ಮಾನಸಿಕ ರೋಗವಾದ 'ಅನೋರೆಕ್ಸಿಯಾ' ಕಾಯಿಲೆಯ ಲಕ್ಷಣಗಳೇನು?

ಕೆಲ ಹೊತ್ತಿನ ಊಟವನ್ನು ಬಿಟ್ಟು ಬಿಡುವುದು

ಒಂದು ವೇಳೆ ಈ ವ್ಯಕ್ತಿ ಬೇಕು ಬೇಕೆಂದೇ ಒಂದು ಅಥವಾ ಎರಡು ಹೊತ್ತಿನ ಊಟವನ್ನು ಬಿಟ್ಟುಬಿಟ್ಟರೆ ಈ ವ್ಯಾಧಿ ನಿಧಾನವಾಗಿ ಆವರಿಸುತ್ತಿದೆ ಎಂದು ಅರ್ಥೈಸಿಕೊಳ್ಳಬಹುದು.

ಊಟ ಮಾಡುವ ಅಭ್ಯಾಸದಲ್ಲಿ ಹಠಾತ್ತನೇ ಬದಲಾವಣೆಯಾಗುವುದು

ಈ ವ್ಯಕ್ತಿಗಳು ತಮ್ಮ ಊಟಮಾಡುವ ಅಭ್ಯಾಸಗಳು ಮತ್ತು ಆಹಾರಗಳಲ್ಲಿ ಹಠಾತ್ತಾಗಿ ಬದಲಾವಣೆಯನ್ನು ಬಯಸುವುದು ರೋಗದ ಪ್ರಮುಖ ಲಕ್ಷಣವಾಗಿದೆ. ಉದಾಹರಣೆಗೆ ಪ್ರತಿದಿನ ಮಧ್ಯಾಹ್ನ ಒಂದು ಗಂಟೆಗೆ ಊಟ ಮಾಡುತ್ತಿದ್ದ ವ್ಯಕ್ತಿ ಥಟ್ಟನೇ ನಾನು ನಾಳೆಯಿಂದ ಸಂಜೆ ನಾಲ್ಕು ಗಂಟೆಗೆ ತಿನ್ನುತ್ತೇನೆ ಎನ್ನುವುದು. ಅಥವಾ ಬೇರೇನೂ ಬೇಡ, ಕೇವಲ ಬಾಳೆಹಣ್ಣನ್ನು ಮಾತ್ರ ತಿನ್ನುತ್ತೇನೆ ಎನ್ನುವುದ್ ಅಥವಾ ಊಟ ಮಾಡಿದರೆ ಅರ್ಧ ಇಡ್ಲಿ ಮಾತ್ರ ತಿನ್ನುತ್ತೇನೆ ಎನ್ನುವುದು ಇದರ ಲಕ್ಷಣಗಳಾಗಿವೆ.

ತೂಕದಲ್ಲಿ ಭಾರೀ ಇಳಿಕೆ ಕಂಡುಬರುವುದು

ವ್ಯಕ್ತಿಯ ತೂಕದಲ್ಲಿ ಸಾಮಾನ್ಯವಾಗಿರುವುದಕ್ಕಿಂತಲೂ ಭಾರೀ ಪ್ರಮಾಣದಲ್ಲಿ ತೂಕ ಕಡಿಮೆಯಾಗಿರುವುದು ಮತ್ತು ಈ ತೂಕವೂ ಹೆಚ್ಚೇ ಎಂದು ವಾದಿಸುವುದು ಇನ್ನೊಂದು ಪ್ರಮುಖ ಲಕ್ಷಣವಾಗಿದೆ.

ತೂಕ ಕಳೆದುಕೊಂಡಿರುವುದನ್ನು ಮರೆಮಾಚಲು ಪ್ರಯತ್ನಿಸುವುದು

ಸಾಮಾನ್ಯವಾಗಿ ತೂಕ ಕಳೆದುಕೊಂಡ ವ್ಯಕ್ತಿಯನ್ನು ಸಮಾಜ ಕಳಕಳಿಯಿಂದ ವಿಚಾರಿಸುತ್ತದೆ. ಈ ಕಳಕಳಿ ಅಗ್ನಿಮಾಂದ್ಯ (ಅನೋರೆಕ್ಸಿಯಾ ನರ್ವೋಸಾ) ತೊಂದರೆಯಿರುವ ವ್ಯಕ್ತಿಗೆ ಕಿರಿಕಿರಿ ಎಂದು ಅನ್ನಿಸುತ್ತದೆ. ತನ್ನನ್ನು ಯಾರೂ ಆ ರೀತಿ ಕೇಳಬಾರದು ಎಂಬ ಇರಾದೆಯಿಂದ ತನ್ನ ಕೃಶಕಾಯ ತೋರದಂತಹ ಉಡುಪುಗಳನ್ನೇ ತೊಡುತ್ತಾರೆ. ಇದು ಇನ್ನೊಂದು ಪ್ರಮುಖ ಲಕ್ಷಣವಾಗಿದೆ.

ದೇಹದ ಅನಗತ್ಯ ಸ್ಥಳಗಳಲ್ಲಿ ರೋಮಗಳು ಮೂಡುವುದು

ದೇಹ ಅತ್ಯಂತ ಕೃಷವಾಗಿದ್ದರೆ ದೇಹ ಉತ್ಪಾದಿಸಿದ ತಾಪಮಾನವನ್ನು ಕಡಿಮೆಗೊಳಿಸಲು ದೇಹಕ್ಕೆ ಸಾಧ್ಯವಾಗದೇ ಅನಿವಾರ್ಯವಾಗಿ ಕೆಲವು ಸ್ಥಳಗಳಲ್ಲಿ ರೋಮಗಳನ್ನು ಹೆಚ್ಚಿಸಬೇಕಾಗುತ್ತದೆ. ಮುಖ (ಮೀಸೆ ಮತ್ತು ಗಡ್ಡ, ವಿಶೇಷವಾಗಿ ಮಹಿಳೆಯರಲ್ಲಿ), ಕೈ, ಕಾಲುಗಳಲ್ಲಿ ಹೆಚ್ಚಿನ ರೋಮಗಳು ಹುಟ್ಟಿರುವುದು ಕಂಡುಬಂದರೆ ಅಗ್ನಿಮಾಂದ್ಯತೆ ಉಲ್ಬಣಗೊಂಡಿದೆ ಎಂದು ಅರ್ಥೈಸಿಕೊಳ್ಳಬೇಕು.

ತನ್ನ ಬಗ್ಗೆ ಕೀಳರಿಮೆಯಲ್ಲಿ ಮಾತನಾಡುವುದು

ಈಗಾಗಲೇ ಕೃಶಶರೀರಿಯಾಗಿದ್ದರೂ ತಾನು ದಪ್ಪನಾಗಿದ್ದೇನೆ ಎಂಬಂತೆ ಕೀಳರಿಮೆಯ ಮಾತುಗಳನ್ನಾಡುವುದು ಇನ್ನೊಂದು ಲಕ್ಷಣವಾಗಿದೆ. ಉದಾಹರಣೆಗೆ ಕಾರಿನಲ್ಲಿ ಹಿಂದೆ ಮೂರು ಜನರು ಕುಳಿತುಕೊಳ್ಳಲು ಅವಕಾಶವಿದ್ದರೂ ಮೂರನೆಯವರಾಗಿ ಬರಲು ಒಪ್ಪದಿರುವುದು.

ಋತುಚಕ್ರದ ದಿನಗಳಲ್ಲಿ ಭಾರೀ ಏರುಪೇರಾಗುವುದು

ಯುವತಿಯರಲ್ಲಿ ಅತಿ ಬೇಗನೇ ಅಥವಾ ಅತ್ಯಂತ ತಡವಾಗಿ ಋತುಚಕ್ರದ ದಿನಗಳು ಬರುವುದು ಅಗ್ನಿಮಾಂದ್ಯದ ಲಕ್ಷಣವಾಗಿದೆ. ಈ ವ್ಯಾಧಿಗೆ ಒಳಗಾದವರಲ್ಲಿ ಸುಮಾರು ಮೂರು ತಿಂಗಳು ಋತುಸ್ರಾವವಾಗದಿರುವುದು ಕಂಡುಬಂದಿದೆ.

ನಡವಳಿಕೆಯಲ್ಲಿ ಬದಲಾವಣೆ

ನಿಧಾನವಾಗಿ ಈ ವ್ಯಕ್ತಿಗಳು ತಮ್ಮನ್ನು ತಾವೇ ಒಂಟಿಯಾಗಿಸಿಕೊಳ್ಳುತ್ತಾ ಹೋಗುತ್ತಾರೆ. ತಮ್ಮ ಮನೆಯವರೊಂದಿಗೆ, ಸ್ನೇಹಿತರೊಂದಿಗೆ ಮಾತನಾಡುವುದನ್ನು ಕಡಿಮೆಗೊಳಿಸಿ ತಮ್ಮದೇ ಗೋಪ್ಯ ಜಗತ್ತಿನಲ್ಲಿ ವಿಹರಿಸುತ್ತಿರುತ್ತಾರೆ.

ರಕ್ತದೊತ್ತಡ ಭಾರೀ ಪ್ರಮಾಣದಲ್ಲಿ ಕುಸಿಯುವುದು

ಯಾವಾಗಲಾದರೂ ಇವರ ರಕ್ತದೊತ್ತಡವನ್ನು ಪರೀಕ್ಷಿಸಿದರೂ ಸಾಮಾನ್ಯವಾಗಿರುವುದಕ್ಕಿಂತ ಅತಿ ಕಡಿಮೆ ಇರುವುದು ಅಗ್ನಿಮಾಂದ್ಯದ ಲಕ್ಷಣವಾಗಿದೆ.

ಚರ್ಮ ಒಣಗಿ ಸುಕ್ಕುಗೊಂಡಿರುವುದು

ಊಟವನ್ನೇ ಸರಿಯಾಗಿ ಮಾಡದಿರುವ ಕಾರಣ ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳು ದೊರಕದೇ ಸೊರಗುತ್ತದೆ. ಇದರ ನೇರ ಪರಿಣಾಮವನ್ನು ಚರ್ಮದ ಕಾಂತಿಯಲ್ಲಿ ಗಮನಿಸಬಹುದು. ಈ ವ್ಯಕ್ತಿಗಳ ಚರ್ಮ ಒಣಗಿ, ಸುಕ್ಕುಸುಕ್ಕಾಗಿರುತ್ತವೆ ಹಾಗೂ ಕಾಂತಿಯನ್ನು ಕಳೆದುಕೊಂಡು ಸಪ್ಪೆಯಾಗಿರುತ್ತವೆ. ಚಿಕ್ಕ ಗೀರು ಬಿದ್ದರೂ ಸುಲಭವಾಗಿ ಗಾಯವಾಗುವಂತಿರುತ್ತದೆ.

ಇದರಲ್ಲಿ ಯಾವುದೇ ಒಂದು ಲಕ್ಷಣ ಕಂಡುಬಂದರೂ ಕೂಡಲೇ ಮನೆಯವರು ವೈದ್ಯರಲ್ಲಿ ತಪಾಸಣೆಗೊಳಪಡಿಸಿ ಸೂಕ್ತ ಚಿಕಿತ್ಸೆ ನೀಡುವುದು ಅಗತ್ಯವಾಗಿದೆ. ಪ್ರಮುಖವಾಗಿ ಮನೆಯವರು ಇವರ ವರ್ತನೆಯನ್ನು ಪರಿಗಣಿಸದೇ ಪ್ರೀತಿಯಿಂದ ನೋಡಿಕೊಂಡಲ್ಲಿ ಶೀಘ್ರವಾಗಿ ಗುಣಮುಖರಾಗುತ್ತಾರೆ. ಒಂದು ಸಮೀಕ್ಷೆಯ ಪ್ರಕಾರ ಈ ವ್ಯಾಧಿ ಹೆಚ್ಚಾಗಿ 20ರಿಂದ 50ರ ವಯಸ್ಸಿನ ಮಹಿಳೆಯರಲ್ಲಿ ಕಂಡುಬರುತ್ತದೆ. (85 ರಿಂದ 95 ಪ್ರತಿಶತ).