ಹೆಚ್ಚು ನಿದ್ದೆ ಮಾಡಿದರೆ ಸಂತೋಷ ಹಾಳಾಗಬಹುದಂತೆ...

Wellness

oi-Sumalatha

By Sumalatha

Published: Thursday, November 24, 2011, 12:25 [IST]

ನೀವು ಯಾವಾಗಲೂ ಸಂತೋಷದಿಂದಿರಲು ಬಯಸುತ್ತೀರಾ? ಉತ್ತಮ ಆರೋಗ್ಯ ಪಡೆಯಬೇಕೆಂಬ ಹಂಬಲ ನಿಮಗಿದೆಯಾ? ಹಾಗಿದ್ದರೆ ಬೆಳಕು ಹರಿದರೂ ಹಾಸಿಗೆ ಬಿಡದಿರುವ ಅಭ್ಯಾಸವನ್ನು ಬಿಟ್ಟುಬಿಡಿ.

ಹೌದು. ನೀವು ಸಂತೋಷ, ಆರೋಗ್ಯವನ್ನು ಬಯಸುವುದಾದರೆ ಮುಂಜಾನೆ ಬೇಗ ಏಳುವ ಅಭ್ಯಾಸವನ್ನು ರೂಢಿಸಿಕೊಳ್ಳುವುದು ಅತ್ಯವಶ್ಯಕ ಎಂದಿದೆ ನೂತನ ಅಧ್ಯಯನ. ಮುಂಜಾನೆಯ ಸಮಯ ತಡವಾಗಿ ಏಳುವವರಿಗೆ ಹೋಲಿಸಿದರೆ ಬೇಗನೆ ಏಳುವವರು ಹೆಚ್ಚು ಆರೋಗ್ಯವಂತರಾಗಿ, ಒತ್ತಡರಹಿತರಾಗಿ ಇರುತ್ತಾರೆ ಎಂದು ಅಧ್ಯಯನ ತಿಳಿಸಿದೆ.

ರೊಹ್ಯಾಂಪ್ಟನ್ ವಿಶ್ವವಿದ್ಯಾಲಯ ನಡೆಸಿದ ಅಧ್ಯಯನದಿಂದ, ಅಲಾರ್ಮ್ ಹೊಡೆದಾಕ್ಷಣವೇ ಏಳುವವರು ಬೇಗ ಬೇಗನೆ ಮನೆಯಲ್ಲೂ ಎಲ್ಲಾ ಕೆಲಸ ಮುಗಿಸುವುದರೊಂದಿಗೆ ಹೊರಗಿನ ಕೆಲಸದಲ್ಲೂ ಚೈತನ್ಯದಿಂದ ಕೆಲಸ ನಿರ್ವಹಿಸುತ್ತಾರೆ ಎಂದು ತಿಳಿದುಬಂದಿದೆ.

ಆದರೆ ರಾತ್ರಿಯಿಡೀ ನಿದ್ದೆಗೆಟ್ಟಿದ್ದು, ಬೆಳಗ್ಗೆ ಬೇಗ ಎದ್ದರೆ ಈ ಲಾಭವನ್ನು ನೀವು ಬಯಸುವಂತಿಲ್ಲ. ರಾತ್ರಿ ನಿದ್ದೆಗೆಡುವವರು ಹೆಚ್ಚು ಒತ್ತಡಕ್ಕೆ ಒಳಗಾಗುತ್ತಾರೆ ಎನ್ನಲಾಗಿದೆ. ಆದ್ದರಿಂದ ರಾತ್ರಿ ಸ್ವಲ್ಪ ಬೇಗನೆ ನಿದ್ದೆಗೆ ಜಾರಿ ಬೆಳಗ್ಗೆ ಬೇಗನೆ ಏಳುವುದರಿಂದ ಎಲ್ಲಾ ದೃಷ್ಟಿಯಿಂದಲೂ ಪ್ರಯೋಜನ ಪಡೆಯಬಹುದು.

ಅಧ್ಯಯನದಲ್ಲಿ 1,068 ಜನರನ್ನು ಒಳಪಡಿಸಿ ಅವರ ಆರೋಗ್ಯ ಮತ್ತು ನಿದ್ದೆಯ ಅವಧಿಯ ಕುರಿತು ಪರೀಕ್ಷಿಸಿದಾಗ, ಬೆಳಗ್ಗೆ ಬೇಗನೆ ಅಂದರೆ 6 ಗಂಟೆಯ ಹೊತ್ತಿಗೆ ಏಳುವವರು ಮತ್ತು ತಡವಾಗಿ, ಅಂದರೆ 8 ರಿಂದ 9 ಗಂಟೆ ನಂತರ ಏಳುವವರ ನಡುವೆ ಅನೇಕ ವಿಭಿನ್ನತೆಗಳು ಕಂಡುಬಂದಿದೆ.

ಬೇಗನೆ ಏಳುವ ಮಂದಿ ಆರೋಗ್ಯಕರವಾಗಿ, ಸಂತೋಷವಾಗಿ ಮತ್ತು ಕಡಿಮೆ ತೂಕ ಹೊಂದಿರುವುದಾಗಿ ತಿಳಿದುಬಂದಿದೆ. ಆದರೆ ತಡವಾಗಿ ಏಳುವವರಲ್ಲಿ ಹೆಚ್ಚು ಕೊಲೆಸ್ಟ್ರಾಲ್ ಅಂಶವೂ ಸೇರಿಕೊಳ್ಳುವುದಷ್ಟೇ ಅಲ್ಲ, ಒತ್ತಡವೂ ಹೆಚ್ಚುತ್ತದೆ ಎಂದು ತಿಳಿದುಬಂದಿದೆ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.