ಹಬ್ಬದ ಸೀಸನ್‌ನಲ್ಲಿ ಎಚ್ಚರ! ಕಲಬೆರಕೆ ಸಿಹಿತಿಂಡಿ ಪತ್ತೆ ಹಚ್ಚುವುದು ಹೇಗೆ? ಆರೋಗ್ಯಕರ ಟಿಪ್ಸ್ ಇಲ್ಲಿದೆ

ಹಬ್ಬದ ಸೀಸನ್ ಶುರುವಾಗುತ್ತಿದ್ದಂತೆ ಕಲಬೆರಕೆ ಆಹಾರ ಪದಾರ್ಥಗಳ ತಡೆಗೆ ಆಹಾರ ಸುರಕ್ಷತಾ ಅಧಿಕಾರಿಗಳು ದಾಳಿಯನ್ನು ಚುರುಕುಗೊಳಿಸಿದ್ದಾರೆ. ಮಹಾರಾಷ್ಟ್ರದ ನಾಸಿಕ್‌ನಲ್ಲಿರುವ ಸಪ್ತಶೃಂಗಿ ಗಡ ಪುಣ್ಯಕ್ಷೇತ್ರದಲ್ಲಿ ನವರಾತ್ರಿ ಆಚರಣೆ ವೇಳೆ ಕಳಪೆ ಗುಣಮಟ್ಟದ ಸ್ವೀಟ್ಸ್‌ಗಳನ್ನು ಅಧಿಕಾರಿಗಳು ಪತ್ತೆಹಚ್ಚಿ, ನಾಶಪಡಿಸಿದ್ದಾರೆ. ಇಲ್ಲಿ ಪಾಮ್ ಆಯಿಲ್ ಬಳಸಿ ತಯಾರಿಸಲಾಗಿದ್ದ ಬರೋಬ್ಬರಿ 1,400 ಕೆಜಿ ಮಾವಾ ಸಿಹಿತಿಂಡಿಗಳನ್ನು ವಶಕ್ಕೆ ಪಡೆಯಲಾಗಿದ್ದು, ಇವುಗಳ ಮೌಲ್ಯ ಸುಮಾರು 5.62 ಲಕ್ಷ ರೂ. ಎಂದು ಅಂದಾಜಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ವ್ಯಾಪಾರಿಗಳು ಕಡ್ಡಾಯವಾಗಿ ಎಫ್‌ಎಸ್‌ಎಸ್‌ಎಐ (FSSAI) ಲೈಸೆನ್ಸ್ ಹೊಂದಿರುವುದು ಹಾಗೂ ಸ್ವಚ್ಛತೆ ಕಾಯ್ದುಕೊಳ್ಳುವುದು ಕಡ್ಡಾಯ ಎಂದು ಅಧಿಕಾರಿಗಳು ಕಟ್ಟುನಿಟ್ಟಿನ ಸೂಚನೆ ನೀಡಿದ್ದಾರೆ.

ಮಹಾರಾಷ್ಟ್ರದಾದ್ಯಂತ ಕಲಬೆರಕೆ ತಡೆಯಲು ಬಿಗಿ ಕ್ರಮ ಕೈಗೊಳ್ಳಲಾಗಿದೆ. ಸೆಪ್ಟೆಂಬರ್ 23 ರಿಂದ 27 ರ ನಡುವೆ ನಡೆಸಿದ ಪರಿಶೀಲನೆಯಲ್ಲಿ ಬರೋಬ್ಬರಿ 50 ಟನ್‌ಗೂ ಹೆಚ್ಚು ಕಳಪೆ ಆಹಾರ ಪದಾರ್ಥಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ನಿಯಮ ಉಲ್ಲಂಘಿಸಿದ ಅಂಗಡಿಗಳ ಲೈಸೆನ್ಸ್ ಅಮಾನತುಗೊಳಿಸಲಾಗಿದೆ. ಇದಕ್ಕೂ ಮುನ್ನ 36 ಕಡೆಗಳಲ್ಲಿ ದಾಳಿ ನಡೆಸಿದ್ದ ಅಧಿಕಾರಿಗಳು 4,000 ಕೆಜಿಗೂ ಹೆಚ್ಚು ನಕಲಿ ಖೋವಾವನ್ನು ಜಪ್ತಿ ಮಾಡಿದ್ದರು. ಹಬ್ಬದ ದಿನಗಳಲ್ಲಿ ಆಹಾರ ಸುರಕ್ಷತೆ ವಿಚಾರದಲ್ಲಿ ಕಟ್ಟುನಿಟ್ಟಿನ ನಿಗಾ ವಹಿಸುವಂತೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಸೆಪ್ಟೆಂಬರ್ ಅಂತ್ಯದಲ್ಲಿ ಸುತ್ತೋಲೆ ಹೊರಡಿಸಿತ್ತು.

ಅಸಲಿ-ನಕಲಿ ಸ್ವೀಟ್ಸ್ ಪತ್ತೆ ಹೇಗೆ? ಶುದ್ಧತೆ ತಿಳಿಯಲು ಇಲ್ಲಿವೆ ಸಿಂಪಲ್ ಟಿಪ್ಸ್

ಸಿಹಿತಿಂಡಿಗಳನ್ನು ಸವಿಯುವ ಮುನ್ನವೇ ಅವುಗಳ ವಾಸನೆ ಮತ್ತು ಗುಣಮಟ್ಟವನ್ನು ಪರಿಶೀಲಿಸುವುದು ಒಳ್ಳೆಯದು. ತುಪ್ಪದ ದುರ್ವಾಸನೆ, ಮೇಣದಂತಹ ಸ್ಪರ್ಶ, ಬಾಯಲ್ಲಿ ಜಿಡ್ಡಿನ ಅನುಭವ ಅಥವಾ ಅತಿಯಾದ ಬಣ್ಣಗಳಿದ್ದರೆ ಜಾಗರೂಕರಾಗಿರಿ. ಸ್ವೀಟ್ಸ್ ಮೇಲೆ ಬಳಸುವ ಅಸಲಿ ಬೆಳ್ಳಿ ಹಾಳೆ (Silver leaf) ಸುಲಭವಾಗಿ ಹರಿಯುತ್ತದೆ ಮತ್ತು ಮಂದ ಬೂದು ಬಣ್ಣದಿಂದ ಕೂಡಿರುವುದಿಲ್ಲ. ಅಂಗಡಿಯಲ್ಲಿ ಎಫ್‌ಎಸ್‌ಎಸ್‌ಎಐ (FSSAI) ಲೈಸೆನ್ಸ್ ನಂಬರ್ ಪ್ರದರ್ಶಿಸಲಾಗಿದೆಯೇ ಎಂದು ಗಮನಿಸಿ. ಇನ್ನು ಶುದ್ಧವಾದ ಖೋವಾ ಸ್ವಲ್ಪ ತರಿತರಿಯಾಗಿದ್ದು, ಬಿಸಿ ಮಾಡಿದಾಗ ಹಾಲಿನ ನೈಸರ್ಗಿಕ ಸುವಾಸನೆ ಬೀರುತ್ತದೆ.

ಉಪವಾಸದ ವೇಳೆ ಆರೋಗ್ಯಕರ ಸ್ನಾಕ್ಸ್: ಮಧುಮೇಹಿಗಳಿಗೆ ಸೂಕ್ತ ಪ್ರಮಾಣ ಎಷ್ಟು?

ಹಬ್ಬ ಹಾಗೂ ಉಪವಾಸದ ದಿನಗಳಲ್ಲಿ ಹುರಿದ ಡ್ರೈ ಫ್ರೂಟ್ಸ್, ಖರ್ಜೂರದ ಲಾಡು, ಬೇಕ್ ಮಾಡಿದ ಶಂಕರಪೋಳೆ ಅಥವಾ ಸಿಹಿ ಇಲ್ಲದ ಮಖಾನಾ ಖೀರ್ ಆಯ್ದುಕೊಳ್ಳುವುದು ಸೂಕ್ತ. ಅಡುಗೆಯಲ್ಲಿ ಕನಿಷ್ಠ ಪ್ರಮಾಣದ ತುಪ್ಪ ಬಳಸಿ, ಸಿಹಿಗಾಗಿ ಖರ್ಜೂರ, ಅಂಜೂರ ಅಥವಾ ಸ್ಟೀವಿಯಾ ಬಳಸಿ. ಸಿಹಿತಿಂಡಿಗಳನ್ನು ಕೇವಲ ಅಂಗೈ ಅಗಲದಷ್ಟು ಕನಿಷ್ಠ ಪ್ರಮಾಣದಲ್ಲಿ ಸೇವಿಸಿ, ಸಿಹಿಯೊಂದಿಗೆ ಮೊಸರು ಸೇವಿಸುವುದು ಆರೋಗ್ಯಕ್ಕೆ ಒಳ್ಳೆಯದು.

ಮಕ್ಕಳು ಮತ್ತು ಹಿರಿಯರ ಆಹಾರ ಸುರಕ್ಷತೆ: ಸಂಗ್ರಹಣೆ ಹಾಗೂ ಜಾಗರೂಕತೆ ವಹಿಸಬೇಕಾದ ಲಕ್ಷಣಗಳು

ಹಾಲಿನಿಂದ ಮಾಡಿದ ಸಿಹಿತಿಂಡಿಗಳನ್ನು ಮುಚ್ಚಿಟ್ಟು ಫ್ರಿಡ್ಜ್‌ನಲ್ಲಿಡಿ ಮತ್ತು ಒಂದೇ ದಿನದಲ್ಲಿ ಬಳಸಿ ಮುಗಿಸಿ. ದೇವರ ಪ್ರಸಾದವನ್ನು ಹಸಿ ಆಹಾರ ಪದಾರ್ಥಗಳಿಂದ ದೂರವಿರಿಸಿ, ಬಳಸುವಾಗ ಸ್ವಚ್ಛ ಹಾಗೂ ಒಣ ಚಮಚಗಳನ್ನೇ ಬಳಸಿ. ಮಕ್ಕಳು ಮತ್ತು ಹಿರಿಯರಿಗೆ ನೀಡುವಾಗ ಅತಿಯಾದ ಬಣ್ಣ, ಕೆಟ್ಟ ವಾಸನೆ ಹಾಗೂ ಗಟ್ಟಿಯಾದ ತಿಂಡಿಗಳನ್ನು ನೀಡಬೇಡಿ. ಒಂದು ವೇಳೆ ಸಿಹಿ ತಿಂದ ನಂತರ ವಾಂತಿ, ಹೊಟ್ಟೆನೋವು ಅಥವಾ ಭೇದಿ ಕಾಣಿಸಿಕೊಂಡರೆ, ತಕ್ಷಣ ಆಹಾರ ಸೇವನೆ ನಿಲ್ಲಿಸಿ, ದ್ರವಾಹಾರ ನೀಡಿ ವೈದ್ಯಕೀಯ ನೆರವು ಪಡೆಯಿರಿ. ಆಹಾರ ಸುರಕ್ಷತಾ ಅಧಿಕಾರಿಗಳಿಗೆ ದೂರು ನೀಡಲು ಬಿಲ್ ಮತ್ತು ಪ್ಯಾಕಿಂಗ್ ಕವರ್ ಭದ್ರವಾಗಿಟ್ಟುಕೊಳ್ಳಿ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.