ಅಯ್ಯೋ, ಏನೋ ಹೇಳ್ಬೇಕಂತಿದ್ದೆ ನೆನಪೇ ಆಗ್ತಿಲ್ಲ!

Wellness

oi-Sumalatha N

By Sumalatha N

Published: Saturday, July 30, 2011, 15:45 [IST]

ನಿಮ್ಮ ಮೆಮರಿ ಪವರ್ ತುಂಬಾ ಚೆನ್ನಾಗಿರಬೇಕಾ? ಹಾಗಾದ್ರೆ ಯಾವುದೇ ಚಿಂತೆ ಮಾಡದೆ ಆರಾಮವಾಗಿ ನಿದ್ದೆ ಮಾಡಿ, ಸಾಕು. ಹೀಗಂತ ಇತ್ತೀಚಿನ ಸಂಶೋಧನೆಯೊಂದು ಹೇಳಿದೆ. ನಿರಂತರವಾಗಿ ನಿದ್ದೆಗೆಟ್ಟರೆ ಅಥವಾ ತುಂಬಾ ಅಡ್ಡಿ ಆತಂಕಗಳಿಂದ ನಿದ್ದೆ ಮಾಡಿದರೆ ನಿಮ್ಮ ಮೆಮರಿ ಲಾಸ್ ಆಗಬಹುದು ಅಂತನೂ ಎಚ್ಚರಿಕೆ ನೀಡಿದೆ.

ನಿದ್ದೆಯ ಕೊರತೆ ನಿಮಗೆ ಮರೆಗುಳಿತನ ತರುವುದು ಗ್ಯಾರಂಟಿ. ಕ್ಯಾಲಿಫೋರ್ನಿಯಾದಲ್ಲಿ ನಡೆಸಿದ ಈ ಅಧ್ಯಯನ ಮನುಷ್ಯನ ನಿದ್ದೆ ಜ್ಞಾಪಕಶಕ್ತಿಗೆ ಎಷ್ಟು ಅವಶ್ಯಕ ಅನ್ನೋದರ ಬಗ್ಗೆ ತಿಳಿಸಿಕೊಟ್ಟಿದೆ.

ಯಾವುದೇ ಅಡ್ಡಿ ಆತಂಕವಿಲ್ಲದೆ ನಿದ್ದೆ ಮಾಡಿದರೆ ನೀವು ಯಾವುದನ್ನೂ ಮರೆಯೋದೇ ಇಲ್ಲ, ಇಲ್ಲ ಅಂದ್ರೆ ಮರೆಗುಳಿತನ ಬರುವ ಸಾಧ್ಯತೆ ಹೆಚ್ಚು. ನಿದ್ದೆ ಮಾಡುವ ಒಟ್ಟು ಅವಧಿಗಿಂತ ನಿದ್ದೆಯನ್ನು ಯಾವುದೇ ಅಡ್ಡಿಯಿಲ್ಲದೆ ಆರಾಮವಾಗಿ ಮಾಡುವುದು ಮುಖ್ಯ. ಅದು ಮೆದುಳಿನ ಜ್ಞಾಪಕ ಶಕ್ತಿಯನ್ನು ಗಟ್ಟಿಗೊಳಿಸುತ್ತದೆ ಎಂದು ಇದರಲ್ಲಿ ತಿಳಿಸಿದೆ.

ಜ್ಞಾಪಕ ಶಕ್ತಿಗೆ ಒಳ್ಳೆಯ ನಿದ್ದೆ ಅವಶ್ಯಕ ಎಂದು ಈ ಹಿಂದೆಯೇ ಎಷ್ಟೋ ಸಂಶೋಧನೆಗಳು ತಿಳಿಸಿವೆ. ಆದರೆ ನಿರಂತರ ಬದಲಾಗುತ್ತಿರುವ ನಿದ್ದೆಯ ಚಲನವಲನಗಳು ಹೇಗೆ ಜ್ಞಾಪಕ ಶಕ್ತಿಯ ಮೇಲೆ ಪರಿಣಾಮ ಬೀರುತ್ತದೆ ಎಂದು ಈಗ ತಿಳಿದುಬಂದಿದೆ.

ಇಲಿಯ ಮೇಲೆ ನಡೆಸಿದ ಪ್ರಯೋಗವೊಂದರಿಂದ, ಅಡ್ಡಿ, ಅಡಚಣೆ, ಆತಂಕಗಳಿಂದ ತುಂಬಿರುವ ನಿದ್ದೆಯಿಂದ ಖಂಡಿತ ಜ್ಞಾಪಕ ಶಕ್ತಿ ಕುಂದುತ್ತದೆ ಎಂದು ಕಂಡುಬಂದಿದೆ. ಸದಾ ಅತ್ತಿತ್ತ ಓಡಾಡುತ್ತಿದ್ದ ಇಲಿಯ ಮೇಲೆ ಈ ಪ್ರಯೋಗ ನಡೆಸಿದಾಗ, ಇಲಿ ತಾನು ಹಿಂದೆ ಕೂಡಿಟ್ಟಿದ್ದ ವಸ್ತುಗಳನ್ನು ಗುರುತಿಸುವಲ್ಲಿ ವಿಫಲವಾಗಿದೆ. ಇದು ಮನುಷ್ಯನಿಗೂ ಅನ್ವಯಿಸುತ್ತದೆ.

ಮನುಷ್ಯರಲ್ಲಿ ಮರೆಗುಳಿತನವನ್ನು ಹೋಗಲಾಡಿಸಲು ಎಷ್ಟು ನಿದ್ದೆಯ ಅವಶ್ಯಕತೆ ಇದೆ ಎಂಬುದರ ನಿಖರವಾಗಿ ಹೇಳಲು ಸಾಧ್ಯವಿಲ್ಲ, ದಿನಕ್ಕೆ 7 ಗಂಟೆ ನಿದ್ದೆ ಸಾಕು, ಆದರೆ ಆ ನಿದ್ದೆಯೂ ನಿರಾತಂಕವಾಗಿರಬೇಕು. ನಿದ್ದೆಯ ರೀತಿಗೂ ಮತ್ತು ಮನುಷ್ಯನ ಜ್ಞಾಪಕ ಶಕ್ತಿಗೂ ಸಂಬಂಧವಿದೆ, ನಿದ್ದೆಯಲ್ಲಿ ಅಸ್ವಸ್ಥತೆ ನಿರಂತರವಾದರೆ ಆತನ ಮೆದುಳಿನ ಮೇಲೆ ಪರಿಣಾಮ ಬೀರಿ ಜ್ಞಾಪಕ ಶಕ್ತಿ ಕುಂದುವಂತೆ ಮಾಡುತ್ತದೆ ಎಂದು ತಿಳಿಸಿದೆ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.