ಹಸಿ ಬಟಾಣಿ ಬಳಸಿ ಈ ರೀತಿ ದಾಲ್ ಮಾಡಿ..! ರೊಟ್ಟಿ ಅಥವಾ ಅನ್ನದೊಂದಿಗೆ ತಿನ್ನಿ.. ಈ ರುಚಿಗೆ ಫಿದಾ ಆಗ್ತೀರಾ!

ರೊಟ್ಟಿ ಅಥವಾ ಅನ್ನದೊಂದಿಗೆ ಈ ದಾಲ್ ಸವಿಯಿರಿ! ರುಚಿ ನೋಡಿದವರು ಇದರ ರಹಸ್ಯ ಕೇಳೋದು ಗ್ಯಾರಂಟಿ. ಹೌದು, ಚಳಿಗಾಲದಲ್ಲಿ (Winter Special) ದೇಹಕ್ಕೆ ಉಷ್ಣತೆ ನೀಡುವಂತಹ, ಬಿಸಿ ಬಿಸಿಯಾದ ಆಹಾರ ಸೇವಿಸುವುದು ಆಹ್ಲಾದಕರ ಅನುಭವ ನೀಡುತ್ತದೆ. ಈ ಅವಧಿಯಲ್ಲಿ ಮಾರುಕಟ್ಟೆಯಲ್ಲಿ ತಾಜಾ ತರಕಾರಿಗಳು ಹೇರಳವಾಗಿ ಸಿಗುವುದರಿಂದ, ವಿಶಿಷ್ಟ ಹಾಗೂ ರುಚಿಕರ ಅಡುಗೆಗಳನ್ನು ಮಾಡಲು ಅವಕಾಶ ಇರುತ್ತದೆ. ಅಂತಹ ವಿಶಿಷ್ಟ ಖಾದ್ಯಗಳ ಸಾಲಿನಲ್ಲಿ ಹಸಿ ಬಟಾಣಿ (ಮಟರ್) ಬಳಸಿ ತಯಾರಿಸುವ ವಿಶೇಷ ದಾಲ್ (Matar Dal) ಕೂಡ ಸೇರಿದೆ.

ಅನ್ನ ಅಥವಾ ರೊಟ್ಟಿಯೊಂದಿಗೆ ಅತ್ಯಂತ ರುಚಿಕರವಾಗಿ ಸವಿಯಬಹುದಾದ ಈ ಮಟರ್ ದಾಲ್, ನಿಮ್ಮ ಕುಟುಂಬ ಸದಸ್ಯರು ಮತ್ತು ಅತಿಥಿಗಳನ್ನು ಖಂಡಿತವಾಗಿಯೂ ಮೆಚ್ಚಿಸುತ್ತದೆ. ಇದರ ಅದ್ಭುತ ರುಚಿಗೆ ಮಾರುಹೋಗಿ, ಪಾಕವಿಧಾನ ಕೇಳುವುದು ಖಚಿತ. ಈ ಲೇಖನದಲ್ಲಿ ಸುಲಭವಾಗಿ ತಯಾರಿಸಬಹುದಾದ ವಿಂಟರ್ ಸ್ಪೆಷಲ್ ಮಟರ್ ದಾಲ್ ರೆಸಿಪಿ (Matar Dal Recipe) ಬಗ್ಗೆ ತಿಳಿಸಲಾಗಿದೆ.

Photo Credit: ಸಂಗ್ರಹ ಚಿತ್ರ

ಮಟರ್ ದಾಲ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ತೊಗರಿ ಬೇಳೆ - 1 ಕಪ್
• ಹಸಿ ಬಟಾಣಿ - ಅರ್ಧ ಕಪ್
• ಸಣ್ಣಗೆ ಹೆಚ್ಚಿದ ಈರುಳ್ಳಿ - 1
• ದೊಡ್ಡ ಟೊಮೆಟೊ (ಕತ್ತರಿಸಿದ) - 1
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ - 1 ಚಮಚ
• ಹಸಿ ಮೆಣಸಿನಕಾಯಿ - 1-2
• ಅರಿಶಿನ ಪುಡಿ - ಅರ್ಧ ಚಮಚ
• ಕೆಂಪು ಮೆಣಸಿನ ಪುಡಿ - ಅರ್ಧ ಚಮಚ
• ಧನಿಯಾ ಪುಡಿ - 1 ಚಮಚ
• ಗರಂ ಮಸಾಲಾ - ಅರ್ಧ ಚಮಚ
• ಇಂಗು - 1 ಚಿಟಿಕೆ
• ಉಪ್ಪು - ರುಚಿಗೆ ತಕ್ಕಷ್ಟು
• ಎಣ್ಣೆ / ತುಪ್ಪ - 2 ಚಮಚ
• ಕೊತ್ತಂಬರಿ ಸೊಪ್ಪು - ಸ್ವಲ್ಪ

ಮಟರ್ ದಾಲ್ ತಯಾರಿಸುವ ವಿಧಾನ

- ಮೊದಲಿಗೆ, ತೊಗರಿ ಬೇಳೆಯನ್ನು ಚೆನ್ನಾಗಿ ತೊಳೆದು ಕುಕ್ಕರ್‌ಗೆ ಸೇರಿಸಿ. ಅದಕ್ಕೆ 2-3 ಕಪ್ ನೀರು, ಚಿಟಿಕೆ ಅರಿಶಿನ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ. ಬೇಳೆ ಸಂಪೂರ್ಣವಾಗಿ ಮೃದುವಾಗುವವರೆಗೆ 3-4 ಸಿಟಿ ಕೂಗಿಸಿ ಬೇಯಿಸಿ.

- ನಂತರ, ಒಂದು ಕಡಾಯಿಯಲ್ಲಿ ಎಣ್ಣೆ ಅಥವಾ ತುಪ್ಪ ಬಿಸಿ ಮಾಡಿ ಇಂಗು ಸೇರಿಸಿ. ಸಣ್ಣಗೆ ಹೆಚ್ಚಿದ ಈರುಳ್ಳಿಯನ್ನು ಕಂದು ಬಣ್ಣ ಬರುವವರೆಗೆ ಚೆನ್ನಾಗಿ ಹುರಿಯಿರಿ.

- ಈಗ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಗೂ ಹಸಿ ಮೆಣಸಿನಕಾಯಿ ಹಾಕಿ ಎರಡು ನಿಮಿಷ ಹುರಿದು, ಕತ್ತರಿಸಿದ ಟೊಮೆಟೊ ಸೇರಿಸಿ ಮೃದುವಾಗುವವರೆಗೆ ಬೇಯಿಸಿ.

- ಟೊಮೆಟೊ ಮೃದುಗೊಂಡ ನಂತರ, ಕೆಂಪು ಮೆಣಸಿನ ಪುಡಿ, ಧನಿಯಾ ಪುಡಿ ಹಾಗೂ ಗರಂ ಮಸಾಲಾ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಈ ಮಸಾಲೆಗೆ ಬೇಯಿಸಿದ ಬೇಳೆಯನ್ನು ಹಾಕಿ, 5-10 ನಿಮಿಷ ಮಧ್ಯಮ ಉರಿಯಲ್ಲಿ ಕುದಿಸಿ.

- ನಂತರ, ಹಸಿ ಬಟಾಣಿಗಳನ್ನು ದಾಲ್‌ಗೆ ಸೇರಿಸಿ. ಬಟಾಣಿ ಸಂಪೂರ್ಣವಾಗಿ ಮೃದುವಾಗುವವರೆಗೆ ಬೇಯಿಸಿ (ತಾಜಾ ಬಟಾಣಿ ಬೇಗ ಬೇಯುತ್ತದೆ).

- ದಾಲ್ ಸಂಪೂರ್ಣವಾಗಿ ತಯಾರಾದ ನಂತರ, ಒಲೆ ಆರಿಸಿ. ಮೇಲೆ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ. ಈಗ ನಿಮ್ಮ ವಿಂಟರ್ ಸ್ಪೆಷಲ್ ಬಿಸಿ ಬಿಸಿ ಮಟರ್ ದಾಲ್ ಬಡಿಸಲು ಸಿದ್ಧ.

- ಈ ವಿಂಟರ್ ಸ್ಪೆಷಲ್ ಮಟರ್ ದಾಲ್ (Winter Special Matar Dal) ಅನ್ನು ಬಿಸಿ ಬಿಸಿ ಅನ್ನ, ರೊಟ್ಟಿ ಅಥವಾ ಚಪಾತಿಯೊಂದಿಗೆ ಸವಿಯಿರಿ.