ಮಧುರ ಸಂಬಂಧಕ್ಕಾಗಿ ಇಡಬೇಕಾದ ಪುಟ್ಟ ಹೆಜ್ಜೆಗಳು

Relationship

oi-Staff

By Super

Updated: Monday, October 12, 2015, 12:47 [IST]

ಪರಸ್ಪರ ಅವಲಂಬನೆ ಮತ್ತು ನಂಬಿಕೆ ದಂಪತಿಗಳ ನಡುವೆ ಇರಬೇಕಾದ ಪ್ರಮುಖವಾದ ಅಂಶ. ಯಾವಾಗ ನಂಬಿಕೆ ಇರುವುದಿಲ್ಲವೊ ಅಲ್ಲಿ ಪ್ರೀತಿ ಉಳಿಯಲು ಸಾಧ್ಯವೆ ಇಲ್ಲ. ಈಗೆಲ್ಲಾ ಎಷ್ಟೊ ಸಂಬಂಧಗಳು ಮುರಿದು ಬೀಳುತ್ತವೆ, ವಿಚ್ಛೇದನ ಜಾಸ್ತಿಯಾಗುತ್ತದೆ, ಹೀಗಾಗಲು ಪ್ರಮುಖ ಕಾರಣ ನಂಬಿಕೆ ಇಲ್ಲದಿರುವುದು.

ಮಧುರ ದಾಂಪತ್ಯಕ್ಕಾಗಿ ಪರಸ್ಪರ ನಂಬಿಕೆ ಬೆಳೆಯಬೇಕು, ಸಂಬಂಧಗಳು ಮತ್ತಷ್ಟು ಗಟ್ಟಿಯಾಗಬೇಕೆಂದು ನೀವು ಬಯಸುವುದಾದರೆ ಈ ಕೆಳಗಿನ ಗುಣಗಳನ್ನು ಮೈಗೂಡಿಸಿಕೊಳ್ಳುವುದು ಒಳ್ಳೆಯದು.

1. ಆತ್ಮವಿಶ್ವಾಸ: ಮೊದಲು ನೀವು ನಿಮ್ಮ ಬಗ್ಗೆ ಆತ್ಮವಿಶ್ವಾಸ ಹೊಂದಿರಬೇಕು. ಒಂದು ವೇಳೆ ನಿಮಗೆ ಆತ್ಮವಿಶ್ವಾಸವಿಲ್ಲವೆಂದರೆ ಇತರರನ್ನು ನಂಬಲು ಸಾಧ್ಯವಾಗುವುದಿಲ್ಲ.

2. ಪರಸ್ಪರ ಮನಸ್ಸು ಬಿಚ್ಚಿ ಮಾತನಾಡುವುದು, ಹಿಂದಿನ ಅನುಭವ ಮತ್ತು ನೆನಪುಗಳನ್ನು ಹಂಚಿಕೊಳ್ಳುವುದು, ಮುಂದಿನ ಭವಿಷ್ಯದ ಬಗ್ಗೆ ಮಾತನಾಡಿ ನಿರ್ಧಾರಗಳನ್ನು ಕೈಗೊಳ್ಳುವುದು ಇವೆಲ್ಲಾ ಸಂಬಂಧಗಳನ್ನು ಗಟ್ಟಿಯಾಗಿಸುವುದು.

3. ಬಾಳ ಸಂಗಾತಿಯ ಮೂಡ್ ಸರಿಯಾಗಿಲ್ಲದಿದ್ದ ಸಮಯದಲ್ಲಿ ಹೋಗಿ ಏನಾದರೂ ಮಾತನಾಡಿದರೆ ಮಾತಿಗೆ ಮಾತು ಬೆಳೆದು, ಜಗಳ ಉಂಟಾಗುವುದು. ಅದರ ಬದಲು ಅವರ ಕೋಪ ತಣಿದ ಮೇಲೆ ನಿಮ್ಮ ಅಭಿಪ್ರಾಯವನ್ನು ಹೇಳುವುದು ಒಳ್ಳೆಯದು.

4. ಯಾವುದೇ ವಿಷಯವಾಗಲಿ ಬಾಳ ಸಂಗಾತಿಯ ಜೊತೆ ಮುಚ್ಚುಮರೆಯಿಲ್ಲದೆ ಸತ್ಯವನ್ನು ಹೇಳಬೇಕು. ಒಮ್ಮೆ ನೀವು ಸುಳ್ಳು ಹೇಳಿ ಸಿಕ್ಕಿ ಬಿದ್ದರೆ ಮುಂದೆ ಅವರು ಯಾವುದೇ ವಿಷಯದಲ್ಲಿ ನಿಮ್ಮನ್ನು ನಂಬಲು ತಯಾರಿರುವುದಿಲ್ಲ ಎಂಬುದು ನೆನಪಿರಲಿ!

5. ನಿಮ್ಮ ಅನಿಸಿಕೆಗಳು, ಅಭಿಪ್ರಾಯಗಳು, ಆಸೆಗಳು ಎಲ್ಲವನ್ನು ಮುಕ್ತವಾಗಿ ಬಾಳಸಂಗಾತಿ ಜೊತೆ ಹೇಳಿಕೊಳ್ಳಬೇಕು. ಹೇಳದೆ ಬಾಯಿಗೆ ಬೀಗ ಹಾಕಿಕೊಂಡರೆ ಭಿನ್ನಾಭಿಪ್ರಾಯಗಳು ಹೆಚ್ಚಾಗುತ್ತವೆ. ಯಾವುದೇ ವಿಷಯವನ್ನು ಶಾಂತವಾಗಿ ಮತ್ತು ಫ್ರೌಢತೆಯಿಂದ ವ್ಯವಹರಿಸಬೇಕು.

ಈ ರೀತಿ ಮಾಡಿದ್ದೇ ಆದರೆ ನಿಮ್ಮ ಬಾಳ ಸಂಗಾತಿ ನಿಮ್ಮ ನಂಬಿಕೆಗೆ ಅರ್ಹರಾಗಿದ್ದಾರೆಯೆ ಎಂಬ ವಿಷಯ ಮನದಟ್ಟಾಗುತ್ತದೆ.