ನಕಲಿ ಪ್ರೋಟೀನ್ ಸಪ್ಲಿಮೆಂಟ್ಸ್ ಎಚ್ಚರಿಕೆ: ನಿಮ್ಮ ಆರೋಗ್ಯಕ್ಕೆ ಕಂಟಕವಾಗುವ ಮುನ್ನ ಈ ಲೇಬಲ್ ಚೆಕ್ ಮಾಡಿ!

ದೆಹಲಿ-ಎನ್‌ಸಿಆರ್ (NCR) ವ್ಯಾಪ್ತಿಯಲ್ಲಿ ಇತ್ತೀಚೆಗೆ ನಡೆಯುತ್ತಿರುವ ಕಾರ್ಯಾಚರಣೆಗಳನ್ನು ಗಮನಿಸಿದರೆ, ನಕಲಿ ಆಹಾರ ಮತ್ತು ಸಪ್ಲಿಮೆಂಟ್ ಉದ್ಯಮ ಎಷ್ಟು ವೇಗವಾಗಿ ಬೆಳೆಯುತ್ತಿದೆ ಎಂಬ ಆತಂಕಕಾರಿ ಸತ್ಯ ಬೆಳಕಿಗೆ ಬಂದಿದೆ. ಸೆಪ್ಟೆಂಬರ್ 16-17 ರಂದು ಗಾಜಿಯಾಬಾದ್ ಪೊಲೀಸರು ನಕಲಿ ಸಪ್ಲಿಮೆಂಟ್‌ಗಳನ್ನು ಮಾರಾಟ ಮಾಡುತ್ತಿದ್ದ ಐವರನ್ನು ಬಂಧಿಸಿ, ₹50 ಲಕ್ಷ ಮೌಲ್ಯದ ಸರಕುಗಳನ್ನು ವಶಪಡಿಸಿಕೊಂಡಿದ್ದಾರೆ. ಜುಲೈನಲ್ಲಿ ಎಫ್‌ಎಸ್‌ಎಸ್‌ಎಐ (FSSAI) ಓಖ್ಲಾದಲ್ಲಿ ದಾಳಿ ನಡೆಸಿ, ಮರು-ಲೇಬಲ್ ಮಾಡಲಾಗಿದ್ದ 40,000ಕ್ಕೂ ಹೆಚ್ಚು ಆಹಾರದ ಪ್ಯಾಕೆಟ್‌ಗಳನ್ನು ಜಪ್ತಿ ಮಾಡಿತ್ತು. ಅದಕ್ಕೂ ಮುನ್ನ, ದೆಹಲಿ ಪೊಲೀಸರು ಎನ್‌ಸಿಆರ್‌ನಾದ್ಯಂತ ಬರೋಬ್ಬರಿ 7,000 ಕೆಜಿ ನಕಲಿ ಪ್ರೋಟೀನ್ ಮಾರಾಟ ಮಾಡಿದ್ದ ಗ್ಯಾಂಗ್ ಒಂದನ್ನು ಪತ್ತೆ ಹಚ್ಚಿದ್ದರು.

ಯಾವುದೇ ಆಹಾರ ಉತ್ಪನ್ನದ ಲೇಬಲ್ ಸರಿಯಾಗಿ ಪರಿಶೀಲಿಸುವುದು ಅತ್ಯಗತ್ಯ. ಏಕೆಂದರೆ ಪ್ಯಾಕ್ ಮೇಲಿರುವ ಆಕರ್ಷಕ ಹೇಳಿಕೆಗಳು ಹೆಚ್ಚಾಗಿ ಜನರನ್ನು ದಾರಿ ತಪ್ಪಿಸುತ್ತವೆ. ಈ ವರ್ಷ ಎಫ್‌ಎಸ್‌ಎಸ್‌ಎಐ '100 ಪರ್ಸೆಂಟ್', 'ನ್ಯಾಚುರಲ್', 'ಫ್ರೆಶ್', 'ಪ್ರೋಟೀನ್-ಪ್ಯಾಕ್ಡ್' ಮತ್ತು 'ನೋ ಆಡೆಡ್ ಶುಗರ್' ಎಂಬಂಥ ಪದಗಳ ಬಳಕೆಗೆ ಎಚ್ಚರಿಕೆ ನೀಡಿದೆ. ಪ್ರಾಧಿಕಾರದಿಂದ ನೋಟಿಸ್ ಬಂದ ತಕ್ಷಣವೇ ಹಲವು ಕಂಪನಿಗಳು ತಮ್ಮ ಪ್ಯಾಕಿಂಗ್ ಲೇಬಲ್‌ಗಳನ್ನು ಬದಲಿಸಿಕೊಂಡಿವೆ. ಕಂಪನಿಗಳು ನೀಡುವ ಜಾಹೀರಾತುಗಳಿಗೆ ಸರಿಯಾದ ಸಾಕ್ಷ್ಯಾಧಾರ ಹಾಗೂ ವೈಜ್ಞಾನಿಕ ಪುರಾವೆಗಳಿವೆಯೇ ಎಂಬುದರ ಮೇಲೆಯೇ ಪ್ರಾಧಿಕಾರ ಕಣ್ಣಿಟ್ಟಿದೆ. ಹೀಗಾಗಿ ಗ್ರಾಹಕರು ಲೇಬಲ್ ಮೇಲಿರುವ ಆಕರ್ಷಕ ಪದಗಳನ್ನು ನೋಡಿ ಮೋಸ ಹೋಗದೆ, 'ನ್ಯೂಟ್ರಿಷನ್ ಪ್ಯಾನಲ್'ನಲ್ಲಿ ವಾಸ್ತವವಾಗಿ ಏನಿದೆ ಎಂಬುದನ್ನು ಪರಿಶೀಲಿಸಬೇಕು.

ಪ್ರೋಟೀನ್ ಸಪ್ಲಿಮೆಂಟ್ಸ್ ಲೇಬಲ್ ಚೆಕ್: FSSAI ಲೈಸೆನ್ಸ್, ಬ್ಯಾಚ್, ಎಕ್ಸ್‌ಪೈರಿ ದಿನಾಂಕ ಮತ್ತು QR ಕೋಡ್ ಪರಿಶೀಲಿಸುವುದು ಹೇಗೆ?

ಮೊದಲಿಗೆ, ಪ್ಯಾಕೆಟ್ ಮೇಲಿರುವ 14 ಅಂಕಿಗಳ FSSAI ಲೈಸೆನ್ಸ್ ಸಂಖ್ಯೆಯನ್ನು ಹುಡುಕಿ. ನಂತರ ಇದನ್ನು 'FoSCoS' ವೆಬ್‌ಸೈಟ್‌ನಲ್ಲಿ 'FBO Search' ಬಳಸಿ ಅಥವಾ 'Food Safety Connect' ಆಪ್ ಮೂಲಕ ಪರಿಶೀಲಿಸಿ. ಕಂಪನಿಯ ಹೆಸರು, ವಿಳಾಸ, ಲೈಸೆನ್ಸ್ ಸ್ಟೇಟಸ್ ಮತ್ತು ವ್ಯಾಲಿಡಿಟಿಯನ್ನು ಖಾತರಿಪಡಿಸಿಕೊಳ್ಳಿ. ನಿಯಮಗಳ ಪ್ರಕಾರ ನೀವು ಪಡೆಯುವ ಬಿಲ್/ಇನ್‌ವಾಯ್ಸ್‌ನಲ್ಲೂ ಇದೇ ಲೈಸೆನ್ಸ್ ಸಂಖ್ಯೆ ನಮೂದಾಗಿರಬೇಕು ಎಂಬುದು ನೆನಪಿರಲಿ.

ಪ್ಯಾಕ್ ಮೇಲಿರುವ ಬ್ಯಾಚ್ ಅಥವಾ ಲಾಟ್ ನಂಬರ್, ತಯಾರಿಸಿದ/ಪ್ಯಾಕ್ ಮಾಡಿದ ದಿನಾಂಕ ಮತ್ತು ಬೆಸ್ಟ್ ಬಿಫೋರ್ ಅಥವಾ ಎಕ್ಸ್‌ಪೈರಿ ದಿನಾಂಕಗಳನ್ನು ಕಡ್ಡಾಯವಾಗಿ ಪರಿಶೀಲಿಸಿ. ಹಳೆಯ ದಿನಾಂಕಗಳ ಮೇಲೆ ಹೊಸ ಸ್ಟಿಕ್ಕರ್ ಅಂಟಿಸಿದ್ದರೆ ಅಥವಾ ಫಾಂಟ್‌ಗಳು ಹೊಂದಾಣಿಕೆಯಾಗದಿದ್ದರೆ ಅಂತಹ ಉತ್ಪನ್ನಗಳನ್ನು ತಕ್ಷಣವೇ ನಿರಾಕರಿಸಿ. ತಯಾರಕರ ವಿವರಗಳನ್ನು ತಿಳಿಯಲು 'Smart Consumer' ಆಪ್ ಬಳಸಿ ಬಾರ್‌ಕೋಡ್ ಸ್ಕ್ಯಾನ್ ಮಾಡಿ. ಪ್ರಸ್ತುತ ಮಾರುಕಟ್ಟೆಯಿಂದ ವಾಪಸ್ ಪಡೆಯಲಾದ ಬ್ಯಾಚ್‌ಗಳನ್ನು ತಿಳಿಯಲು FoSCoS ನ 'Food Recall' ಪುಟವನ್ನು ನೋಡಿ. ಸದಾ ಅಧಿಕೃತ ಮಾರಾಟಗಾರರಿಂದ ಸೀಲ್ ಆದ ಉತ್ಪನ್ನಗಳನ್ನಷ್ಟೇ ಖರೀದಿಸಿ, ಗ್ರೇ-ಮಾರ್ಕೆಟ್ ಆಮದುಗಳಿಂದ ದೂರವಿರಿ.

ರಿಫಂಡ್ ಪಡೆಯುವುದು ಮತ್ತು ದೂರು ನೀಡುವ ಹಂತಗಳು; ಬಜೆಟ್ ಸ್ನೇಹಿ ನೈಸರ್ಗಿಕ ಪ್ರೋಟೀನ್ ಮೂಲಗಳು

ನೀವು ಖರೀದಿಸಿದ ಉತ್ಪನ್ನ ನಕಲಿ ಎಂದು ಅನುಮಾನ ಬಂದರೆ ತಕ್ಷಣವೇ ಕ್ರಮ ಕೈಗೊಳ್ಳಿ. ಪ್ರಾಡಕ್ಟ್ ವಾಪಸ್ ಪಡೆಯಲು ಮತ್ತು ಪೂರ್ಣ ಹಣ ರಿಫಂಡ್ ಮಾಡಲು ಮಾರಾಟಗಾರರಿಗೆ ಲಿಖಿತ ರೂಪದಲ್ಲಿ ಕೋರಿ. "Subject: Suspected counterfeit, batch X, FSSAI Y; please refund and arrange pickup" ಎಂದು ಬರೆದು ಇಮೇಲ್ ಕಳುಹಿಸಿ. ನಂತರ 'Food Safety Connect'ನಲ್ಲಿ ದೂರು ದಾಖಲಿಸಿ. ಇ-ಕಾಮರ್ಸ್ ಪ್ಲಾಟ್‌ಫಾರ್ಮ್ ಸಂಬಂಧಿತ ದೂರುಗಳಿಗೆ, ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ (NCH) ಸಂಖ್ಯೆ 1915ಕ್ಕೆ ಮೆಸೇಜ್ ಮಾಡಿ ಅಥವಾ 8800001915 ಸಂಖ್ಯೆಗೆ ವಾಟ್ಸಾಪ್ ಮಾಡಿ. ಬಜೆಟ್ ಸ್ನೇಹಿ ನೈಸರ್ಗಿಕ ಪ್ರೋಟೀನ್ ಆಯ್ಕೆಗಳಿಗಾಗಿ: ಎರಡು ಮೊಟ್ಟೆ, ಒಂದು ಕಪ್ ಬೇಳೆ, 60 ಗ್ರಾಂ ಪನೀರ್, ಮೊಸರು ಮತ್ತು ಕಡಲೆಕಾಯಿಯನ್ನು ನಿಮ್ಮ ದಿನನಿತ್ಯದ ಆಹಾರದಲ್ಲಿ ಬಳಸಬಹುದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.