ಗಂಡನನ್ನು ಇತರರೊಡನೆ ಹೋಲಿಕೆ ಮಾಡಬೇಡಿ!

Relationship

oi-Reena

By Hema S

Updated: Friday, September 21, 2012, 14:21 [IST]

ಒಬ್ಬರೊಂದಿಗೆ ಮತ್ತೊಬ್ಬರನ್ನು ಹೋಲಿಕೆ ಮಾಡುವುದು ಮನುಷ್ಯರ ಗುಣ. ನಮ್ಮನ್ನು ನಾವೇ ಅದೆಷ್ಟೋ ಬಾರಿ ಹೋಲಿಕೆ ಮಾಡಿಕೊಳ್ಳುತ್ತೇವೆ. ನಮ್ಮ ಜೊತೆ ಓದಿದವರ ಜೊತೆ, ನಮ್ಮ ಸ್ನೇಹಿತರ ಜೊತೆ ಹೋಲಿಕೆ ಮಾಡಿಕೊಳ್ಳುತ್ತೇವೆ. ಅದೇ ಬೇರೆಯವರು ನಮ್ಮನ್ನು ಹೋಲಿಕೆ ಮಾಡಿದಾಗ ಮಾತ್ರ ಸಹಿಸಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಅದರಲ್ಲೂ ಪುರುಷರಿಗೆ ಹೆಂಡತಿ ತಮ್ಮನ್ನು ಈ ಕೆಳಗಿನವರ ಜೊತೆ ಹೋಲಿಕೆ ಮಾಡುವುದು ಸ್ವಲ್ಪವೂ ಇಷ್ಟವಾಗುವುದಿಲ್ಲ.

ಮಾವನ ಜೊತೆ: ಹೆಣ್ಣು ಮಕ್ಕಳಿಗೆ ಗಂಡನನ್ನು ತಮ್ಮ ಅಪ್ಪನ ಜೊತೆ ಹೋಲಿಕೆ ಮಾಡುವ ಗುಣ ಅಧಿಕವಿರುತ್ತದೆ. ಆದರೆ ಗಂಡನಿಗೆ ಈ ರೀತಿ ಹೋಲಿಕೆ ಮಾಡುವುದು ಸ್ವಲ್ಪವೂ ಇಷ್ಟವಿರುವುದಿಲ್ಲ. ನನ್ನ ಅಪ್ಪ ನನಗೆ ಸ್ವಲ್ಪ ಹುಷಾರಿಲ್ಲದಿದ್ದರೆ ಸಾಕು ತುಂಬಾ ಗಾಬರಿ ಬೀಳುತ್ತಿದ್ದರು, ನನ್ನ ಅಪ್ಪ ತುಂಬಾ ಅಸ್ತಿ ಮಾಡಿದ್ದಾರೆ ಹೀಗೆ ಪ್ರತಿಯೊಂದು ವಿಷಯಕ್ಕೂ ಗಂಡನನ್ನು ಅಪ್ಪನ ಜೊತೆ ಹೋಲಿಕೆ ಮಾಡುತ್ತಾ ಹೋದರೆ ಸಂಸಾರದಲ್ಲಿ ಕಲಹ ಉಂಟಾಗುವುದು.

ಗೆಳೆಯರ ಜೊತೆ ಹೋಲಿಕೆ: ಬೆಸ್ಟ್ ಫ್ರೆಂಡ್ ಇದ್ದು ಯಾವುದಾದರೂ ಒಂದು ಕಾರಣಕ್ಕೆ ನೀವು ನಿಮ್ಮ ಗಂಡನನ್ನು ಗೆಳೆಯನ ಜೊತೆ ಹೋಲಿಕೆ ಮಾಡಿ ಹೇಳಿದರೆ ಅವರಿಗೆ ಇಷ್ಟವಾಗುವುದಿಲ್ಲ.

ಗಂಡನ ಗೆಳೆಯರ ಜೊತೆ ಹೋಲಿಕೆ ಮಾಡುವುದು: ಗಂಡನ ಗೆಳೆಯರ ಬಗ್ಗೆ ಹೇಳುತ್ತಾ ನಿಮ್ಮ ಗೆಳಯ ತುಂಬಾ ಸಂಪಾದಿಸಿದ್ದಾನೆ, ನೀವು ಏನು ಮಾಡಿದ್ದೀರಿ? ಹೀಗೆ ಅವರ ಗೆಳೆಯರ ಜೊತೆ ಹೋಲಿಕೆ ಮಾಡಿದರೆ ನೀವು ಅವರನ್ನು ಅಪಮಾನಿಸುತ್ತಿದ್ದೀರ ಎಂದು ಭಾವಿಸುತ್ತಾರೆ. ನಿಮ್ಮ ಸಂಸರದಲ್ಲಿ ಸುಮ್ಮನೆ ಕಲಹ ಬರುವುದು ಬೇಡ ಎಂದು ಬಯಸುವುದಾದರೆ ನಿಮ್ಮ ಗಂಡನನ್ನು ಇತರರೊಡನೆ ಹೋಲಿಕೆ ಮಾಡದಿರುವುದು ಒಳ್ಳೆಯದು.

ಒಬ್ಬರು ಮತ್ತೊಬ್ಬರಂತೆ ಇರುವುದಿಲ್ಲ, ಆದ್ದರಿಂದ ಒಬ್ಬರಲ್ಲಿ ಕಂಡ ಗುಣವನ್ನು ಮತ್ತೊಬ್ಬರಲ್ಲಿ ಬಯಸುವುದು ಕೂಡ ತಪ್ಪು. ಅಲ್ಲದೆ ಈ ರೀತಿ ಹೋಲಿಕೆ ಮಾಡುತ್ತಿದ್ದರೆ ಸಂಬಂಧ ಹಾಳಾಗುತ್ತದೆ, ನೋವು ಹೆಚ್ಚಾಗುತ್ತದೆ ಆದ್ದರಿಂದ ಹೋಲಿಕೆಯಿಂದ ಗುಣ ಸಿಗುವುದಾದರೆ ಮಾತ್ರ ಹೋಲಿಕೆ ಮಾಡಬೇಕು, ಇಲ್ಲದಿದ್ದರೆ ಮಾಡಲು ಹೋಗಬಾರದು.