ದೇಹದಲ್ಲಿ ಈ ಬದಲಾವಣೆಗಳಾದರೆ ಅವು ಥೈರಾಯ್ಡ್‌ನ ಸೂಚನೆಗಳಾಗಿವೆ

ಚಯಪಚಯ ಕ್ರಿಯೆ ನಿಧಾನವಾಗುವುದು, ತುಂಬಾ ಸುಸ್ತು

ಥೈರಾಯ್ಡ್‌ ಹಾರ್ಮೋನ್‌ಗಳು ನಮ್ಮ ಚಯಪಚಯ ಕ್ರಿಯೆ ಸರಿಯಾಗಿ ನಡೆಯಲು ಅವಶ್ಯಕ. ಚಯಪಚಯ ಕ್ರಿಯೆಯ ಮೂಲಕ ನಾವು ತಿಂದ ಆಹಾರವನ್ನು ಶಕ್ತಿಯಾಗಿ ಪರಿವರ್ತಿಸುವುದು. ಆದರೆ ಥೈರಾಯ್ಡ್‌ ಗ್ರಂಥಿ ಸರಿಯಾದ ರೀತಿಯಲ್ಲಿ T4 and T3 ಹಾರ್ಮೋನ್‌ಗಳನ್ನು ಉತ್ಪಾದಿಸದೇ ಇದ್ದರೆ ದೇಹದಲ್ಲಿ ಶಕ್ತಿ ಉತ್ಪಾದನೆ ಕಡಿಮೆಯಾಗುವುದು. ಇದರಿಂದ ಸುಸ್ತು, ಆಗಾಗ ತಲೆಸುತ್ತು ಉಂಟಾಗುವುದು.

ಮಲಬದ್ಧತೆ ಸಮಸ್ಯೆ ಉಂಟಾಗುವುದು

ಥೈರಾಯ್ಡ್ ಸಮಸ್ಯೆ ಉಂಟಾದಾಗ ಕಂಡು ಬರುವ ಮತ್ತೊಂದು ಸಮಸ್ಯೆಯೆಂದರೆ ಮಲಬದ್ಧತೆ. ಥೈರಾಯ್ಡ್‌ ಹಾರ್ಮೋನ್‌ಗಳು ಸರಿಯಾದ ಉತ್ಪತ್ತಿಯಾಗದೇ ಇದ್ದಾಗ ಜೀರ್ಣಕ್ರಿಯೆಯ ಶಕ್ತಿ ಕುಂದುವುದು. ಇದರಿಂದಾಗಿ ಮಲಬದ್ಧತೆ ಉಂಟಾಗುವುದು.

ಮೈತೂಕದಲ್ಲಿ ವ್ಯತ್ಯಾಸ

ಹೈಪೋಥೈರಾಯ್ಡ್ ಉಂಟಾದರೆ ಮೈ ತೂಕ ತುಂಬಾನೇ ಹೆಚ್ಚಾಗುವುದು. ಒಂದು ರೀತಿ ಬೊಜ್ಜು ಮೈ ಬರುವುದು. ಹೈಪರ್‌ ಥೈರಾಯ್ಡ್ ಸಮಸ್ಯೆಯಿದ್ದರೆ ಮೈ ತೂಕ ತುಂಬಾನೇ ಕಡಿಮೆಯಾಗುವುದು. ಈ ರೀತಿ ದೇಹದ ತೂಕದಲ್ಲಿ ವ್ಯತ್ಯಾಸ ಉಂಟಾದರೆ ಥೈರಾಯ್ಡ್ ಪರೀಕ್ಷೆ ಮಾಡಿಸಿ.

ಕೂದಲು ಉದುರುವುದು

ಥೈರಾಯ್ಡ್ ಸಮಸ್ಯೆಯ ಮತ್ತೊಂದು ಲಕ್ಷಣವೆಂದರೆ ವಿಪರೀತ ಕೂದಲು ಉದುರುವುದು. ಥೈರಾಯ್ಡ್‌ ಗ್ರಂಥಿ ಕಬ್ಬಿಣದಂಶ, ಕ್ಯಾಲ್ಸಿಯಂ ಹೀರಿಕೊಳ್ಳಲು ಸಹಾಯಕಾರಿ. ಥೈರಾಯ್ಡ್ ಹಾರ್ಮೋನ್‌ಗಳಲ್ಲಿ ವ್ಯತ್ಯಾಸ ಉಂಟಾದರೆ ದೇಹದಲ್ಲಿ ಕಬ್ಬಿಣದಂಶ, ಕ್ಯಾಲ್ಸಿಯಂ ಕೊರತೆ ಉಂಟಾಗಿ ಕೂದಲು ಉದುರಲಾರಂಭಿಸುವುದು.

ಅನಿಯಮಿತ ಮುಟ್ಟಿನ ಸಮಸ್ಯೆ

ತಿಂಗಳಿಗೆ ಸರಿಯಾಗಿ ಮುಟ್ಟಾಗದಿದ್ದರೆ ಅದು ಥೈರಾಯ್ಡ್ ಸಮಸ್ಯೆಯ ಲಕ್ಷಣವಾಗಿದೆ. ಇನ್ನು ಮುಟ್ಟಿನ ಸಮಯದಲ್ಲಿ ತುಂಬಾ ಕಡಿಮೆ ರಕ್ತಸ್ರಾವ, ತುಂಬಾ ಅಧಿಕ ರಕ್ತಸ್ರಾವ ಇವೆಲ್ಲಾ ಥೈರಾಯ್ಡ್ ಸಮಸ್ಯೆಯ ಲಕ್ಷಣಗಳಾಗಿವೆ.

ಗರ್ಭಧಾರಣೆಯಾಗದಿರುವುದು ಅಥವಾ ಗರ್ಭಪಾತವಾಗುವುದು

ಥೈರಾಯ್ಡ್ ಸಮಸ್ಯೆಯಿದ್ದ ಮಹಿಳೆಯರಿಗೆ ಗರ್ಭಧಾರಣೆಗೆ ತೊಂದರೆಯಾಗುವುದು. ಒಂದು ವೇಳೆ ಗರ್ಭಿಣಿಯಾದರೂ ಗರ್ಭಪಾತವಾಗುವ ಸಾಧ್ಯತೆ ಹೆಚ್ಚು. ಈ ರೀತಿ ಸಮಸ್ಯೆ ಇರುವವರು ಥೈರಾಯ್ಡ್ ಪರೀಕ್ಷೆ ಮಾಡಿಸಬೇಕು.

ಹೃದಯ ಬಡಿತದಲ್ಲಿ ವ್ಯತ್ಯಾಸ

ಥೈರಾಯ್ಡ್‌ ಸಮಸ್ಯೆಯಿದ್ದರೆ ಹೃದಯ ಬಡಿತ ತುಂಬಾ ವೇಗವಾಗಿರುತ್ತದೆ ಅಥವಾ ತುಂಬಾ ಕಡಿಮೆ ಇರುತ್ತದೆ. ಹೃದಯ ಬಡಿತದಲ್ಲಿ ಅಸಹಜತೆ ಕೂಡ ಥೈರಾಯ್ಡ್‌ನ ಲಕ್ಷಣಗಳಾಗಿವೆ.

ಮಾನಸಿಕ ಒತ್ತಡ

ಥೈರಾಯ್ಡ್‌ ಹಾರ್ಮೋನ್‌ಗಳ ವ್ಯತ್ಯಾಸ ಉಂಟಾದಾಗ ತುಂಬಾ ಮಾನಸಿಕ ಒತ್ತಡಕ್ಕೆ ಒಳಗಾಗುವುದು, ಮೂಡ್ ಸ್ವಿಂಗ್ ಈ ರೀತಿಯೆಲ್ಲಾ ಕಂಡು ಬರುವುದು. ನಿದ್ದೆಗೆ ಕೂಡ ಭಂಗ ಉಂಟಾಗಬಹುದು.

ಈ ರೀತಿಯ ಲಜ್ಷಣಗಳು ಕಂಡು ಬಂದರೆ ನಿರ್ಲಕ್ಷ್ಯ ಮಾಡುತ್ತಾ ಕೂರುವ ಬದಲಿಗೆ ಪರೀಕ್ಷೆ ಮಾಡಿಸಬೇಕು.