ಫುಡ್ ಪಾಯಿಸನ್ ತಡೆಗಟ್ಟುವುದು ಹೇಗೆ?

Wellness

oi-Reena

By Hema S

Updated: Thursday, April 4, 2013, 9:40 [IST]

ಫುಡ್ ಪಾಯಿಸನ್ ಆಗಿ ಆಸ್ಪತ್ರೆಗೆ ಸೇರಿಸಲಾಯಿತು ಅಂತ ಹೇಳುವುದನ್ನು ಕೇಳುತ್ತಿರುತ್ತೇವೆ. ಕೆಲವರಿಗೆ ಈ ರೀತಿ ಉಂಟಾದ ಅನುಭವ ಕೂಡ ಇರುತ್ತದೆ. ಫುಡ್ ಪಾಯಿಷನ್ ಅಂದರೆ ಆಹಾರ ವಿಷಮಯವಾಗುವುದು. ರಾಸಾಯನಿಕಗಳು, ಬ್ಯಾಕ್ಟೀರಿಯಾಗಳು, ಕೀಟಾಣುಗಳು ಆಹಾರದಲ್ಲಿದ್ದರೆ ಅಂತಹ ಆಹಾರ ಹೊಟ್ಟೆ ಸೇರಿದರೆ ದೇಹದ ಆರೋಗ್ಯ ತಪ್ಪುತ್ತದೆ.

ಇದು ಉಂಟಾದರೆ ವಾಂತಿ, ಬೇಧಿ ಉಂಟಾಗಿ ದೇಹದಲ್ಲಿ ನೀರಿನ ಅಂಶ ಕಡಿಮೆಯಾಗುವುದು. ಸೂಕ್ತ ಚಿಕಿತ್ಸೆ ತೆಗೆದುಕೊಳ್ಳದಿದ್ದರೆ ಪ್ರಾಣಕ್ಕೆ ಅಪಾಯ ಉಂಟಾಗಬಹುದು. ಆದ್ದರಿಂದ ಫುಡ್ ಪಾಯಿಸನ್ ಆಗದಂತೆ ತಡೆಯಲು ಈ ಕೆಳಗಿನ ಸಲಹೆಗಳನ್ನು ಪಾಲಿಸಬಹುದು.

1. ಅಡುಗೆಯನ್ನು ಮಾಡುವ ಮೊದಲು ಮತ್ತು ನಂತರ ಕೈಗಳನ್ನು ಚೆನ್ನಾಗಿ ತೊಳೆಯಬೇಕು. ಅದರಲ್ಲೂ ಮಾಂಸದ ಅಡುಗೆ ಮಾಡುವಾಗ ಶುಚಿತ್ವಕ್ಕೆ ಹೆಚ್ಚಿನ ಪ್ರಾಮುಖ್ಯತೆ ಕೊಡಬೇಕು.

2. ತರಕಾರಿಗಳನ್ನು ತೊಳೆದು ತಿನ್ನಬೇಕು. ಅಡುಗೆಗೆ ಬಳಸುವಾಗ ಚೆನ್ನಾಗಿ ತೊಳೆದು ಸರಿಯಾದ ರೀತಿಯಲ್ಲಿ ಬೇಯಿಸಬೇಕು.

3. ಆಹಾರ ತಿಂದು ಮಿಕ್ಕಿದರೆ ಅದನ್ನು ಕೂಡಲೇ ಫ್ರಿಜ್ ನಲ್ಲಿಡಬೇಕು, ಇಲ್ಲದಿದ್ದರೆ ಚೆನ್ನಾಗಿ ಮುಚ್ಚಿಡಬೇಕು. ಆಹಾರ ಪ್ಯಾಕೆಟ್ ಕೊಳ್ಳುವಾಗ ಕಾಲಾವಧಿ ಮುಗಿದ ಆಹಾರವನ್ನು ತಿನ್ನಬಾರದು. ಹಣ್ಣು ಅಥವಾ ತರಕಾರಿ ಸ್ವಲ್ಪ ಹಾಳಾದರೂ ಕೂಡ ತಿನ್ನಲು ಹೋಗಬಾರದು.

4. ಅಡುಗೆ ಮನೆಯನ್ನು ಶುಚಿಯಾಗಿ ಇಟ್ಟುಕೊಳ್ಳಬೇಕು. ಶುಚಿಯಾದ ಹೋಟೆಲ್ ನಿಂದ ಮಾತ್ರ ಆಹಾರ ತಿನ್ನಬೇಕು.

5. ಶೌಚಾಲಯಕ್ಕೆ ಹೋಗಿ ಬಂದ ತಕ್ಷಣ ಕೈಗಳನ್ನು ಸೋಪು ಹಾಕಿ ತೊಳೆಯಬೇಕು.

6. ಬೇಧಿ, ಹೊಟ್ಟೆ ನೋವಿನ ಸಮಸ್ಯೆ ಉಂಟಾದರೆ ಆಹಾರವನ್ನು ತಿನ್ನುವಾಗ ಸ್ಪೂನ್ ಬಳಸಿ ತಿನ್ನಬೇಕು.

7. ಆಹಾರವನ್ನು ಸಂಗ್ರಹಿಸಿಡುವ ಸ್ಥಳವನ್ನು ಶುದ್ಧವಾಗಿ ಇಟ್ಟುಕೊಳ್ಳಬೇಕು.

ಫುಡ್ ಪಾಯಿಸನ್ ಉಂಟಾದರೆ ಚಿಕಿತ್ಸೆ:

1. ಫುಡ್ ಪಾಯಿಸನ್ ಉಂಟಾದರೆ ಸಾಕಷ್ಟು ಪ್ರಮಾಣದಲ್ಲಿ ನೀರು ಕುಡಿಯಬೇಕು. ಘನ ಆಹಾರ, ಕೊಬ್ಬಿನಂಶವಿರುವ ಆಹಾರ ಮತ್ತು ಮದ್ಯವನ್ನು ಮುಟ್ಟಬಾರದು.

2. ಮೊದಲು ತೆಳು ಆಹಾರ ಅಂದರೆ ಗಂಜಿ, ಜ್ಯೂಸ್ ತಿಂದು ಸ್ವಲ್ಪ ಹುಷರಾದ ಮೇಲೆ ಮಾಮೂಲಿ ರೀತಿ ಆಹಾರ ತಿನ್ನಬಹುದು.

3. ಬ್ಲ್ಯಾಕ್ ಟೀ ಮಾಡಿ ಕುಡಿಯಬಹುದು ಅಥವಾ ಒಂದು ಚಮಚ ಮೆಂತೆ ಪುಡಿಯನ್ನು ಒಂದು ಗ್ಲಾಸ್ ನೀರಿನಲ್ಲಿ ಅಥವಾ ಮೊಸರಿನಲ್ಲಿ ಹಾಕಿ ಕುಡಿದರೆ ಬೇಧಿ ಕಡಿಮೆಯಾಗುವುದು.

ಫುಡ್ ಪಾಯಿಸನ್ ಕಾಣಿಸಿಕೊಂಡರೆ ವೈದ್ಯರನ್ನು ಕಂಡು ಚಿಕಿತ್ಸೆಯನ್ನು ಪಡೆಯುವುದು ಒಳ್ಳೆಯದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.