ನಿಮ್ಮ ತ್ವಚೆ ಸಮಸ್ಯೆಗೆ ಇಲ್ಲಿದೆ ಪರಿಹಾರ

Skin Care

oi-Reena

By Hema S

Updated: Tuesday, November 13, 2012, 13:23 [IST]

ಸುಂದರವಾಗಿ ಕಾಣಬೇಕೆಂಬ ಆಸೆ ಯಾರಿಗೆ ಇಷ್ಟವಿರಲ್ಲ ಹೇಳಿ? ಅದಕ್ಕಾಗಿ ನಾವೆಲ್ಲಾ ಸಾಕಷ್ಟು ಪ್ರಯತ್ನ ಕೂಡ ಪಡುತ್ತೇವೆ. ಹೇರ್ ಸ್ಟೈಲ್ ಚೇಂಜ್ ಮಾಡುತ್ತೇವೆ, ಆಕರ್ಷಕವಾಗಿ ಕಾಣುವಂತೆ ಡ್ರೆಸ್ಸಿಂಗ್ ಮಾಡುತ್ತೇವೆ. ಮುಖದ ಅಂದವನ್ನು ಹೆಚ್ಚಿಸಲು ಕ್ರೀಮ್ ಗಳನ್ನು ಬಳಸುತ್ತೇವೆ.

ಇಷ್ಟೆಲ್ಲಾ ಮಾಡಿದರೂ ಕೆಲವೊಮ್ಮೆ, ಮೊಡವೆ, ಕಲೆ, ಬ್ಲ್ಯಾಕ್ ಹೆಡ್ಸ್, ಮುಖದಲ್ಲಿ ರಂಧ್ರ ಮುಂತಾದ ಸಮಸ್ಯೆಗಳು ಕಂಡು ಬರುತ್ತವೆ. ಆದ್ದರಿಂದ ತ್ವಚೆ ಆರೈಕೆ ಕಡೆಗೆ ಹೆಚ್ಚಿನ ಗಮನ ಕೊಡುವುದು ಒಳ್ಳೆಯದು. ಇಲ್ಲಿ ಕೆಲವೊಂದು ಆರ್ಯುವೇದದ ವಿಧಾನದಿಂದ ತ್ವಚೆ ಆರೈಕೆ ಹೇಗೆ ಎಂದು ಹೇಳಲಾಗಿದೆ. ಈ ಸಲಹೆಗಳನ್ನು ಪಾಲಿಸಿದರೆ ಆರೋಗ್ಯಕರವಾದ ಆಕರ್ಷಕವಾದ ತ್ವಚೆ ನಿಮ್ಮದಾಗುವುದು.

ನೆರಿಗೆ ತಡೆಗಟ್ಟಲು: ಪ್ರತಿದಿನ ಹರಳೆಣ್ಣೆಯಿಂದ ಮುಖ ಹಾಗೂ ಕುತ್ತಿಗೆಯ ಭಾಗವನ್ನು ಮಸಾಜ್ ಮಾಡಿದರೆ ತ್ವಚೆ ಮೃದುವಾಗುವುದು ಹಾಗೂ ಅಕಾಲಿಕ ನೆರಿಗೆಯನ್ನು ತಡೆಗಟ್ಟುತ್ತದೆ.

ಮುಖದಲ್ಲಿ ರಂಧ್ರ ಮರೆ ಮಾಚಲು: ಪ್ರತಿದಿನ ಸ್ವಲ್ಪ ಹಾಲಿಗೆ ಹತ್ತಿಯನ್ನು ಅದ್ದಿ, ಆ ಹತ್ತಿಯಿಂದ ಮುಖವನ್ನು ಉಜ್ಜಬೇಕು. ಈ ರೀತಿ ಪ್ರತಿದಿನ ಕ್ಲೆನ್ಸ್ ಮಾಡಿದರೆ ಮುಖದಲ್ಲಿ ರಂಧ್ರಗಳು ಎದ್ದು ಕಾಣುವುದಿಲ್ಲ.

ಮಾಯಿಶ್ಚರೈಸರ್: ತ್ವಚೆ ಒಣಗದಿರಲು ಸ್ವಲ್ಪ ಮೊಸರಿಗೆ ಒಂದು ಚಮಚ ನಿಂಬೆ ರಸ, ಒಂದು ಚಮಚ ಕಿತ್ತಳೆ ರಸ ಹಾಕಿ ಮಿಶ್ರಣ ಮಾಡಿ ಮೈಗೆ ಹಚ್ಚಿ ಅರ್ಧಗಂಟೆಯ ಬಳಿಕ ಸ್ನಾನ ಮಾಡಬೇಕು. ಈ ರೀತಿ ವಾರದಲ್ಲಿ 2 ಬರಿ ಮಾಡಿದರೂ ತ್ವಚೆ ಒಣಗುವ ಸಮಸ್ಯೆ ಕಂಡು ಬರುವುದಿಲ್ಲ.

ಸ್ಕಿನ್ ಕಂಡೀಷನರ್: 2 ಚಮಚ ಹಾಲಿನ ಕೆನೆಗೆ 1 ಚಮಚ ಜೇನು ಹಾಕಿ ಮಿಶ್ರಣ ಮಾಡಿ ಮುಖಕ್ಕೆ ಹಚ್ಚಬೇಕು. ನಂತರ ಒದ್ದೆ ಟವಲ್ ನಿಂದ ಮುಖ ಒರೆಸಬೇಕು. ಈ ರೀತಿ ಮಾಡಿದರೆ ಮುಖದ ಹೊಳಪು ಹೆಚ್ಚುವುದು.

ಕಪ್ಪು ಕಲೆ ನಿವಾರಣೆಗೆ: ಹಸಿ ಆಲೂಗೆಡ್ಡೆಯನ್ನು ವೃತ್ತಾಕಾರವಾಗಿ ಕತ್ತರಿಸಿ ಅದರಿಂದ ಮುಖವನ್ನು ಉಜ್ಜಿದರೆ ಕಪ್ಪು ಕಲೆಗಳು ಕಡಿಮೆಯಾಗುವುದು.

ತ್ವಚೆ ಮೃದುವಾಗಲು: ಕಿತ್ತಳೆ ರಸವನ್ನು ಮುಖಕ್ಕೆ ಹಚ್ಚಿ 10 ನಿಮಿಷದ ಬಳಿಕ ಮುಖ ತೊಳೆಯಬೇಕು. ಈ ರೀತಿ ಪ್ರತಿದಿನ ಮಾಡಿದರೆ ತ್ವಚೆ ಮೃದುವಾಗುವುದು.

ಮುಖದ ರೋಮ ಹೋಗಲಾಡಿಸಲು: ಎಳ್ಳೆಣ್ಣೆಗೆ ಅರಿಶಿಣ ಪುಡಿ ಹಾಗೂ ಗೋಧಿ ಪುಡಿಯನ್ನು ಸಮ ಪ್ರಮಾಣದಲ್ಲಿ ಹಾಕಿ ಮುಖಕ್ಕೆ ತಿಕ್ಕಿದರೆ ಮುಖದ ರೋಮ ಕಡಿಮೆಯಾಗುವುದು.