ಹಬ್ಬಕ್ಕೆ ಎಣ್ಣೆ ಸ್ನಾನ ಮಾಡೋದು ಯಾಕೆ ಗೊತ್ತಾ?

Body Care

oi-Sumalatha N

By Sumalatha N

Published: Wednesday, August 31, 2011, 15:15 [IST]

ಹಬ್ಬ ಬಂತೆಂದರೆ ಬೆಳಗ್ಗೆ ಎಣ್ಣೆ ಸ್ನಾನ ಇರಲೇಬೇಕು. ಗಣೇಶ ಚತುರ್ಥಿ, ದೀಪಾವಳಿ, ಯುಗಾದಿ ಹಬ್ಬಗಳಂದು ಎಣ್ಣೆಸ್ನಾನ ಮಾಡಿದ ನಂತರವಷ್ಟೇ ದೇವರಿಗೆ ಪೂಜೆ ಸಲ್ಲಿಸುವುದು ರೂಢಿ. ಆದ್ರೆ ಎಣ್ಣೆ ಸ್ನಾನ ಎಂದರೆ ಈಗ ಮುಖ ಮುರಿಯುವವರು ಹೆಚ್ಚು. ಅಂತಹವರು ಎಣ್ಣೆ ಸ್ನಾನ ಮತ್ತು ಬಿಸಿ ನೀರಿನಿಂದ ದೇಹಕ್ಕೆ ಏನು ಉಪಯೋಗ ಎಂದು ತಿಳಿದುಕೊಂಡರೆ ಹಬ್ಬಗಳ ನೆಪದಲ್ಲಿ ಹಿರಿಯರು ಮಾಡಿರುವ ಈ ಸಂಪ್ರದಾಯದಲ್ಲಿನ ವಿಶೇಷ ಅರ್ಥ ಗೋಚರಿಸುತ್ತದೆ.

ಎಣ್ಣೆ ಸ್ನಾನ ಮತ್ತು ಬಿಸಿ ನೀರಿನ ಸ್ನಾನದಿಂದ ಇರುವ ಉಪಯೋಗವನ್ನು ತಿಳಿದುಕೊಳ್ಳಿ:

1. ಬಿಸಿ ನೀರಿನ ಸ್ನಾನ ತ್ವಚೆಯನ್ನು ಸಾಂದ್ರಗೊಳಿಸಿ ಕ್ರಿಮಿಗಳ ವಿರುದ್ಧ ಹೋರಾಡಲು ಅನುಕೂಲ ಮಾಡಿಕೊಡುತ್ತದೆ. ಎಣ್ಣೆಯನ್ನು ದೇಹಕ್ಕೆ ಲೇಪಿಸಿಕೊಂಡು ಮಸಾಜ್ ಮಾಡುವುದರಿಂದ ರಕ್ತ ಸಂಚಲನ ಹೆಚ್ಚಾಗಿ ಆರೋಗ್ಯವೂ ಚೆನ್ನಾಗಿರುತ್ತದೆ ಮತ್ತು ತ್ವಚೆಯೂ ಶುದ್ಧವಿರುತ್ತದೆ.

2. ಬಿಸಿ ನೀರಿನ ಸ್ನಾನ ಮಾಡುವಾಗ ದೊರೆಯುವ ಆವಿಯು ದೇಹದ ದುರ್ಗಂಧವನ್ನು ಹೊರಹಾಕಲು ಸಹಾಯ ಮಾಡುತ್ತದೆ. ಚರ್ಮದ ಜೀವಕಣಗಳು ಶುದ್ಧಗೊಂಡು ತ್ವಚೆಯು ಆರಾಮವಾಗಿ ಉಸಿರಾಡಲು ಅನುವು ಮಾಡಿಕೊಡುತ್ತದೆ.

3. ದೇಹದ ಹಿಂಭಾಗ, ಬೆನ್ನು, ಭುಜ ಮುಂತಾದ ಜಾಗಗಳು ಅಷ್ಟೇನೂ ಸೂಕ್ಷ್ಮವಲ್ಲದ ಕಾರಣ ಬಿಸಿ ನೀರನ್ನು ಹಾಕಿಕೊಂಡರೆ ತೊಂದರೆಯಿಲ್ಲ. ಇದು ಮೂಳೆಗಳಲ್ಲಿ ಮತ್ತು ಕೀಲುಗಳಲ್ಲಿನ ನೋವು ಮತ್ತು ಉರಿಯನ್ನು ಉಪಶಮನಗೊಳಿಸುತ್ತದೆ. ಆದರೆ ಮುಖಕ್ಕೆ ಮತ್ತು ತಲೆಯ ಬುಡಕ್ಕೆ ಬಿಸಿ ನೀರನ್ನು ಹಾಕಿಕೊಳ್ಳುವುದು ಬೇಡ. ಹೆಚ್ಚು ಬಿಸಿ ನೀರನ್ನು ತಲೆಗೆ ಹಾಕಿಕೊಂಡರೆ ಕೂದಲು ಉದುರಬಹುದು.

4. ಬಿಸಿ ನೀರಿನ ಸ್ನಾನ ಚರ್ಮವನ್ನು ಮೃದುಗೊಳ್ಳುವಂತೆ ಮಾಡುತ್ತದೆ. ಎಣ್ಣೆ ಸ್ನಾನ ಮಾಡುವವರು ಎಣ್ಣೆಗೆ ಸ್ವಲ್ಪ ಅರಿಶಿನ ಬೆರೆಸಿ ಹಚ್ಚಿಕೊಂಡು ಬಿಸಿ ನೀರಿನಿಂದ ಸ್ನಾನ ಮಾಡುವುದರಿಂದ ನೈಸರ್ಗಿಕವಾಗಿ ತ್ವಚೆಯನ್ನು ಕಾಂತಿಯುತಗೊಳಿಸಿ ದೇಹದ ದುರ್ಗಂಧವನ್ನೂ ತೊಲಗುವಂತೆ ಮಾಡುತ್ತದೆ. ಹಾಗೆಯೇಚರ್ಮಕ್ಕೆ ಸಂಬಂಧಿಸಿದಂತೆ ಅನೇಕ ರೋಗಗಳು ಬರುವುದನ್ನೂ ತಡೆಯುತ್ತದೆ.

ಎರಡು ವಾರಕ್ಕೊಮ್ಮೆಯಾದರೂ ಬಿಸಿ ನೀರಿನ ಸ್ನಾನ ದೇಹಕ್ಕೆ ಒದಗಿದರೆ ಒಳ್ಳೆಯದು. ಇದು ದೇಹವನ್ನು ಪ್ರಶಾಂತಗೊಳಿಸುವುದಷ್ಟೇ ಅಲ್ಲ ಮನಸ್ಸನ್ನೂಉಲ್ಲಸಿತಗೊಳಿಸುತ್ತದೆ. ಜೊತೆಗೆ ಆರೋಗ್ಯವನ್ನೂ ಕಾಪಾಡುತ್ತದೆ. ಹೇಗೂ ನಾಳೆ ಗಣೇಶ ಹಬ್ಬ. ಎಣ್ಣೆ ಸ್ನಾನದ ಗಮ್ಮತ್ತನ್ನು ನೀವೂ ಒಂದು ಕೈ ನೋಡಿ ಬಿಡಿ.