ಸಂಬಂಧಗಳ ಬಗ್ಗೆ ಇರುವ ಕೊಂಚ ಇಂಟರೆಸ್ಟಿಂಗ್ ಸಂಗತಿ

Love And Romance

oi-Manohar

By Deepu

Updated: Thursday, March 10, 2016, 20:44 [IST]

ಸಂಬಂಧ ಎನ್ನುವುದು ಒಂದು ಮಧುರ ಬಾಂಧವ್ಯ. ಅದಕ್ಕೆ ಕಾಳಜಿ, ಪ್ರೀತಿ, ಗೌರವ, ಪ್ರಾಮಾಣಿಕತೆ ಮತ್ತು ಸಹಾನುಭೂತಿಗಳ ಅಗತ್ಯವಿರುತ್ತದೆ. ಸಂಬಂಧಗಳು ಕೊಡು ಕೊಳ್ಳುವಿಕೆಯನ್ನು ಹೊಂದಿರುತ್ತವೆ. ಯಾವ ಸಂಬಂಧವು ಕೊಡುವುದಕ್ಕಿಂತ ತೆಗೆದುಕೊಳ್ಳುವುದು ಹೆಚ್ಚಾಗಿರುತ್ತವೆಯೋ, ಆ ಸಂಬಂಧದಲ್ಲಿ ಮಧುರ ಬಾಂಧವ್ಯ ಕಡಿಮೆಯಾಗುತ್ತದೆ. ಸಂಬಂಧವನ್ನು ಉಳಿಸಿಕೊಂಡರೆ ಮಾತ್ರ ಉಳಿಯುತ್ತದೆ ಎಂಬ ಮಾತು ಚಾಲ್ತಿಯಲ್ಲಿದೆ.

ಭಾರತದಲ್ಲಿ ಸಂಬಂಧಗಳು ಭಾವನಾತ್ಮಕವಾಗಿರುತ್ತವೆ ಎಂಬ ಭಾವನೆ ಇತ್ತೀಚೆಗೆ ಕಡಿಮೆಯಾಗಿದೆ. ಇದು ಈಗ ಹಣ, ದೈಹಿಕ ಅಗತ್ಯವಾಗಿ ನಿಂತಿದೆ ಎಂದು ಬಹುತೇಕರಿಗೆ ಈಗಾಗಲೇ ತಿಳಿದಿದೆ. ಅದರಲ್ಲೂ ನಗರ ಪ್ರದೇಶದಲ್ಲಿ 90% ಸಂಬಂಧಗಳು ಈ ಕಾರಣಕ್ಕಾಗಿಯೇ ಇರುತ್ತವೆ.

ಹೊಂದಾಣಿಕೆಯಿಲ್ಲದ ಸಂಬಂಧ
ನಗರಗಳಲ್ಲಿ ಕೇವಲ ನೆಪ ಮಾತ್ರಕ್ಕೆ ಸಂಬಂಧದಲ್ಲಿರುವ ಅಥವಾ ಹೊಂದಾಣಿಕೆಯಿಲ್ಲದ ಸಂಬಂಧಗಳು ಇರುತ್ತವೆ. ಈ ಬಗೆಯ ಸಂಬಂಧವು ನಗರಗಳಲ್ಲಿ ಇತ್ತೀಚೆಗೆ ಹೆಚ್ಚಾಗುತ್ತಿವೆ. ಇಂತಹ ಸಂಬಂಧವು ಪ್ರತಿಯೊಬ್ಬರಿಗೂ ಮಾರಕವಾಗಿರುತ್ತವೆ. ಅಂತಹವುಗಳಲ್ಲಿ ಬಾಳುವ ಬದಲಿಗೆ, ಇಬ್ಬರೂ ಸೇರಿ ಒಂದು ನಿರ್ಧಾರಕ್ಕೆ ಬಂದು ಆ ಸಂಬಂಧವನ್ನು ಕಡಿದುಕೊಳ್ಳುವುದು ಉತ್ತಮ.

ಹಣದ ಮೇಲೆ ಆಧಾರಪಟ್ಟಿರುವ ಸಂಬಂಧ
ಕೆಲವೊಂದು ಸಂಬಂಧಗಳಲ್ಲಿ ಹಣವೇ ಮುಖ್ಯವಾಗಿರುತ್ತದೆ. ಹೆಂಗಸರನ್ನು ಸಂತೋಷಪಡಿಸುವಷ್ಟು ಹಣವು ಗಂಡಸಿನ ಬಳಿ ಇಲ್ಲವಾದಲ್ಲಿ ಆ ಸಂಬಂಧವು ತುಂಬಾ ದಿನಗಳ ಕಾಲ ಜೀವಂತವಾಗಿರುವುದಿಲ್ಲ. ಆ ಪರಿಸ್ಥಿತಿಯಲ್ಲಿ ಆ ಹೆಂಗಸು ಅವನ ಜೊತೆಗೆ ಬಾಳಲು ಇಷ್ಟಪಡದೆ ಸಂಬಂಧವನ್ನು ಕಡಿದುಕೊಳ್ಳುತ್ತಾಳೆ. ಸಂಬಂಧದಲ್ಲಿ ಹಣವೇ ಮುಖ್ಯ ಎಂಬ ಭಾವನೆಯು ಎಂದಿಗೂ ಒಳ್ಳೆಯದಲ್ಲ.

ತಮ್ಮದೇ ಮನೋಧರ್ಮಕ್ಕೆ ಅಂಟಿಕೊಂಡಿರುವ ಸಂಬಂಧ
ಕೆಲವೊಂದು ಹೆಂಗಸರು ಆಳುವ ಮನೋಧರ್ಮವನ್ನು ರೂಢಿಸಿಕೊಂಡಿರುತ್ತಾರೆ. ಸಂಬಂಧದಲ್ಲಿ ತಮ್ಮದೇ ಆದ ಸ್ವಂತ ಮನೋಧರ್ಮವನ್ನು ಹೊಂದುವುದು ಸಂಬಂಧದ ಆರೋಗ್ಯಕ್ಕೆ ಹಾನಿಕಾರಕ. ಒಂದು ವೇಳೆ ಮಹಿಳೆಯು ಯಾವಾಗಲು ಬೇಡಿಕೆ ಇಡುವ ಮತ್ತು ಆದೇಶಿಸುವ ಗುಣವನ್ನು ಹೊಂದಿದ್ದರೆ, ಆಕೆ ಗಂಡನ್ನು ಆಳುವ ಗುಣವನ್ನು ಹೊಂದಿ ಬಿಡುತ್ತಾಳೆ. ಆಗ ಆಕೆ ತನ್ನ ಮಾತೇ ನಡೆಯಬೇಕು ಎಂದು ಹಠ ಹಿಡಿಯುತ್ತಾಳೆ, ಆಗ ಗಂಡಸು ಆದವನು ತನ್ನ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಕಷ್ಟವಾಗುತ್ತದೆ.

ಪೋಷಕರ ಮಾತಿಗೆ ಬೆಲೆ ನೀಡುವ ಸಂಬಂಧ

ಭಾರತೀಯ ಸಂಪ್ರದಾಯದಲ್ಲಿ ಒಂದು ಜನಪ್ರಿಯ ರೀತಿ ಇದೆ. ಅದು ಮದುವೆಯಾದವರು ತಮ್ಮ ನಿರ್ಧಾರಕ್ಕಿಂತ ಪೋಷಕರ ಮಾತಿಗೆ ಹೆಚ್ಚಿನ ಬೆಲೆ ನೀಡುತ್ತಾರೆ. ಇದಕ್ಕೂ ಹೆಚ್ಚಿನ ಸಮಸ್ಯೆ ಏನಪ್ಪಾ ಎಂದರೆ ಸುಮಾರು ಜನ ತಮ್ಮ ಪೋಷಕರ ಮಾತನ್ನು ಕೇಳಿ ಮದುವೆಗಳನ್ನು ಮಾಡಿಕೊಳ್ಳುತ್ತಾರೆ. ಅಪ್ಪ-ಅಮ್ಮ ನೋಡಿದವರು ಎಂದು ಮದುವೆ ಮಾಡಿಕೊಳ್ಳುವವರು, ಮುಂದೆ ಅದೇ ಸಮಸ್ಯೆಯಾಯಿತು ಎಂದು ಪರಿತಪಿಸುತ್ತಾರೆ. ಇದು ನಗರಗಳಲ್ಲಿ ಕಂಡು ಬರುವ ಸಂಬಂಧಗಳ ಸಮಸ್ಯೆಗಳಲ್ಲಿ ಪ್ರಮುಖವಾಗಿರುತ್ತವೆ.

ಲಿವ್ ಇನ್ ಸಂಬಂಧ
ಇದು ಸಹ ಭಾರತದಲ್ಲಿ ಇರುವ 6 ಬಗೆಯ ಸಂಬಂಧದ ಬಗೆಗಳಲ್ಲಿ ಒಂದಾಗಿದೆ. ಒಂದು ವರದಿಯ ಪ್ರಕಾರ ಸುಮಾರು 90% ಜನ ತಾವು ಲಿವ್ ಇನ್ ರಿಲೇಷನ್‌ಶಿಪ್‌ನಲ್ಲಿ ಇರಬೇಕು ಎಂದು ಬಯಸುತ್ತಾರಂತೆ. ಈ ಸಂಬಂಧವು ಮದುವೆ ಎಂದು ಪರಿಗಣಿಸದಿದ್ದರು ಸಹ, ಅದು ಮದುವೆಗೆ ತೀರಾ ಸನಿಹದ್ದಾಗಿರುತ್ತದೆ. ಇದು ಮದುವೆಯಷ್ಟು ಜವಾಬ್ದಾರಿಗಳನ್ನು ಹೊಂದಿರುವುದಿಲ್ಲ ಎಂದು ಇದಕ್ಕೆ ಸುಮಾರು ಜನ ತಮ್ಮ ಸಹಮತವನ್ನು ವ್ಯಕ್ತಪಡಿಸುತ್ತಾರೆ.

ಸಮಯದ ಕೊರತೆ ಇರುವ ಸಂಬಂಧ
ಸಂಬಂಧಗಳು ಸಮಯಾವಕಾಶದ ಕೊರತೆ ಎದುರಿಸಿದರೆ, ಸತ್ತು ಹೋಗುತ್ತವೆ. ಇಬ್ಬರು ದುಡಿಯುವಾಗ ಕುಳಿತು ಮಾತನಾಡುವಷ್ಟು ಪುರುಸೊತ್ತು ಇಲ್ಲದಿದ್ದಾಗ, ಯಾವ ಭಾವನೆ, ಕಷ್ಟ-ಸುಖವನ್ನು ಹಂಚಿಕೊಳ್ಳಲು ಸಾಧ್ಯವಾಗುತ್ತದೆ ಹೇಳಿ. ಕೆಲಸದ ಒತ್ತಡವು ಇವರನ್ನು ಹಿಂಡಿ ಹಿಪ್ಪೆ ಮಾಡುತ್ತದೆ. ಸಂಬಂಧವು ಸುಗಮವಾಗಿ ಸಾಗಬೇಕು ಎಂದರೆ ಇಬ್ಬರಿಗೂ ಸ್ವಲ್ಪ ಬಿಡುವು ಇರಬೇಕು. ಒಟ್ಟಿಗೆ ಕಾಫಿ, ತಿಂಡಿ, ಊಟ ಮಾಡುವಷ್ಟು!