ಹಳೆಯ ಜಮಾನದ ಟ್ರಿಕ್ಸ್‌ಗೆ, ಹುಡುಗಿಯರು ಬಗ್ಗುವುದಿಲ್ಲ ಕಣ್ರೀ!

ಹಣ

ಇಂದು ಹೆಚ್ಚಿನ ಮಹಿಳೆಯರು ವಿದ್ಯಾವಂತರಾಗಿದ್ದು ತಮ್ಮ ಸ್ವಸಾಮರ್ಥ್ಯಗಳ ಮೇಲೆ ಅವಲಂಬಿತರಾಗಿ ಉದ್ಯೋಗಿಗಳೂ ಆಗುತ್ತಿದ್ದಾರೆ. ತಮ್ಮ ಸ್ವಂತ ಗಳಿಕೆಯಿಂದಲೇ ತಮ್ಮ ಮತ್ತು ತಮ್ಮ ಕುಟುಂಬದ ಪಾಲನೆಯನ್ನೂ ಮಾಡುತ್ತಿದ್ದಾರೆ. ಆದ್ದರಿಂದ ಇವರಿಗೆ ಪುರುಷನ ಹಣ ಒಂದು ಆಕರ್ಷಣೆಯಾಗಿ ಉಳಿದಿಲ್ಲ. ಇಂದು ಪುರುಷನ ಹಣವನ್ನು ನೋಡಿ ಮೋಡಿಗೊಳಗಾಗುವ ಮಹಿಳೆಯರು ಇರಬಹುದು, ಆದರೆ ಇವರ ಸಂಖ್ಯೆ ಸ್ವಾಭಿಮಾನಿ ಮಹಿಳೆಯರಿಗೆ ಹೋಲಿಸಿದರೆ ನಗಣ್ಯವಾಗಿದೆ.

ಹುರಿಗಟ್ಟಿದ ಸ್ನಾಯುಗಳು

ಒಂದು ವೇಳೆ ಬುದ್ಧಿವಂತ ಪುರುಷನಲ್ಲಿ ಉತ್ತಮ ದೇಹದಾರ್ಢ್ಯವಿದ್ದು ಸಮಾಜದಲ್ಲಿಯೂ ಉತ್ತಮ ನಡವಳಿಕೆ ಹೊಂದಿದ್ದರೆ ಇವರು ಖಂಡಿತವಾಗಿಯೂ ಮಹಿಳೆಯರ ಗಮನ ಸೆಳೆಯುತ್ತಾರೆ. ಆದರೆ ಕೇವಲ ಹುರಿಗಟ್ಟಿದ ಮಾಂಸಖಂಡಗಳು ಮಾತ್ರವೇ ಕಾರಣವಾಗಲಾರದು. ಆದರೆ ಇಂದಿಗೂ ಹೆಚ್ಚಿನ ಪುರುಷರು ಹುರಿಗಟ್ಟಿದ ಸ್ನಾಯುಗಳೇ ಮಹಿಳೆಯರ ಆಕರ್ಷಣೆ ಪಡೆಯುತ್ತವೆ ಎಂದು ನಂಬಿದ್ದಾರೆ. ಈ ದಿನಗಳು ಎಂದೋ ಸರಿದು ಹೋಗಿವೆ.

ಉಡುಗೊರೆಗಳು

ನಿಮ್ಮ ಸ್ನೇಹಿತರೊಂದಿಗಿನ, ಬಂಧು ಬಾಂಧವರೊಡನ ಬಾಂಧವ್ಯವನ್ನು ಹೆಚ್ಚಿಸಲು ಉಡುಗೊರೆಗಳು ಖಂಡಿತಾ ನೆರವಾಗುತ್ತವೆ. ಪವಿತ್ರ ಕುರಾನ್ ನಲ್ಲಿಯೂ, ಬೈಬಲ್ ನಲ್ಲಿಯೂ, ವೇದಗಳಲ್ಲಿಯೂ ನಿಮ್ಮ ಪ್ರೀತಿಪಾತ್ರರನ್ನು ನೋಡಲು ಹೋಗುವಾಗ ಉಡುಗೊರೆಯೊಂದನ್ನು ಖಂಡಿತಾ ಕೊಂಡು ಹೋಗಿ ಎಂದು ತಿಳಿಸಲಾಗಿದೆ. ಆದರೆ ಇಂದು ಮಹಿಳೆಯರು ಉಡುಗೊರೆಗಾಗಿ ಹಾತೊರೆದು ಕುಳಿತಿಲ್ಲ. ಅಷ್ಟೇ ಅಲ್ಲ, ಅಪರಿಚಿತರಿಂದ ಉಡುಗೊರೆ ಪಡೆಯುವುದು ಅಪಾಯಕರ ಎಂದು ತಿಳಿದು ಭಯಭೀತರಾಗುತ್ತಾರೆ ಕೂಡಾ.

ರೌಡಿಪಟ್ಟ

ಕೆಲವು ಜಾನಪದ ಕಥೆಗಳಲ್ಲಿ ಕಥಾನಾಯಕ ರೌಡಿಯೂ ಆಗಿರುತ್ತಾನೆ, ಅಂದರೆ ದುಷ್ಟರನ್ನು ಸದೆಬಡಿದು ಸಾಮಾನ್ಯ ಜನರಿಗೆ ನೆರವಾಗುತ್ತಾನೆ. ಈ ನಡವಳಿಕೆ ವಿಶೇಷವಾಗಿ ಚಿಕ್ಕ ಹುಡುಗಿಯರ ಮನದಲ್ಲಿ ಅಚ್ಚುಬಿಟ್ಟಿರುತ್ತದೆ. ಇವರು ಗುಪ್ತವಾಗಿ ಇಂತಹ ನಡವಳಿಕೆಗಳನ್ನು ಇಷ್ಟಪಡುತ್ತಿರುತ್ತಾರೆ. ಅಂತೆಯೇ ಸಮಾಜದಲ್ಲಿ ರೌಡಿಗಳಂತೆ ವರ್ತಿಸುವ ವರ್ತನೆಯನ್ನು ಹೆಚ್ಚು ಗಮನಿಸುತ್ತಾರೆ. ಇದನ್ನೇ ಪ್ರೇರಣೆಯನ್ನಾಗಿ ಕಂಡುಕೊಂಡ ಪಡ್ಡೆ ಹುಡುಗರು ರೌಡಿತನಕ್ಕೆ ಇಳಿಯುತ್ತಾರೆ. ಆದರೆ ಇಂದಿನ ಮಹಿಳೆಯರು ಎಷ್ಟೋ ಪ್ರೌಢರಾಗಿದ್ದು ರೌಡಿಗಳ ವರ್ತನೆಯನ್ನು ಇಷ್ಟಪಡುವುದಿರಲಿ, ಸೂಕ್ತ ಬುದ್ಧಿ ಕಲಿಸಲೂ ಶಕ್ತರಿದ್ದಾರೆ..!

ಎಲೆಕ್ಟ್ರಾನಿಕ್ ಉಪಕರಣಗಳು

ಒಂದು ಕಾಲದಲ್ಲಿ ಸೋನಿ ವಾಕ್ಮನ್ ಕೇಳುತ್ತಾ ಓಡಾಡುವುದು ಒಂದು ಗೀಳಾಗಿತ್ತು. ಜನರು ನೋಡಲಿ ಎಂದೇ ಬೆಂಗಳೂರಿನಾದ್ಯಂತ ಅದರಲ್ಲೂ ಎಂಜಿ ರೋಡ್, ಬ್ರಿಗೇಡ್ ರೋಡ್ ಗಳಲ್ಲಿ ವಾಕ್ಮನ್ ಕೇಳುತ್ತಾ ಓಡಾಡುವವರಿದ್ದರು. ವಾಸ್ತವವೆಂದರೆ ಇವರಲ್ಲಿ ಹೆಚ್ಚಿನವರು ಕೇವಲ ಹೆಡ್ ಫೋನನ್ನು ಮಾತ್ರ ಕಿವಿಗೆ ಸಿಕ್ಕಿಸಿ ಅದರ ಪಿನ್ನನ್ನು ಜೇಬಿನೊಳಗಿಟ್ಟು ಎದುರಿನವರ ಗಮನ ಸೆಳೆಯಲು ಯತ್ನಿಸುತ್ತಿದ್ದರು. ಅಂದರೆ ಜೇಬಿನಲ್ಲಿ ವಾಕ್ಮನ್ ಇರುತ್ತಲೇ ಇರಲಿಲ್ಲ..! ಆದರೆ ಇಂದು ವಾಕ್ಮನ್ ಬಿಡಿ, ದುಬಾರಿ ವರ್ತು ಮೊಬೈಲ್ ಕೈಯಲ್ಲಿ ಹಿಡಿದುಕೊಂಡು ಹೋದರೂ ಮಹಿಳೆಯರು ಇದಕ್ಕೆ ಯಾವುದೇ ಗಮನ ನೀಡುವುದಿಲ್ಲ.

ಜನಪ್ರಿಯತೆ

ಸಾಮಾನ್ಯವಾಗಿ ಖ್ಯಾತ ವ್ಯಕ್ತಿಗಳು ಜನರ ನಡುವೆ ಬರುತ್ತಿದ್ದಂತೆಯೇ ಹೆಚ್ಚಿನ ಗಮನ ಪಡೆಯುತ್ತಾರೆ. ಅಭಿಮಾನಿಗಳು ಮುತ್ತಿಕೊಂಡು ಆಟೋಗ್ರಾಫ್ ಗಾಗಿ ಪೀಡಿಸುತ್ತಾರೆ. ಆದರೆ ಜನಪ್ರಿಯತೆ ಮಹಿಳೆಯರನ್ನು ಸೆಳೆಯಲು ಹಿಂದಿನಂತೆ ಸಮರ್ಥವಾಗಿಲ್ಲ. ವ್ಯಕ್ತಿ ಎಷ್ಟೇ ಜನಪ್ರಿಯನಿರಲಿ, ಅವರ ಅಭಿಮಾನಿಯಾಗಿರಲು ಇಷ್ಟಪಡುತ್ತಾರೆಯೇ ವಿನಃ ಅದಕ್ಕೂ ಹೆಚ್ಚು ಇನ್ನೇನೂ ಅಲ್ಲ. ಅವರು ಪುರುಷರಲ್ಲಿ ಉತ್ತಮ ಗುಣಗಳನ್ನೇ ನೋಡಲು ಇಷ್ಟಪಡುತ್ತಾರೆ.