ನಿಮ್ಮ ಸಂಗಾತಿಯನ್ನು ಬೇರೆಯವರ ಜೊತೆ ಹೋಲಿಕೆ ಮಾಡಿದ್ದೇ ಆದರೆ ನಿಮ್ಮ ಸಂಸಾರ ಜೋಕೆ!

ಈ ಪ್ರಪಂಚದಲ್ಲಿಯೇ ಅತ್ಯಂತ ಸೂಪರ್‌ ಜೋಡಿ ಯಾರೂ ಇಲ್ಲ

ಪ್ರತಿಯೊಂದು ಸಂಸಾರದಲ್ಲಿ ಒಂದೆಲ್ಲಾ ಒಂದು ನ್ಯೂನತೆ ಇದ್ದೇ ಇರುತ್ತದೆ, ಆ ನ್ಯೂನತೆ ಕಡೆ ಗಮನ ನೀಡದೆ ಹೊಂದಾಣಿಕೆಯಿಂದ ಬಾಳಿದರೆ ಆ ಸಂಸಾರ ತುಂಬಾನೇ ಸುಂದರವಾಗಿರಲು ಸಾಧ್ಯ.

ಬೇರೆಯವರನ್ನು ನೋಡಿದಾಗ ತುಂಬಾ ಬೆಟರ್ ಅನಿಸುತ್ತೆ, ಆದರೆ ಅವರ ಇನ್ನೊಂದು ಸೈಡ್‌ ಗೊತ್ತಿರುವುದಿಲ್ಲ

ಕೆಲವೊಂದು ಸಂಸಾರ ನೋಡುವಾಗ ಎಂಥ ಜೋಡಿ ನೋಡುವುದಕ್ಕೆ ಒಬ್ಬರೂ ಸುರದ್ರೂಪಿಗಳು, ಇಬ್ಬರಿಗೆ ಕೈ ತುಂಬಾ ಸಂಬಳ, ಮನೆ, ಕಾರು ಎಲ್ಲಾ ಇದೆ ನಮಗಿಂತ ಅವರ ಬದುಕು ಸೂಪರ್ ಆಗಿರುತ್ತದೆ ಎಂದು ನಾವು ಭಾವಿಸುತ್ತೇವೆ, ಆದರೆ ಅವರ ಸಂಸಾರದ ಹುಳುಕು ಅವರಿಗಷ್ಟೇ ಗೊತ್ತಿರುತ್ತದೆ, ಆದ್ದರಿಂದಲೇ ನೋಡಿ ಎಷ್ಟೋ ಸೆಲೆಬ್ರಿಟಿಗಳ, ದೊಡ್ಡ ದೊಡ್ಡ ಹುದ್ದೆಯಲ್ಲಿರುವವರು ವೈವಾಹಿಕ ಜೀವನ ಮುರಿದು ಬೀಳುವುದು. ನಮ್ಮ ಕಣ್ಣಿಗೆ ಅವರಿಗೆ ಯಾವುದೇ ಕೊರತೆ ಇರಲ್ಲ, ಹೊರ ಜಗತ್ತಿಗೆ ಒಬ್ಬರನ್ನೊಬ್ಬರು ತುಂಬಾ ಇಷ್ಟಪಡುವರಂತೆ ಪೋಸ್‌ ಕೂಡ ಕೊಡುತ್ತಾರೆ. ಅವರ ಇನ್‌ಸ್ಟಾಗ್ರಾಮ್‌, ಫೇಸ್‌ಬುಕ್‌ ನೋಡುವಾಗ ಇಬ್ಬರ ರೊಮ್ಯಾಂಟಿಕ್‌ ಫೋಟೋಗಳಿಗೇನು ಕಡಿಮೆ ಇರಲ್ಲ, ಸ್ವಲ್ಪ ತಿಂಗಳಿನಲ್ಲಿ ಅವರಿಬ್ಬರ ವಿಚ್ಛೇದನ ಸುದ್ದಿ ಕೇಳಿ ಬರುತ್ತದೆ, ಆದ್ದರಿಂದ ನಾವು ಕಾಣುತ್ತಿರುವುದೇ ನಿಜವಲ್ಲ ಎಂಬುವುದು ಅರಿತುಕೊಳ್ಳುವುದು ಒಳ್ಳೆಯದು.

ಹೋಲಿಕೆಯ ಪ್ರೀತಿ ಒಳ್ಳೆಯಲ್ಲ

ನಿಮ್ಮ ಬದುಕನ್ನು ಬೇರೆಯವರ ಬದುಕಿನ ಜೊತೆ ಹೋಲಿಸಲೇಬೇಡಿ. ಬೇರೆಯವರ ವೈವಾಹಿಕ ಜೀವನದ ಜೊತೆ ಹೋಲಿಕೆ ಮಾಡಲಾರಂಭಿಸಿದರೆ ನಿಮ್ಮ ಜೀವನದಲ್ಲಿ ಕೆಲವೊಂದು ಅಮೂಲ್ಯ ಕ್ಷಣಗಳನ್ನು, ಖುಷಿಯನ್ನು ಮಿಸ್‌ ಮಾಡುತ್ತೀರಿ. ಬೇರೆಯವರ ಗಂಡ ಮದುವೆ ವಾರ್ಷಿಕೋತ್ಸವಕ್ಕೆ ನೆಕ್ಲೆಸ್‌ ತಂದುಕೊಟ್ಟಿರಬಹುದು, ಅದೇ ನಿಮ್ಮ ಗಂಡ ಒಂದು ಡ್ರೆಸ್‌ ಮಾತ್ರ ಕೊಡಿಸಿದ ಅಂದ ಮಾತ್ರ, ನಿಮ್ಮ ಗಂಡನಿಗೆ ನಿಮ್ಮ ಮೇಲೆ ಪ್ರೀತಿಯಿಲ್ಲ ಎಂದು ಭಾವಿಸುವುದು ಮೂರ್ಖತನ. ನಿಮ್ಮ ಸಂಗಾತಿ ಬಳಿ ಅದಿಲ್ಲ, ಇದಿಲ್ಲ ಅಂತ ಹೋಲಿಕೆ ಮಾಡಿ ಕೊರಗುವ ಬದಲು ಅವರಲ್ಲಿ ಏನಿದೆ ಅದರಲ್ಲಿ ಸಂತೋಷವಾಗಿರಲು ಕಲಿತರೆ ಸಂಸಾರ ಆನಂದ ಸಾಗರವಾಗುವುದರಲ್ಲಿ ನೋ ಡೌಟ್.

ಬೇರೆಯವರು ಏನು ಹೇಳುತ್ತಾರೆ ಎಂದು ತಲೆಕೆಡಿಸಿಕೊಳ್ಳಬೇಡಿ

ನಿಮ್ಮ ಬದುಕು ನಿಮಗೆ ಅವರ ಬದುಕು ಅವರಿಗೆ ಆದ್ದರಿಂದ ಬೇರೆಯವರು ಏನು ಹೇಳುತ್ತಾರೆ ಎಂದು ತಲೆಕೆಡಿಸಬೇಡಿ. ನಮ್ಮಲ್ಲಿ ತುಂಬಾ ಜನ ನಮಗಾಗಿ ಬದುಕುವ ಬದಲು ಬೇರೆಯವರಿಗಾಗಿ ಬದುಕುತ್ತಾರೆ, ಅಂಥವರು ಕೊರಗುತ್ತಾ ತಮ್ಮ ಇರುವ ನೆಮ್ಮದಿ ಕಳೆದಕೊಳ್ಳುತ್ತಾರೆ.

ಆದ್ದರಿಂದ ನಿಮ್ಮ ಸಂಸಾರವನ್ನು ಬೇರೆಯವರ ಜೊತೆ ಹೋಲಿಕೆ ಮಾಡಲು ಹೋಗಲೇಬಾರದು, ಹೌದು ತಾನೆ?