ಬಾಯಿ ಹುಣ್ಣು ಸಮಸ್ಯೆಗೆ 10 ಅತ್ಯುತ್ತಮ ಮನೆಮದ್ದು

1. ಐಸ್

ಹುಣ್ಣು ಇರುವ ಕಡೆ ಐಸ್‌ ಕ್ಯೂಬ್ಸ್‌ ಇಡಿ, ಇಲ್ಲ ಐಸ್‌ಕ್ಯಾಂಡಿ ಚೀಪುವುದು ಕೂಡ ಒಳ್ಳೆಯದು. ಐಸ್‌ ಇಟ್ಟಾಗ ಆ ಭಾಗದ ನೋವು ತಕ್ಷಭ ಕಡಿಮೆಯಾಗುವುದು, ಆದರೆ ಇದು ತಾತ್ಕಲಿಕವಾಗಿ ನೋವು ಕಡಿಮೆ ಮಾಡುವುದು. ಆಗಾಗ ಐಸ್‌ ಇಡುತ್ತಾ ಬಂದರೆ ನೋವು ನಿಧಾನಕ್ಕೆ ಮಾಯವಾಗುವುದು.

2. ಆಲುಮ್ ಪುಡಿ

ಆಲುಮ್ ಪುಡಿಯನ್ನು ಪೊಟಾಷ್ಯಿಯಂ ಸಲ್ಪೇಟ್‌ನಿಂದ ಮಾಡಲಾಗುತ್ತದೆ. ಇದನ್ನು ಬಾಯಿ ಹುಣ್ಣು ಚಿಕಿತ್ಸೆಯಲ್ಲಿ ಬಳಸಲಾಗುವುದು. ಇದನ್ನು ಬಳಸುವ ವಿಧಾನ ಇಲ್ಲಿ ನೀಡಲಾಗಿದೆ ನೋಡಿ:

• ಆಲೂಮ್‌ ಪುಡಿಯನ್ನು ಸ್ವಲ್ಪ ನೀರಿನಲ್ಲಿ ಕಲೆಸಿ ಪೇಸ್ಟ್ ರೀತಿ ಮಾಡಿ.
• ಈಗ ಆ ಪೇಸ್ಟ್ ಅನ್ನು ಹುಣ್ಣು ಇರುವ ಕಡೆ ಇಡಿ.
• ಸ್ವಲ್ಪ ಹೊತ್ತು ಇಟ್ಟು ನಂತರ ಉಪ್ಪು ನೀರಿನಿಂದ ತೊಳೆಯಿರಿ, ಒಂದೆರಡು ದಿನದಲ್ಲಿ ನೋವು ಇಲ್ಲವಾಗುವುದು.



3. ಉಪ್ಪು ನೀರಿನಿಂದ ಬಾಯಿ ಮುಕ್ಕಳಿಸುವುದು

ಬಾಯಿ ಹುಣ್ಣು ಉಂಟಾದಾಗ ಉಪ್ಪು ನೀರಿನಿಂದ ಬಾಯಿ ಮುಕ್ಕಳಿಸಿದರೆ ಹುಣ್ಣು ಬೇಗನೆ ಒಣಗುವುದು. ಇನ್ನು ಹುಣ್ಣು ಇರುವ ಕಡೆ ಸ್ವಲ್ಪ ಕಲ್ಲುಪ್ಪು ಇಡಿ. ಇಟ್ಟಾಗ ಸ್ವಲ್ಪ ಉರಿ ಅನಿಸಿದರೂ ಹುಣ್ಣು ಬೇಗನೆ ಒಣಗುವುದು. ಉಪ್ಪನ್ನು ಹುಣ್ಣು ಒಣಗುವವರೆಗೆ ಆಗಾಗ ಇಡಿ.



4. ಜೇನು

ಇನ್ನು ಬಾಯಿ ಹುಣ್ಣು ಹೋಗಲಾಡಿಸಲು ಜೇನನ್ನು ಕೂಡ ಮನೆಮದ್ದಾಗಿ ಬಳಸಬಹುದು. ಇದು ಹುಣ್ಣಿನ ಗಾತ್ರ ಕಡಿಮೆ ಮಾಡುತ್ತದೆ, ನೋವು ಕಡಿಮೆ ಮಾಡುತ್ತದೆ ಎಂದು 2014ರಲ್ಲಿ ನಡೆಸಿದ ಅಧ್ಯಯನ ಹೇಳಿದೆ.

ಜೇನನ್ನು ಹುಣ್ಣು ಇರುವ ಕಡೆ ಹಚ್ಚುತ್ತಾ ಇರಿ, ಒಂದೆರಡು ದಿನದಲ್ಲಿ ನೋವು ಕಡಿಮೆಯಾಗುವುದು.



5. ಅಡುಗೆ ಸೋಡಾ

ಬಾಯಿ ಹುಣ್ಣಿನ ಸಮಸ್ಯೆಯಿಂದ ಬೇಗನೆ ಗುಣಮುಖರಾಗಲು ಅಡುಗೆ ಸೋಡಾ ಕೂಡ ಬಳಸಬಹುದು. ಇದು ಬಾಯಿ ಹುಣ್ಣಿಗೆ ಕಾರಣವಾದ ಬ್ಯಾಕ್ಟಿರಿಯಾ ಕೊಲ್ಲುತ್ತದೆ. ಅರ್ಧ ಕಪ್ ಬಿಸಿ ನೀರಿನಲ್ಲಿ ಒಂದು ಚಮಚ ಅಡುಗೆ ಸೋಡಾ ಹಾಕಿ ಬಾಯಿ ತೊಳೆಯಿರಿ.



6. ಲೋಳೆಸರ

ಬಾಯಿಹುಣ್ಣು ಗಾತ್ರ ಹೆಚ್ಚಾಗದಿರಲು ಲೋಳೆಸರ ಬಳಸುವುದು ಒಳ್ಳೆಯದು. ಅಲ್ಲದೆ ಉರಿ, ನೋವು ಕಡಿಮೆ ಮಾಡುತ್ತದೆ. ತಾಜಾ ಲೋಳೆಸರ ತೆಗೆದು ಹುಣ್ಣು ಇರುವ ಕಡೆ ಹಚ್ಚುತ್ತಾ ಇರಿ. ಈ ರೀತಿ ಮಾಡುವುದರಿಂದ ಹುಣ್ಣು ಬೇಗನೆ ಒಣಗುವುದು.



7. ತೆಂಗಿನೆಣ್ಣೆ

ಇದರಲ್ಲಿರುವ ಲೌರಿಕ್ ಆಮ್ಲ ಬಾಯಿ ಸ್ವಾಸ್ಥ್ಯ ಕಾಪಾಡಲು ಸಹಕಾರಿ. ತೆಂಗಿನೆಣ್ಣೆಯಿಂದ ಆಯಿಲ್ ಪುಲ್ಲಿಂಗ್ ಮಾಡಿ. ಇನ್ನು ಸ್ವಲ್ಪ ಹತ್ತಿ ತೆಗೆದು ಉಂಡೆ ಮಾಡಿ ಅದನ್ನು ತೆಂಗಿನೆಣ್ಣೆಯಲ್ಲಿ ಅದ್ದಿ, ಅದನ್ನು ಹುಣ್ಣು ಇರುವ ಕಡೆ ಇಡಿ.



8. ಬೆಳ್ಳುಳ್ಳಿ

ಬೆಳ್ಳುಳ್ಳಿಯಲ್ಲಿರುವ ಬ್ಯಾಕ್ಟಿರಿಯಾ ನಾಶ ಮಾಡುವ ಗುಣ ಬಾಯಿ ಹುಣ್ಣಿಗೆ ಕಾರಣವಾದ ಬ್ಯಾಕ್ಟಿರಿಯಾಗಳನ್ನು ನಾಶ ಮಾಡುತ್ತದೆ. ಆದರೆ ಈ ವಿಧಾನದಲ್ಲಿ ತುಂಬಾ ಉರಿ ಅನಿಸಿದರೂ ಬೇಗನೆ ಹುಣ್ಣು ಒಣಗುವುದು. ಬೆಳ್ಳುಳ್ಳಿ ಜಜ್ಜಿ, ಹುಣ್ಣು ಇರುವ ಕಡೆ ಹಚ್ಚಿ. ಈ ವಿಧಾನ ನೋವು ಸಹಿಸುವ ಶಕ್ತಿ ಇರುವವರು ಮಾತ್ರ ಮಾಡಿ. ಬೇಗನೆ ಬಾಯಿಹುಣ್ಣು ಸಮಸ್ಯೆಯಿಂದ ಪಾರಾಗಬಹುದು.



9.ಚಮೊಯಿಲ್ ಟೀ'

ಚಮೊಯಿಲ್ ಟೀ ಬ್ಯಾಗ್ ಅನ್ನು ಒಂದು ಕಪ್ ನೀರಿನಲ್ಲಿ ಅದ್ದಿ, ನಂತರ ಆ ಬ್ಯಾಗ್ಅನ್ನು ಹುಣ್ಣು ಇರುವ ಕಡೆ ಇಡಿ. ಅಲ್ಲದೆ ಆ ನೀರಿನಿಂದ ಬಾಯಿ ಮುಕ್ಕಳಿಸಿದರೆ ಒಳ್ಳೆಯದು.



10. ವಿಟಮಿನ್ ಬಿ 12

ಇನ್ನು ಈ ಬಾಯಿ ಹುಣ್ಣು ಸಮಸ್ಯೆ ವಿಟಮಿನ್ ಬಿ12 ಕೊರತೆಯಿಂದ ಉಂಟಾಗುತ್ತದೆ. ಕೋಳಿ, ಮೊಟ್ಟೆ, ಮೀನು, ಮಾಂಸ, ಹಾಲಿನ ಉತ್ಪನ್ನಗಳಲ್ಲಿ ಬಿ12 ಇರುತ್ತದೆ. ಇವುಗಳನ್ನು ಆಹಾರಕ್ರಮದಲ್ಲಿ ಸೇರಿಸುವುದರಿಂದ ಆಗಾಗ ಬಾಯಿ ಹುಣ್ಣು ಸಮಸ್ಯೆ ಬಾರದಂತೆ ತಡೆಗಟ್ಟಬಹುದು.