ನಿಮ್ಮ ಪ್ರೀತಿಯ ಅತ್ತೆಗೆ ವಿಶ್ ಮಾಡಿದಿರಾ?

Relationship

oi-Reena

By Hema S

Updated: Tuesday, October 30, 2012, 9:37 [IST]

ಇವತ್ತು ಅತ್ತೆಯಂದಿರ ದಿನ. ಹಾಗೆಂದರೆ ಸೊಸೆಯಾದವಳು 'ಇವತ್ತು ಮಾತ್ರ ಏಕೆ ಯಾವತ್ತು ಅತ್ತೆಯದೇ ದಿನ 'ಎಂದು ಗೊಣಗಿಕೊಳ್ಳುತ್ತಾಳೆ. ಅತ್ತೆ-ಸೊಸೆ ಪರಸ್ಪರ ಅರ್ಥ ಮಾಡಿಕೊಂಡು ಪ್ರೀತಿಯಿಂದ ಇರುವ ಸಂಸಾರಗಳು ತುಂಬಾ ವಿರಳ. ಅತ್ತೆ ಸೊಸೆಯ ನಡುವೆ ಯಾವುದೋ ಒಂದು ಅಸಮಾಧಾನ ಹೊಗೆಯಾಡುತ್ತಲೇ ಇರುತ್ತದೆ. ಅತ್ತೆಗೆ ಮಗನ ಮೇಲೆ ಇರುವ ಪ್ರೀತಿ ಸೊಸೆ ಮೇಲೆ ಇರುವುದಿಲ್ಲ, ಸೊಸೆಗೆ ಅಮ್ಮನ ಮೇಲೆ ಇರುವ ಪ್ರೀತಿ ಗಂಡನ ತಾಯಿಯ ಮೇಲೆ ಇರುವುದಿಲ್ಲ, ಇವರಿಬ್ಬರ ನಡುವೆ ಸಿಕ್ಕಿ ಒದ್ದಾಡುವ ಪುರುಷನ ಗತಿ ದೇವರಿಗೇ ಪ್ರೀತಿ!

ಅತ್ತೆ-ಸೊಸೆಯ ಬಗ್ಗೆ ಅನೇಕ ಸಿನಿಮಾಗಳು ಬಂದಿವೆ, ಮೆಗಾ ಧಾರವಾಹಿಗಳೇ ಬಂದಿವೆ ಆದರೂ ಅತ್ತೆ ಸೊಸೆಯ ಶೀತಲ ಸಮರ ಮಾತ್ರ ಕೊನೆಗೊಂಡಿಲ್ಲ. ಈ ರೀತಿಯ ಅತ್ತೆ-ಸೊಸೆಯ ಜಗಳ ಸಮಾಜದ ಎಲ್ಲಾ ವರ್ಗದವರಲ್ಲೂ ಕಂಡು ಬರುತ್ತದೆ. ಅತ್ತೆ-ಸೊಸೆಯ ವೈರಿಯ ಸಂಬಂಧ ಬೆಳೆಯಲು ಕಾರಣ ಅತ್ತೆಯ ಮಗ, ಸೊಸೆಯ ಗಂಡನಾಗಿರುವ ಆ ಬಡಪಾಯಿ ಪುರುಷನೇ ಎಂದರೆ ಸ್ವಲ್ಪ ಆಶ್ಚರ್ಯ ಅನಿಸಬಹುದಲ್ಲವೇ?

ಹೌದು ತಾಯಿಯೂ ಮಗನನ್ನು ಕಷ್ಟಪಟ್ಟು ಬೆಳೆಸಿರುತ್ತಾಳೆ. ಮಗನೂ ಪ್ರತಿಯೊಂದು ವಿಷಯಕ್ಕೂ ಅಮ್ಮನನ್ನು ಅವಲಂಬಿಸಿರುತ್ತಾನೆ. ಬೆಳೆದು ದೊಡ್ಡವನಾಗಿ ಮದುವೆಯಾದ ನಂತರ ತನ್ನ ಸುಖ-ದುಃಖಗಳನ್ನು ಹೆಂಡತಿಯ ಬಳಿ ಹಂಚಿಕೊಳ್ಳಲಾರಂಭಿಸುತ್ತಾನೆ, ಅಮ್ಮನ ಬಳಿ ಹೇಳುವುದನ್ನು ಕಡಿಮೆ ಮಾಡುತ್ತಾನೆ. ಅಲ್ಲದೆ ತಾಯಿಗೆ ವಯಸ್ಸಾಗುತ್ತಾ ಬಂದಿರುತ್ತದೆ ತಾಯಿಯ ಬದಲು ಮನೆ ನಿರ್ವಹಣೆಯನ್ನು ಸೊಸೆ ಮಾಡಲಾರಂಬಿಸುತ್ತಾಳೆ. ಆಗ ಅತ್ತೆಯಾದವಳು ಸೊಸೆ ಬಂದ ಕಾರಣ ಈ ರೀತಿಯಾಯಿತು ಎಂದು ಯೋಚಿಸಿ ಅವಳನ್ನು ದ್ವೇಷಿಸಲಾರಂಭಿಸುತ್ತಾಳೆ.

ಇನ್ನು ಸೊಸೆಯೂ ಮದುವೆಯಾಗಿ ಗಂಡನ ಮನೆಗೆ ಬಂದ ತಕ್ಷಣ ಎಲ್ಲವೂ ನಾನು ಬಯಸಿದಂತೆ ಇರಬೇಕೆಂದು ಬಯಸುತ್ತಾಳೆ. ಒಂದು ವೇಳೆ ಅತ್ತೆ ಸೊಸೆಯ ತಪ್ಪುಗಳನ್ನು ಎತ್ತಿ ತೋರಿಸಿದರೆ, ಹೀಗೆ ಮಾಡಿದ್ದು ನನ್ನ ಒಳ್ಳೆಯದಕ್ಕೆ ಎಂದು ಭಾವಿಸದೇ ಅತ್ತೆ ನನ್ನ ಮೇಲೆ ದರ್ಬಾರು ಮಾಡುತ್ತಿದ್ದಾರೆ ಎಂದು ಅಪಾರ್ಥ ಕಲ್ಪಿಸಿಕೊಳ್ಳುತ್ತಾಳೆ. ಇಲ್ಲಿಗೆ ಅತ್ತೆ-ಸೊಸೆಯ ಕತೆ ಮುಗಿಯದ ಅಧ್ಯಾಯವಾಗುತ್ತದೆ.

ಅತ್ತೆ-ಸೊಸೆ ಆತ್ಮೀಯವಾಗಿ ಇರಬೇಕೆಂದರೆ ಸೊಸೆಯನ್ನು ಮಗಳಂತೆ ಅಲ್ಲ ಮಗಳಾಗಿಯೇ ಭಾವಿಸಬೇಕು, ಸೊಸೆ ಅಷ್ಟೆ ಅತ್ತೆಯನ್ನು ಅಮ್ಮನ ತರ ಅಲ್ಲ ಅಮ್ಮನಾಗಿಯೇ ಭಾವಿಸಬೇಕು. ಈ ರೀತಿ ನಡೆದುಕೊಂಡಿದ್ದೇ ಆದರೆ ಅತ್ತೆ-ಸೊಸೆ ಶತ್ರುಗಳ ರೀತಿ ಜೀವನ ನಡೆಸಬೇಕಾದ ಅಗತ್ಯ ಕಂಡು ಬರುವುದಿಲ್ಲ. ಇದಕ್ಕಾಗಿ ಅತ್ತೆ-ಸೊಸೆ ಇಬ್ಬರೂ ಮನಸ್ಸು ಮಾಡಬೇಕು.

ಅತ್ತೆ ಸೊಸೆ ಬಗ್ಗೆ ನಿಮಗೆ ಏನು ಅನಿಸುತ್ತದೆ ಎಂದು ನಮ್ಮೊಂದಿಗೆ ಹಂಚಿಕೊಳ್ಳಿ.