ಸಕ್ಕರೆ, ಬೆಲ್ಲ, ಜೇನುತುಪ್ಪ ಇವುಗಳಲ್ಲಿ ಯಾವುದು ಬೆಸ್ಟ್ ಎಂಬ ಗೊಂದಲವೇ?

ಸಕ್ಕರೆ

ಆರೋಗ್ಯಕರವೆಂದು ಹೇಳಲಾಗುವ ಬೇರೆಯ ಸಿಹಿಗೆ ಸಕ್ಕರೆಯಲ್ಲಿರುವ ಕ್ಯಾಲರಿಯನ್ನು ಹೋಲಿಸಿ ನೋಡುವುದಾದರೆ ಅಂತಹ ಗಮನಾರ್ಹ ವ್ಯತ್ಯಾಸವೇನು ಕಂಡು ಬರುವುದಿಲ್ಲ. 100 ಗ್ರಾಂ ಕಂದು ಬಣ್ಣದ ಸಕ್ಕರೆಯಲ್ಲಿ 375 ಕ್ಯಾಲೋರಿಗಳಿದ್ದರೆ,ಸಕ್ಕರೆಯಲ್ಲಿ 390 ಕ್ಯಾಲರಿಗಳಿರುತ್ತದೆ. ಲಾಭದಾಯಕ ಅಂಶಗಳು ಮತ್ತು ಪೌಷ್ಟಿಕಾಂಶ ದ ಬಗ್ಗೆ ನೋಡಿದಾಗ ಸಕ್ಕರೆಯು ಒಳ್ಳೆಯ ಆಯ್ಕೆಯಂತೂ ಖಂಡಿತ ಅಲ್ಲ. ಸಕ್ಕರೆಯು ರಕ್ತದಲ್ಲಿನ ಸಕ್ಕರೆಯನ್ನು ತಟ್ಟನೆ ಮೇಲೆರಿಸಿಬಿಡುತ್ತದೆ ಈ ಪ್ರಮುಖ ಕಾರಣದಿಂದ ಸಕ್ಕರೆಯು ಕೆಟ್ಟ ಆಯ್ಕೆ. ಅದರಲ್ಲೂ ಮಧುಮೇಹಿಗಳಿಗೆ ಇದು ಸೂಕ್ತ ಆಯ್ಕೆಯಲ್ಲ.

ಜೇನುತುಪ್ಪ

ಜೇನುತುಪ್ಪ ಸೇವಿಸಿದ ನಂತರ ದೇಹ ಹೀರಿಕೊಳ್ಳಲು ಸಮಯ ತೆಗೆದುಕೊಳ್ಳುವುದರಿಂದ ರಕ್ತದಲ್ಲಿನ ಸಕ್ಕರೆಯ ಮಟ್ಟ ತಕ್ಷಣವೇ ಮೇಲೇರುವುದಿಲ್ಲ.ಇದು ಸಕ್ಕರೆಗಿಂತ ಸ್ವಾಭಾವಿಕವಾದದ್ದು. ಅದರ ಅರ್ಥ ಜೇನುತುಪ್ಪವೇ ಉತ್ತಮವೆಂದಲ್ಲ. ಕ್ಯಾಲೋರಿಯ ವಿಷಯಕ್ಕೆ ಬಂದಾಗ ಜೇನುತುಪ್ಪವೂ ಹೆಚ್ಚು ಕಡಿಮೆ ಸಕ್ಕರೆಯಷ್ಟೇ ಕ್ಯಾಲೋರಿಗಳನ್ನು ಹೊಂದಿದೆ. ಜೇನುತುಪ್ಪದಿಂದ ತೂಕ ಇಳಿಸಬಹುದೆಂದು ಯೋಚಿಸಿದ್ದಲ್ಲಿ, ಅದು ಖಂಡಿತ ನಿಮ್ಮ ಉದ್ದೇಶವನ್ನು ಈಡೇರಿಸುವುದಿಲ್ಲ. ಪೌಷ್ಟಿಕಾಂಶದ ವಿಷಯಕ್ಕೆ ಬಂದಾಗ ಮಾತ್ರ ಜೇನುತುಪ್ಪ ಉತ್ತಮ ಆಯ್ಕೆ.

ಬೆಲ್ಲ

ಸಾಂದ್ರಿಕರಿಸಿದ ಕಬ್ಬಿನ ಸಾರವನ್ನು ಗಟ್ಟಿಯಾಗುವವರೆಗೆ ಕುದಿಸಿ ಬೆಲ್ಲವನ್ನು ತಯಾರಿಸುತ್ತಾರೆ. ಬೆಲ್ಲವನ್ನು ತಯಾರಿಸುವ ಕಾರ್ಯ ವಿಧಾನ ಸಂಸ್ಕರಿಸಿದ ಸಕ್ಕರೆಗಿಂತ ಬೆಲ್ಲವನ್ನು ಉತ್ತಮ ಆಯ್ಕೆಯನ್ನಾಗಿ ಮಾಡಿದೆ. ಈ ಸ್ವಾಭಾವಿಕ ಸಕ್ಕರೆ ನೂರು ಗ್ರಾಂ ಗೆ 380 ಕ್ಯಾಲೋರಿಗಳನ್ನು ಹೊಂದಿದ್ದು ಹೆಚ್ಚು ಕಡಿಮೆ ಸಕ್ಕರೆಯಷ್ಟೇ ಕ್ಯಾಲೋರಿಗಳನ್ನು ಹೊಂದಿದೆ. ಇನ್ಸುಲಿನ್ ಮಟ್ಟದ ಏರಿಕೆಯೂ ಕೂಡ ಸಕ್ಕರೆಯಷ್ಟೇ ಬೇಗ ಏರಿಸುತ್ತದೆ. ಆರೋಗ್ಯಕ್ಕೆ ಲಾಭದಾಯಕವಾದ ಅಂಶಗಳನ್ನು ಗಮನಿಸಿದಾಗ ಬೆಲ್ಲ ಸೂಕ್ತವಾದದ್ದು. ಪ್ರೋಟೀನ್ ಕೊಬ್ಬಿನಾಂಶ ಕಬ್ಬಿನಾಂಶ ಮೆಗ್ನೀಷಿಯಂ ಪೊಟ್ಯಾಶಿಯಂ ಮ್ಯಾಂಗನೀಸ್ ಹೇರಳವಾಗಿರುವುದರಿಂದ ಪೌಷ್ಟಿಕಾಂಶದ ವಿಷಯದಲ್ಲಿ ಬೆಲ್ಲಕ್ಕೆ ಸರಿಸಾಟಿ ಇನ್ನೊಂದಿಲ್ಲ

ಈ ಎಲ್ಲಾ ಅಂಶಗಳನ್ನು ಪರಿಗಣಿಸಿ,ಈಗ ನೀವೇ ಪರಿಶೀಲಿಸಿ ನೋಡಿ.ಪ್ರತಿಯೊಬ್ಬರ ಅವಶ್ಯಕತೆಗಳು, ದೇಹ ರಚನೆಯು ಭಿನ್ನವಾಗಿರುವುದರಿಂದ, ನೀವು ಪ್ರಸ್ತುತ ಪ್ರಚಾರದಲ್ಲಿರುವ ಯಾವುದೇ ರೀತಿಯ ಸುದ್ದಿಗಳಿಗೆ ಕಿವಿಗೊಡುವ ಅವಶ್ಯಕತೆಯೇ ಇಲ್ಲ.ನಿಮ್ಮ ವೈಯಕ್ತಿಕ ಅವಶ್ಯಕತೆಗೆ ತಕ್ಕಂತೆ ನೀವೇ ಇವುಗಳಲ್ಲಿ ಯಾವುದು ಉತ್ತಮ ಎಂದು ಆಯ್ಕೆ ಮಾಡಿಕೊಳ್ಳಿ.