ಗಂಡ ಹೆಂಡತಿಯಲ್ಲಿ ಗೌರವಿಸುವ ಗುಣಗಳು

ಒಬ್ಬ ವ್ಯಕ್ತಿಗೆ ಸಿಗುವ ಗೌರವ ಅವನ/ಅವಳ ನಡುವಳಿಕೆಗಳ ಮೇಲೆ ಅವಲಂಭಿತವಾಗಿರುತ್ತದೆ. ಸಂಸಾರದಲ್ಲಿ ಅಷ್ಟೆ ಪರಸ್ಪರ ನಂಬಿಕೆ, ಪ್ರೀತಿ ಹಾಗೂ ಗೌರವ ಇರಬೇಕು. ಪುರುಷರಿ ಗೆ ಗೌರವ ಸಿಗಬೇಕೆಂದರೆ ದುಡಿಯುವವನಾಗಿರಬೇಕು, ತನ್ನ ಸಂಸಾರದ ಬಗ್ಗೆ ಪ್ರೀತಿ ಇರಬೇಕು ಹಾಗೂ ಸಂಸಾರವನ್ನು ಸಮರ್ಥವಾಗಿ ನಿರ್ವಹಿಸಿಕೊಂಡು ಹೋಗುವವನು ಆಗಿರಬೇಕು. ಮಹಿಳೆಯರಿಗೆ ಗೌರವ ಸಿಗಬೇಕೆಂದರೆ ಕೆಲವೊಂದು ಗುಣಗಳಿರಬೇಕು. ಪುರುಷನು ತುಂಬಾ ಇಷ್ಟಪಡುವ ಹಾಗೂ ಗೌರವಿಸುವ ಆ ಗುಣಗಳ ಬಗ್ಗೆ ಇಲ್ಲಿ ಹೇಳಲಾಗಿದೆ ನೋಡಿ:

1. ಡ್ರೆಸ್ಸಿಂಗ್ ಬಗ್ಗೆ ಗಮನವಿರಲಿ: ತುಂಬಾ ಬಿಗಿಯಾದ ಬಟ್ಟೆ, ತುಂಬಾ ಗಿಡ್ಡ ಬಟ್ಟೆಗಳನ್ನು ಹೆಂಡತಿ ಧರಿಸಿದರೆ ಗಂಡನಿಗೆ ಇಷ್ಟವಾಗುವುದಿಲ್ಲ. ಅವಳ ಡ್ರೆಸ್ಸಿಂಗ್ ಇತರರು ಅವಳನ್ನು ನೋಡಿ ಗೌರವ ಕೊಡುವಂತೆ ಇರಬೇಕು. ಆದಷ್ಟು ಡೀಸೆಂಟ್ ಡ್ರೆಸ್ ಹಾಕುವ ಹುಡುಗಿಯರು ಪುರುಷರಿಗೆ ಇಷ್ಟವಾಗುತ್ತಾರೆ. ಮೈ ತೋರಿಸಿ ಬಟ್ಟೆ ಹಾಕಿದರೆ ಅವರ ಬಗ್ಗೆ ಪುರುಷರು ಕೆಟ್ಟದಾಗಿ ಮಾತನಾಡಿಕೊಳ್ಳುತ್ತಾರೆ. ನನ್ನ ಹೆಂಡತಿಯ ಬಗ್ಗೆ ಇತರರು ಹಾಗೆ ಮಾತನಾಡಬಾರದು ಎಂಬ ಆಸೆ ಪ್ರತಿಯೊಬ್ಬ ಗಂಡಸಿಗೂ ಇರುತ್ತದೆ.

2. ಸಿಲ್ಲಿ ರೀತಿ ವರ್ತಿಸಬಾರದು: ಮಾತನಾಡುತ್ತಿರುವಾಗ ಅವರ ಮೈ ಮೇಲೆ ಬಿದ್ದು ಮಾತನಾಡಿಸುವುದು, ಮನೆಯವರ ಎದುರಿಗೆ ಗಂಡನ ಜೊತೆ ಸಿಲ್ಲಿ ರೀತಿಯಲ್ಲಿ ವರ್ತಿಸುವುದು ಮಾಡಿದರೆ ಗಂಡನಿಗೆ ಇಷ್ಟವಾಗುವುದಿಲ್ಲ, ಅಲ್ಲದೆ ಹೆಂಡತಿ ಮೇಲೆ ಗೌರವ ಕೂಡ ಇಲ್ಲದಾಗುತ್ತದೆ.

3. ಮನೆಯವರ ಗೌರವ: ಮದುವೆಯಾಗಿ ಗಂಡನ ಮನೆಗೆ ಬಂದ ಮೇಲೆ ಅಲ್ಲಿಯವರಿಗೆ ಪ್ರೀತಿ ಪಾತ್ರಳಾಗುವಂತೆ ನಡೆದುಕೊಂಡರೆ ಗಂಡನು ತನ್ನ ಹೆಂಡತಿಯನ್ನು ತುಂಬಾ ಗೌರವಿಸುತ್ತಾನೆ.

4.ಕಂಡೀಷನ್ ಗಳನ್ನು ಹಾಕಬಾರದು: ಪ್ರತಿಯೊಂದು ವಿಷಯಕ್ಕೂ ಕಂಡೀಷನ್ ಹಾಕುವ ಗುಣ ಪುರುಷರಿಗೆ ಇಷ್ಟವಾಗುವುದಿಲ್ಲ. ಆದ್ದರಿಂದ ಮಿತಿಮೀರಿ ಕಂಡೀಷನ್ ಹಾಕಬಾರದು.

5. ಬೇಕು ಬೇಡವನ್ನು ಪೂರೈಸಬೇಕು: ಹೆಂಡತಿಯಾದವಳು ಗಂಡನ ಭಾವನೆಗಳನ್ನು ಅರ್ಥ ಮಾಡಿಕೊಳ್ಳಬೇಕು. ಮನೆಯನ್ನು ಸರಿಯಾದ ರೀತಿಯಲ್ಲಿ ನಡೆಸಿಕೊಂಡು ಹೋಗಬೇಕು. ಬುದ್ಧಿವಂತೆ ಆಗಿರಬೇಕು, ಅವನ ಕಷ್ಟಕ್ಕೆ ನೆರವಾಗಬೇಕು. ಅಂತಹ ಹೆಣ್ಣನ್ನು ಗಂಡನು ತುಂಬಾ ಗೌರವಿಸುತ್ತಾನೆ.