ಆಫೀಸ್ ಸಮಯದಲ್ಲಿ ಕಾಡುವ ತಲೆನೋವಿಗೆ ಪರಿಹಾರ

ನಿಮ್ಮಲ್ಲಿ ನೀವೇ ಚೈತನ್ಯ ತುಂಬಿ

ಸ್ವಲ್ಪ ರೆಸ್ಟ್ ತೆಗೆದುಕೊಳ್ಳದೇ ನಿರಂತರವಾಗಿ ಕೆಲಸ ಮಾಡುತ್ತಿದ್ದರೆ ತಲೆನೋವು ಉಂಟಾಗುತ್ತದೆ. ಎಷ್ಟೇ ಕೆಲಸವಿರಲಿ 2 ಗಂಟೆಗೊಮ್ಮೆ 5 ನಿಮಿಷ ವಿಶ್ರಾಂತಿ ತೆಗೆದುಕೊಳ್ಳಿ. ಸಹೋದ್ಯೋಗಿ ಜೊತೆ ಮಾತನಾಡಿ.ಸ್ವಲ್ಪ ಹೊತ್ತು ರಿಲ್ಯಾಕ್ಸ್ ಆಗಿರಿ. ಇದರಿಂದ ಉಳಿದ ಕೆಲಸವನ್ನು ಬೇಗನೆ ಮುಗಿಸಲು ಚೈತನ್ಯ ಬರುತ್ತದೆ. ತುಂಬಾ ಕೆಲಸವಿದೆಯೆಂದು ಒಂದು ನಿಮಿಷ ಕೂಡ ವಿಶ್ರಾಂತಿ ತೆಗೆಯದೆ ಕೆಲಸ ಮಾಡಿದರೆ ತುಂಬಾ ಸುಸ್ತಾಗುವುದು, ಮಾನಸಿಕ ಒತ್ತಡ ಹೆಚ್ಚಾಗುವುದು. ಇದರಿಂದ ಕೆಲಸವನ್ನೂ ಬೇಗನೆ ಮುಗಿಸಲು ಸಾಧ್ಯವಿಲ್ಲ, ತಲೆನೋವು ಕಾಣಿಸಿಕೊಳ್ಳುವುದು.

ತುಂಬಾ ನೀರು ಕುಡಿಯಿರಿ

ಎಷ್ಟೋ ಜನರು ಕೆಲಸದಲ್ಲಿ ಮಗ್ನರಾಗಿ ನೀರು ಕುಡಿಯುವುದೇ ಇಲ್ಲ. ದೇಹದಲ್ಲಿ ನೀರಿನಂಶ ಕಡಿಮೆಯಾದರೆ ತಲೆನೋವು ಉಂಟಾಗುವುದು. ಕಡಿಮೆ ನೀರು ಕುಡಿದರೆ ನಿದ್ದೆ ಬರುವುದು, ನೀರು ಮಾನಸಿಕ ಒತ್ತಡವನ್ನು ಕಡಿಮೆ ಮಾಡುತ್ತದೆ.

ಕತ್ತನ್ನು ತಿರುಗಿಸಿ

ನಿಮ್ಮ ಕುತ್ತಿಗೆಗೆ ವಿಶ್ರಾಂತಿ ನೀಡಿ. ತಲೆಯನ್ನು ಅಲ್ಲಾಡಿಸದೆ ಕಂಪ್ಯೂಟರ್ ಮಾತ್ರ ನೋಡುತ್ತಾ ಕೆಲಸ ಮಾಡಿದರೆ ತಲೆನೋವು ಕಾಣಿಸಿಕೊಳ್ಳುವುದು, ಕತ್ತನ್ನು ಅತ್ತ-ಇತ್ತ ತಿರುಗಿಸಿ. ಸರಳವಾದ ಕತ್ತಿನ ವ್ಯಾಯಾಮದಿಂದ ಕೂಡ ತಲೆನೋವು ಕಡಿಮೆಯಾಗುತ್ತದೆ.

ಸೂಜಿ ಚಿಕಿತ್ಸೆ

ಆಗಾಗ ತಲೆನೋವು ಬರುತ್ತಾ ಇದ್ದರೆ ಸೂಜಿ ಚಿಕಿತ್ಸೆಯಿಂದ ಕಡಿಮೆ ಮಾಡಬಹುದು. ಇದು ನಮ್ಮಲ್ಲಿರುವ ಮಾನಸಿಕ ಒತ್ತಡವನ್ನು ಕಡಿಮೆ ಮಾಡುತ್ತದೆ. ಗರ್ಭಿಣಿ ಮಹಿಳೆಯರು ಹಾಗೂ ಇತರ ಆರೋಗ್ಯ ಸಮಸ್ಯೆ ಇರುವವರು ಈ ಚಿಕಿತ್ಸೆಯನ್ನು ಮಾಡಿಸಿಕೊಳ್ಳಬಾರದು.

ಟೀ

ತಲೆ ನೋವು ಕಾಣಿಸಿದರೆ ಶುಂಠಿ ಟೀ ಅಥವಾ ಲೆಮನ್ ಟೀ ಕುಡಿದರೆ ತಲೆನೋವು ಕಡಿಮೆಯಾಗುವುದು.

ನಿದ್ದೆ ಕಡಿಮೆಯಾಗಿದ್ದರೆ

ನಿದ್ದೆ ಕಡಿಮೆಯಾಗಿದ್ದರೆ ಕೂಡ ತಲೆನೋವು ಕಾಣಿಸಿಕೊಳ್ಳುತ್ತದೆ, ತೂಕಡಿಕೆ ಬರುತ್ತದೆ. ಆಗ ಒಂದು ಲೋಟ ಕಾಫಿ ಕುಡಿಯಿರಿ, ಸ್ವಲ್ಪ ಚೈತನ್ಯ ಬರುತ್ತದೆ. ಆಫೀಸ್ ಮುಗಿಸಿ ಮನೆಗೆ ಬಂದ ಮೇಲೆ ಬೇಗ ಮಲಗಿ ಚೆನ್ನಾಗಿ ನಿದ್ದೆ ಮಾಡಿ. ಇಷ್ಟು ಮಾಡಿದರೆ ನಿದ್ದೆ ಕಡಿಮೆಯಾಗಿ ಬಂದಂತಹ ತಲೆನೋವಾದರೆ ಕಡಿಮೆಯಾಗುತ್ತದೆ.

ಕೂರುವ ಭಂಗಿ

ಕೂರುವ ಭಂಗಿ ಸೊಂಟನೋವನ್ನು ಮಾತ್ರವಲ್ಲ, ತಲೆನೋವನ್ನೂ ತರುತ್ತದೆ. ಭುಜಗಳ ಮೇಲೆ ಒತ್ತಡ ಬೀಳುವಂತೆ ಕೂತರೆ ತಲೆನೋವು ಉಂಟಾಗುತ್ತದೆ. ಬೆನ್ನಿಗೆ ಸಪೋರ್ಟ್ ಆಗಿರುವ ಚೇರ್ ನಲ್ಲಿ ಕೂರಬೇಕು.