ಹೊಳೆವ ಕಣ್ಣಿಗೆ ಮಿಡಿವ ಹೃದಯಕ್ಕೆ ಏನೋ ನಂಟು

ಕಣ್ಣ ರೆಪ್ಪೆಯ ಮೇಲೆ ಕಾಣಿಸಿಕೊಳ್ಳುವ ಹಳದಿ ಕಲೆ (xanthelasmatsa) ಹೃದಯಾಘಾತದ ಮುನ್ಸೂಚನೆ ಅಥವಾ ಹೃದಯ ಗಂಭೀರ ತೊಂದರೆಗೆ ಒಳಗಾಗುವ ಸಂಕೇತ ಎಂದು ಅಧ್ಯಯನವೊಂದು ತಿಳಿಸಿದೆ.

ಬಿಎಂಜೆ ವೆಬ್ ಸೈಟ್ ನಲ್ಲಿ ಪ್ರಕಟಣೆಗೊಂಡ ಈ ಅಧ್ಯಯನ, ಕಣ್ಣಿನ ಕವಚದ ಮೇಲ್ಭಾಗ ಹಳದಿ ಕಲೆ ಕಾಣಿಸಿಕೊಂಡರೆ, ಮುಂದೆ ಹೃದಯ ಸ್ತಂಭನವಾಗುವ ಸಾಧ್ಯತೆ ಶೇಕಡಾ 48 ರಷ್ಟಿದೆ ಎಂದು ತಿಳಿಸಿದೆ.

ದೇಹದಲ್ಲಿ ತುಂಬಿಕೊಂಡ ಅತಿಯಾದ ಕೊಲೆಸ್ಟ್ರಾಲ್ ನಿಂದ ಈ ಹಳದಿ ಕಲೆ ಉಂಟಾಗುತ್ತದೆ. ಹೃದಯದ ರಕ್ತನಾಳಗಳಲ್ಲಿ ಸೇರಿಕೊಂಡು ಹೃದಯ ಸ್ತಂಭನಕ್ಕೆ ಕಾರಣವಾಗುವ ಕೊಲೆಸ್ಟ್ರಾಲ್ ಅಂಶವನ್ನು ಹಳದಿ ಕಲೆ ಸೂಚಿಸುವುದರ ಮೂಲಕ ಹೃದಯಾಘಾತದ ಮುನ್ಸೂಚನೆಯನ್ನು ನೀಡುತ್ತದೆ ಎಂದು ಅಧ್ಯಯನ ತಿಳಿಸಿದೆ.

ಡೆನ್ಮಾರ್ಕ್ ನಲ್ಲಿರುವ ಹರ್ಲೆವ್ ಆಸ್ಪತ್ರೆಯಲ್ಲಿನ ಸಂಶೋಧಕರು 1970 ರಿಂದ 12, 745 ಜನರನ್ನು ಈ ಸಂಬಂಧ ಅಧ್ಯಯನ ನಡೆಸುತ್ತಾ ಬಂದಿದ್ದು, ಈ ಹಳದಿ ಕಲೆ ಕಾಣಿಸಿಕೊಂಡು ಅದನ್ನು ನಿರ್ಲಕ್ಷಿಸಿದರೆ ಹೃದಯ ಸ್ತಂಭನವಾಗುವ ಸಾಧ್ಯತೆ ಶೇಕಡಾ 48 ರಷ್ಟಿದೆ ಮತ್ತು ಹೃದಯಕ್ಕೆ ಸಂಬಂಧಿಸಿದ ಕಾಯಿಲೆಗಳು ಬರುವ ಸಾಧ್ಯತೆ ಶೇ 39 ಇದೆ ಎಂದಿದ್ದಾರೆ. ಇದರಿಂದ ಶೇ14 ರಷ್ಟು ಜನರು ಸಾವನ್ನಪ್ಪುತ್ತಾರೆ ಎಂದು ತಿಳಿಸಿದ್ದಾರೆ.

ಹಲವು ವಯೋಮಿತಿಯ ಮಹಿಳೆ ಮತ್ತು ಪುರುಷರಲ್ಲಿ ಕಾಣಿಸಕೊಳ್ಳುವ ಈ ಹಳದಿ ಕಲೆ ಐವರಲ್ಲಿ ಒಬ್ಬರಿಗೆ ಮುಂದಿನ ಹತ್ತು ವರ್ಷಗಳಲ್ಲಿ ಹೃದಯದ ತೊಂದರೆ ತಂದೊಡ್ಡುತ್ತದೆ ಎಂದು ಅಧ್ಯಯನ ತಿಳಿಸಿದೆ. ಕೊಲೆಸ್ಟ್ರಾಲ್ ನಿಯಂತ್ರಣ ಮಾಡಿಕೊಳ್ಳಲು ಒಳ್ಳೆಯ ಜೀವನ ಶೈಲಿ ಮತ್ತು ಆಹಾರ ಕ್ರಮ ರೂಢಿಸಿಕೊಂಡರೆ ಹೃದಯ ತೊಂದರೆಗಳಿಂದ ದೂರವುಳಿಯಬಹುದು, ಆದರೆ ಜನರು ಈ ಕಲೆಯ ವೈಜ್ಞಾನಿಕ ಅಂಶ ತಿಳಿಯದೆ ಕಲೆ ಹೋಗಿಸಲು ಕಾಸ್ಮೆಟಿಕ್ ಸರ್ಜರಿ ಮೊರೆಹೋಗುತ್ತಾರೆ ಎನ್ನುತ್ತಾರೆ ಹೃದಯ ತಜ್ಞರು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.