ಲವ್ ಬ್ರೇಕ್‌ ಅಪ್‌ ಆದರೇನಂತೆ? ಪ್ರಪಂಚವೇನೂ ಮುಳುಗಿ ಹೋಗಲ್ಲ!

ನಿಮ್ಮ ಮಾಜಿ ಸಂಗಾತಿಯನ್ನು ಹಿಂಬಾಲಿಸಲು ಹೋಗಬೇಡಿ!

ಸಂಬಂಧದಲ್ಲಿ ಒಂದಾಗುವುದು ಎಷ್ಟು ಸಹಜವೋ? ಬೇರ್ಪಡುವುದು ಸಹ ಅಷ್ಟೇ ಸಹಜ! ಅದನ್ನು ಆರೋಗ್ಯಕರವಾಗಿ ಸ್ವೀಕರಿಸಿ. ಬ್ರೇಕಪ್ ಆದ ನಂತರ ಅವರನ್ನು ಸಾಮಾಜಿಕ ಜಾಲತಾಣದಲ್ಲಿ ಹಿಂಬಾಲಿಸಲು ಹೋಗಬೇಡಿ. ನಿಮ್ಮ ಸ್ನೇಹಿತರು ಅವರ ಬಗ್ಗೆ ಮಾತನಾಡಬಹುದು. ಅದರ ಕುರಿತು ಗಮನವಹಿಸಬೇಡಿ, ನೀವು ನಿಮ್ಮ ಸಂತೋಷವನ್ನು ಮಾತ್ರ ನೋಡಿಕೊಳ್ಳಿ. ಅವರ ಕುರಿತಾಗಿ ಚಿಂತೆಯನ್ನು ಬಿಡಿ. ನಿಮ್ಮ ಸಂಗಾತಿ ನಿಮ್ಮಿಂದ ದೂರವಾಗಿ ನೊಂದುಕೊಂಡಿದ್ದಾರೆ ಅಥವಾ ಖುಷಿಯಾಗಿದ್ದಾರೆ ಎಂದು ಯಾವುದೇ ಮಾತು ಕೇಳಿದರೂ ನಿಮಗೆ ಬೇಸರವಾಗಬಹುದು. ಹಾಗಾಗಿ ಅವರ ಕುರಿತು ತಲೆಕೆಡಿಸಿಕೊಳ್ಳಬೇಡಿ.

ಅವರಷ್ಟಕ್ಕೇ ಅವರನ್ನು ಬಿಟ್ಟುಬಿಡಿ...

ಒಮ್ಮೆ ಬೇರ್ಪಟ್ಟ ಮೇಲೆ ಹೇಗಾದರೂ ಮಾಡಿ ಮತ್ತೆ ಸಂಬಂಧವನ್ನು ಮರುಸ್ಥಾಪಿಸಲು ಮನಸ್ಸು ಬಯಸಬಹುದು. ಆದರೆ ಹೀಗೆ ಮಾಡಿದಾಗ ಅದರಲ್ಲಿ ಭಾವನೆಗಳ ಕೊರತೆ ಇರುವುದನ್ನು ನೀವು ಬಹುಬೇಗ ಗುರುತಿಸುತ್ತೀರಿ. ಹೀಗೆ ಮಾಡುವುದರಿಂದ ನೀವು ನಿಮ್ಮ ಅಮೂಲ್ಯ ಸಮಯವನ್ನು ವ್ಯರ್ಥ ಮಾಡುತ್ತೀರಿ ಅಷ್ಟೇ. ಜೊತೆಗೆ ನೀವು ನಿಮ್ಮ ಸಂಗಾತಿಯನ್ನು ಸಹ ಮತ್ತೆ ಘಾಸಿಗೊಳಿಸುತ್ತೀರಿ.

ಸಿನಿಮಾವೇ ಬೇರೆ-ನಿಜ ಜೀವನವೇ ಬೇರೆ...

ಸಿನಿಮಾಗಳಲ್ಲಿ ಹೀಗೆ ಇರುವುದನ್ನು ನೋಡಲು ಚೆನ್ನಾಗಿರುತ್ತದೆ; ಆದರೆ ನಿಜ ಜೀವನದಲ್ಲಿ ಇದು ಸಾಧ್ಯವಿಲ್ಲ ಬಿಡಿ. ಒಂದು ವೇಳೆ ನಿಮ್ಮ ಹಿಂದಿನ ಸಂಗಾತಿ ಬಗ್ಗೆ ನಿಮಗೆ ಇನ್ನೂ ಒಳ್ಳೆಯ ಭಾವನೆ ಇದ್ದಲ್ಲಿ, ಅವರು ಹೊಸ ಸಂಬಂಧವನ್ನು ಆರಂಭಿಸಿದ ತಕ್ಷಣ ನಿಮ್ಮ ಮನಸ್ಸಿಗೆ ಘಾಸಿಯಾಗುತ್ತದೆ.

ನಿಮ್ಮ ಪ್ರೀತಿ ಪಾತ್ರರ ಜೊತೆಗೆ ಕಾಲ ಕಳೆಯಿರಿ

ನಿಮ್ಮ ಮುರಿದುಬಿದ್ದ ಸಂಬಂಧದ ಕುರಿತು ಆಲೋಚನೆ ಮಾಡುವ ಬದಲಿಗೆ, ನಿಮ್ಮ್ ಪ್ರೀತಿ ಪಾತ್ರರ ಜೊತೆಗೆ ಕಾಲ ಕಳೆಯಿರಿ. ನಿಮ್ಮ ಸ್ನೇಹಿತರು ಮತ್ತು ಕುಟುಂಬ ಸದಸ್ಯರು ನಿಮಗೆ ಈ ನೋವಿನಿಂದ ಹೊರ ಬರಲು ಸಹಾಯ ಮಾಡುತ್ತಾರೆ.

ಸ್ವಲ್ಪ ಹೊತ್ತು ಏಕಾಂತವಾಗಿರಿ....

ನಿಮಗೆ ಎಂದು ಸ್ವಲ್ಪ ಏಕಾಂತವನ್ನು ಇರಿಸಿಕೊಳ್ಳಿ. ನಿಮಗೆ ಇಷ್ಟವಾದ ಕೆಲಸವನ್ನು ಈ ಅವಧಿಯಲ್ಲಿ ಮಾಡಿ.

ತಪ್ಪನ್ನು ಅರಿತು, ಮುಂದಿನ ಜೀವನದ ಬಗ್ಗೆ ಆಲೋಚಿಸಿ

ಬ್ರೇಕಪ್ ಆಯಿತು ಎಂದು ಚಿಂತಿಸುವ ಬದಲಿಗೆ ಬ್ರೇಕಪ್‌ಗೆ ಕಾರಣವೇನು ಎಂದು ತಿಳಿದುಕೊಳ್ಳಲು ಪ್ರಯತ್ನಿಸಿ. ಒಂದು ವೇಳೆ ತಪ್ಪು ನಿಮ್ಮಿಂದಲೇ ಆಗಿದ್ದಲ್ಲಿ, ಅದನ್ನು ಸರಿಪಡಿಸಿಕೊಳ್ಳಲು ಪ್ರಯತ್ನಿಸಿ. ಹಿಂದೆ ಮಾಡಿರುವ ತಪ್ಪುಗಳನ್ನು ತಿದ್ದಿಕೊಂಡು ನಿಮ್ಮ ಮುಂದಿನ ಭವಿಷ್ಯವನ್ನು ಸರಿಪಡಿಸಿಕೊಳ್ಳಲು ಪ್ರಯತ್ನಿಸಿ. ಇದರಿಂದ ಮುಂದೆ ಸಂಬಂಧವನ್ನು ಭದ್ರಪಡಿಸಿಕೊಳ್ಳಬಹುದು.

ಲವಲವಿಕೆಯಿಂದಿರಿ...

ಜಿಮ್‌ಗೆ ಹೋಗಿ, ಹಾಡು ಹಾಡಿ ಇತ್ಯಾದಿ ಮಾಡಿ, ಒಟ್ಟಿನಲ್ಲಿ ಸಂತೋಷವಾಗಿರಿ. ಚೆನ್ನಾಗಿ ಅಲಂಕಾರ ಮಾಡಿಕೊಳ್ಳಿ. ಕುಡಿಯುವುದು ಇತ್ಯಾದಿಗಳಲ್ಲಿ ತೊಡಗಿಸಿಕೊಳ್ಳುವ ಬದಲಿಗೆ ಸಂತೋಷವಾಗಿ ಇರಲು ಪ್ರಯತ್ನಿಸಿ.

ಬ್ರೇಕಪ್ ಆದ ತಕ್ಷಣ ಪ್ರಪಂಚ ಮುಳುಗಿ ಹೋಗುವುದಿಲ್ಲ ನೆನಪಿರಲಿ...

ನೀವು ಸಂತೋಷವಾಗಿರಲು ಇನ್ನೊಬ್ಬರನ್ನು ಅವಲಂಬಿಸಬೇಡಿ. ನಿಮ್ಮ ಸಂತೋಷ ಸ್ವಾವಲಂಬಿಯಾಗಿರಲಿ. ಬ್ರೇಕಪ್ ಆದ ತಕ್ಷಣ ಪ್ರಪಂಚ ಮುಳುಗಿ ಹೋಗುವುದಿಲ್ಲ. ಸ್ವಲ್ಪ ಆರಾಮವಾಗಿರಿ ಎಲ್ಲವೂ ಸರಿ ಹೋಗುತ್ತದೆ. ನಿಮಗೆ ಹೊಂದಿಕೊಳ್ಳುವ ಮತ್ತೊಬ್ಬರು ಸಿಕ್ಕೇ ಸಿಕ್ಕುತ್ತಾರೆ.