ಅಲರ್ಜಿ ನಿವಾರಣೆಗೆ ಇಲ್ಲಿವೆ ಸೂಪರ್ ಮನೆಮದ್ದು

Updated: Thursday, April 4, 2013, 9:38 [IST]

ಅಲರ್ಜಿ ಹೆಚ್ಚಿನವರಲ್ಲಿ ಕಂಡು ಬರುವ ಸಮಸ್ಯೆಯಾಗಿದೆ. ಈ ಸಮಸ್ಯೆ ನಾನಾ ಕಾರಣಗಳಿಂದ ಬರುತ್ತದೆ. ಅಲರ್ಜಿ ದೂಳಿನಿಂದ ಬರಬಹುದು ಅಥವಾ ರಾಸಾಯನಿಕ ವಸ್ತುಗಳಿಂದ ಹಾಗೂ ಆಹಾರದಿಂದ ಕೂಡ ಬರಬಹುದು. ಆಗಾಗ ಕೆಮ್ಮು, ಶೀತದಂತಹ ತೊಂದರೆಗಳು ಕಾಣಿಸಿಕೊಳ್ಳುವುದು ಅಲರ್ಜಿನಿಂದಾಗಿರುತ್ತದೆ. ಆದ್ದರಿಂದ ಅಲರ್ಜಿ ತೊಂದರೆ ಇರುವವರು ಆರೋಗ್ಯದ ಬಗ್ಗೆ ಹೆಚ್ಚಿನ ಗಮನ ಹರಿಸಬೇಕು.

ಅಲರ್ಜಿ ಉಂಟಾದರೆ ಮೈ ಮೇಲೆ ಕೆಂಪಗೆ ಗುಳ್ಳೆಗಳು ಬರುತ್ತವೆ. ಆ ಗುಳ್ಳೆಗಳಿಂದಾಗಿ ವಿಪರೀತ ತುರಿಕೆ ಉಂಟಾಗುವುದರಿಂದ ತುಂಬಾ ಹಿಂಸೆ ಅನಿಸುತ್ತದೆ. ಈ ರೀತಿಯ ತೊಂದರೆಯು ಯಾವ ಕಾರಣದಿಂದ ಉಂಟಾಗುತ್ತದೆ ಎಂದು ಮೊದಲು ಕಂಡು ಹಿಡಿಯಬೇಕು. ದೂಳಿನಿಂದ ಆದರೆ ಆದಷ್ಟು ದೂಳಿರುವ ಪ್ರದೇಶಕ್ಕೆ ಹೋಗಬಾರದು, ಗುಡಿಸುವಾಗ ಆ ಜಾಗದಲ್ಲಿ ನಿಲ್ಲಬಾರದು, ಗಾಡಿಯಲ್ಲಿ ಹೋಗುವಾಗಲೂ ಇದರ ಬಗ್ಗೆ ಎಚ್ಚರಿಕೆವಹಿಸಬೇಕು. ಆಹಾರದಿಂದಾದರೆ ಅದರ ಬಗ್ಗೆ ಎಚ್ಚರವಹಿಸಬೇಕು.

ಈ ರೀತಿಯ ಅಲರ್ಜಿಯನ್ನು ಮನೆ ಮದ್ದಿನಿಂದ ಹೋಗಲಾಡಿಸಬಹುದು. ಅದರಲ್ಲೂ ಈ ಕೆಳಗಿನ ಮನೆಮದ್ದು ತುಂಬಾ ಪರಿಣಾಮಕಾರಿಯಾಗಿದೆ.

ದೊಡ್ಡ ಪತ್ರೆ

ಅಲರ್ಜಿಯಿಂದ ಮೈಯಲ್ಲಿ ಗುಳ್ಳೆ ಬಂದರೆ ದೊಡ್ಡಪತ್ರೆಯ ರಸ ತೆಗೆದು ಅದನ್ನು ಮೈಗೆ ಉಜ್ಜಿದರೆ ತಕ್ಷಣ ಕಡಿಮೆಯಾಗುವುದು. ಅದಲ್ಲದಿದ್ದರೆ ಸ್ವಲ್ಪ ದೊಡ್ಡ ಪತ್ರೆಯ ರಸಕ್ಕೆ 3-4 ಹನಿ ಜೇನು ಹಾಕಿ ಪ್ರತಿದಿನ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಸೇವಿಸುತ್ತಾ ಬಂದರೆ ಅಲರ್ಜಿ ಸಮಸ್ಯೆ ಕಾಡಬಹುದು. ಇದರಿಂದ ಚಟ್ನಿ ತಯಾರಿಸಿ ತಿಂದರೆ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು.

ಅರಿಶಿಣ ಹಾಕಿದ ಹಾಲು

ಅಲರ್ಜಿ ಕೆಮ್ಮವಿದ್ದರೆ ಒಂದು ಲೋಟ ಬಿಸಿಹಾಲಿಗೆ ಒಂದು ಚಮಚೆ ಶುದ್ಧ ಅರಿಶಿಣಪುಡಿಯನ್ನು ಬೆರೆಸಿ ಕುಡಿದರೆ ತುಂಬಾ ಒಳ್ಳೆಯದು. ಹಾಲು ಇಷ್ಟ ಪಡದವರು ನೀರಿಗೆ ಕೂಡ ಹಾಕಿ ಕುಡಿದರೆ ಅಲರ್ಜಿ ಕೆಮ್ಮು ಹಾಗೂ ಶೀತ ಕಡಿಮೆಯಾಗುವುದು.