ಭಾವೀ ಪತಿಯಲ್ಲಿ ಕೇಳಲೇಬೇಕಾದ 5 ಪ್ರಶ್ನೆಗಳು

Relationship

oi-Reena

By Hema S

Published: Saturday, April 21, 2012, 17:52 [IST]

ಮದುವೆಯಾಗುವುದು ಅಂದರೆ ಆಟದ ವಿಷಯವಲ್ಲ, ಅದರಲ್ಲಿ ನಮ್ಮ ಭವಿಷ್ಯವಿರುತ್ತದೆ. ಸಂಸಾರ ಬದುಕಿನ ಬಗ್ಗೆ ಸ್ಪಷ್ಟವಾದ ನಿಲುವು ಇರಬೇಕು. ಆದ್ದರಿಂದ ಭವಷ್ಯದ ಬಗ್ಗೆ ಕೆಲವೊಂದು ನಿರ್ಧಾರಗಳನ್ನು ಮದುವೆಗೆ ಮುಂಚೆ ತೆಗೆದುಕೊಳ್ಳಬೇಕು. ಇಲ್ಲದಿದ್ದರೆ ಮುಂದಕ್ಕೆ ಸಮಸ್ಯೆಗಳು ತಲೆದೋರಬಹುದು. ಅದಕ್ಕಾಗಿ ಯಾವುದೇ ಸಂಕೋಚ ಪಡಬೇಕಾಗಿಲ್ಲ. ಏಕೆಂದರೆ ನಿಮ್ಮ ಭವಿಷ್ಯ ಬಗ್ಗೆ ನಿರ್ಧಾರವನ್ನು ಕೈಗೊಳ್ಳುವ ಹಕ್ಕು ನಿಮಗಿದೆ. ಮೌನ ಸಮ್ಮತಿ ಲಕ್ಷಣಂ ಅಂತ ಸುಮ್ಮನಿದ್ದರೆ ಮುಂದೆ ಜೀವನದಲ್ಲಿ ಕಷ್ಟ ಬಂದಾಗ ಬೊಬ್ಬೆ ಹೊಡೆದು ಯಾವುದೇ ಪ್ರಯೋಜನವಿಲ್ಲ. ಆದ್ದರಿಂದ ನಿಮ್ಮ ಭಾವೀ ಪತಿಯಲ್ಲಿ ಈ ಕೆಳಗಿನ ಪ್ರಶ್ನೆಗಳನ್ನು ಕೇಳುವುದು ಒಳ್ಳೆಯದು.

1. ಭವಿಷ್ಯದ ಬಗ್ಗೆ ಸದ್ಯಕ್ಕೆ ನಿಮ್ಮ ಪ್ಲಾನ್ ಏನು?
ಈ ರೀತಿ ಪ್ರಶ್ನಿಸಿದಾಗ ಭವಿಷ್ಯದಲ್ಲಿ ಮುಂದೆ ಅವರು ಏನಾಗಬೇಕೆಂದು ಬಯಸುತ್ತಿದ್ದಾರೆ ಅನ್ನುವುದು ನಿಮಗೆ ಸ್ಪಷ್ಟವಾಗುತ್ತದೆ. ಆದರೆ ಈ ಪ್ರಶ್ನೆಯನ್ನು ಕೇಳುವಾಗ ಸಂದರ್ಶನದಲ್ಲಿ ಕೇಳುವ ರೀತಿ ಕೇಳದೆ ಸುಮ್ಮನೆ ಮಾತನಾಡುತ್ತಾ ಕೇಳಿ ತಿಳಿದುಕೊಳ್ಳಬೇಕು.

2. ಮುಂದೆ ಏನು ಮಾಡಬೇಕೆಂದು ಇದ್ದೀರಾ?
ಭವಿಷ್ಯದ ಬಗ್ಗೆ ಹೆಚ್ಚಿನ ಕಾಳಜಿ ಇರುವವರು ದೊಡ್ಡ-ದೊಡ್ಡ ಕನಸುಗಳನ್ನು ಹೊಂದಿರುತ್ತಾರೆ. ಅದಕ್ಕಾಗಿ ಈಗ ಯೊಜನೆಗಳನ್ನು ರೂಪಿಸಿರುತ್ತಾರೆ. ಅದರ ಬಗ್ಗೆ ಕೇಳಿ ತಿಳಿದುಕೊಳ್ಳುವುದು ಒಳ್ಳೆಯದು. ಮುಂದೆ ಏನಾದರೂ ಆಗ ಬೇಕೆಂದು ಬಯಸುವವರು ಜೀವನದಲ್ಲಿ ನಿರ್ಧಿಷ್ಟವಾದ ಗುರಿ ಹೊದಿರುತ್ತಾರೆ. ಭವಿಷ್ಯದ ಬಗ್ಗೆ ಚಿಂತೆ ಮಾಡದವರಾದರೆ ಅಂತಹವರು ಜವಬ್ದಾರಿಯಿಂದ ನುಣುಚಿಕೊಳ್ಳುವ ಗುಣ ಹೊಂದಿರುತ್ತಾರೆ. ಆದ್ದರಿಂದ ನಿಮ್ಮ ಭವಿಷ್ಯ ಉತ್ತಮವಾಗಿರಬೇಕಾದರೆ ಜವಬ್ದಾರಿ ಇರುವ ಹುಡುಗನಾಗಿರಬೇಕು.

3. ಸಂಬಂಧದ ಬಗ್ಗೆ ನಿಮ್ಮ ಅಭಿಪ್ರಾಯ ಏನು?
ಮದುವೆ ಮೊದಲು ಇದನ್ನು ಕೇಳಿ ಸ್ಪಷ್ಟ ಪಡಿಸಿಕೊಳ್ಳಬೇಕು. ಏಕೆಂದರೆ ಹೆಣ್ಣು ಮದುವೆಯಾದ ಮೇಲೆ ಗಂಡನ ಮನೆಯ ಏಳಿಗೆಯ ಬಗ್ಗೆ ಚಿಂತಿಸಬೇಕು ನಿಜ. ಆದರೆ ಕೆಲವೊಮ್ಮೆ ಒಬ್ಬಳೆ ಮಗಳಾಗಿದ್ದರೆ ನಿಮ್ಮ ಪೋಷಕರನ್ನು ನೀವೆ ನೋಡಿ ಕೊಳ್ಳಬೇಕಾಗುತ್ತದೆ. ಆದರೆ ಕೆಲವರು ಮದುವೆಯ ನಂತರ ಹೆಂಡತಿಯ ಪೋಷಕರನ್ನು ನೋಡಿಕೊಳ್ಳಲು ತಕರಾರು ತೆಗೆಯಬಹುದು. ಆದ್ದರಿಂದ ಇಂತಹ ವಿಷಯಗಳ ಬಗ್ಗೆ ಮದುವೆಯ ಮೊದಲೆ ಮಾತನಾಡಿ ಸ್ಪಷ್ಟ ನಿರ್ಧಾರ ತೆಗೆದುಕೊಳ್ಳಬೇಕು.

4. ನನ್ನ ಬಗ್ಗೆ ನಿಮ್ಮ ಅಭಿಪ್ರಾಯವೇನು?
ಕೆಲವೊಮ್ಮೆ ಹುಡುಗರು ಬೇರೆ ಹುಡುಗಿ ಮನಸ್ಸಿನಲ್ಲಿದ್ದು ಮನೆಯವರ ಬಲವಂತಕ್ಕೆ ಮದುವೆಯಾಗ ಬಂದಿರುತ್ತಾರೆ. ಆದ್ದರಿಂದ ಹುಡುಗನಿಗೆ ನೀವು ಇಷ್ಟವಾಗಿದೆಯೆ ಎಂಬುದನ್ನು ಸ್ಪಷ್ಟವಾಗಿ ಕೇಳಿ ತಿಳಿದುಕೊಳ್ಳಬೇಕು. ಇಲ್ಲದಿದ್ದರೆ ಮುಂದೆ ಕಷ್ಟಪಡಬೇಕಾದೀತು.

5. ನಾನು ಹೇಗಿರಬೇಕೆಂದು ನೀವು ಬಯಸುತ್ತೀರಾ?
ಈ ಪ್ರಶ್ನೆಯನ್ನು ತಪ್ಪದೆ ಕೇಳಬೇಕು. ಏಕೆಂದರೆ ಪ್ರತಿಯೊಬ್ಬ ಹುಡುಗನಿಗೆ ತನ್ನ ಹುಡುಗಿ ಹೀಗಿರಬೇಕೆಂಬ ನಿಲುವು ಇರುತ್ತದೆ. ಮದುವೆಯ ನಂತರ ಒಂದು ವೇಳೆ ಆ ನಿಲುವುಗಳು ನಿಮಗೆ ಹೊಂದಾಣಿಕೆಯಾಗದಿದ್ದರೆ ದಾಂಪತ್ಯ ಜೀವನದಲ್ಲಿ ಸಮಸ್ಯೆ ತಲೆದೋರಬಹುದು.
ಉದಾಹರಣೆಗೆ: ನೀವು ಉದ್ಯೋಗ ಮಾಡಲು ಇಷ್ಟಪಡುವವರಾಗಿದ್ದು ನಿಮ್ಮ ಹುಡುಗನಿಗೆ ಕೆಲಸಕ್ಕೆ ಹೋಗಲು ಇಷ್ಟವಿಲ್ಲದಿದ್ದರೆ ಸಮಸ್ಯೆ ತಲೆದೋರುತ್ತದೆ. ಆದ್ದರಿಂದ ಮದುವೆಗೆ ಮೊದಲು ಹುಡುಗ ಮತ್ತು ಹುಡುಗಿ ತಮ್ಮ ಭವಿಷ್ಯದ ಕುರಿತು ನಿರ್ಧರಿಸುವುದು ಒಳ್ಳೆಯದು.