ಕೂದಲು ಉದುರುವುದು ತಡೆಗಟ್ಟಲು ಈ ಪುರಾತನ ಮದ್ದೇ ಬೆಸ್ಟ್ ಎಂದ ರವೀನಾ ಟಂಡನ್

ದಿನಾ ಆಮ್ಲ/ನೆಲ್ಲಿಕಾಯಿ ತಿನ್ನಿ

ಕೂದಲಿನ ಪೋಷಣೆಗೆ ನೆಲ್ಲಿಕಾಯಿ ತುಂಬಾನೇ ಸಹಾಯ ಮಾಡುತ್ತದೆ. ಕೂದಲು ಚೆನ್ನಾಗಿರಲು ದಿನಾ ನೆಲ್ಲಿಕಾಯಿ ತಿನ್ನುವಂತೆ ಸಲಹೆ ನೀಡಿದ್ದಾರೆ. ಪ್ರತಿದಿನ ನೆಲ್ಲಿಕಾಯಿ ತಿನ್ನುವುದು ಆರೋಗ್ಯಕ್ಕೂ ತುಂಬಾನೇ ಒಳ್ಳೆಯದು. ದೇಹಕ್ಕೆ ಅಗ್ಯತವಿರುವ ವಿಟಮಿನ್ ಸಿ ಸಿಗುತ್ತದೆ ಹಾಗೂ ಜೀರ್ಣಕ್ರಿಯೆಗೆ ಸಹಕಾರಿ ಹಾಗೂ ಕೂದಲನ್ನು ಬುಡದಿಂದಲೇ ಪೋಷಣೆ ಮಾಡುತ್ತದೆ. ಆದ್ದರಿಂದ ದಿನದಲ್ಲಿ ಒಂದರಿಂದ ಎರಡು ನೆಲ್ಲಿಕಾಯಿ ತಿನ್ನುವ ಅಭ್ಯಾಸ ರೂಢಿಸಿಕೊಳ್ಳಿ.

ನೆಲ್ಲಿಕಾಯಿಯನ್ನು ತಲೆಗೆ ಹೇಗೆ ಬಳಸಬೇಕು?

ಒಂದು ಕಪ್ ಹಾಲಿಗೆ ನಾಲ್ಕರಿಂದ ಐದು ನೆಲ್ಲಿಕಾಯಿ ಹಾಕಿ ಕುದಿಸಬೇಕು. ನೆಲ್ಲಿಕಾಯಿ ಚೆನ್ನಾಗಿ ಬೆಂದು ಮೆತ್ತಗಾಗಬೇಕು. ನಂತರ ಅದನ್ನು ಉರಿಯಿಂದ ಇಳಿಸಿ, ತಣ್ಣಗಾದ ಮೇಲೆ ಹಾಲಿನಲ್ಲಿಯೇ ಮ್ಯಾಶ್‌ ಮಾಡಿ. ಈಗ ಈ ಹಾಲಿನ ಮಿಶ್ರಣವನ್ನು ತಲೆಗೆ ಹಚ್ಚಿ 30 ನಿಮಿಷ ಬಿಡಬೇಕು. ನಂತರ ಉಗುರು ಬೆಚ್ಚಗಿನ ನೀರಿನಲ್ಲಿ ತಲೆ ತೊಳೆಯಬೇಕು.

ತಲೆ ತೊಳೆಯುವ ಶ್ಯಾಂಪೂ ಹಚ್ಚುವ ಅಗ್ಯತವಿಲ್ಲ

ನೆಲ್ಲಿಕಾಯಿ ಮತ್ತು ಹಾಲಿನ ಹೇರ್‌ ಮಾಸ್ಕ್ ಮಾಡಿದರೆ ಕೂದಲಿಗೆ ಶ್ಯಾಂಪೂ ಹಚ್ಚುವ ಅಗ್ಯತವಿಲ್ಲ. ಏಕೆಂದರೆ ಹಾಗೇ ತಿಕ್ಕಿ ತೊಳೆದರೂ ಕೂದಲಿನ ಬುಡದಲ್ಲಿರುವ ಕೊಳೆ ಸಂಪೂರ್ಣವಾಗಿ ಹೋಗುವುದು, ಕೂದಲಿನಲ್ಲಿ ಯಾವುದೇ ಜಿಡ್ಡಿನಂಶ ಉಳಿಯುವುದಿಲ್ಲ ಆದ್ದರಿಂದ ಯಾವುದೇ ಶ್ಯಾಂಪೂ ಹಚ್ಚದೆ ಕೂದಲಿನ ಆರೈಕೆ ಮಾಡಬಹುದು. ಕೂದಲು ತುಂಬಾ ಹೊಳಪಿನಿಂದಲೂ ಕೂಡಿರುತ್ತದೆ.

ಆಮ್ಲ ಏಕೆ ಕೂದಲಿಗೆ ಒಳ್ಳೆಯದು?

ಆಮ್ಲದಲ್ಲಿ ವಿಟಮಿನ್ ಸಿ, ಇ, ರಂಜಕ ಟಾನ್ನಿಸ್, ಕಬ್ಬಿಣದಂಶ ಮತ್ತು ಕ್ಯಾಲ್ಸಿಯಂ ಇರುತ್ತದೆ. ಇದರಲ್ಲಿ ವಿಟಮಿನ್ ಇ ಅಧಿಕವಿರುವುದರಿಂದ ಕೂದಲಿನ ಬೆಳವಣಿಗೆಗೆ ಸಹಕಾರಿ. ಇನ್ನು ವಿಟಮಿನ್ ಸಿ ಹಾಗೂ ಆ್ಯಂಟಿಆಕ್ಸಿಡೆಂಟ್‌ ಕೂದಲಿನ ಬುಡವನ್ನು ಸ್ವಚ್ಛವಾಗಿ ಇಡುವುದರ ಜೊತೆಗೆ ಯಾವುದೇ ತಲೆಹೊಟ್ಟಿನ ಸಮಸ್ಯೆ ಕೂಡ ಕಾಡುವುದಿಲ್ಲ.