ಈ ನಡುವಳಿಕೆಗಳಿದ್ದರೆ ದಾಂಪತ್ಯ ದುಃಸ್ವಪ್ನವಾಗುವುದು

ಅತೀಯಾದ ಅವಲಂಬನೆ

ಇಬ್ಬರಿಗೂ ತಮ್ಮದೇ ಆದ ಸ್ವಾತಂತ್ರ್ಯ ಇರಬೇಕು. ಪ್ರೀತಿಯ ಹೆಸರಿನಲ್ಲಿ ಮತ್ತೊಬ್ಬ ವ್ಯಕ್ತಿಯನ್ನು ತುಂಬಾ ಅವಲಂಬಿಸಿದರೆ ಮಾತ್ರ ಆ ವ್ಯಕ್ತಿಯ ಸ್ವಾತಂತ್ರ್ಯಕ್ಕೆ ಅಡಚಣೆಯಾಗುವುದು. ಇದನ್ನು ತನ್ನ ಸಂಗಾತಿಯಲ್ಲಿ ಹೇಳಲು ಸಾಧ್ಯವಿಲ್ಲ, ಹೇಳದಿರಲೂ ಸಾಧ್ಯವಾಗದೇ ಕೊನೆಗೆ ತಮ್ಮ ಸಂಗಾತಿ ಬಗ್ಗೆ ನೆನೆಸಿದರೆ ಜಿಗುಪ್ಸೆ ಉಂಟಾಗಲಾರಂಭಿಸುತ್ತದೆ. ನನ್ನ ಆಯ್ಕೆ ತಪ್ಪಾಯಿತ್ತು ಎಂದು ಪಶ್ಚಾತಾಪ ಪಡುತ್ತಾರೆ. ಈ ಪರಿಸ್ಥಿತಿ ಎಂದಿಗೂ ಬರದಿರಲು ಪ್ರೀತಿಯ ಹೆಸರಿನಲ್ಲಿ ಅತೀಯಾದ ಅವಲಂಬನೆ ಸಲ್ಲದು.

ಪ್ರೀತಿಯಿಲ್ಲದೆಯೇ ಜೊತೆಯಾಗಿರುವುದು

ಇಂತಹ ಅನೇಕ ಜೋಡಿಗಳನ್ನು ಕಾಣಬಹುದು, ಅಲ್ಲಿ ಪ್ರೀತಿ ಇರುವುದಿಲ್ಲ ಆದರೂ ಅವರು ಜೊತೆಯಾಗಿರುತ್ತಾರೆ. ಸಮಾಜಕ್ಕಾಗಿಯೋ, ಹಣಕ್ಕಾಗಿಯೋ, ಸೆಕ್ಯೂರಿಟಿ ಹೀಗೆ ಯಾವುದೋ ಒಂದು ಕಾರಣಕ್ಕೆ ಬೇರೆಯಾಗದೆ ಜೊತೆಯಾಗಿರುತ್ತಾರೆ. ಇದ್ದರಿಂದ ಇಬ್ಬರಿಗೂ ನೆಮ್ಮದಿ ಇರುವುದಿಲ್ಲ, ಖುಷಿ ಇರುವುದಿಲ್ಲ. ಇದು ಆರೋಗ್ಯಕರ ಸಂಬಂಧವಲ್ಲ.

ಮೋಸ

ಸಂಗಾತಿಗೆ ಮೋಸ ಮಾಡಿ ಇನ್ನೊಬ್ಬರ ಜೊತೆ ಅನೈತಿಕ ಸಂಬಂಧ ಬೆಳೆಸಿದರೆ ನಾನು ಖುಷಿಯಾಗಿ ಇರಬಹುದೆಂದು ಭಾವಿಸುವವರು ಇರುತ್ತಾರೆ. ಆದರೆ ಅನೈತಿಕ ಸಂಬಂಧದಿಂದ ಜೀವನದಲ್ಲಿ ಇದ್ದ ಖುಷಿಯನ್ನೂ ಕಳೆದುಕೊಳ್ಳಬೇಕಾಗುವುದು.

ಪರಸ್ಪರ ಗೌರವ ಇಲ್ಲದಿರುವುದು

ಉತ್ತಮ ಸಂಬಂಧಕ್ಕೆ ಬೇಕಾಗುವುದು ಒಬ್ಬರನ್ನೊಬ್ಬರು ಗೌರವಿಸುವ ಗುಣ. ಆದರೆ ಆ ಗುಣವೇ ಇಲ್ಲದಿದ್ದರೆ ಗಂಡ-ಹೆಂಡತಿಯ ನಡುವೆ ಪ್ರೀತಿ ಮತ್ತು ಉತ್ತಮ ಬಾಂಧವ್ಯ ಬೆಳೆಯಲು ಸಾಧ್ಯವಾಗುವುದಿಲ್ಲ.

ಬಾಹ್ಯ ಸೌಂದರ್ಯಕ್ಕೆ ಬೆಲೆ ಕೊಡುವುದು

ಬಾಹ್ಯ ಸೌಂದರ್ಯಕ್ಕಿಂತ ಆಂತರಿಕ ಸೌಂದರ್ಯ ಇರುವ ವ್ಯಕ್ತಿ ಮಾತ್ರ ನಮಗೆ ಉತ್ತಮ ಸಂಗಾತಿಯಾಗಲು ಸಾಧ್ಯ ಅನ್ನುವುದನ್ನು ಮರೆಯದಿರಿ. ಆದ್ದರಿಂದ ಯಾವುದೇ ವ್ಯಕ್ತಿಯಿರಲಿ ಅವರ ಗುಣಕ್ಕೆ ಬೆಲೆ ಕೊಡಬೇಕು, ನಮ್ಮ ಸಂಗಾತಿಯಲ್ಲೂ ಅವರ ಲುಕ್ ಗಿಂತ ಅವರ ಗುಣ ನಮ್ಮನ್ನು ಹೆಚ್ಚಾಗಿ ಆಕರ್ಷಿಸುತ್ತದೆ.

ಕಂಟ್ರೋಲ್

ದಾಂಪತ್ಯ ಜೀವನದಲ್ಲಿ ಒಬ್ಬರ ಮೇಲೆ ಮತ್ತೊಬ್ಬರ ಪ್ರಭಾವ ಇದ್ದೇ ಇರುತ್ತದೆ. ಆದರೆ ವಿಪರೀತವಾಗಿ ಸಂಗಾತಿಯನ್ನು ಕಂಟ್ರೋಲ್ ಮಾಡಿದರೆ, ದಾಂಪತ್ಯ ಜೀವನ ಸುಂದರವಾಗಿರುವುದಿಲ್ಲ.

ಸಂಗಾತಿಯ ಮೇಲೆ ತುಂಬಾ ನಿಗಾ ಇಡುವುದು

ಅವನ/ಅವಳ ಚಟುವಟಿಕೆ ಮೇಲೆ ಅತೀಯಾದ ನಿಗಾ ಇಡುವುದು, ಪ್ರತಿಯೊಂದು ವಿಷಯದಲ್ಲೂ interfere ಆಗುವುದು ಮಾಡುತ್ತಿದ್ದರೆ ಆ ಸಂಬಂಧ ಬೇಗನೆ ಮುರಿದು ಬೀಳುವುದು ಅಥವಾ ಇಬ್ಬರಲ್ಲಿ ಸಂತೋಷ ಅನ್ನುವುದು ಮಾಯವಾಗುತ್ತದೆ.

ಯಾವುದೇ ನಿರ್ಧಾರದಲ್ಲಿ ಜೊತೆಯಾಗಿ ನಿಲ್ಲದಿರುವುದು

ಯಾವುದೇ ನಿರ್ಧಾರ ತೆಗೆದುಕೊಳ್ಳುವಾಗ ಇಬ್ಬರು ಒಮ್ಮತದಿಂದ ಚರ್ಚಿಸಿ, ತೀರ್ಮಾನ ತೆಗೆದುಕೊಂಡರೆ ದಂಪತಿಗಳ ನಡುವೆ ಹೊಂದಾಣಿಕೆ ಇರುತ್ತದೆ. ಅದು ಮಿಸ್ ಆದರೆ ಸಮಸ್ಯೆಗಳು ಪ್ರಾರಂಭವಾಗಿ ದಾಂಪತ್ಯ ಜೀವನ ಬೋರಾಗಲಾರಂಭಿಸುತ್ತದೆ.

ಬದಲಾಗಲು ಶ್ರಮಿಸುವುದು

ಕಂಡೀಷನಲ್ ಲವ್ ತುಂಬಾ ಕಾಲ ಬಾಳುವುದಿಲ್ಲ. ನಿಜವಾದ ಪ್ರೀತಿಯಲ್ಲಿ ಯಾವುದೇ ಕಂಡೀಷನ್ ಇರುವುದಿಲ್ಲ, ತನ್ನ ಸಂಗಾತಿಗಾಗಿ ತುಂಬಾ ಬದಲಾಗಲು ಪ್ರಯತ್ನಿಸಿದರೆ ನಾವು ನಮ್ಮ ಸ್ವಂತಿಕೆಯನ್ನು ಕಳೆದುಕೊಳ್ಳುತ್ತೇವೆ.

ನಿಂದನೆ

ದಿನಾ ಜಗಳ, ನಿಂದನೆ, ಮಾನಸಿಕ ಮತ್ತು ದೈಹಿಕ ಹಿಂಸೆ ಇವೆಲ್ಲಾ ಉತ್ತಮ ಸಂಬಂಧದ ಲಕ್ಷಣಗಳಲ್ಲ. ದಾಂಪತ್ಯದಲ್ಲಿ ಈ ರೀತಿಯ ಲಕ್ಷಣ ಕಾಣಿಸಿದರೆ ಸೂಕ್ತ ನಿರ್ಧಾರ ತೆಗೆದುಕೊಳ್ಳುವದು ಒಳ್ಳೆಯದು.