ಏನಿದು ಕಪಲ್ ಚಾಲೆಂಜ್? ಇದರ ಉದ್ದೇಶವೇನು?

ಹಾಲಿವುಡ್‌ನ ಪ್ರಸಿದ್ಧ ಜೋಡಿ ಪ್ರಾರಂಭಿಸಿದ ಕಪಲ್ ಚಾಲೆಂಜ್

ಲಾಕ್‌ಡೌನ್ ಸಮಯದಲ್ಲಿ ಎಲ್ಲರೂ ಮನೆಯಲ್ಲಿಯೇ ಇದ್ದರು. ಆಗ ಮನೆಯವರೊಂದಿಗೆ ಕಳೆಯಲು ತುಂಬಾ ಸಮಯ ಸಿಗುತ್ತಿತ್ತು. ಈ ಸಂದರ್ಭದಲ್ಲಿ ಹಾಲಿವುಡ್‌ ಪ್ರಸಿದ್ಧ ಜೋಡಿಯಾದ ಜೆನ್ನಿಫರ್‌ ಲೋಪೆಜ್ ಹಾಗೂ ಅಲೆಕ್ಸ್ ರೊಡ್ರಿಗಸ್ ಈ ಚಾಲೆಂಜ್ ಶುರು ಮಾಡಿದರು.

ಕಪಲ್ ಚಾಲೆಂಜ್ ಎಂದರೇನು?

ಈ ಚಾಲೆಂಜ್ ಗಂಡ ಹೆಂಡತಿ ನಡುವೆ ಕೆಮಿಸ್ಟ್ರಿ ಹೇಗಿದೆ ಎಂದು ತಿಳಿಸುವುದು ಅಲ್ಲದೆ ಸಾಕಷ್ಟು ಫನ್ ಕೂಡ ಇರುತ್ತದೆ. ಹೀಗೆ ಶುರುವಾದ ಚಾಲೆಂಜ್ ಟಿಕ್‌ಟಾಕ್ ಇದ್ದಾಗ ತುಂಬಾ ಸದ್ದು ಮಾಡಿತ್ತು. ಇದೀಗ ಫೇಸ್‌ಬುಕ್‌ನಲ್ಲಿ ಫೋಟೋಸ್‌ ಅಪ್‌ಲೋಡ್‌ ಮಾಡುವ ಮೂಲಕ ಸದ್ದು ಮಾಡುತ್ತಿದೆ. ಸೆಲೆಬ್ರಿಟಿಯಿಂದ ಹಿಡಿದು ಸಾಮಾನ್ಯ ಜನರು ಕೂಡ ಈ ಕಪಲ್ ಚಾಲೆಂಜ್‌ನಲ್ಲಿ ಭಾಗವಹಿಸುತ್ತಿದ್ದಾರೆ.

ಕಪಲ್ ಚಾಲೆಂಜ್ ಆಡುವುದು ಹೇಗೆ?

ಈ ಕಪಲ್ ಚಾಲೆಂಜ್ ತುಂಬಾ ಸರಳವಾಗಿದೆ. ಗಂಡ-ಹೆಂಡತಿ ಕಣ್ಣುಮುಚ್ಚಿ ಅಕ್ಕ-ಪಕ್ಕ ಕುಳಿತುಕೊಳ್ಳಬೇಕು. ಇವರ ವೀಡಿಯೋವನ್ನು ಸ್ನೇಹಿತರೋ ಅಥವಾ ಮನೆಯವರು ಮಾಡುತ್ತಾರೆ. ಅವರು ಪ್ರಶ್ನೆ ಕೇಳುತ್ತಾ ಹೋಗುತ್ತಾರೆ. ಅದಕ್ಕೆ ಇವರಿಬ್ಬರು ಉತ್ತರಿಸಬೇಕು. ಕೆಲವೊಮ್ಮೆ ದಂಪತಿ ಪ್ರಶ್ನೆ ಕೇಳುವಾಗ ತದ್ವಿರುದ್ಧ ಉತ್ತರ ನೀಡುತ್ತಾರೆ. ಇದು ನೋಡಲು ಮಜಾವಾಗಿರುತ್ತದೆ.

ಕಪಲ್ ಚಾಲೆಂಜ್‌ಗೆ ಕೇಳುವ ಪ್ರಶ್ನೆಗಳು

ಆ ದಂಪತಿಗೆ ಸಂಬಂಧಿಸಿದಂತೆ ಪ್ರಶ್ನೆಗಳನ್ನು ಕೇಳಲಾಗುವುದು. ಸಾಮಾನ್ಯವಾಗಿ ಈ ಪ್ರಶ್ನೆಗಳನ್ನು ಕೇಳಲಾಗುವುದು

• ನಿಮ್ಮಲ್ಲಿ ಯಾರು ರೊಮ್ಯಾಂಟಿಕ್?
• ಯಾರು ಚೆನ್ನಾಗಿ ಅಡುಗೆ ಮಾಡುತ್ತಾರೆ?
• ಯಾರಿಗೆ ಬೇಗ ಕೋಪ ಬರುತ್ತದೆ?
• ಯಾರು ಗೊರಕೆ ಹೊಡೆಯುತ್ತಾರೆ?
• ಯಾರು ಮೊದಲು ಕ್ಷಮೆ ಕೇಳುತ್ತಾರೆ?
• ಯಾರು ಹೆಚ್ಚು ಜಾಲಿ ಪರ್ಸನ್?
• ಯಾರಿಗೆ ಫ್ಯಾಷನ್ ಟೇಸ್ಟ್ ಅಧಿಕ?
• ಯಾರು ಸೋಮಾರಿ?
• ಯಾರು ತುಂಬಾ ಕ್ರೇಝಿ?
• ಯಾರು ಹೊರಡಲು ತುಂಬಾ ಸಮಯ ತೆಗೆದುಕೊಳ್ಳುತ್ತಾರೆ?

ಹೀಗೆ ಸರಳವಾದ ಪ್ರಶ್ನೆಗಳನ್ನು ಕೇಳಲಾಗುವುದು. ಅವರು ಉತ್ತರಿಸುವುದು ನೋಡಲು ಸಕತ್‌ ಫನ್ ಆಗಿರುತ್ತದೆ.