವಾಗಿ ಪರಿಣಮಿಸುತ್ತದೆಯಂತೆ. ಆದರೆ ಕೆಲವು ವೈದ್ಯರು ಮಾರ್ನಿಂಗ್ ಸಿಕ್‍ನೆಸ್‍ಗೆ ಶುಂಠಿ ರಾಮ ಬಾಣ ಎಂದು ಹೇಳುತ್ತಾರೆ. ಆದರೆ ಸಾಂಪ್ರದಾಯಿಕ ಚೀನಿ ಆಯುರ್ವೇದ ಪಂಡಿತರ ಪ್ರಕಾರ ಶುಂಠಿ ಗರ್ಭಿಣಿಯರಿಗೆ ಮತ್ತು ಅವರ ಗರ್ಭದಲ್ಲಿರುವ ಮಗುವಿಗೆ ಮಾರಕವಂತೆ. ಇದು ಗರ್ಭಪಾತಕ್ಕು ಸಹ ಎಡೆ ಮಾಡಿಕೊಡುತ್ತದೆ ಎಂಬ ಮಾತು ಅವರಲ್ಲಿ ಚಾಲ್ತಿಯಲ್ಲಿದೆ. ಆದ್ದರಿಂದ ನಿಮ್ಮ ಒಳ್ಳೆಯದಕ್ಕಾಗಿ ಗರ್ಭಿಣಿಯರಿಗೆ ಶುಂಠಿ ಟೀಯನ್ನು ನೀಡಬೇಡಿ. ನೀವು ಗರ್ಭಿಣಿಯಾಗಿದ್ದಲ್ಲಿ ಶುಂಠಿ ಟೀಯನ್ನು ವೈದ್ಯರ ಅನುಮತಿಯಿಲ್ಲದೆ ಸೇವಿಸಬೇಡಿ.