ನೀವು ಪ್ರೀತಿಸುವ ಹುಡುಗನಿಗೆ ಕುಡಿಯೋ ಅಭ್ಯಾಸ ಇದ್ಯಾ? ಹಾಗಾದ್ರೆ ಈ ವಿಚಾರಗಳ ಬಗ್ಗೆ ಹುಷಾರಾಗಿರಿ!

ನಮಗೆ ಯಾರ ಮೇಲೆ ಬೇಕಾದರೂ ಪ್ರೀತಿ ಹುಟ್ಟಬಹುದು. ಕೆಲವೊಂದು ಸಲ ನಾವು ಒಬ್ಬರ ಬಗ್ಗೆ ತಿಳಿದುಕೊಂಡು, ಅವರ ಗುಣಗಳನ್ನು ಮೆಚ್ಚಿ ಪ್ರೀತಿಯಲ್ಲಿ ಬೀಳುತ್ತೇವೆ. ಆದರೆ ಕೆಲವೊಂದು ಸಲ ಒಬ್ಬ ವ್ಯಕ್ತಿಯ ಕೆಲವು ಗುಣಗಳು ನಮಗೆ ಇಷ್ಟವಾಗದಿದ್ದರೂ ಕೂಡ ನಾವು ಅವರೊಂದಿಗೆ ಪ್ರೀತಿಯಲ್ಲಿ ಬೀಳುತ್ತೇವೆ.

ಒಂದು ವೇಳೆ ನೀವು ಪ್ರೀತಿಸುತ್ತಿರುವ ವ್ಯಕ್ತಿಗೆ ಕುಡಿತದ ಚಟ ಇದ್ದರೆ ಏನಾಗಲಿದೆ ಗೊತ್ತಾ? ಅಷ್ಟಕ್ಕು ಒರ್ವ ಕುಡಿತದ ಚಟ ಹೊಂದಿರುವ ವ್ಯಕ್ತಿಯೊಂದಿಗೆ ಪ್ರೀತಿಯಲ್ಲಿ ಬೀಳೋ ಮೊದಲು ನೀವು ಈ ವಿಚಾರಗಳನ್ನು ತಿಳಿದುಕೊಂಡಿರಲೇಬೇಕು.

1. ನಿಮಗೆ ತಪಿತಸ್ಥ ಭಾವನೆ ಕಾಡಬಾರದು

ನಿಮಗೆ ಕುಡಿತದ ಚಟ ಹೊಂದಿರುವ ವ್ಯಕ್ತಿಯ ಮೇಲೆ ಪ್ರೀತಿ ಆಗಿದೆ ಎಂದಿಟ್ಟುಕೊಳ್ಳಿ. ಮೊದ ಮೊದಲು ನೀವು ಅವರ ಕುಡಿತದ ಚಟವನ್ನು ತಡೆದುಕೊಳ್ಳುತ್ತೀರಿ. ಆದರೆ ದಿನ ಕಳೆದಂತೆ ಅವರ ಅಭ್ಯಾಸ ಅತಿಯಾಗುತ್ತದೆ. ಇದರಿಂದ ನಿಮಗೂ ಕೂಡ ಮಾನಸಿಕ ಹಿಂಸೆ ಉಂಟಾಗುತ್ತದೆ.

ನಿಮ್ಮ ಸ್ನೇಹಿತರೇ ನಿಮ್ಮನ್ನು ಕುಡುಕನ ಹುಡುಗಿ ಎಂದು ಹೀಯಾಳಿಸಬಹುದು. ಆಗ ನಿಮಗೆ ತಪಿತಸ್ಥ ಭಾವನೆ ಕಾಡಲೇಬಾರದು. ಏಕೆಂದರೆ ಅವರ ಕುಡಿತದ ಚಟ ಗೊತ್ತಿದ್ದು ಕೂಡ ನೀವು ಅವರನ್ನು ಪ್ರೀತಿ ಮಾಡಿರೋದ್ರಿಂದ ನೀವು ಇದನ್ನೆಲ್ಲಾ ಸಹಿಸಿಕೊಳ್ಳಲೇಬೇಕು. ಸಾಧ್ಯವಾದರೆ ನಿಮ್ಮ ಹುಡುಗನನ್ನು ಸರಿ ಮಾಡಲು ಪ್ರಯತ್ನಿಸಿ. ಇಲ್ಲವಾದರೆ ನೀವು ನಿಮ್ಮ ಸ್ನೇಹಿತರು ಹಾಗೂ ಆಪ್ತ ಬಳಗಕ್ಕೆ ಉತ್ತರಿಸಲು ತಯಾರಾಗಿ ಇರಬೇಕು.

2. ಕುಡಿದು ನಿಮ್ಮ ಜೊತೆಗೆ ಅಸಭ್ಯವಾಗಿ ವರ್ತಿಸಬಹುದು

ನಿಮ್ಮ ಹುಡುಗ ಸಿಕ್ಕಾಪಟ್ಟೆ ಕುಡಿದು ನಿಮ್ಮ ಜೊತೆಗೆ ಅಸಭ್ಯವಾಗಿ ವರ್ತಿಸಬಹುದು. ಫೋನ್ ಮಾಡಿ ಅಥವಾ ನಿಮ್ಮ ಜೊತೆಗೆ ಇರುವಾಗ ನಿಮಗೆ ಬೈಬಹುದು. ಕೆಲವೊಂದು ಸಲ ಹೊಡೆಯಲು ಪ್ರಯತ್ನ ಮಾಡಬಹುದು. ಇದಕ್ಕೆಲ್ಲಾ ಉತ್ತರ ಕೊಡೋದಕ್ಕೆ ನೀವು ಸಿದ್ಧರಾಗಿ ಇರಬೇಕು. ನೀವು ಪ್ರೀತಿಯಲ್ಲಿ ಬೀಳುವ ಮೊದಲೇ ನಿಮಗೆ ಅವರ ಈ ಚಟದ ಬಗ್ಗೆ ಗೊತ್ತಿದ್ದರಿಂದ ನಿಮ್ಮಲ್ಲಿ ಈಗ ಉಳಿದಿರೋದು ಬರೀ ಎರಡು ಆಯ್ಕೆಗಳು ಮಾತ್ರ. ಒಂದಾ ನೀವು ಅವರು ಮಾಡಿದ್ದನ್ನೆಲ್ಲಾ ಸಹಿಸಿಕೊಳ್ಳಬೇಕು. ಎರಡನೇಯದ್ದು ಅವರ ವಿರುದ್ಧ ಹೋರಾಡಬೇಕು.

3. ಜವಾಬ್ದಾರಿ ತೆಗೆದುಕೊಳ್ಳಬೇಕು

ನೀವು ಪ್ರೀತಿಸುತ್ತಿರುವ ಹುಡುಗ ದುಡಿಯುತ್ತಿದ್ದರೂ ಕೂಡ ಆತ ಕೈಯಲ್ಲಿ ಒಂದು ಬಿಡಿಗಾಸು ಉಳಿಯೋದಿಲ್ಲ. ಯಾಕಂದ್ರೆ ಆತ ತಾನು ದುಡಿದ ದುಡ್ಡನ್ನೆಲ್ಲಾ ಕುಡಿಯೋದಕ್ಕೆ ಖರ್ಚು ಮಾಡುತ್ತಾನೆ. ಹೀಗಿರುವಾಗ ನೀವು ಎಲ್ಲಾದರೂ ಹೊರಗಡೆ ಹೋಗುವಾಗ, ಊಟಕ್ಕೆ ಹೋಗುವಾಗ, ಏನಾದರೂ ಕೊಂಡುಕೊಳ್ಳಬೇಕಾದರೆ ಆತ ದುಡ್ಡು ಕೊಡಬೇಕು ಎಂದು ನೀವು ಬಯಸೋದಕ್ಕೆ ಆಗೋದಿಲ್ಲ. ಬದಲಾಗಿ ಅದರ ಜವಾಬ್ದಾರಿಯನ್ನು ನೀವು ಹೊತ್ತುಕೊಳ್ಳಬೇಕು. ಆ ಎಲ್ಲಾ ಖರ್ಚುಗಳನ್ನು ನೀವೇ ಭರಿಸಬೇಕಾಗುತ್ತದೆ.

4. ಕುಡಿತದ ಚಟ ಬಿಡಲು ಒತ್ತಡ ಹಾಕಬೇಡಿ

ನಿಮ್ಮ ಹುಡುಕನ ಕುಡಿತದ ದಾಸನಾಗಿದ್ದರೆ ಆತನಿಗೆ ಕುಡಿಯೋದು ಬಿಟ್ಟು ಬೇರ್ಯಾವುದೇ ವಿಚಾರಗಳು ತಲೆಗೆ ಬರೋದಿಲ್ಲ. ನೀವು ಅವರ ಮೇಲೆ ಪ್ರೀತಿ, ಕಾಳಜಿ ತೋರಿದರೂ ಕೂಡ ಅವರು ಅದನ್ನು ಗಣನೆಗೆ ತೆಗೆದುಕೊಳ್ಳೋದಿಲ್ಲ.

ಕೆಲವೊಂದು ಸಲ ಅವರ ಕುಡಿತದ ಚಟದಿಂದ ಬೇಸತ್ತ ನೀವು ಕುಡಿತವನ್ನು ಬಿಟ್ಟು ಬಿಡುವಂತೆ ಒತ್ತಡ ಹಾಕೋದಕ್ಕೆ ಶುರು ಮಾಡುತ್ತೀರಿ. ಆದರೆ ಆ ರೀತಿ ಮಾಡುವುದು ತಪ್ಪು. ಅದು ಅವರಿಗೆ ಮಾನಸಿಕ ಹಿಂಸೆ ಅನ್ನಿಸಿಬಿಡಬಹುದು. ಹೀಗಾಗಿ ಅವರ ಮೇಲೆ ಒತ್ತಡ ಹಾಕೋದಕ್ಕೆ ಹೋಗಬೇಡಿ.

5. ಕುಡಿತದ ಚಟ ಬಿಡಿಸುತ್ತೇನೆ ಎಂಬ ಅತಿಯಾದ ಆತ್ಮ ವಿಶ್ವಾಸ ಬೇಡ

ಕೆಲವೊಂದು ಸಲ ಹುಡುಗಿಯರು ಹುಡುಗನ ಕುಡಿತದ ಚಟ ಬಿಡಿಸುತ್ತೇನೆ ಎಂಬ ಅತಿಯಾದ ಆತ್ಮ ವಿಶ್ವಾಸದಿಂದ ಕುಡುಕನ ಪ್ರೀತಿಯಲ್ಲಿ ಬಿದ್ದು ಬಿಡುತ್ತಾರೆ. ಆದರೆ ಪ್ರೀತಿಯಲ್ಲಿ ಬಿದ್ದ ನಂತರ ಅವರಿಗೆ ಕುಡಿತದ ಚಟವನ್ನು ಬಿಡಿಸೋದಕ್ಕೆ ಸಾಧ್ಯ ಆಗೋದಿಲ್ಲ. ಹುಡುಗಿಯ ಮಾತು ಕೇಳಿ ಸ್ವಲ್ಪ ದಿನಗಳ ಕಾಲ ಕುಡಿತವನ್ನು ಬಿಟ್ಟರೂ ಕೂಡ ಮತ್ತೆ ಪುನಃ ಕುಡಿಯೋದಕ್ಕೆ ಶುರು ಮಾಡುತ್ತಾರೆ.

ಇದನ್ನು ಸಹಿಸಿಕೊಳ್ಳೋದಕ್ಕೆ ನಿಮಗೆ ತುಂಬಾ ಕಷ್ಟ ಆಗಬಹುದು. ಕೆಲವೊಂದು ಸಲ ನಿಮ್ಮ ಬಳಿ ಕುಡಿಯೋದಿಲ್ಲ ಎಂದು ಪ್ರಮಾಣ ಮಾಡಿ ನಿಮಗೆ ಗೊತ್ತಿಲ್ಲದ ಹಾಗೆ ಕದ್ದು ಮುಚ್ಚಿ ಕುಡಿಯುತ್ತಿರಬಹುದು. ಹೀಗಾಗಿ ಕುಡಿತ ಬಿಡಿಸುತ್ತೇನೆ ಎಂಬ ಆತ್ಮ ವಿಶ್ವಾಸದಲ್ಲಿ ಖಂಡಿತ ನೀವು ಪ್ರೀತಿಯಲ್ಲಿ ಬೀಳದಿರಿ.

ಕುಡಿತದ ಚಟ ಹೊಂದಿರುವ ವ್ಯಕ್ತಿಗಳು ಸಾಮಾನ್ಯ ವ್ಯಕ್ತಿಗಳಿಗಿಂತ ವಿಭಿನ್ನವಾಗಿರುತ್ತಾರೆ. ಅವರ ಜೊತೆಗೆ ಬದುಕೋದು ಕೊಂಚ ಕಷ್ಟವೇ ಸರಿ. ಹೀಗಾಗಿ ಇದಕ್ಕೆಲ್ಲಾ ಸಿದ್ಧವಾಗಿದ್ದರೆ ಮಾತ್ರ ನೀವು ಪ್ರೀತಿಯಲ್ಲಿ ಬೀಳಬಹುದು.