ನಿಮ್ಮ ತಲೆನೋವಿಗೆ ಈ ಆಹಾರಗಳು ಕಾರಣವಿರಬಹುದೇ?

ಆಹಾರಕ್ರಮ

ಆಹಾರಕ್ರಮವನ್ನು ಇದ್ದಕ್ಕಿದ್ದ ಹಾಗೇ ಬದಲಾಯಿಸಿದರೆ ತಲೆನೋವು ಕಾಣಿಸಬಹುದು. ಕಾರ್ಬೋಹೈಡ್ರೇಟ್ ಮತ್ತು ಕೊಬ್ಬಿನಂಶವನ್ನು ಮುಟ್ಟದೇ, ತೆಳ್ಳಗಾಗಬೇಕೆಂದು ಕಡಿಮೆ ಕ್ಯಾಲೋರಿಯ ಆಹಾರಗಳನ್ನು ಮಾತ್ರ ತಿನ್ನುವುದು ಮಾಡಿದರೆ ದೇಹದಲ್ಲಿ ಸಕ್ಕರೆಯಂಶ ಕಡಿಮೆಯಾಗಿ ತಲೆನೋವು ಬರುವುದು.

ಕಡಿಮೆ ನೀರು ಕುಡಿದರೆ

ದಿನದಲ್ಲಿ 8-10 ಗ್ಲಾಸ್ ನೀರು ಕುಡಿಯಬೇಕು, ನೀರನ್ನು ಕಮ್ಮಿ ಕುಡಿದರೆ ದೇಹದಲ್ಲಿ ನೀರಿನಂಶ ಕಮ್ಮಿಯಾಗುವುದು, ಇದರಿಂದ ತಲೆನೋವು ಕಾಣಿಸಿಕೊಳ್ಳುವುದು.

ಟೈರಾಮೈನ್ (tyramine)

ಟೈರಾಮೈನ್ ಅನ್ನುವುದು ಒಂದು ಬಗೆಯ ಅಮೈನೋ ಆಮ್ಲ. ಇದು ಮೆದುಳಿನಲ್ಲಿರುವ ಸೆರೋಟೊನಿನ್ ಅನ್ನು ಕಡಿಮೆ ಮಾಡುತ್ತದೆ. ಆಗ ತಲೆನೋವು ಉಂಟಾಗುವುದು. ರೆಡ್ ವೈನ್, ಚೀಸ್, ಚಾಕಲೇಟ್, ಆಲ್ಕೋಹಾಲ್, ಮತ್ತು ಸಂಸ್ಕರಿಸಿದ ಕೆಲವೊಂದು ಮಾಂಸಗಳು ಹೊಟ್ಟೆಯನ್ನು ಸೇರಿದರೆ ತಲೆನೋವು ಬರುವುದು.

ಆಲ್ಕೋಹಾಲ್

ಬೀರ್, ವಿಸ್ಕಿ, ವೈನ್ , ಹೀಗೆ ಯಾವುದೇ ಬಗೆಯ ಮದ್ಯ ಕುಡಿದರೂ ಸೆರೋಟೊನಿನ್ ಕಮ್ಮಿಯಾಗಿ ತಲೆನೋವು ಬರುವುದು.

ಚಾಕಲೇಟ್

ಮೈಗ್ರೇನ್ ಇರುವವರಿಗೆ ಚಾಕಲೇಟ್ ತಿಂದರೆ ತಲೆನೋವು ಬರುವ ಸಾಧ್ಯತೆ ಹೆಚ್ಚು. ಮಾನಸಿಕ ಒತ್ತಡದಲ್ಲಿ ಇದ್ದಾಗ ಚಾಕಲೇಟ್ ತಿಂದರೆ ಒತ್ತಡ ಕಡಿಮೆಯಾಗುವುದು ಆದರೆ ಇದರಲ್ಲಿ ಥೈಯಾಮಿನ್ ಅಂಶ ಇರುವುದರಿಂದ ತಲೆನೋವು ಬರುವ ಸಾಧ್ಯತೆ ಕೂಡ ಇದೆ.

ಕಾಫಿ

ತಲೆನೋವು ಆದಾಗ ಕಮ್ಮಿಯಾಗಲು ಟೀ ಅಥವಾ ಕಾಫಿ ಕುಡಿಯಬೇಕೆಂದು ಅನಿಸುವುದು ಸಹಜ ಅಲ್ಲವೇ? ಆದರೆ ಕೆಲವರಿಗೆ ಕಾಫಿ ಕುಡಿದ ತಕ್ಷಣ ತಲೆನೋವು ಬರುವುದು. ಆದ್ದರಿಂದ ಯಾರಿಗೆ ಕಾಫಿ ಕುಡಿದ ತಕ್ಷಣ ತಲೆನೋವು ಕಾಣಿಸಿಕೊಳ್ಳುತ್ತದೋ ಅವರು ಕಾಫಿ ಕುಡಿಯುವುದನ್ನು ಬಿಡುವುದು ಒಳ್ಳೆಯದು.

ಸಕ್ಕರೆ

ಕೃತಕ ಸಿಹಿ ಇರುವ ಸಿಹಿ ಪದಾರ್ಥಗಳು ಕೂಡ ತಲೆನೋವು ತರಬಹುದು. ಆದ್ದರಿಂದ ಆಗಾಗ ತಲೆನೋವು ಕಾಣಿಸಿಕೊಳ್ಳುತ್ತಿದ್ದರೆ ಈ ಆಹಾರಗಳು ನಿಮ್ಮ ತಲೆ ನೋವಿಗೆ ಕಾರಣವಿರಬಹುದೇ ಅನ್ನುವುದನ್ನು ಪರೀಕ್ಷಿಸಿ. ಪರೀಕ್ಷಿಸುವುದು ಸುಲಭ, ಈ ಆಹಾರಗಳನ್ನು ತಿಂದ ಅಥವಾ ಕುಡಿದ ಬಳಿಕ ತಲೆ ನೋವು ಬಂದರೆ ಆಹಾರಕ್ರಮವೇ ನಿಮ್ಮ ತಲೆ ನೋವಿಗೆ ಕಾರಣವೆಂಬುವುದನ್ನು ತಿಳಿಯಬಹುದು.