ಮುದ್ದಿನ ಪತ್ನಿಯಾಗಲು ಇರಲೇಬೇಕಾದ ಗುಣಗಳಿವು

Relationship

oi-Reena

By Hema S

Published: Tuesday, March 27, 2012, 12:04 [IST]

ಮದುವೆಯಾದ ಮೇಲೆ ಗಂಡ ನನ್ನನ್ನು ಪ್ರೀತಿಸಬೇಕು, ನನಗೆ ರಕ್ಷಣೆ ಕೊಡಬೇಕೆಂದು ಹೆಣ್ಣು ಬಯಸುವುದು ಸಹಜ. ಅದೇ ರೀತಿ ಗಂಡನಾದವನು ಹೆಂಡತಿ ಹತ್ತಿರ ಏನನ್ನು ಬಯಸುತ್ತಾನೆ ಎನ್ನುವುದನ್ನು ಮಹಿಳೆಯರು ತಿಳಿದುಕೊಂಡರೆ ಸುಖಮಯವಾದ ದಾಂಪತ್ಯ ಜೀವನ ನಡೆಸಬಹುದು.

ಹೆಣ್ಣು ಮದುವೆಯಾಗಿ ಗಂಡನ ಮನೆಗೆ ಬರುವಾಗ ನೂರಾರು ಕನಸುಗಳ ಜೊತೆ ಬರುತ್ತಾಳೆ, ಅದೇ ರೀತಿ ಗಂಡನಾದವನು ತನ್ನ ಹೆಂಡತಿ ಬಗ್ಗೆ ಸಾಕಷ್ಟು ಕನಸ್ಸು ಕಂಡಿರುತ್ತಾನೆ. ಅದರಲ್ಲೂ ಗಂಡಸಿಗೆ ತನ್ನ ಹೆಂಡತಿಯಾದವಳ ಹತ್ತಿರ ಈ ಕೆಳಗಿನ ಗುಣಗಳಿದ್ದರೆ ಅವಳು ಅವನ ಮುದ್ದಿನ ಮಡದಿಯಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ.

1. ಆತ್ಮವಿಶ್ವಾಸವಿರಬೇಕು: ಆತ್ಮವಿಶ್ವಾಸ ಹೊಂದಿರುವ ಮಡದಿಯೆಂದರೆ ಗಂಡಸರಿಗೆ ಇಷ್ಟವಾಗುತ್ತದೆ. ಸ್ವ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಾಮರ್ಥ್ಯ, ಸಂಸಾರವನ್ನು ನಿಭಾಯಿಸಿಕೊಂಡು ಹೋಗುವ ಸಾಮರ್ಥ್ಯ ಹೊಂದಿರಬೇಕು. ಎಲ್ಲದಕ್ಕೂ ಗಂಡನನ್ನೆ ಅವಲಂಭಿಸಿದರೆ ಅವನಿಗೆ ಜವಾಬ್ದಾರಿ ಹೆಚ್ಚಾಗುವುದು, ಅವನ ಆತ್ಮವಿಶ್ವಾಸ ಕೂಡ ಕುಂದುವುದು.

2. ಒಳ್ಳೆಯ ಸಲಹೆ: ಹೆಂಡತಿ ಕೊಡುವ ಮಾರ್ಗದರ್ಶನಗಳು ಒಳ್ಳೆಯದಾಗಿದ್ದರೆ ಗಂಡನಿಗೆ ಇಷ್ಟವಾಗುತ್ತದೆ. ಗಂಡನಿಗೆ ಸಲಹೆಗಳನ್ನು ಕೊಡುವಾಗ ವಿವೇಚನೆಯನ್ನು ಉಪಯೋಗಿಸಬೇಕು. ಇಲ್ಲದಿದ್ದರೆ ನೀವು ಕೊಡುವ ಸಲಹೆಗಳೇ ಅವರಿಗೆ ಕಿರಿಕಿರಿ ತರಬಹುದು.

3. ದಾಂಪತ್ಯ ಸುಖ: ಪ್ರತಿಯೊಬ್ಬ ಗಂಡಸು ಹೆಂಡತಿಯಾದವಳು ತನ್ನ ದೈಹಿಕ ಆಸೆಗಳನ್ನು ಪೂರೈಸುವಂತಳಾಗಿರಬೇಕು ಎಂದು ಬಯಸುತ್ತಾನೆ. ದೈಹಿಕ ತೃಪ್ತಿ, ಪ್ರೀತಿ ತನ್ನ ಹೆಂಡತಿಯಿಂದ ದೊರಕಿದರೆ ಅವನು ಇತರ ಹೆಂಗಸಿನ ಕಡೆ ಆಸಕ್ತಿ ಬೆಳೆಸುವುದಿಲ್ಲ.

4. ಪ್ರೀತಿ: ಹೆಂಡತಿ ತನ್ನನ್ನು ತುಂಬಾ ಪ್ರೀತಿಸಬೇಕು. ತನ್ನ ಸುಖದಲ್ಲಿ ಮಾತ್ರವಲ್ಲ, ಕಷ್ಟದಲ್ಲೂ ಜೊತೆಯಲ್ಲಿದ್ದು ಅವನಿಗೆ ಬೆಂಬಲವನ್ನು ನೀಡಬೇಕೆಂದು ಬಯಸುತ್ತಾನೆ. ಮಕ್ಕಳಾದ ಮೇಲೆ ಮಕ್ಕಳನ್ನು ನೋಡಿಕೊಳ್ಳುವ ಬ್ಯೂಸಿಯಲ್ಲಿ ಗಂಡನ ಆರೈಕೆ ಮರೆಯಬಾರದು. ಗಂಡ ತನ್ನ ಹೆಂಡತಿ ತನ್ನನ್ನು ಮುದ್ದು ಮಾಡಬೇಕು, ಮಗುವಿನಂತೆಯೆ ನನ್ನನ್ನು ನೋಡಿಕೊಳ್ಳಬೇಕೆಂದು ಬಯಸುತ್ತಾನೆ.

5. ಗೆಳಯ: ಗಂಡನನ್ನು ಉತ್ತಮ ಗೆಳಯನಂತೆ ಕಾಣಬೇಕು. ಅವನತ್ತ ಯಾವುದೇ ಕಾರಣಕ್ಕೂ ನಿರ್ಲಕ್ಷ್ಯ ತೋರಬಾರದು. ಎಲ್ಲಾ ವಿಷಯಗಳನ್ನು ಮುಚ್ಚು ಮರೆಯಿಲ್ಲದೆ ಪರಸ್ಪರ ಹಂಚಿಕೊಳ್ಳಬೇಕು.

ಈ ಇಷ್ಟು ಗುಣಗಳು ಹೆಣ್ಣಿನಲ್ಲಿದ್ದರೆ ಎಂತಹ ಸ್ವಭಾವದ ಗಂಡನನ್ನು ಬೇಕಾದರೂ ಸರಿ ದಾರಿಗೆ ತಂದು, ಸಾಮರಸ್ಯದ ಸಂಸಾರ ನಡೆಸಬಹುದು.